Annan sa bon pwennvi konsernan ou bann problenm

1-2. Ki nou bezwen fer pour nou kapab fer fas avek nou bann problenm? (Vwar portre.)

ESKI pour le moman ou pe fer fas avek lenzistis, ou fanmir pe opoz ou oubyen ou pe ganny persekite akoz ou krwayans? Eski ou annan en problenm lasante oubyen ou pe fer fas avek bann problenm ki vin avek lavyeyes? Oubyen eski ou pe soufer akoz en keksoz terib in arive, petet en dimoun ki ou kontan in mor? Parey en kantite parmi bann mouton presye Zeova, petet ou lavi i “ranpli avek problenm ek sagrinasyon.”—Ps. 90:10.

² Pour nou kapab fer fas avek nou bann problenm, nou bezwen annan sa bon pwennvi konsernan nou problenm. Ki sa i enplike? Annou vwar en legzanp ki pou ed nou konpran sa. Bann problenm ki nou fer fas avek i parey bann danze ki nou kapab rankontre ler nou pe dray. Bann aksyon ki ou pou pran i depan lo sa danze. Petet ou pou bezwen say gos oubyen drwat, ralanti oubyen aret en pti kou. Me pour ou kapab pran sa pli bon aksyon, ou pou bezwen vwar byen sa danze. Ou pa pou kapab vwar si lo ou lafnet i annan lanez oubyen labou. Pareyman, pour nou kapab fer fas avek nou bann problenm, nou bezwen vwar zot parey Zeova i vwar zot. Dan sa lartik, nou pou vwar (1) sa bon fason ki nou devret vwar nou bann problenm (2) ki mannyer ler nou annan en move pwennvi lo nou sityasyon sa i kapab fer nou ditor e (3) serten keksoz ki nou kapab fer pour kontinyen annan sa bon pwennvi ler nou rankontre problenm.

ANNAN SA BON PWENNVI KONSERNAN OU BANN PROBLENM

3. Ki nou bezwen aksepte konsernan lavi dan sa move lemonn?

³ Nou pa kapab evit problenm dan sa move lemonn. Tan ki nou ankor enparfe e ki Satan i ankor pe diriz sa lemonn, nou pou rankontre problenm. An plis ki sa, anmezir ki lafen sa sistenm i vin pli pros, nou pou fer fas avek bokou plis problenm, ki swa bann katastrof natirel oubyen bann katastrof ki arive akoz bann keksoz ki imen i fer oubyen menm akoz bann move keksoz ki dimoun i fer. (Mat. 24:8; 2 Tim. 3:13) Si Zeova ti rezourd tou sa bann problenm la konmela, i ti pou paret konmsi Zeova pe ed Satan diriz sa lemonn. Tan ki Satan ki diriz sa lemonn, nou pou fer fas avek “maler.”—Ekle. 9:12.

4. Ki lezot problenm bann Kretyen i fer fas avek?

⁴ Bann Kretyen i fer fas avek lezot problenm. Zezi ti souvan dir son bann disip ki zot ti pou ganny persekite akoz zot krwayans. (Mat. 24:9; Zan 16:2) Ler nou konn sa, nou pa pou sirprann ler nou ganny persekite. (1 Tesa. 3:3, 4) Ler nou reste fidel ler nou pas dan problenm, nou kapab asire ki nou pe fer sa ki byen e ki nou lo semen ki anmenn ver lavi eternel. Nou osi montre ki nou’n swazir pour ador Zeova parski i sa pli bon dirizan e nou montre ki Satan i en manter. Enn bann mansonz ki Satan i dir, i ki bann imen i servi Zeova pour bann rezon egois. Pour esey prouve ki sa ki i’n dir i vre, Satan i atak pep Zeova e fer zot soufer en kantite. (Zob 1:9-11) Ler nou andire akoz nou kontan Zeova, nou fer li kontan.—Prov. 27:11.

