Kontinyen annan en bon lanmitye avek ou konzwen

1. Akoz bann bon zanmi i en kado sorti kot Zeova?

BANN bon zanmi i en kado sorti kot Zeova. (Zak 1:17) Zot kontan Bondye e zot kontan nou. Zot zwaye ler nou zwaye, zot rekonfort nou ler nou sagren e ler nou bezwen konsey, zot donn nou bann konsey fran. Zot fidel avek nou e nou kapab annan konfyans dan zot. Bann zanmi koumsa i “fer leker kontan.”—Prov. 27:9.

2. Akoz i enportan pour en koup ki’n marye kontinyen annan en bon lanmitye avek kanmarad? (Matye 19:6)

² I enportan ki en msye ek son madanm i de bon zanmi. Zot devret rapel ki zot bezwen fer zefor pour reste de zanmi ki pros. Si zot negliz zot lanmitye, zot kapab konmans santi zot tousel, zot fristre e menm ankoler. Me si zot kontinyen fer zefor pour vin pli pros, zot pou annan sa pli bon lanmitye ki de dimoun i kapab annan. (Lir Matye 19:6.) Dan sa lartik, nou pou vwar ki mannyer bann koup ki’n marye i kapab kontinyen annan en bon lanmitye avek kanmarad. Me premyerman, annou vwar ki mannyer en Kretyen ki selibater i kapab swazir en konzwen ki pou vin son pli bon zanmi pour lavi.

KI MANNYER OU KAPAB SWAZIR EN KONZWEN KI POU VIN OU PLI BON ZANMI POUR LAVI?

3-4. Kwa ki pou ed en dimoun pour trouv en bon konzwen? (Proverb 18:22)

³ Avan ki nou fer nenport gro desizyon, nou bezwen reflesir lo bann risk, bann byenfe e lo sa ki kapab arive. Bann gro desizyon i kapab annan en lefe lo nou lavi pour en kantite letan, alor nou bezwen reflesir byen avan ki nou fer en desizyon.

⁴ Ler nou pe swazir en dimoun pour vin nou zanmi pour lavi setadir pour vin nou konzwen, nou pe fer enn bann desizyon pli enportan ki nou pou fer dan nou lavi. Vi ki Zeova ki’n kree sa laranzman maryaz, i fer sans ki nou rod son gidans ler nou pe swazir en konzwen. I anvi ki en msye i trouv en bon madanm e I anvi ki en madanm i trouv en bon msye. Zeova i toultan konnen kwa ki pli bon nou. (Lir Proverb 18:22; Iza. 48:17, 18) Bann prensip ki dan Parol Bondye i kapab ed en Kretyen pour trouv en dimoun ki pou vin en bon konzwen pour li.

5. Akoz i enportan pour ou swazir en dimoun ki’n batize konman en konzwen?

⁵ Ler nou batize, nou vin bann zanmi Bondye. (Ps. 25:14) Alor si ou ti pou kontan marye, ou devret swazir en dimoun ki deza en zanmi Zeova. (1 Kor. 7:39) Ler ou fer sa, ou montre ki ou apresye bann standar Zeova e ou pou vwar ou konzwen konman en benediksyon sorti kot Zeova. (Prov. 19:14) Osi, ou pa pou ganny bann problenm ki vin avek ler en serviter Zeova i marye avek en dimoun ki pa servi Zeova. (2 Kor. 6:14) I pa ti pou saz pour pwente avek en dimoun ki pa servi Zeova parski ou krwar ki i napa okenn Temwen Zeova ki ou kapab marye avek. Ou pa pou ni menm rod leskiz pour pwente avek sa dimoun parski ou krwar ki en zour, sa dimoun i kapab vin en Temwen Zeova.

6-7. Ki kalite kestyon ki devret ganny reponn pandan ki ou pe pwente?

⁶ Byensir, sa pa vedir ki nenport frer oubyen ser ki’n batize pou vin en bon konzwen pour ou. Si ou vwar en dimoun ki ou enterese avek, i ti pou byen ki ou demann ou lekor serten kestyon:a ‘Ki mannyer i tret son fanmir? Eski i demontre respe e i pran an konsiderasyon santiman lezot? Lekel son bann zanmi? Ki mannyer i rezourd bann dezakor? Eski i ensiste ki keksoz i ganny fer dan son prop fason oubyen eski i pare pour sede ler i napa okenn prensip Labib ki enplike? Eski i krwar ki i enportan pour annan en ta larzan?’

