Aprann avek sa Bondye “ki donn rekonfor dan tou sityasyon”

1. Akoz nou devret rekonfort lezot?

NOU tou nou “sagrinen akoz bann diferan leprev.” Sa i fer ki parfwa nou bezwen rekonfor ek lankourazman. (1 Pyer 1:6) Zis parey nou apresye ler lezot i rekonfort nou, nou devret deswit pare pour rekonfort bann ki pe soufer. (Mat. 7:12) Zeova i sa “Bondye . . . ki donn rekonfor dan tou sityasyon” e i montre nou ki mannyer pour “rekonfort lezot dan tou sort kalite leprev.” Nou kapab swiv son legzanp par “rekonfort kanmarad.” (2 Kor. 1:3, 4; 1 Tesa. 4:18) Nou fer sa, pa akoz nou oblize fer li me akoz nou kontan nou bann frer ek ser. Dan sa lartik, nou pou vwar (1) ki sa mo rekonfor i vedir dan Labib, (2) ki mannyer nou kapab rekonfort lezot e (3) ki nou kapab fer ler nou bezwen rekonfor.

KI SA MO REKONFOR I VEDIR DAN LABIB?

2. Ki sa mo ki’n ganny tradwir “rekonfor” dan Labib, i kapab vedir?

² Dan Labib, sa mo Grek ki’n ganny tradwir “rekonfor” i kapab vedir diferan keksoz dapre konteks. I kapab vedir “ankouraz,” “persyad” oubyen “sipliy.” (Rom. 12:8; vwar not letid “encourages” dan nwtsty-E an Angle.) Sa mo i literalman vedir “apel en dimoun pour vin debout o bor ou.” Alor nou kapab imazin en dimoun ki taye pour al ed son zanmi ki pe soufer, pour donn li nenport led oubyen sipor ki i bezwen. Nenport led ki sa zanmi i donnen, a lafen dizour, sa enn ki ti pe soufer pou’n ganny batir e ankouraze.

3. Ki mannyer Barnabas in kit en bon legzanp konsernan rekonfort lezot? (Vwar portre.)

³ Annou vwar en legzanp dan Labib. En Kretyen ki ti apel Zozef, ti sitan annan sa abilite pour ankouraz e rekonfort lezot ki bann zapot ti apel li Barnabas, ki vedir “Garson Rekonfor.” (Akt 4:36) Sa non ti sitan dekrir sa kalite dimoun ki i ti ete, ki depi sa moman Labib pa zanmen apel li Zozef me i toultan ganny apele Barnabas. Plizyer fwa, Barnabas in montre ki i “Garson Rekonfor” par ed son bann frer ek ser ler zot dan bezwen. Par egzanp, pa bokou letan apre ki Sol ti’n vin en Kretyen, Sol ti al Zerizalenm e i ti anvi zwenn bann disip ki ti dan sa lavil. Me zot ti per parski zot ti konnen ki Sol ti’n persekit en kantite frer ek ser dan lepase. Me Barnabas ti annan konfyans dan Sol e i ti entrodwir li avek bann zapot.—Akt 9:26-28.

KI MANNYER NOU KAPAB REKONFORT LEZOT?

4. Ki enn bann pli bon fason nou rekonfort lezot? (Romen 1:11, 12)

⁴ Vizit zot si i posib. Zeova i servi son bann serviter pour rekonfort lezot. Par egzanp, ler profet Eliya ti dekouraze, Zeova ti servi en lanz pour ankouraz li. (1 Rwa. 19:4-7) Osi, zapot Pol ti anvi vizit son bann frer ek ser parski dan sa fason zot ti kapab ankouraz kanmarad. (Lir Romen 1:11, 12.) Ler ou vizit en dimoun, pas en pe letan avek li pour ou kapab ankouraz li. (1 Kor. 16:7) Me si ou pa kapab vizit en dimoun ki dan bezwen, ou ankor kapab ankouraz li par telefonn li, anvoy li en let, en kart oubyen en teks. Eski ou pou les Zeova servi ou pour rekonfort lezot?

