20 SANMSON
I ti ganny kouraz ler i ti feb
SANMSON pa ti kapab vwar nanryen. Me i ti kapab tann sa lafoul Filisten ki ti monk li e sikann li. Ki mannyer Sanmson in ariv la? Dan bet i ti’n devwal sekre konsernan son lafors ki Bondye ti donn li. Apre sa, bann Filisten ti tyonbo li, tir son lizye, anmar li, met li dan prizon e fors li pour travay konman en lesklav. La aprezan, bann Filisten ti pe riy li e san dout zot ti pe osi riy son Bondye, Zeova. Sanmson ti konnen ki preski tousala ti akoz son lafot. I ti’n toultan en dimoun ki annan en kantite kouraz. Aprezan, sa kouraz ti pe ganny teste ziska son limit.
Pandan 20 an, Sanmson ti ziz Izrael menm si i ti vreman diferan avek lezot ziz. Lezot ziz, parey Barak, Gideonn ek Zefta ti’n diriz en larme pour lager kont bann lennmi Bondye. Me Sanmson pa ti fer sa. Sanmson li menm ti sa larme! Zeova ti servi li pour detrir en kantite Filisten li tousel. Ki mannyer?
Anba gidans Bondye, paran Sanmson ti dedye son lavi pour servi Zeova konman en Nazireen. Alor i pa ti zanmen koup son seve. Tan ki i ti reste fidel avek son ve, Zeova ti beni li avek en lafors ekstraordiner. En fwa, Sanmson ti menm desir en lyon an de avek zis son lanmen! Sanmson ti servi sa lafors ki Bondye ti donn li pour lager avek bann Filisten ki ti pe domin lo pep Izrael ki ti’n rebele.
En fwa, pep Izrael li menm ti anmar Sanmson e anmenn li kot bann Filisten akoz zot ti per. Me Sanmson ti kas sa bann lakord konmsi en senp difil linenn e i ti touy 1,000 Filisten avek zis lanmaswar en bourik. Pli tar, ler Sanmson ti dan lavil Gaza, son bann lennmi ti kasyet pour atak li akoz zot ti anvi touy li granmaten. Me Sanmson ti leve dan milye lannwit, i ti tyonbo baro lavil e redi li ansanm avek son de poto ek bar. Apre, i ti met zot lo son zepol e anmenn zot en zistans apepre 60 kilomet anler lo latet en montanny o bor Ebronn!
Sanmson ti defet bann Filisten plizyer fwa. I ti montre bann Filisten ki zot bann bondye, parey Dagon, ti napa okenn pouvwar lo en serviter Zeova. Par kont, bann Filisten ti ganny en bon zouti pour defet Sanmson. Sa ti Dalila.
Sanmson ti tonm anmoure avek li, me Dalila ti enfidel e rize. I ti aksepte en gous avek bann Filisten pour ki i rode kwa ki ti fer Sanmson sitan for. Dalila ti kontinyelman demann Sanmson son sekre. Finalman, Sanmson ti ganny ase e i ti dir li son sekre. I ti dir li ki si son seve i ganny koupe, i ti pou for parey en dimoun ordiner. Alor Dalila ti espere ziska ler Sanmson ti dormi. Apre i ti fer en dimoun koup son bann gran lake seve. Labib i dir: “Zeova ti’n kit li.” Alor, Sanmson ti perdi son lafors. Bann Filisten ti antre, tyonbo li e tir son lizye.
Sanmson ti ganny forse pour kraz lagrenn pour son bann lennmi, en travay fatigan. Bann Filisten ti vreman dan lazwa. Zot lennmi ki ti vreman for ti aprezan zis en lesklav dan minot. Zot ti organiz en gran lafet pour onor Dagon. Zour lafet, plizyer milye dimoun ti rasanble dan en gran tanp. Apepre 3,000 dimoun ki ti’n vin lafet ti lo twa sa tanp. Bann Filisten ti deside pour servi Sanmson pour fer zot riye, alor zot ti donn lord pour anmenn li deor e met li debout ant de gran pilye. Me sa letan, seve sa ziz ki ti’n repantir ti’n fini rekonmans pouse.
Sanmson ti perdi son liberte akoz son fot, me i ti rod en loportinite pour fer keksoz byen
Apre ki i ti’n tous sa de pilye, i ti demann Zeova pour redonn li lafors parey avan. I ti priye: “Silvouple . . . mazin mwan. O Bondye, silvouple, donn mwan lafors pour en dernyen fwa.” Apre i ti kriye: “Les mwan mor ansanm avek bann Filisten!” Zis esey imazin Sanmson kot i pe pous sa bann gro pilye avek tou son lafors ziska ki finalman zot konmans bouze. Avan ler bann Filisten ti kapab aret li, sa bann pilye ti tonbe e sa tanp antye ti degrengole. Sa ti dernyen keksoz ki Sanmson ti fer. Sa zour, i ti touy plis lennmi Bondye ki sa ki i ti’n touye tou dilon son lavi.
Plizyer syek pli tar, ler zapot Pol ti ekri konsernan bann dimoun ki ti annan en gran lafwa, i ti osi mansyonn Sanmson. Ler Pol ti ekri konsernan bann ki “ti vin for ler zot ti feb,” sirman i ti pe mazin sa ziz ki ti annan kouraz.—Ebr. 11:32-34.
Lir sa resi dan Labib:
Pour diskit lo la:
Ki mannyer Sanmson ti demontre kouraz?
Al pli o profon
1. Akoz Sanmson ti kapab reste en Nazireen menm si i ti tous lekor mor? (w05-E 15/1 30 ¶1–31 ¶1)
2. Kwa ki montre ki Sanmson ti bezwen lespri sen Bondye pour anmenn baro lavil ek son de poto sorti Gaza ziska Ebronn? (w04 1/11 15 ¶7-8) A
Portre A
3. Kwa ki montre ki Dalila ti kapab en Izraelit? (w05-E 15/3 28 ¶3)
4. Akoz Sanmson ti priye pour pran revanz pour zis “enn [son] de lizye”? (Ziz 16:28; it-E “Samson” ¶10)
Reflesir lo sa bann leson
Ler Sanmson ti anba presyon, i ti dir Dalila bann lenformasyon konfidansyel. Ki bann ansyen ek zot madanm i aprann atraver sa? B
Portre B
Sanmson ti fer en fot grav, me pli tar Zeova ti servi li dan en fason pwisan. Ozordi, si en Kretyen i fer en fot, ki mannyer legzanp Sanmson i kapab ankouraz li pour pa bes lebra?
Ki mannyer ou kapab imit kouraz Sanmson?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Sanmson ler i resisite?
Aprann plis
Ansenny ou zanfan lo sa ki ti fer Sanmson vin sa zonm pli for ki’n deza egziste.
Ki lezot leson ki nou kapab aprann avek zistwar Sanmson?