⁷ Ou kapab osi demann ou lekor: ‘Eski sa dimoun ki mon enterese avek, i kontan Zeova? Eski i pe fer zefor pour devlop “sa nouvo personnalite”? Eski i pou ed mwan pour kontinyen fer plis pour servi Zeova? Eski nou annan bann menm lobzektif spirityel? Eski mon krwar ki nou pou kapab, pa zis vin bann bon zanmi, me bann zanmi ki vreman pros?’ (Kol. 3:9, 10) Si ou en ser, eski sa frer ki ou pe pwente avek, pou vin en bon zanmi ek en bon sef fanmir pour ou? (1 Kor. 11:3) Si ou en frer, eski sa ser ki ou pe pwente avek, pou pare pour aksepte ou lotorite konman sef fanmir malgre ou bann lenperfeksyon? I pran letan pour reponn bann kestyon koumsa. Alor, servi sa letan pandan ki zot pe pwente pour konn byen sa dimoun ki ou krwar pou vin en bon konzwen pour ou.

8-9. Kwa ki kapab ed en dimoun ki pe pwente pour fer en desizyon ki saz? (Vwar portre.)

⁸ I tre probab ki ou pou fer en desizyon ki saz si pandan ki ou pe pwente, ou esey aprann ki kalite dimoun ou zanmi i ete. Rode ki mannyer lezot i vwar li. Ou kapab demann lezot konsernan son repitasyon ek bann kalite ki i annan. Par egzanp, eski sa dimoun i annan limilite, i annan labonte e i rezonnab? En ser ki apel Sarah, ki reste French Guiana e ki’n marye avek en frer ki apel Daniel i dir: “Mon ti demann lezot konsernan Daniel. Mon ti koz avek en frer ki reste avek li e ki fer pionye ansanm avek li, avek en ansyen dan kongregasyon Daniel, avek bann zanmi ki konn nou de Daniel byen e avek bann ser dan son kongregasyon.” Osi, ou kapab zantiman, demann sa dimoun ki ou pe pwente avek, si i annan okenn keksoz ki’n ariv li dan lepase oubyen ki pe arive avek li an se moman ki ou pou bezwen konnen. I kapab enportan pour konn sa bann keksoz parski i kapab ki serten sa bann keksoz i vin en problenm dan zot maryaz pli tar.

⁹ Pa bezwen inyor bann dout ki ou kapab annan oubyen bann remark ki bann zanmi matir i dir ou. Si ou fer sa bann keksoz, ou pou kapab deside si i saz pour kontinyen pwente avek sa dimoun oubyen non.b Aprezan, nou pou vwar ki mannyer bann koup ki’n marye i kapab annan en pli bon lanmitye.

LER ZOT PAS LETAN ANSANM, SA POU ED ZOT VIN PLI PROS

10. Akoz i bon pour en msye ek son madanm pas letan ansanm?

¹⁰ En msye ek en madanm i kapab gard zot lanmitye ek zot maryaz for par fer letan pour kanmarad menm si zot bizi. Sa i donn zot en loportinite pour koz konsernan sa ki’n arive pandan zot lazournen, pour dir kanmarad ki mannyer zot pe santi e ki zot pe panse, pour demontre lafeksyon anver kanmarad e pour pas en bon letan ansanm.

11. Kwa ki kapab gat lanmitye ki i annan ant en msye ek son madanm?

¹¹ En msye ek en madanm ki bon zanmi i prefere pas letan avek kanmarad olye pas letan lwen avek kanmarad. Byensir, parfwa i kapab arive ki zot bezwen lwen avek kanmarad. Me si sa i dire pour en kantite letan, sa i kapab danzere. Par egzanp, serten in aksepte en travay dan en lot pei e sa i fer ki zot reste lwen avek zot fanmir pour plizyer mwan. Menm si i kapab ki sa i anmenn plis larzan, ler zot lwen avek kanmarad pour en long peryod letan, sa i kapab anmenn en kantite problenm dan zot maryaz.

12-13. (a) Ki serten koup ki’n marye in fer pour zot kapab pas letan avek zot konzwen? (Vwar portre.) (b) Ki kantite enportan nou lanmitye avek nou konzwen i devret ete? (Vwar bwat “Ki kantite enportan mon konzwen i devret ete pour mwan?”)

¹² Remark sa ki serten koup in fer pour fer sir ki zot pas letan ansanm regilyerman. Leah, ki reste Guam, i dir: “Mwan ek mon msye, nou kontan fer diferan keksoz ansanm. I rar ki nou fer keksoz oubyen aksepte bann lenvitasyon kot enn pa pou la.” Roxanne, ki reste Leta-z-ini, i dir: “Vi ki nou vreman bizi, nou ti konmans plàn davans pour nou pas letan ansanm, zis parey nou ti pou fer pour lezot levennman enportan.” (Konpar Amos 3:3.) Damien, ki reste Lafrans, i dir: “Nou’n aprann pour demontre lentere dan sa ki kanmarad i kontan fer e avek letan, nou’n aprann pour kontan sa ki kanmarad i kontan.” (Mat. 7:12) Katie, ki osi reste Leta-z-ini, i dir: “Parfwa nou met nou telefonn laba pour ki zot pa distrer nou.”