5. Ki nou kapab aprann dan Eklezyas 7:13, 14? (Vwar portre.)

⁵ Zeova i permet bann move keksoz arive. Zeova pa zanmen azir dan en move fason oubyen teste nou par sa ki mal. (Zak 1:13) Me akoz Lerwa Salomon ti dir ki ler nou pas “dan en maler,” sa i en keksoz ki Bondye ki’n fer? (Lir Eklezyas 7:13, 14, not.) Parey i leka dan lezot verse Labib, menm si sa verse i dir ki sa i en keksoz ki Bondye in fer, an realite i pe esey dir ki Bondye in permet sa keksoz arive. Salomon ti donn bann bon konsey ki kapab ed nou pour annan sa bon pwennvi konsernan nou bann problenm. Premyerman, nou bezwen aksepte larealite konsernan nou lavi dan sa lemonn Satan. Nou enparfe alor nou pou annan bann bon zour ek bann move zour. Ler nou pas en bon lazournen, nou kapab demontre nou lapresyasyon pour sa labonte ki Bondye in demontre e konsider sa lazournen konman en kado sorti kot li. Dezyenmman, Salomon i fer nou rapel ki nou “pa konnen ki pou arive,” ki swa sa lazournen pou anmenn bann bon keksoz oubyen i pou anmenn problenm. Bann problenm ki nou pa ekspekte i ariv avek dimoun ki fer sa byen e avek dimoun ki fer sa ki mal.

6. Petet akoz Zeova i les nou pas dan problenm? (Ebre 12:7, 11)

⁶ Si nou annan sa bon pwennvi konsernan nou bann problenm, nou pou realize ki Zeova pe ansenny nou pour depan lo li olye lo nou lekor. Zeova i toultan remarke ler nou pas dan problenm. I sagren ler nou soufer e i pou toultan ed nou. Menm si i les nou mars “dan en vale ki fernwanr,” i kontinyen gid nou, i montre nou ki kantite i kontan nou e i donn nou sa lafors ki nou bezwen pour andire. (Ps. 23:4) Ler nou pas dan problenm, sa i kapab ed nou pour konn nou bann febles e avek led Bondye, nou kapab amelyor nou personnalite. (Lir Ebre 12:7, 11.) Par egzanp, Zob ti bezwen devlop plis limilite. Zeova pa ti fer Zob pas dan problenm. Me i ti permet sa bann keksoz arive e i ti servi sa pour ed Zob aprann bann leson enportan. (Zob 42:1-6) Nou asire ki nenport keksoz ki Zeova i permet arive, pa pou fer nou ditor pour touzour. Ler nou andire e reste fidel, nou pou “sorti konpletman venker.”—Rom. 8:35-39.

7. Akoz ou kapab zwaye menm ler ou ganny persekite akoz ou krwayans?

⁷ Nou kapab zwaye menm si nou pe ganny persekite. Si ou pe ganny persekite akoz ou krwayans, pa bezwen krwar ki Zeova pe nepli beni ou. O kontrer, gard antet ki si ou pe ganny persekite, sa i akoz ou pe obeir Zeova e sa i fer li plezir e i pou rekonpans ou. (Mat. 5:10-12) Ler ou annan sa bon pwennvi, ou pou santi ou zwaye e ou pou gard ou dinyite ler ou ganny persekite zis parey bann zapot. (Akt 5:40-42) An plis, sa i kapab ed bann ki pa Temwen Zeova pour aprann laverite e pour “glorifye Bondye.” (1 Pyer 2:12) Mazin legzanp Zozef. Zeova ti ed Zozef e rekonpans li pandan ki i ti ankor dan prizon, pa zis apre ki i ti’n ganny libere. Zeova i kapab fer parey pour nou menm ler nou pe soufer.—Zen. 39:3, 23.

8. Ki lezot rezon nou annan pour andire e reste fidel menm ler nou fer fas avek problenm?

⁸ Nou bann problenm pou fini en zour. Sa ki ti arive avek Zob i fer nou rapel ki nou bann problenm pou fini en zour. Anfet, “Zeova ti beni lafen lavi Zob plis ki o konmansman.” (Zob 42:12) Dan menm fason, Zeova i promet ki dan nouvo lemonn i pou beni nou dan en fason merveye. Konpare avek nou lavi la konmela ki kourt e ki ranpli avek problenm, dan lavenir nou pou viv pour touzour. Pa sa i motiv nou tou pour andire ziska lafen!—Mat. 24:13.

EN MOVE PWENNVI I KAPAB FER NOU DITOR

9. Ki mannyer ler nou annan en move pwennvi konsernan nou bann problenm sa i kapab fer nou ditor?

⁹ Nenport problenm ki nou pe fer fas avek, nou bezwen annan sa bon pwennvi lo nou sityasyon pour nou pa fer keksoz vin pli difisil pour nou. Par egzanp, nou kapab krwar ki Zeova ki fer nou annan problenm. Pour en serten letan, Zob osi ti santi koumsa e sa move pwennvi ti fer li “esey defann son prop lekor plito ki Bondye.” (Zob 32:2) O konmansman, Naomi osi ti blanm Zeova pour son bann problenm. (Rit 1:13, 20, 21) Si Zob ek Naomi ti’n kontinyen annan sa move pwennvi, zot ti pou’n gat zot lanmitye avek Zeova. (Prov. 19:3) Me Zeova ti ed zot pour annan sa bon pwennvi konsernan zot problenm e i ti beni zot pour zot fidelite.

