21 SAMYEL
En garson ki ti anons mesaz Zeova avek kouraz
SAMYEL ti parey fiy Zefta ek Sanmson dan en fason. Zot tou le trwa, sa ki zot paran ti fer ti annan en gran lefe lo zot lavi. Parey fiy Zefta, Samyel ti dedye tou son lavi dan servis sakre Zeova. (1 Sam. 2:11) Parey Sanmson, Samyel ti en Nazireen tou dilon son lavi. (Ziz 13:7) Parey zot tou le de, Samyel ti bezwen kouraz.
Ler Samyel ti ganny sevre petet a laz trwa-z-an oubyen plis, son manman Ana ti anmenn li pour servi kot tabernak Zeova, Silo, parey Ana ti’n promet Zeova. Me i ti kontinyen vizit son garson regilyerman. Sak lannen i ti anmenn en nouvo lenz pour li met kot tabernak. Samyel ti grandi laba, anba responsabilite granpret Eli ki ti aze. Petet serten madanm kot tabernak ti ede pour pran swen avek Samyel.
Me malerezman, ladorasyon kot tabernak ti pe ganny sali e dan en sans Eli ti responsab. Son de garson Ofni ek Fineas ti move. Zot ti pe fer imoralite seksyel avek bann madanm ki ti pe servi kot lakaz sakre Zeova. Zot ti pe sali ladorasyon pir dan lezot fason osi. I paret ki Ofni ek Fineas ti donn lord bann serviter tanp pour pran pardfors bann pli bon bout lavyann ki bann dimoun ti anmennen pour ofer konman sakrifis avan ler i ti ganny ofer avek Zeova. Eli ti konnen sa ki son bann garson ti pe fer. Me i ti zis donn zot en pti konsey e les zot. Malgre tou sa bann move keksoz ki ti otour li, Samyel ti grandi e i ti kontinyen ganny laprouvasyon Zeova ek dimoun. Ler sa letan ti arive pour Zeova koriz sa bann problenm Silo, i ti swazir Samyel konman son portparol.
En zour swar, Samyel ti sote dan son sonmey akoz i ti tann en dimoun pe koze. Zeova ti pe kriy li! Me Samyel ti krwar ki Eli ki ti pe kriy li, alor i ti tay kot granpret e demann li ki i ti bezwen. Eli ki ti vye e aveg ti reanvoy Samyel dormi akoz i pa ti’n kriy li. Menm keksoz ti ariv ankor de fwa. Finalman Eli ti konpran sa ki ti pe arive. Alor i ti demann Samyel pour al alonze ankor en fwa e si Zeova ti kriy li ankor, Samyel ti pou bezwen reponn: “Silvouple Zeova koz avek ou serviter, parski mon pe ekout ou.” Samyel ti fer parey i ti’n ganny demande.
Pour en katriyenm fwa, Zeova ti kriye: “Samyel, Samyel!” Sa garson ti dir: “Silvouple koz avek ou serviter, parski mon pe ekout ou.” Alor, Zeova ti koz avek li. I ti dir li ki i ti pou koriz tou sa bann problenm Silo e ki Eli ti pou ganny pini akoz i pa ti’n disiplin son zanfan. Son fanmir enkli sa bann move garson ti’n ganny zize. Samyel ti bezwen dir Eli tousala!
Samyel ti retourn dan son plas, me Labib pa dir si i ti reisi dormi ankor apre sa. Son bomaten, i ti leve pour li ouver bann laport lakour tabernak. Nou kapab konpran ki “Samyel ti per pour rakont Eli sa vizyon.” Eli ti kriy Samyel kot li e i ti demann li sa ki Bondye ti’n dir li. Petet i ti vwar ki Samyel ti per, alor i ti dir li: “Silvouple, pa kasyet nanryen avek mwan.”
Menm si i ti zis en pti garson, Samyel ti bezwen anons mesaz zizman Zeova avek granpret Eli
Sirman, sa ti en keksoz difisil pour Samyel fer. Eski i ti respekte Eli konmsi i ti son granpapa? An tou leka, konman granpret, Eli ti sa enn ki ti pe diriz nasyon Izrael spirityelman! Kantmenm sa, sa garson ti koze. Anfet, “Samyel ti rakont li tou keksoz.” Alor Eli ti konpran ki maler ti pou vin lo zot byento. Eski i ti esey koriz son bann move garson? Napa laprev ki montre ki i ti fer sa.
Zeova ti beni Samyel en kantite akoz i ti demontre kouraz. Labib i dir: “Zeova ti avek li.” Deplis, Zeova ti konmans servi li konman son profet e I “ti fer ki tou parol Samyel ti ganny akonplir.” Tou sa ki Samyel ti dir lo Eli ek son bann garson ti vin vre. Apre sa, Zeova ti servi Samyel pour gid e diriz nasyon Izrael spirityelman. Pour plizyer deseni, Samyel ti servi Zeova fidelman konman son profet ek ziz. I ti’n aprann pour demontre kouraz depi byen zenn e i ti kontinyen fer sanmenm tou dilon son lavi. Samyel ti viv lontan e i ti ganny en kantite benediksyon.
Lir sa resi dan Labib:
Pour diskit lo la:
Ki mannyer Samyel ti demontre kouraz?
Al pli o profon
1. Dekrir Silo, sa landrwa kot tabernak Zeova ti ete. (w92-E 1/11 8-9) A
Todd Bolen/BiblePlaces.com
Portre A: Sa landrwa kot Silo ti ete
2. Ki mannyer lavi ti ete pour Samyel kot tabernak? (ia 61-62 ¶9-13) B
Portre B
3. Dan ki sans Samyel “pa ti ankor aprann konn Zeova”? (1 Sam. 3:7; w03 1/1 8 ¶5-6)
4. Ki mannyer sa profesi konsernan fanmir Eli ti ganny akonplir? (it-E “Eli, I” ¶5-7)
Reflesir lo sa bann leson
Ki en zenn i kapab aprann avek Samyel lo lenportans pour . . .
pare pour obeir? (1 Sam. 3:5)
demontre lapolites ek respe? (1 Sam. 3:6-10)
vin en dimoun ki lezot i kapab depan lo la? (1 Sam. 3:15) C
Portre C
Kan ki en zenn i kapab bezwen kouraz pour koze e ki mannyer legzanp Samyel i kapab ed li?
Ki lezot fason ki ou kapab imit kouraz Samyel?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Samyel ler i resisite?
Aprann plis
Kan ki bann zenn ek adilt i kapab bezwen kouraz pour defann sa ki byen?
Menm ler bann dimoun otour li ti mank respe pour Bondye, Samyel ti fer sa ki byen.