¹³ Me pli enportan ankor, bann koup i bezwen pas letan ansanm dan bann aktivite spirityel. Myriam, ki reste Lafrans, i dir: “Nou konmans lazournen par lir Labib. Apre nou partaz sa ki nou’n kontan dan nou lektir e ki mannyer nou kapab aplik sa ki nou’n lir. Mon vreman apresye sa bann moman.” I osi dir: “Mon osi kontan ler nou fer lapriyer ansanm e mon tande ki kantite mon msye i kontan Zeova.” Katie, ki’n ganny mansyonnen pli boner, i dir: “Predikasyon i sa letan kot nou pli kontan pas letan ansanm. Ler nou tann kanmarad koz lo Zeova, sa i fer nou vin pli pros e nou kontinyen aprann nouvo keksoz avek kanmarad.”—Prov. 27:17.

RESTE PROS LER ZOT RANKONTRE PROBLENM

14-15. Akoz en koup i devret fer zot mye pour fer fas avek bann problenm ki zot kapab gannyen dan zot maryaz? Donn en legzanp.

¹⁴ Konman bann imen enparfe, bann koup ki’n marye pou ganny bann problenm dan zot maryaz. Labib i dir ki bann dimoun ki’n marye “pou ganny problenm dan zot lavi.” (1 Kor. 7:28) En not letid dan Labib an Angle pour sa verse i dir ki sa lekspresyon pe “refer avek bann problenm ki laplipar dimoun ki’n marye i rankontre.” Alor ler bann problenm koumsa i arive, akoz bann koup i devret fer zot mye pour reste pros avek kanmarad e fer fas avek sa bann problenm?

¹⁵ Annou vwar en legzanp. Si en batiman renonmen oubyen en tablo i ganny andomaze, i tre probab ki son met pou esey repare. I kapab ki zot depans en kantite larzan ek lezot resours pour repar sa batiman oubyen sa tablo e i kapab ki i pran li plizyer lannen pour fini sa travay. Akoz son met pour fer sa? Parski sa batiman oubyen sa tablo i presye pour li. Dan menm fason, tou maryaz i presye. Menm bann koup ki annan en lanmitye vreman pros pou annan problenm ek dezakor. Me parey en batiman oubyen en tablo ki’n ganny andomaze i kapab ganny repare, en koup i kapab repar sa lanmitye pros ki zot ti annan oparavan. I tre probab ki sa reparasyon pou pran letan e zot pou bezwen fer bokou zefor. Me Zeova pou kontan si sa koup i fer tou sa ki zot kapab pour ranforsi zot maryaz e pour reste ansanm. (Mal. 2:16) Ler zot fer sa, zot demontre lanmour ek respe, pa zis pour kanmarad, me osi pour Zeova, sa Enn ki’n kree sa laranzman maryaz.

16. Dapre 1 Korentyen 13:4-8a, kwa ki kapab ed en koup ki pe rankontre bann gro problenm dan zot maryaz? (Vwar portre ek sa bwat “Kwa ki kapab ed ou pour annan en pli bon lanmitye avek ou konzwen?”)

¹⁶ Si ou rankontre problenm dan ou maryaz, pa deside pour separe deswit. (1 Kor. 7:10, 11) O kontrer, demann ou lekor, ‘Eski mon kapab fer plis pour ed nou vin pli pros?’ Etidye sa ki Labib i dir konsernan demontre lanmour e reflesir lo lafason ki ou kapab demontre lanmour dan bann fason ki ganny mansyonnen dan 1 Korentyen 13:4-8a. (Lir.) Olye rod fason pour kit ou konzwen, fer ou mye pour reflesir lo ki mannyer ou kapab vin pli pros avek ou konzwen e pour kontan kanmarad ankor. Konsantre lo sa ki ou kapab fer pour repar zot lanmitye. Priy Zeova e demann li pour gid ou. Rod sa led ki ou bezwen dan nou bann piblikasyon ek video e osi avek bann ansyen ek lezot Kretyen matir. Labib i dir ki maryaz i parey en “lakord ki’n tres an trwa” e Zeova i sa lakord ki pli for e pli enportan dan ou maryaz. Alor ler ou depan lo li, ou maryaz pou vin for e i ‘pa pou fasil pour kase.’—Ekle. 4:12.

17. Ki mannyer bann ki pe mazin pour marye e bann ki’n fini marye i kapab zwaye?

¹⁷ Zeova i anvi ki tou son bann serviter i zwaye, enkli bann ki pe mazin pour marye e bann ki’n fini marye. Alor si ou en selibater e ou ti pou kontan marye, swazir byen sa dimoun ki pou vin ou zanmi pour lavi. Si ou’n fini marye, kontinyen annan en bon lanmitye avek ou konzwen. Fer zefor pour fer fas avek bann problenm ki kapab arive dan ou maryaz par depan lo Zeova pour ed zot. Ler ou fer sa, ou pou “pas bann bon letan” avek ou konzwen, ki ou kontan.—Ekle. 9:9.