10. Ler nou pe fer fas avek problenm, ki nou kapab konmans mazinen?

¹⁰ Menm si nou asire ki Zeova pa pe fer nou annan problenm, petet nou kapab konmans demann nou lekor si Zeova i ankor enterese avek sa ki pe arive dan nou lavi. Sa kalite fason panse i kapab fer nou perdi lafors. (Prov. 24:10) Lerwa David ek profet Abakouk ti fer fas avek bann problenm e parfwa zot pa ti asire si Zeova ti pe ekout zot ler zot ti kriy osekour. (Ps. 10:1; Aba. 1:2) Me kantmenm sa, zot pa ti aret priye. Zeova ti asir sa bann zonm fidel ki i pe ed zot e i pou fer sanmenm pour ou.—Ps. 10:17.

11. Ki i kapab arive avek nou si nou napa sa bon pwennvi konsernan problenm?

¹¹ Si nou napa sa bon pwennvi konsernan problenm, nou kapab sirprann ler nou rankontre problenm e petet menm mazinen ki sa pa devret arive avek nou. (1 Pyer 4:12) Bann disip Zezi ti vwar li difisil pour konpran ki Zezi ti pou fer fas avek en gran persekisyon. (Lik 18:33, 34) Menm si Zezi ti’n eksplik zot klerman sa ki ti pe al arive avek li, zapot Pyer ti krwar ki Bondye pa ti pou permet Zezi soufer dan sa fason. Zezi ti konnen ki sa kalite fason panse ti pou kapab fer difisil pour li fer lavolonte Zeova, alor i ti koz severman avek Pyer. (Mark 8:31-33) Menm apre ki Zezi ti’n fini mor, son bann disip pa ti konpran akoz sa bann keksoz ti’n arive e i ti pran letan pour zot konpran. Me Zezi ti kontan zot e i ti kontinyen ed zot. Ler i ti koz avek zot apre ki i ti’n resisite, i ti ed zot konpran akoz i ti bezwen soufer par “eksplik [zot] Lekritir.” (Lik 24:25-27, 32, 44-48) Par medit lo sa ki Zezi ti pe ansenny zot, zot ti pou kapab prepare pour sa lopozisyon ki zot ti pe al fer fas avek byento parski zot ti bann disip Zezi. Ler nou medit lo bann laverite ki dan Labib, sa i kapab ed nou pour prepare pour bann problenm ki nou pou rankontre.

12. Ki mannyer nou kapab santi ler nou annan en move pwennvi lo nou sityasyon?

¹² Si nou annan en move pwennvi konsernan nou sityasyon, sa i kapab fer nou santi ki keksoz i pli grav ki i vreman ete. Zezi ti montre en fason ki sa i kapab arive dan sa legzanp ki i ti donnen konsernan bann travayer dan plantasyon rezen. Serten travayer ti konplent parski zot ti krwar ki zot pa ti’n ganny sa bon lapey, me met lakour ti dir enn parmi zot: “Msye, mon pa’n fer ou ditor.” (Mat. 20:10-13) Sa bann travayer ti krwar ki sa met lakour in tret zot dan en fason enzis me an realite i pa ti’n fer sa. Zot ti santi koumsa parski zot ti ekspekte en keksoz ki zot pa ti’n devret ekspekte. Ozordi serten frer ek ser in fer fas avek bann santiman koumsa. Par egzanp, ler zot pa’n ganny fer en servis ki zot ti anvi oubyen ler zot in bezwen aret fer en servis ki zot ti kontan. Ki nou kapab fer pour annan sa bon pwennvi konsernan bann sityasyon difisil ki nou rankontre?

SERTEN KEKSOZ KI NOU KAPAB FER LER NOU RANKONTRE PROBLENM

13. Ki i kapab arive ler ou rankontre problenm?

¹³ Bann serviter Zeova i konnen ki Labib i dir konsernan soufrans. Petet ou’n menm koz avek lezot konsernan sa bann verse pour ed zot fer fas avek problenm. Me ler ou pas dan problenm, ou kapab vwar li difisil pour annan sa bon pwennvi konsernan ou sityasyon. Par egzanp, ou kapab santi ki Zeova pe pini ou oubyen ki i pa pe ekout ou lapriyer. Ki ou kapab fer pour kontinyen annan sa bon pwennvi konsernan ou sityasyon?

