Zeova in form mwan depi mon zenes

Me avan mon kontinyen, les mwan rankont mon zistwar depi o konmansman. Mon ti ne pandan Dezyenm Lager Mondyal, dan en lavil ki apel Calgary, ki sitye Kanada. Tar dan bann lannen 1940, en zenn frer pionye ki ti apel Donald Fraser ti tap lo nou laport e Manman ti aksepte en letid Labib. I ti vreman kontan laverite me vi ki i ti annan bann problenm lasante grav, i pa ti kapab fer bokou dan kongregasyon. Me kantmenm sa, i ti progrese ziska ki i ti batize an 1950. Malerezman, mwens ki de-z-an apre, i ti mor. Sa letan, mon papa pa ti en Temwen Zeova me kantmenm sa, i ti dakor pour les Temwen Zeova fer lanterman mon manman.

Detrwa zour apre lanterman mon manman, en ser aze ki ti apel Alice, ki ti en Kretyen swazir, ti envit mwan pour vin renyon. I ti konn mwan parski mon ti abitye asiste renyon wikenn, ansanm avek mon manman ler i ti kapab. Mon ti demann mon papa si mon ti kapab ale. I ti dakor e i ti deside ki i pou al avek mwan “zis en fwa” pour li remersye sa frer ki ti’n fer diskour dan lanterman mon manman. Sa zour swar, i ti annan Lekol Minister Teokratik ek Renyon Servis e i ti sa pli bon renyon ki mon papa ti’n kapab asiste. I ti’n deza pran en kour pour aprann pour vin en bon orater e i ti enpresyonnen avek sa ki i ti tande dan sa renyon. Mon papa ti deside pour asiste sa renyon tou le semenn. Ptitapti, i ti konmans asiste lezot renyon.

Sa letan, sa frer ki ti diriz Lekol Minister Teokratik ti konmans sa renyon par lir non bann frer ki ti dan sa lekol e ler zot non ti ganny lir, sa bann frer ti reponn “Prezan.” En zour swar, mon ti demande ki mon non osi i ganny lir pandan renyon. Sa frer ti felisit mwan me i pa ti demann mwan si mon ti konpran ki sa i enplike.

Mon pa ti konnen ki mon ti pe demande pour mwan fer diskour dan sa lekol. Mon ti zis anvi ki mon non i ganny lir. Bann semenn apre, mon non ti ganny lir e byen fyer, mon ti reponn, “Prezan.” Apre renyon, mon ti ganny felisite. Plizyer semenn apre, mon ti ganny sa size ki mon’n mansyonnen o konmansman sa lartik.

Mon ti per! Sa letan, bann etidyan ti fer bann diskour ki ti dire pour sis a wit minit. I ti napa en size pour zis lir Labib. Mon papa ti ed mwan prepar sa diskour e i ti fer mwan practice li 20 fwa avan ki mon ti fer sa diskour. Apre sa diskour, mon ti ganny bann konsey ki ti vreman itil. Pandan bann lannen ki’n pase, Zeova in servi mon papa, bann frer ek ser dan kongregasyon ek Son lorganizasyon pour form mwan.

ZEOVA TI KONTINYEN FORM MWAN

Alice, ki mon’n mansyonnen pli boner, ti form mwan ler mon ti konmans partisip dan predikasyon. Sa bann letan, nou ti ganny ankouraze pour lir trwa verse avek sa met lakour e apre ofer li en liv. Ler i ti mon tour pour koz avek en met lakour, Alice ti entrodwi son lekor, i ti konmans sa konversasyon e apre, i ti demann mwan pour lir sa premye verse. Apre sa, mon ti kontiny sa konversasyon, lir sa dezyenm e trwazyenm verse e apre ofer sa piblikasyon. Pli tar, mon ti aprann ki mannyer pour entrodwir mon lekor. Apre ki mon papa ti batize ver lafen lannen 1954, i ti kontinyen form mwan pour fer predikasyon. Konman en paran tousel, i ti fer sa ki i ti kapab pour elve mwan dan laverite. Renyon ek predikasyon ti vreman enportan pour li. Mon ti toultan konnen ki nou pe asiste tou renyon e al predikasyon tou le wikenn.