5. Ki difikilte nou kapab ekspekte fer fas avek?

⁵ Anmezir ki bann dernyen zour i vin pli difisil, nou kapab ekspekte ki i pou vin deplizanpli difisil pour vizit nou bann frer ek ser pour ankouraz zot. Ler Pol ti dan prizon Ronm, Onezifor ki ti sorti Efez, ti rod Pol menm si i ti kapab ganny met dan prizon e menm ganny touye. (2 Tim. 1:16-18) Bann frer ek ser Larisi i fer menm parey ler zot bann frer ek ser i ganny persekite pour zot krwayans. Ler enn i ganny anmennen ankour, zot vin ankour pour siport sa frer oubyen sa ser menm si zot kapab ganny met dan prizon zot osi. Ki mannyer ou kapab prepare pour ou kapab swiv zot legzanp dan bann sityasyon koumsa? Petet ou kapab etidye lafason ki bann serviter Bondye dan lepase e dan nou letan in siport kanmarad e aprann ki zot in fer pour reste zwaye menm ler zot ti ganny persekite.

6. Ki mannyer nou kapab swiv legzanp Zeova anmezir ki nou rekonfort lezot? (Vwar portre.)

⁶ Ekout zot. Ler profet Eliya ti krwar ki son lavi ti an danze, i ti priy Zeova e dir li ki mannyer i ti pe santi. Menm si Zeova ti deza konnen kwa ki ti pe fatig Eliya, Zeova ti ekout son profet anmezir ki i ti eksprim son santiman. Zeova ti kontinyen ekout Eliya menm si Eliya ti dir menm keksoz plizyer fwa. (1 Rwa. 19:9, 10, 14) Zeova ti fer menm parey avek profet Abakouk. I ti les sa profet eksprim son bann santiman ek dout menm si Abakouk ti koz dan en fason ki ti kapab paret konmsi i ti pe kestyonn lotorite Bondye. (Aba. 1:2, 3) Ozordi, Zeova i ekout tou sa ki nou dir li dan lapriyer menm si i deza konnen ki nou bezwen. Nou kapab swiv legzanp Zeova par ekout nou bann frer ek ser atantivman e par demontre respe ler zot pe koze. Nou devret “pare pour ekoute” anmezir ki zot koze e pa enteronp zot oubyen ofanse si i paret ki zot in koz san reflesir oubyen si zot repet menm keksoz plizyer fwa.—Zak 1:19; Ekle. 7:9.

7. Ki mannyer nou kapab konpran ki en dimoun ki pe soufer i bezwen?

⁷ Esey konpran ki sa dimoun i bezwen. Nou pa konn sa ki i annan dan leker dimoun parey Zeova i konnen. Alor pour nou kapab konpran ki lezot i bezwen, nou bezwen ekout zot atantivman. Pa bezwen krwar ki ou konnen ki sa dimoun i bezwen zis akoz ou konnen ki ou, ou ti pou bezwen si ou ti dan en sityasyon koumsa. Nou tou nou diferan. Alor pran ou letan, ekout atantivman e avek labonte demann bann kestyon ki pou ed ou konnen ki i bezwen.—Prov. 20:5.

8. Ki mannyer Zezi ti rekonfort Mart ek Mari apre lanmor Lazar? (Vwar portre.)

⁸ Reflesir lo lafason ki Zezi ti rekonfort Mart ek Mari apre lanmor zot frer Lazar. Tou le de madanm ti’n pas dan menm sityasyon me Zezi ti rekonfort zot dan diferan fason. Apre ki Mart ti’n koz avek Zezi, Zezi ti koz avek li lo rezireksyon e ed li pour annan plis lafwa dan sa laverite. Me ler Mari ti vin kot Zezi an pleran, i paret ki Zezi pa ti koz avek li lo rezireksyon. O kontrer i ti plere ansanm avek li e demande kote zot ti’n anter Lazar. (Zan 11:20-35) Ki nou kapab aprann? Ler nou pe rekonfort bann ki pe soufer, nou bezwen konpran ki zot bezwen e pa esey rekonfort tou dimoun dan menm fason.

