Akoz zot lafwa zot ti protez Moiz

I TI deza plis ki 60 an depi ki Zozef in mor. Bann Ezipsyen ti’n fini oubliy sa zonm fidel ki Zeova ti’n servi pour sov zot nasyon ler i ti annan lafanmin. La, i ti annan en nouvo Faraon ki ti pe diriz sa pei. I ti ay e per bann Izraelit. Bann Izraelit ti pe kontinyelman ogmante parski Zeova ti pe beni zot. Alor, bann Ezipsyen ti fer bann Ebre vin zot lesklav e zot ti tret zot dan en fason dir. Kantmenm sa, sa bann lesklav ti kontinyen ogmante.

Apre sa, Faraon ti esey fer en lot keksoz kriyel. I ti donn lord pour anmenn devan li Sifra ek Poua, de madanm Ebre ki ti bann fanmsaz. Esey mazinen ki mannyer zot ti santi ler sa dirizan pwisan ti donn zot lord pour touy tou bann pti garson ki zot ti pe ede pour ne! Me sa de madanm kouraze “ti annan en gran respe pour Bondye.” Zot ti konnen ki napa personn, menm si i pwisan, ki ti annan drwa fer zot dezobeir Zeova, Souvren liniver. Sa gran respe ki zot ti annan pour Bondye ti ed zot pour fer en keksoz ki ti demann bokou kouraz. “Zot pa ti fer sa ki lerwa Lezip ti’n demann zot.” Me zot ti fer lekontrer: Zot ti ede pour protez e sov otan pti baba ki zot ti kapab. Faraon ti vreman ankoler me zot pa ti dir li sa ki zot ti pe fer. Zeova ti vwar sa ki zot ti pe fer. Alor, “Bondye ti beni sa bann fanmsaz.” Pli tar, i ti fer zot ganny zot prop fanmir.

Ler Faraon ti realize ki son plan pa ti pe marse, i ti deside pour fer en keksoz vreman kriyel: I ti donn lord pour noy tou bann pti garson dan Larivyer Nil! Pandan sa letan, en koup Ebre, Amram ek Zokebed, ti bezwen fer en desizyon vreman difisil. Zot ti deza annan de zanfan, Miriyam ek Aaron. Me ler Zokebed ti tonm ansent avek zot trwazyenm zanfan, zot ti konnen ki si i en pti garson son lavi ti pou vreman an danze. Ler sa pti baba ti ne, zot ti esey kasyet li pour kantite letan ki zot ti kapab. Me i pa fasil pour kasyet en pti baba. Ler i ti annan trwa mwan, Zokebed ti pran en pannyen e i ti pas koltar lo la. Apre sa i ti met sa zanfan ladan. I ti kasyet sa pannyen parmi bann zon dan Larivyer Nil. Son fiy Miriyam ti kasyet pa tro lwen avek sa pannyen pour vey lo son pti frer.

Pa lontan apre, fiy Faraon ti vin kot Larivyer Nil pour bennyen. I ti vwar sa pannyen e i ti anvoy son lesklav pour al serse. Ler i ti ouver sa pannyen, i ti vwar en zoli pti garson pe plere e i ti pran pitye pour li. Alor i ti deside pour adopte li me i ti realize ki i ti pou bezwen en dimoun pour donn li tete. Deswit Miriyam ti tay kot li e i ti demann li si i kapab rod en dimoun pour donn tete sa pti baba. Fiy Faraon ti dakor. Apre Miriyam ti retournen avek son manman. Imazin sa lazwa ki Zokebed ti bezwen santi ler i ti tande ki i ti pou kapab donn tete e pran swen avek son pti baba ki i ti kontan e deplis ganny peye pour fer sa! Sirman, Zokebed avek Amram ti fer tou sa ki zot ti kapab pour ansenny zot pti garson lo Zeova. Me sa zour ti arive kot zot ti bezwen donn fiy Faraon sa pti garson. Sa prenses ti apel li Moiz.

Eski Zeova ti rekonpans Amram, Zokebed ek Miriyam pour sa lafwa ek kouraz ki zot ti demontre? Byensir! Amram ek Zokebed ti elve Miriyam ek Aaron pour vin bann serviter fidel Zeova. Zot ti osi vwar ki mannyer Zeova ti pe protez Moiz. Labib pa dir si paran Moiz ti viv ase lontan pour vwar ki kalite dimoun Moiz ti vini. (Egz. 6:20) Me Miriyam ek Aaron ti la e zot ti vwar ki mannyer Zeova ti servi Moiz pour fer bann keksoz ekstraordiner. Zot tou le trwa zot ti demontre lafwa ek kouraz remarkab. Dan sa lot sapit, nou pou vwar ki mannyer Moiz ti grandi e deside pour servi Zeova.

Lir sa resi dan Labib:

• Egzod 1:6–2:10

• Akt 7:17-21

• Ebre 11:23

Pour diskit lo la:

Ki mannyer bann fanmsaz ek fanmir Moiz ti demontre kouraz?

Al pli o profon

1. 1. Ki bann arkeolog in dir ki montre ki sa resi i egzakt? (g04-E 8/4 4 ¶4–5 ¶1)

   Ou larepons

2. 2. Ki levidans i annan ki montre ki sa resi Labib konsernan sa pannyen ki’n ganny fer avek papiris ek sa lord ki Faraon ti donnen pour touy bann pti baba Ebre i vre? (g04-E 8/4 6 ¶1-2) A

   Ou larepons

   

   Christine Osborne Pictures/Alamy Stock Photo

3. 3. Ki nou konnen lo bann fanmsaz Ebre e ki mannyer zot ti ganny beni? (w03 1/11 22 ¶3-4; it-E “Midwife”) B

   Ou larepons

   

4. 4. Ki mannyer Miriyam ti kontinyen demontre lafwa remarkab ziska dan son vye zour? (ijwia lartik 7 ¶14-18)

   Ou larepons

Reflesir lo sa bann leson

• Ki paran i kapab aprann avek Amram ek Zokebed?

  Ou larepons

• Ki bann frer ek ser dan en fanmir i kapab aprann avek Miriyam ler i ti zenn? C

  Ou larepons

  

• Ki mannyer ou kapab imit kouraz Sifra ek Poua dan ou lavi?

  Ou larepons

Reflesir lo Zeova ek son plan

• Ki sa resi i ansenny mwan lo Zeova?

  Ou larepons

• Ki mannyer sa resi i relye avek plan Zeova?

  Ou larepons

• Ki mon ti pou kontan demann sa bann dimoun dan sa resi Labib ler zot resisite?

  Ou larepons

Aprann plis

Gete ki mannyer nou kapab aprann atraver legzanp bann madanm ki ti demontre kouraz e dezobeir en Faraon.

“Bann Fanm ki ti fer Leker Zeova kontan” (w03 1/11 22-23 ¶3-5)

Eski Zeova i kontinyen pran swen avek bann ki obeir li avek kouraz plito ki obeir bann imen?

We Belong to Jehovah (6:55)