Pandan sa 12 an ki mon’n lekol, mon’n aprann en kantite keksoz ki’n ed mwan pli tar dan mon lavi. Par egzanp, mon ti aprann fer matematik e aprann gramer Angle. Mon ti asiste bann laklas Angle ek en laklas lo ki mannyer pour ekri zistwar e sa in ed mwan dan sa servis ki mon pe fer la konmela kot mon pe travay avek Writing Department.

Souvan dimoun i demann mwan akoz mon kontan lanmizik. Tou le de mon paran ti kontan lanmizik. Ler mon ti annan set an, pour en pe letan, mon ti aprann zwe piano. Me mon ansenyan pa ti krwar mon zwe byen. I ti dir mon papa ki mon devret aret asiste sa laklas. Mon konpran akoz i ti dir sa. Sa letan mon pa ti anvi aprann zwe lanmizik.

Detrwa mwan pli tar, mon papa ti trouv en lot ansenyan. Safwasi, mon ti aprann sante e zwe piano e mon ti fer byen. Konman en garson, mon ti annan en zoli lavwa e mon ti ranport laviktwar dan serten konpetisyon. Mon ti annan sa lobzektif pour etidye lanmizik e ganny en degre pour ki mon kapab ansenny lezot lanmizik e siport mon lekor anmezir ki mon fer pionye ordiner. Me mon ti realize ki mon ti pou pas tro bokou letan pe etidye lanmizik e prepar bann tes. Alor mon ti aret mon letid e mon ti konmans fer pionye ordiner. Sa ti an 1963.

MON TI GANNY BOKOU LAZWA LER MON TI FER PIONYE

Apre ki mon ti’n fer pionye pour enn an, mon ti ganny demande pour fer pionye spesyal Kapuskasing, Ontario. Mon ti fer pionye ansanm avek Daniel Skinner, ki ti bokou pli vye ki mwan. I ti ansenny mwan en kantite konsernan lafason ki kongregasyon ti organize. Ler mon ti annan 20 an, mon ti ganny apwente pour servi lo Konmite Servis Kongregasyon, alor i ti annan bokou pour mwan aprann. Mon ti kontan ki ankor enn fwa, lorganizasyon ti montre ki i enportan pour form bann zenn frer. Si sa bann frer i travay dir, zot kapab itil pour Zeova menm ler zot ankor byen zenn.

Parfwa i ti difisil pour viv Kapuskasing. Pandan liver, tanperatir ti ariv 44 degre anba 0 degre santigrad oubyen parfwa tanperatir ti mont 33 degre anba 0 degre santigrad. Kantmenm sa, nou de Dan, nou ti marse pour al preski partou. Me enn bann lazwa ki mon’n gannyen dan mon servis i pour zwenn en ser ki apel Linda Cole, ki pli tar ti vin Linda Splane.

Linda ti kontan fer predikasyon e i ti annan bokou retourn vizit. I ti zenere, zantiy e i ti kontan pas letan avek lezot. Goldie, ki ti manman Linda, ti en ser ki ti fidel. O konmansman, son papa Allen ti opoz laverite. Menm si Allen ti opoz laverite, Goldie ti anmenn Linda ek son bann frer, John ek Gordon renyon regilyerman e i ti ansenny zot ki mannyer pour prese. I ti annan en letan kot zot tou, Goldie, Linda, John ek Gordon ti fer pionye. Plizyer lannen apre, Allen ti aksepte laverite e i ti travay dir dan kongregasyon.

An 1965, mon ti ganny envite Betel Kanada pour asiste Lekol Minister Rwayonm pour mwan ganny plis formasyon e sa lekol ti dire pour en mwan. Pandan sa lekol, mon ti ganny demande pour ranpli en form pour asiste Lekol Gilead. Mon pa ti’n zanmen mazinen pour servi konman misyonner parski mon pa ti krwar ki mon ti pou kapab. Kantmenm sa, mon ti ranpli sa form. Mon ti ganny envite pour asiste 42zyenm laklas Gilead. Souvan, nou ti ganny bann rapor konsernan nou progre avek nou bann enstrikter. Sa premye rapor ki mon ti gannyen ti ankouraz mwan pour aprann tou sa ki ti mon kapab konsernan lorganizasyon pandan ki mon ti dan sa lekol. Sa letan, mon ti annan zis 21 an, alor i ti en bon konsey pour mwan.