9. Ki mannyer nou kapab servi Labib pour rekonfort lezot? (Romen 15:4, 5)

⁹ Servi Labib. Ler ou partaz sa “rekonfor ki Lekritir i donn nou” avek en dimoun, sa i kapab ed li pour reganny lespwar. (Lir Romen 15:4, 5.) Sa lespwar i kapab rekonfort li plis e ankouraz li. (Iza. 40:31) Ki mannyer ou kapab trouv en verse Labib ki pou ankouraz en dimoun? Serten i gard en lalis bann verse ki zot al gete ler zot bezwen, parey bann verse ki ganny trouve anba topik “Rekonfor” dan sa liv Bann verse Labib pour nou lavi Kretyen. Demann Zeova pour ed ou servi son Parol dan sa pli bon fason pour ou kapab ankouraz lezot. Son lespri sen i kapab ed ou pour rapel bann verse rekonfortan ler ou bezwen.—Zan 14:26.

10. Akoz nou bezwen koz avek labonte ler nou pe esey ankouraz en dimoun?

¹⁰ Koz avek labonte. Sa mo ki’n ganny tradwir “rekonfor” i kapab osi ganny tradwir “persyad” oubyen “sipliy.” Parfwa ou kapab bezwen persyad oubyen sipliy sa dimoun ki ou pe rekonforte pour sanz son nide. Si i neseser pour fer sa, reflesir byen avan ou koze, pour ki ou parol i kapab fer sa dimoun santi li pli byen olye bles li. (Prov. 12:18) Zeova in kit en legzanp parfe lo ki mannyer pour fer sa ler i ti koz avek Eliya. Eliya ti krwar ki i ti sa sel dimoun Izrael ki ti pe servi Zeova e ki son travay konman profet Zeova ti anven. Avek labonte, Zeova ti ed Eliya sanz son fason panse san ki i ti dir li ki i ti mal. (1 Rwa. 19:15-18) Si ou reflesir avan ou koze e ou demontre labonte, ou osi ou pou kapab fer parey. Ler ou fer en diskour oubyen ou reponn pandan renyon, toultan koz avek labonte e dan en fason pozitif pour ki ou kapab ankouraz e batir ou bann frer ek ser.

11. Ki bann ki pe soufer i bezwen? (1 Zan 3:18)

¹¹ Ede dan bann fason pratik. Souvandfwa, bann ki pe soufer i bezwen plis ki bann parol rekonfortan. (Lir 1 Zan 3:18.) Barnabas in kit en bon legzanp pour nou. I ti vann en bout later e donn sa larzan pour siport bann Kretyen ki ti fek batize ki ti dan bezwen. (Akt 4:36, 37) En kantite Kretyen ozordi i swiv son legzanp par ed bann ki dan bezwen dan en fason pratik. Gabriela, ki reste Lapolonny, ti vreman sagren e enkyet ler linondasyon ti andomaz son lakour. I dir: “Mon ti vreman per e enkyet. Mon paran ki reste avek mwan ti santi parey. Mon pa ti konnen ki mannyer mon ti pou fer fas avek sa sityasyon. Me bann frer dan en kongregasyon ki pa tro lwen, ti vin kot mwan e dan zis en zour, zot ti fer en kantite bann travay reparasyon. Sa leksperyans in fer mwan annan plis konfyans ki Zeova pe gid son pep pour rekonfort bann ki pe soufer.”

