19 ZEFTA EK SON FIY
Zot ti akonpli en ve difisil
ANKOR enn fwa, lavi ti difisil Izrael, akoz bann dimoun ti’n abandonn Zeova ankor. Akoz sa, Zeova ti les bann Amonnit fer zot soufer pandan 18 an. (Ziz 10:8) Finalman, pep Bondye ti aksepte ki zot ti’n fer pese, zot ti debaras zot avek zot bann fo bondye e retourn kot Zeova. Me pa lontan apre sa, bann Amonnit ti rasanble Gilead pour atak Izrael.
Bann ansyen Gilead ti demann en zonm ki apel Zefta pour vin diriz zot dan lager. Bann demi frer Zefta ti’n maltret li ler i ti Gilead, alor i ti kit sa landrwa. Eski Zefta ti ankoler oubyen gard rankin avek zot? Non. Zefta ti dakor pour retournen e lager. Me premye keksoz ki i ti fer, i ti esey fer lape avek bann Amonnit. Zefta ti anvoy bann mesaze pour eksplik an detay lerwa bann Amonnit akoz i ti napa drwa pran sa pei ki i ti anvi pran avek Izrael. Zefta ti montre ki i ti konn byen tou sa ki Zeova ti’n fer pour Son pep ek nasyon dan zalantour. Me lerwa Amonnit pa ti ekoute. I ti determinen pour lager!
Ler Zefta ti met li pare pour lager, lespri sen Zeova ti vin lo li. Alor Zefta pa ti fer keksoz dan bet ler i ti fer sa ve avek Zeova: “Si ou livre bann Amonnit dan mon lanmen, sa dimoun ki sorti dan mon lakaz pour vin zwenn mwan ler mon retournen sen e sof sorti kot bann Amonnit, pou vin pour Zeova. Mon pou osi ofer sa dimoun konman en lofrann brile.”
Eski Zefta ti pe esey dir ki i ti pou literalman bril en dimoun? Byensir ki non. Zeova ti deteste e enterdi sakrifis imen. (Det. 18:10, 12) Plito, Zefta ti pe esey dir ki sa dimoun ki sorti premye dan son lakaz ti pou “vin pour Zeova” dan sa sans ki i ti pou konpletman devoue dan Son servis, posibleman kot tabernak Silo. Zefta ti konnen ki son ve ti pou kapab kout li ser. I ti annan zis en zanfan, son sel fiy ki i ti kontan en kantite. Petet li menm ki ti pou sorti premye pour vin dir li bonzour ler i retourn kot li.
Me pour le moman, Zefta ti bezwen al lager. Avek kouraz i ti diriz son bann solda dan lager e Zeova ti beni zot en kantite. Zot ti “touy en gran kantite” dimoun e detrir 20 lavil Amonnit.
Zefta ti retourn kot lakour dan lazwa. Petet i ti pe konmans swete ki en serviter ki pou sorti dan lakaz premye. Si i ti pe mazin sa, i bezwen ki i ti vreman dezapwente. Sa premye dimoun pour sorti ti son fiy ki ti pe danse e zwe tanbourin! Zefta ti vreman tris, i ti desir son lenz e kriye: “Ar wi zot mon fiy! Ou’n kas mon leker parski ou menm ou ki mon pou bezwen fer ale.”
Zefta ek son fiy ti bezwen akonpli en ve, me sa ti pou kout zot ser
Fiy Zefta ti konpran ki sa ve ki son papa ti fer ti vedir. I ti pou bezwen konpletman devoue dan servis sakre Zeova. Savedir, i pa ti pou zanmen marye ni annan zanfan e pour bann madanm Izraelit, sa ti en laont. Me avek kouraz, sa zenn fiy ti reasir son papa: “Si ou’n fer en promes avek Zeova, fer avek mwan sa ki ou’n promet.” I ti zis demann en pe letan pour ki i tousel avek son bann zanmi e plere akoz i pa ti pou zanmen marye ni annan zanfan.
Fiy Zefta ti ganny rekonforte e felisite. Tou le lannen, bann zenn fiy Izraelit ti al kot li pandan kat zour pour felisit sa madanm ki pa ti egois e ki ti annan kouraz. Sirman i ti ganny rekonpanse pour son servis kot tabernak sa letan. I posib ki pandan sa menm letan, Samyel osi ti laba ler i ti en pti garson. Eski fiy Zefta ti donn koudmen pour form e ankouraz Samyel anmezir i ti pe grandi? Nou pa konnen. Si i ti fer sa, i bezwen ki i ti vreman kontan vi ki i ti napa zanfan. Me nou konnen ki i ti annan en problenm imoralite seksyel kot tabernak sa letan. (1 Sam. 2:22) Eski fiy Zefta ti osi enplike dan imoralite seksyel? Non. Labib i dir: “Fiy [Zefta] pa ti zanmen annan relasyon seksyel avek en zonm.”
Zapot Pol ti mansyonn Zefta parmi bann zonm ek madanm ki ti annan en gran lafwa. (Ebr. 11:32) Tou le de Zefta ek son fiy in kit en zoli legzanp kouraz. I ti lager pour pep Bondye e son fiy ti siport li. Ansanm, zot ti akonplir en ve difisil pour Zeova!
Lir sa resi dan Labib:
Pour diskit lo la:
Ki mannyer ki Zefta ek son fiy ti demontre kouraz?
Al pli o profon
1. Kwa ki montre ki bann Amonnit pa ti pe lager zis avek bann Izraelit me osi kont vre ladorasyon? (it-E “Jephthah” ¶6) A
Portre A: “Zot ti tir bann bondye etranze parmi zot e zot ti ador Zeova.”—Ziz 10:16
2. Ki mannyer latitid Zefta ti parey pour Zakob ler i ti fer sa ve avek Zeova? (it-E “Jephthah” ¶11)
3. Akoz i ti vreman en gran sakrifis pour Zefta akonpli son ve? (w17.04 4 ¶6)
4. Profet Samyel ti ne apepre lannen 1180 avan Kris. Kwa ki montre ki Samyel ek fiy Zefta ti’n kapab servi kot tabernak an menm tan? (it-E “Jephthah” ¶2; get sa laliny kronolozi “Depi lepok bann patriars ziska lepok bann ziz.”)
Reflesir lo sa bann leson
Ler paran i demontre kouraz parey Zefta, ki lefe sa i annan lo zot zanfan?
Ki mannyer bann Kretyen ozordi i kapab imit legzanp bann zenn fiy ki ti felisit fiy Zefta e ed li pour kontinyen demontre kouraz? B
Portre B
Ki mannyer ou kapab imit kouraz Zefta ek son fiy dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Zefta ek son fiy ler zot resisite?
Aprann plis
Ki mannyer legzanp fiy Zefta i ed bann Kretyen ki pa marye?
Gete ki mannyer Zefta ek son fiy i ansenny nou pour reste fidel avek Zeova.