Pandan Lekol Gilead, nou ti aprann ki mannyer pour travay avek medya, setadir bann stasyon radyo, stasyon televizyon ek bann zournalis. Mon ti vreman kontan pour aprann konsernan sa. Sa letan, mon pa ti realize ki sa ki mon ti pe aprann ti pou itil dan lavenir. Mon pou eksplik sa pli tar.

MON TI AL SERVI SENEGAL

Detrwa zour apre ki mon ti’n fini Lekol Gilead, nou de Michael Höhle, en frer ki ti vin mon konpanyon servis, ti al Senegal, Lafrik pour konmans nou servis. Sa letan, i ti annan apepre 100 proklanmater dan sa pei.

Apre plizyer mwan ki mon ti’n servi Senegal, mon ti ganny envite pour al travay dan biro brans Temwen Zeova en fwa par semenn. Sa “biro brans” ti zis en lasanm dan en lakaz misyonner. Menm si sa biro ti vreman senp, Emmanuel Paterakis, ki ti serviter biro brans, ti toultan fer mwan rapel ki biro brans i reprezant lorganizasyon Zeova dan sa pei. En fwa, Frer Paterakis ti deside ki nou devret ekri en let ankourazan pour bann misyonner. Sa bann letan, i pa ti fasil pour fer bann kopi e i ti ser. Alor sak let ti ganny ekrir an servan en typewriter. Sa ti en kantite travay parski nou ti bezwen fer sir ki nou pa fer okenn fot.

Avan mon ti retourn kot mwan sa zour swar, Frer Paterakis ti donn mwan en lanvlop. I ti dir: “David, lorganizasyon in ekri ou.” Pli tar, ler mon ti ouver sa lanvlop, mon ti vwar en let ki mon ti’n tipe. Sa ti ansenny mwan pour annan respe pour lorganizasyon, ki swa biro brans dan sa pei i pti oubyen gran.

Mon ti fer zanmi avek plizyer proklanmater dan kongregasyon e souvandfwa Sanmdi swar, mon ti pas letan avek bann fanmir. Nou ti pas bann bon moman! Nou ankor gard kontak e ler mon vizit bann biro brans partou dan lemonn, mon kapab koz Franse.

An 1968, nou de Linda, nou ti fiyanse. Pour plizyer mwan apre sa, mon ti esey trouv en louvraz a mitan pour ki nou de Linda, nou kapab fer pionye ansanm Senegal. Me bann anplwayer laba, ti plito anploy bann dimoun lokal olye etranze pour travay. Finalman, apre ki mon ti retourn Kanada, nou ti marye e konman en koup, nou ti ganny demande pour al servi konman pionye spesyal Edmundston, New Brunswick, ki ti en pti lavil lo lafrontyer provens Quebec.

NOU TI AL FER PIONYE DAN LAVIL NEW BRUNSWICK EK QUEBEC

I ti napa okenn proklanmater dan sa lavil e pa bokou letid Labib. Larelizyon Katolik ti domin preski tou laspe lavi sa bann dimoun. Lo preski tou lakaz i ti annan en lansenny “No Jehovah’s Witnesses,” ki ti montre ki zot pa ti anvi Temwen Zeova i vin kot zot. Sa letan, nou pa ti tro pran kont bann lansenny koumsa alor nou ti al kot tou lakaz, ki swa zot ti annan sa lansenny oubyen non. Tou le semenn, en lorganizasyon Katolik ti met en lanons dan zournal ki dir: “Annou al rod e pous bann Temwen Zeova.” I ti annan zis kat Temwen Zeova dan sa lavil. Sa ti Victor ek Velda Norberg e nou de Linda. Alor nou ti konnen ki zot ti pe refer avek nou.

Mon pa pou zanmen oubliy premye vizit sirveyan rezyonal. Apre ki i ti’n pas en semenn avek nou, i ti dir: “Petet sel keksoz ki ou kapab akonpli dan sa lavil, i pour ed dimoun pour annan en pli bon lopinyon lo Temwen Zeova.” Depi sa zour, sa ti vin nou lobzektif prensipal e i ti marse. Ptitapti, dimoun ti konmans vwar sa diferans ki i annan ant bann Temwen Zeova ki bann dimoun ki annan limilite e bann dirizan dan legliz Katolik ki ti orgeye. Ozordi, i annan en pti kongregasyon dan sa lavil.