12. Ki mannyer ler ou andire e reste fidel avek Zeova, sa i kapab ed ou bann frer ek ser?

¹² Andire e reste fidel avek Zeova. Pol ti dir bann Kretyen Tesalonik ki ler i ti aprann ki zot ti pe andire e reste fidel malgre zot ti pe ganny persekite, sa ti rekonfort li e donn li lafors. I ti konnen ki sa travay ki i ti’n fer parmi zot, pa ti anven. (1 Tesa. 3:5-8) An retour, Pol ti swete ki son fidelite e lefet ki i ti pe lite pour zot, ti pou rekonfort son bann frer ek ser, menm bann ki pa ti’n rankontre li personnelman. (Kol. 2:1, 2) Pareyman, ler nou bann frer ek ser i vwar lafason ki Zeova pe ed nou andire e reste fidel, sa i kapab vreman ankouraz zot.

13. Ki nou bezwen kontinyen fer anmezir ki nou ankouraz lezot?

¹³ Annan pasyans. I kapab ki bann frer ek ser ki dekouraze pa santi zot byen deswit apre ki ou’n esey rekonfort zot. Labib i dir ki nou bezwen “kontinyen ankouraz kanmarad.” Sa i vedir ki nou bezwen fer sa ankor e ankor. (1 Tesa. 5:11) Alor, anmezir ki ou kontinyen konsol e rekonfort bann ki bezwen sipor, annan pasyans. (1 Tesa. 5:14) Byensir, parfwa nou tou nou bezwen rekonfor. Ki nou kapab fer ler sa arive?

LER OU BEZWEN REKONFOR

14-15. Ki nou devret fer ler nou santi nou enkyet oubyen sagren?

¹⁴ Priy Zeova. Demann li pour rekonfort ou ler ou enkyet oubyen sagren. (Ps. 94:19) Devid ou leker avek li e dir li tou sa ki ou pe santi. (Ps. 62:8) Menm si Zeova i deza konnen ki mannyer ou santi avan ki ou priye, ler ou dir li sa ki ou pe vreman santi, sa i montre ki ou annan konfyans ki i kontan ou e ki i pe ekout ou lapriyer. Zeova i toultan reponn lapriyer bann ki annan lafwa dan li menm si i kapab ki i pa reponn dan sa fason ki sa dimoun pe ekspekte. (Mark 11:24) Filipyen 4:6, 7 i dir nou: “Fer Bondye konn zot bann demann dan lapriyer . . . e ki lape Bondye ki depas tou sa ki nou kapab konpran i protez zot leker ek lespri.”

¹⁵ Rod led avek lezot. Koz avek en zanmi oubyen en ansyen ki ou annan konfyans ladan konsernan lafason ki ou pe santi. Ou bann frer ek ser i kapab vin en sours rekonfor me i kapab ki zot pa konnen ki mannyer ou pe santi oubyen ki ou bezwen. Alor koz avek zot lo la. (Prov. 14:10) Ou kapab demann zot pour ekout ou anmezir ki ou koz lo ou santiman oubyen pour partaz en verse ouswa en lartik ki zot in vwar rekonfortan avek ou.

16. Ki i kapab arive ler lezot i esey ankouraz ou me ki ou devret gard antet?

¹⁶ Annan pasyans e pardonnen. I kapab ki ou bann frer ek ser i fer fot pandan ki zot pe esey ankouraz ou. Par egzanp, i kapab ki zot dir oubyen fer en keksoz ki fer ou santi ou pli pir olye pli byen. Si sa i arive, annan pasyans avek zot. (1 Kor. 13:4, 7) Gard antet bann parol ki’n ganny ekrir dan Zak 3:2: “Si en dimoun pa zanmen fer okenn fot ler i koze, i en dimoun parfe.” Konsantre lo lefet ki ou bann frer ek ser i anvi ed ou. Gard antet ki “vreman, lespri i anvi fer sa ki byen, me lekor enparfe i feb.”—Mat. 26:41.

17. Ki nou devret determinen pour fer?

¹⁷ Nou tou nou bezwen rekonfor ek lankourazman. Nou pou bezwen sa plis ankor anmezir ki bann dernyen zour i vin pli difisil e ki bann lennmi Bondye i vin pli ankoler e zot opoz nou plis ankor. Alor annou determinen pour fer tou sa ki nou kapab pour rekonfort kanmarad.