8 ZOZEF
I ti reziste tantasyon
LER Zozef ti zenn, son papa Zakob e son Bondye Zeova ti kontan li en kantite e i ti ganny latansyon spesyal. Me sa pa vedir ki lavi ti fasil pour Zozef. Plito, son bann frer ti ay li. Vi ki Zakob ti tret Zozef dan en fason spesyal, son bann frer ti zalou li, zot ti tret li dan en fason kriyel. Ler Zeova ti fer li ganny bann rev ki ti predir ki en zour sa fanmir ti pou bezwen tonm azenou devan Zozef, son bann frer ti ay li plis ankor.
En zour, ler Zozef ti annan apepre 17 an, Zakob ti anvoy li lo en vwayaz ki ti pou pran plizyer zour pour li gete ki mannyer son bann frer ti ete. Zot ti atak li e zet li dan en pwi ki ti’n sek. Zot ti sitan kriyel ki menm si i ti sipliy zot, zot ti inyor li konpletman. Menm si zot ti’n fer konplo pour touy li, zot ti deside pour plito vann li avek bann marsan ki ti pe pase. Pli tar, sa bann frer ti anbet Zakob e fer li krwar ki en zannimo ti’n touy Zozef son garson ki i ti kontan. Me an realite, Zozef ti’n ganny anmennen dan sid, Lezip kot i ti’n ganny vann konman en lesklav avek Potifar, en zofisye dan gouvernman Faraon.
I ti pou’n fasil pour Zozef dezespere. Me i ti plito demontre kouraz e travay dir. Labib i dir: “Zeova ti avek li.” Zeova ti fer sir ki tou sa ki Zozef ti fer ti reisi. Potifar ti’n konfye li tou keksoz dan son lakaz.
Me en move keksoz ti pros pour arive. “Zozef ti’n vin en zoli garson e i ti byen kosto” e madanm Potifar osi ti remark sa. I pa ti kasyet son santiman e i ti menm dir: “Dormi avek mwan.” Ki Zozef ti pou fer? Son fanmir ti sitan lwen. I ti en lesklav, zis en propriyete ki son bann met ti kapab fer mannyer zot anvi avek li. Sirman sa madanm ti annan pouvwar pour fer son lavi difisil. Eski Zozef ti pou les li ganny tante? Eski i ti pou annan kouraz pour dir non?
Zozef ti konnen ki madanm son met ti kapab fer son lavi difisil. Kwa ki ti ed li pa tonm dan son pyez?
Labib i dir: “Zozef ti refize.” Zozef ti dir li ki i pa ti pou trai son msye ki ti annan konfyans dan li. Pli enportan ankor, Zozef ti dir sa parol: “Ki mannyer mon kapab fer en keksoz sitan mal e fer pese kont Bondye?” Zozef ti kontan son papa Zeova e sa ti donn li kouraz pour dir non deswit. Me madanm Potifar pa ti aret fatig li. “Tou le zour” i ti koz avek Zozef. Finalman, en zour ler lezot serviter pa ti dan lakaz, i ti tyonbo lenz Zozef e dir: “Dormi avek mwan!” Zozef ti reisi sove. Me lenz Zozef ti reste dan son lanmen. Pli tar, sa madanm ti montre Potifar sa lenz e i ti dir ki Zozef ti’n sey vyol li. Potifar ti vreman ankoler e i ti met Zozef dan prizon.
Sa prizon kot Zozef ti ete ti vreman fernwanr. Pour en pe letan, zot ti anmar son lipye avek lasenn e zot ti met lasenn dan son likou. (Ps. 105:17, 18) Zozef ti’n kapab fasilman dezespere. Eski Zeova ti’n abandonn li? Non! Zozef pa ti zanmen perdi konfyans dan son Bondye. I ti travay dir dan prizon e Zeova ti beni li. I pa ti tarde pour li ganny bann gran responsabilite dan prizon. Lannen apre lannen, i ti kontinyen andire avek kouraz.
Akoz lafwa ek kouraz Zozef, Zeova ti kontinyen servi li. Pli tar, Zeova ti fer Faraon ganny de rev ki ti predir sa ki ti pou arive a lavenir e Zeova ti permet Zozef eksplike ki sa de rev i vedir. Zozef ti dir lerwa ki sa bann rev ti pe predir ki i ti pou annan set lannen kot zot ti pou annan bokou pour manze e apre sa, i ti pou annan ankor set lannen kot i ti pou annan en lafanmin. Faraon ti enpresyonnen. Alor, Faraon ti demann li pour prepar sa nasyon pour sa dezas ki ti pe vini. I ti fer Zozef vin en dirizan pwisan dan sa pei, zis Faraon ki ti par lao li. Akoz sa, Zozef pa ti zis anpes bann Ezipsyen mor lafen me osi son fanmir. Ler son bann frer ti vin Lezip pour rod manze, san konnen zot ti tonm azenou lafas anba devan zot pti frer. Sa rev ki Zeova ti’n fer Zozef gannyen ler i ti ankor zenn ti vin vre. Me son bann frer osi ti montre ki avek letan zot ti’n vin bann pli bon dimoun. Sa frer ki zot pa ti kontan, li menm ki ti sov zot, zot papa ek fitir nasyon Izrael. Sa in posib, akoz Zozef ti demontre kouraz e i ti gard son lafwa for dan Zeova.
Lir sa resi dan Labib:
Pour diskit lo la:
Ki mannyer Zozef ti demontre kouraz?
Al pli o profon
1. Ki levidans i annan ki montre ki sa resi konsernan lavi Zozef Lezip i vre? (g-E 11/10 15 ¶2)
2. Ki mannyer Zozef ti konnen ki pour Zeova adilter ti en keksoz vreman mal? (Zen. 39:9; w22.08 26 ¶2)
3. Akoz Zeova ti les Zozef vin premye minis Lezip? (w96-E 1/5 11 ¶4) A
Portre A
4. Ki Zozef ti fer ler i ti annan 110 an e ki mannyer sa i montre ki son lafwa ti ankor for dan Zeova? (Zen. 50:25, 26; w07 1/6 30 ¶10-11) B
Portre B
Reflesir lo sa bann leson
Ki ou aprann atraver lafason ki Zozef ti tret son bann frer ler ou ganny en problenm avek en frer oubyen en ser? (Zen. 45:4, 5; 50:19-21)
Menm ler Zozef ti lwen avek son fanmir, i ti reste fidel avek Zeova. Ki mannyer son legzanp i kapab ed nou ler . . .
nou kot lekol? C
Portre C
nou pe vwayaze? D
Portre D
nou pe servi nou telefonn oubyen en lot lekipman elektronik? E
Portre E
Ki mannyer ou kapab imit kouraz Zozef dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Zozef ler i resisite?
Aprann plis
Menm si Zeova pa ti anpes Zozef pas atraver sa bann problenm, i ti ed Zozef pour andire. Gete ki mannyer Zeova i kapab ed ou osi.
Ki mannyer bann zanfan i kapab imit legzanp Zozef ler lezot i sikann zot?