Apre ki nou ti’n pas apepre enn an dan sa teritwar ki ti izole, nou ti ganny demande pour al ede dan en gran kongregasyon ki baze Quebec City. Nou ti pas sis mwan avek bann frer ek ser ki ti demontre lospitalite anver nou e i ti gou. Apre sa, mon ti ganny demande pour al servi konman sirveyan rezyonal.

Pour sa prosenn 14 an, nou ti vizit bann kongregasyon dan provens Quebec. Nou ti pas bann moman eksitan! Sa travay predikasyon Quebec ti annan bann bon rezilta e souvandfwa nou ti zwenn plizyer fanmir ki ti pe etidye pour vin Temwen Zeova.

NOU MAZIN BANN FRER EK SER FIDEL KI TI TRAVAY VREMAN DIR

Bann frer ek ser ki reste dan sa bout Kanada ki koz Franse ti fran, zwaye e annan bokou lantouzyazm. I ti fasil pour kontan zot. Me i pa ti toultan fasil pour zot aksepte laverite e zot fanmir ti opoz zot en kantite. Serten paran ki pa Temwen Zeova in menm dir avek zot zanfan, “Swa ou aret etidye Labib avek Temwen Zeova, swa ou al reste en lot landrwa!” Me zot in reste fidel avek Zeova malgre lopozisyon. I bezwen ki zot in fer Zeova fyer!

Mon osi anvi koz lo sa kantite pionye ordiner ek pionye spesyal ki i ti annan Quebec dan sa bann lannen. Laplipar zot ti sorti dan lezot landrwa Kanada. Apard ki aprann Franse, zot ti osi bezwen aprann konsernan bann dimoun ek zot kiltir, ki ti’n ganny enfliyanse par larelizyon Katolik.

Souvandfwa bann pionye spesyal ti ganny anvoye dan bann teritwar izole kot i ti napa proklanmater. Vi ki dimoun dan sa bann landrwa pa ti kontan Temwen Zeova, i ti difisil pour zot trouv en landrwa reste e pli difisil pour ganny en travay a mitan. Menm bann koup ki ti fek marye ti bezwen reste dan bann group kat, sis oubyen wit pour zot kapab partaz bann depans. Zot pa ti kapab pey en landrwa pour zot reste zot tousel. Me sa bann pionye devoue ti travay dir. Ler zot ti konmans en letid Labib, zot ti fer tou sa ki zot ti kapab pour ed sa etidyan. Aprezan Quebec i annan en kantite proklanmater e en kantite parmi sa bann pionye in al ede dan lezot landrwa kot i annan bezwen.

Ler nou ti vizit bann kongregasyon dan nou rezyon, nou ti fer zefor pour al predikasyon avek bann adolesan dan Sanmdi bomaten. Sa ti permet nou konn bann problenm ki zot ti pe fer fas avek. Serten bann adolesan ki nou ti travay avek dan predikasyon pe aprezan servi aletranze konman bann misyonner oubyen dan lezot servis.

Sa bann letan, kongregasyon pa ti kapab ed nou pour pey bann depans ki nou ti fer ler nou ti pe vwayaze, alor parfwa nou larzan ti fini avan lafen dimwan. Dan sa bann moman, nou ti bezwen depan lo Zeova konpletman vi ki zis li ki ti konn nou sityasyon. I pa’n zanmen abandonn nou. Nou ti toultan reisi sorti dan en kongregasyon pour al dan en lot.

BANN LESON KI MON TI APRANN AVEK BANN FRER FIDEL

Parey mon’n dir pli boner, bann formasyon ki mon ti gannyen ler mon ti Gilead lo lafason pour travay avek bann dimoun dan medya ti vreman ed mwan. Ler mon ti Quebec, nou ti ganny en kantite loportinite pour donn en temwannyaz lo radyo, televizyon e dan bann zournal. Mon ti souvan travay avek Léonce Crépeault, ki ti en sirveyan rezyonal ki konn byen ki mannyer pour travay avek medya. Ler i ti koz avek en dimoun ki vreman enportan dan lendistri medya, i pa ti pou esey montre ki i ti konnen ki i pe fer. O kontrer, i ti dir: “Msye, mwan ek mon zanmi nou bann minis larelizyon. Nou pa konn bokou konsernan ki mannyer pour koze lo televizyon ek radyo me nou lorganizasyon in demann nou pour enform bann dimoun konsernan en gran lasanble ki Temwen Zeova pe fer. Nou pou vreman apresye nenport led ki ou kapab donn nou.” Vi ki i ti demontre limilite, en kantite dimoun dan lendistri medya ti pare pour ed nou.