14. Ler ou pe soufer, ki ou kapab priy lo la? (Filipyen 4:13)

¹⁴ Demann Zeova pour ed ou. Koz avek Zeova konsernan ou sityasyon e lafason ki i pe fer ou santi. Ou kapab koz avek Zeova lo egzakteman sa ki ou ti ava kontan i fer pour ou. Ou kapab demann Zeova pour donn ou son lespri sen pour ou kapab annan sa lafors ek sa lasazes ki ou bezwen pour andire. Me gard antet ki Zeova i kapab reponn ou lapriyer dan en fason ki ou pa pe ekspekte. (Efe. 3:20) I kapab osi servi bann lanz ouswa ou bann frer ek ser pour ed ou. (Ps. 34:7) Alor, aksepte led Zeova dan nenport fason ki i donn ou. I kontan e i pare pour donn nou son lespri sen e i kapab donn ou lespri sen ki ou bezwen pour ou kapab fer fas avek nenport sityasyon.—Lir Filipyen 4:13.

15. Kwa ki pou ed ou andire ler ou rankontre problenm? (Vwar portre.)

¹⁵ Kontinyen gard ou routin spirityel. Fer sa ki ou kapab menm si ou pa kapab gard sa routin ki ou ti annan oparavan. I dan bann letan “maler ek difikilte” ki ou bezwen ranpli ou lespri avek fason panse Bondye plis ki zanmen oparavan. (Ps. 119:143) Kontinyen lir Labib regilyerman, etidye li e medit lo sa ki ou lir. Otan ki ou kapab, partisip dan predikasyon e asiste e partisip dan renyon. Pas letan avek ou bann frer ek ser. Menm si ou anvi reste ou tousel, lalit avek sa santiman.—Prov. 18:1.

16. Ki bann dout ou kapab annan ler ou rankontre problenm e ki mannyer ou kapab sirmont sa bann dout? (2 Korentyen 10:4, 5)

¹⁶ Sirmont ou bann dout. Ler ou rankontre problenm, petet ou pou bezwen detrir bann nide “ki’n byen anrasinen.” Sa i enkli bann dout ki ou kapab annan konsernan ou lekor oubyen konsernan Zeova. (Lir 2 Korentyen 10:4, 5.) Ou kapab fer sa par fer resers pour konn pwennvi Bondye ki ganny trouve dan Labib e dan bann piblikasyon ki son lorganizasyon i donnen. Par egzanp, eski ou annan dout konsernan si ou ankor annan laprouvasyon Zeova? Etidye konsernan zapot Pol. Pandan son minister, i ti rankontre bann gro problenm me sa bann keksoz ti zis fer li pli asire ki i’n ganny aprouve konman en serviter Kris. (2 Kor. 11:23-27) Eski ou annan dout konsernan si Zeova in vreman pardonn ou pour bann fot ki ou’n fer dan lepase? Si wi, fer en lalis bann verse ki montre ki Zeova i pardonn nou bann pese. (Iza. 43:25) Apre, lir sa bann verse e medit lo la. (Ps. 119:97) Eski en move keksoz in arive ki’n fer ou annan dout konsernan si Zeova pou gard son promes pour protez son bann serviter fidel? Fer resers lo akoz Zeova i permet soufrans e ki mannyer i protez nou spirityelman nenport kwa ki kapab arive avek nou. (Ps. 91:9-12) Osi, lir konsernan bann frer ek ser ki’n andire menm si zot in rankontre bann problenm ki’n fer zot soufer.a

17. Ki nou devret fer ler nou rankontre problenm?

¹⁷ Eski pour lemoman ou pe pas en bon lazournen e ou napa bann problenm grav? Si wi, remersye Zeova e servi sa loportinite pour reflesir lo sa labonte ki i’n demontre. (Ekle. 7:14) Me ler ou rankontre problenm, kontinyen annan sa bon pwennvi konsernan ou sityasyon e kontinyen annan konfyans dan Zeova. Anmezir ki ou fer sa, Zeova pou “donn [ou] semen sorti pour ki [ou] kapab andire.” (1 Kor. 10:13) Me ki mannyer nou kapab ed nou bann frer ek ser ler zot rankontre problenm? Nou pou vwar larepons sa kestyon dan sa lartik ki swiv.