28 ASA
I ti servi Zeova avek tou son leker “tou dilon son lavi”
I BEZWEN ki Lerwa Asa ti soke ler i ti vwar sa: en gran larme Etyopyen ki ti’n kanpe Zida, pare pour lager. Zeova ti’n anvoy son pep lager en kantite fwa, me napa okenn par ki montre ki zot ti’n deza fer fas avek en gran larme koumsa. Sa larme ti annan en milyon solda, preski de fwa an plis ki sa kantite solda ki Asa ti annan. Ki mannyer Asa ti pou ganny kouraz pour lager avek sa gran larme?
Dan en sans, Asa ti pe deza met li pare pour sa lager. Ler i ti konmans diriz Zida di-z-an pase, Lerwa Asa ti montre ki i ti vreman parey son aryer granper Lerwa David. Asa ti anvi premyerman fer plezir son Bondye Zeova. Avek limilite, sa lerwa ti ekout bann profet Zeova, Oded ek garson Oded, Azarya. Avek kouraz, sa zenn dirizan ti reisi tir bann move keksoz ki ti’n pran rasin depi letan ki Lerwa Salomon ti’n vin en aposta. Avek bokou lardyes, Asa ti reisi detrir bann zidol ki bann dimoun ti pe adore e i ti osi tir bann zonm ki ti fer prostitisyon dan tanp.
Asa ti menm koriz bann move keksoz ki son fanmir ti pe fer. Son granmanman Maaka ti annan en gran “pozisyon konman larenn” dan Zida. I ti’n fer en zidol degoutan pour promot ladorasyon sèks. Asa pa ti les son fanmir enfliyans li. I ti tir son granmanman dan son pozisyon konman larenn e i ti bril sa zidol. Vi ki Asa ti fer plezir Zeova dan sa fason, Bondye ti beni sa pei e i ti annan lape pandan di-z-an. Me ki Zeova ti fer pour ed Asa ler bann Etyopyen ti vin atak Zida?
Lerwa Asa ti lager avek sa pli gran larme ki Labib i mansyonnen
Ler Asa ti get bann grann laplenn Zida anba e i ti vwar sa gran larme Etyopyen, deswit i ti demann led son Bondye. Imazinen ki mannyer son bann solda ti santi ler Asa ti priye e dir: “O Zeova, i pa enportan pour ou si sa bann ki ou ede i en kantite oubyen si zot fay. O Zeova nou Bondye, ed nou parski nou pe depan lo ou e nou’n vin lager avek sa gran larme akoz ou non. O Zeova, ou nou Bondye. Pa bezwen les dimoun ganny laviktwar lo ou.” I bezwen ki sa lapriyer senser ti fer Zeova plezir. I ti vwar ki Asa ti vreman parey Zonatan garson Lerwa Sail ler i ti devan li akoz zot tou le de, zot ti realize ki en kantite solda pa ti en problenm pour Zeova. (1 Sam. 14:6) En dimoun ki annan Souvren liniver lo son kote pou toultan sa enn pli for!
Asa ti diriz son bann zonm dan lager. Ki ti arive? Labib i dir sa konsernan sa bann ki ti pe vin atak li: “Zeova ek son larme ki ti’n kraz zot.” Ni enn sa bann solda pa ti reste vivan.
Apre sa, Asa ti kontinyen promot vre ladorasyon. En kantite dimoun sorti dan sa dis tribi dan rwayonm nor Izrael ti vin reste Zida dan sid pour ki zot kapab ador Zeova dan tanp Zerizalenm. Asa ti fer tou dimoun Zida fer en serman ki zot ti pou servi Zeova fidelman.
Par kont, Labib i osi koz lo serten fot grav ki Asa ti fer. Ler lerwa Izrael ti menas pour lager avek Zida, Asa pa ti rod led Zeova. I ti plito donn larzan lerwa Siri pour atak Izrael. Ler Zeova ti anvoy profet Anani pour koriz Asa, sa lerwa ti ankoler e i ti met sa profet dan prizon. Dan son vye zour, ler Asa ti byen malad, i ti al rod led avek bann dimoun ki fer gerizon olye rod led avek Zeova. I paret ki Asa pa ti reste fidel ziska lafen.
Me Zeova i en Papa ki annan en kantite pasyans. Son Parol i dir sa lo sa 41 lannen ki Asa ti dirize: “Kantmenm sa, Asa ti servi Zeova avek tou son leker tou dilon son lavi.” Sa ki Labib i dir lo sa zonm remarkab i fer nou mazinen ki Zeova i kontan bann ki kontan Li. Me i osi dir nou ki nou pa devret zanmen oubliy tou sa ki Zeova in fer pour nou. Anmezir ki letan i pase, i donn nou plis rezon pour nou kontinyen annan plis kouraz!
Lir sa resi dan Labib:
Pour diskit lo la:
Ki mannyer Asa ti demontre kouraz?
Al pli o profon
1. Kisisa en “poto sakre” e ki mannyer bann levidans arkeolozik i siport sa nide ki bann aposta parmi pep Bondye ti ador sa bondye madanm ki sa poto sakre ti reprezante? (1 Rwa. 15:12, 13; w08 1/7 9 ¶1-5) A
Portre A: Asa ti tir son granmanman dan son pozisyon konman larenn e i ti detrir sa poto sakre
Portre A: Asa ti tir son granmanman dan son pozisyon konman larenn e i ti detrir sa poto sakre
2. Aparaman lekel ki ti garson profet Anani e ki mannyer i ti imit kouraz son papa? (it-E “Hanani” No. 2)
3. Menm si Asa ti fer fot, kwa ki montre ki i ti “servi Zeova avek tou son leker”? (1 Rwa. 15:14; w17.03 16 ¶5-6)
4. I rar ki lekor mor ti ganny brile Izrael. Alor akoz Labib i dir ki zot ti fer ‘en gro dife pour lanterman’ Asa? (2 Kron. 16:14; w06 1/1 16 ¶5)
Reflesir lo sa bann leson
Sa ki profet Azarya ti dir ti ankouraz Asa pour retablir vre ladorasyon. Ki lefe ou parol pozitif i kapab annan lo lezot? B
Portre B
Asa ti depan lo Zeova pour defet en gran larme me pli tar i ti depan lo bann imen pour defet en pli pti larme. Ki sa i ansenny nou konsernan depan lo Zeova dan tou sa ki nou fer? (Prov. 3:5, 6)
Ki mannyer ou kapab imit kouraz Asa dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Asa ler i resisite?
Aprann plis
Si ou reste dan en pei kot ou lib pour ador Zeova, ki mannyer ou kapab imit lafason ki Asa ti profit lo sa letan ki ti annan lape Zida?
Reflesir lo ki mannyer legzanp Asa i kapab ankouraz nou ler nou bezwen lalit avek bann lennmi ki for.