Pli tar, biro brans ti demann mwan pour travay ansanm avek Frer Glen How, ki ti enn nou avoka, lo en ka difisil ki ti pou kapab atir latansyon medya. Sa formasyon ki mon ti’n gannyen Gilead e leksperyans ki mon ti’n gannyen avek Léonce, ti ed mwan. I ti vreman en gran privilez pour travay ansanm avek Frer How. I ti napa okenn lafreyer ler i ti defann lorganizasyon Zeova dan bann ka legal me pli enportan ki sa, i ti vreman kontan Zeova.

An 1985, nou ti ganny anvoye pour servi konman sirveyan rezyonal dan en rezyon ki pros avek kot mon papa i reste dan les Kanada. Sa ti fer ki nou ti kapab ede pran swen avek li. Malerezman, trwa mwan apre, i ti mor. Nou ti kontinyen servi dan bann rezyon dan les Kanada ziska an 1989, ler nou ti sirprann pour ganny envite pour vin servi dan Betel Leta-z-ini. Sa ti vedir ki nou ti bezwen kit sa servis sirveyan apre preski 19 an ki nou’n dan sa servis. Pandan sa bann lannen, nou’n reste dan plizyer santenn lakour e nou’n pran plizyer repa avek bann frer ek ser ki’n demontre lospitalite. Nou vreman rekonesan pour tou bann ki’n akeyir nou dan zot lakour e ki’n partaz zot manze avek nou.

NOU TI AL RESTE LETA-Z-INI

Ler nou ti ariv Brooklyn, mon ti travay dan Departman Servis. Mon pou toultan rekonesan pour sa formasyon ki mon’n gannyen laba. Enn bann leson ki mon’n aprann i pour pa krwar ki mon’n konpran en keksoz avan ki mon ganny tou lenformasyon. An 1998, mon ti al servi dan Writing Department, kot mon ankor pe aprann ki mannyer pour ekri. Pour plizyer lannen, mon’n annan sa privilez pour servi konman asistan Frer John Barr, ki ti kordinater Konmite Redaksyon. Mon pou toultan apresye sa formasyon ki mon’n gannyen ek letan ki mon’n pase avek li. I ti annan bann zoli kalite Kretyen.

I vreman en plezir pour travay ansanm avek bann frer ek ser ki annan limilite ki servi dan Writing Department. Zot toultan demann Zeova pour ed zot dan zot servis e zot konnen ki nenport keksoz ki zot akonpli i akoz lespri sen Zeova e pa akoz bann abilite ki zot annan.

In osi en privilez pour mwan ek Linda vizit bann frer ek ser fidel dan 110 pei. Nou’n vwar ki kantite bann misyonner, bann manm lo bann Konmite Brans ek lezot serviter a plen tan, i kontan Zeova. In osi en benediksyon pour vwar devouman ek fidelite bann frer ek ser dan sa bann pei. Zot kontinyen met lentere Rwayonm premye malgre lager, problenm ekonomik ek persekisyon. Mon konnen ki Zeova i kontan zot en kantite!

Pandan bann lannen, Linda in vreman en gran led pour mwan anmezir ki mon’n desarz bann responsabilite. I kontan dimoun e toultan pe rod fason pour ed lezot. I osi konnen ki mannyer pour konmans bann konversasyon dan temwannyaz enformel. I’n reisi atir en kantite dimoun ver laverite, enkli serten ki ti inaktif oparavan. I’n vreman en kado sorti kot Zeova. Anmezir ki nou vin pli vye, nou de Linda, nou vreman apresye led bann frer ek ser ki pli zenn, ki’n ed nou ler nou vwayaze e dan lezot fason pratik.—Mark 10:29, 30.

Ler mon mazin sa ki’n arive pandan sa dernyen 80-z-an, mon vreman rekonesan. Mon dakor avek sa ki sa psalmis ti ekri: “O Bondye, ou’n ansenny mwan depi mon zenes e ziska prezan mon kontinyen koz lo bann keksoz merveye ki ou’n fer.” (Ps. 71:17) Mon anvi kontinyen fer sa tan ki mon vivan.