7 ZAKOB
I ti fer fas avek danze pour protez son fanmir
LER Zakob ti pros pour mor, i ti dir sa lo son lavi: “Mon lavi in kourt e i pa’n sitan fasil.” (Zen. 47:9) Sa ki i ti dir i vre! Ler i ti pli zenn, i ti bezwen sove e al reste Arann akoz son frer ti anvi touy li. Ler i ti Arann, Zakob ti tonm anmoure avek Rasel me papa Rasel, Labann, ti trik li e fer li marye avek son pli gran ser. Alor Zakob ti annan de madanm ki pa ti byen avek kanmarad. Zakob ti travay pour Labann pour plizyer lannen. Me plizyer fwa Labann ti esey vol Zakob. Zakob ti demontre en kantite kouraz, lafwa ek landirans.
En zour, Zeova ti dir Zakob ki i ti’n ariv ler pour li kit Arann e retourn kot li Kanaan. Me sa ti’n kapab danzere akoz Labann ti voras e i ti krwar ki tou sa ki Zakob ti annan ti pour li. Zakob ti koz avek son fanmir. I ti rasanble son fanmir e zot ti sove san dir Labann nanryen. Ler Labann ti tande ki zot ti’n sove, i ti rasanble son bann zonm e tay deryer zot. Ler i ti finalman zwenn Zakob ek son fanmir, i ti dispit avek Zakob akoz i ti’n ale. Labann ti menm menas Zakob e dir: “Mon kapab fer zot ditor.” Me avek kouraz Zakob ti defann son lekor. I ti dir Labann ki i ti’n tret li dan en fason enzis e anbet li pour plizyer lannen. Me an menm tan, Zakob ti pare pour fer lape. Finalman ler Labann ek Zakob ti kite, zot ti anpe avek kanmarad.
Kwa ki ti ed Zakob pour fer lape avek bann manm fanmir ki ti ankoler e menm lalit avek en lanz pwisan?
Me problenm Zakob pa ti ankor fini. Son frer Ezai ti pe vin zwenn li. Plizyer lannen pase, son manman Rebeka ti’n averti Zakob ki Ezai ti anvi touy li. Ezai ti krwar ki Zakob ti’n pran son benediksyon dan en fason malonnet. Me la, Zakob ti pe esey fer lape avek son frer. I ti’n tande ki Ezai avek 400 zonm ti pe vin kot li ek son fanmir. Zakob ti anvoy son bann serviter avek kado pour zwenn Ezai. Me eski sa ti pou ase pour kalmi lakoler Ezai? Labib i dir: “Zakob ti vreman per e i ti enkyet.” Apre, en keksoz enkrwayab ti arive.
Tar dan milye lannwit, Zakob ti vwar en dimoun ki i pa ti konnen. Sa ti en lanz Zeova e sa lanz ti konmans lalit avek Zakob. Vi ki Zakob ti krwar ki sa lanz ti pou beni li, avek kouraz i ti lalit avek sa lanz pandan plizyer erdtan. Zakob pa ti pe bes lebra menm si i ti annan 97 an e sa lanz ti bokou pli for ki li. I ti kontinyen lalit avek sa lanz e i ti menm plere. (Ose. 12:4) Zakob ti determinen e i ti konvenki ki nenport ki benediksyon ki i ti gannyen sorti kot Zeova, ti vo lapenn pour lalit. Lo gran maten, sa lanz ti tous laans Zakob e zis sa ti ase pour deranz son laans. Sa lanz ti osi dir en keksoz enportan Zakob, ki aprezan i ti pou apel Izrael. Sa non i vedir, sa enn ki lalit avek Bondye. Sa non ti al byen avek Zakob akoz i ti persiste e lalit pour ki Zeova i beni li.
Zakob ti bwete pour al kot son fanmir. Dan lwen, i ti vwar Ezai pe vini avek son 400 zonm. Zakob ti al li tousel pour zwenn zot. Anmezir i ti vin pli pre avek Ezai, Zakob ti tonm azenou lafas anba set fwa devan li. Apre sa, Ezai ti tay kot li me i pa ti tir okenn zarm. I ti plito ouver son lebra e anmay Zakob! Sa de zonm ti plere. Vi ki Zakob ti’n demontre limilite e i ti’n anvoy en kantite kado pour Ezai, sa ti fer Ezai aret ankoler. Petet i ti osi admir kouraz Zakob. Zakob ti’n reisi rod en fason pour fer lape avek son frer.
Pour larestan son lavi, Zakob ti bezwen bwete akoz son laans ti’n deranze e i ti fer fas avek en kantite lezot problenm. Me Zakob pa ti zanmen annan okenn regre akoz i ti obeir Zeova oubyen lalit avek sa lanz. Pli tar, sa zoli promes ki Zeova ti’n fer avek li ti ganny akonplir, Izrael ti vin en gran nasyon. (Zen. 28:14) Deplis, Zeova ti souvan ganny apele “Bondye Zakob.” (Egz. 3:6) Menm Zezi ti dir sa parol. I ti osi dir ki Zeova, “i pa Bondye bann ki’n mor, me Bondye bann ki vivan parski pour li zot tou zot vivan.” (Lik 20:37, 38) Alor, Zakob i annan en zoli lavenir ki pe esper li. Dan nouvo lemonn, son lavi pa pou kourt e difisil me i pou viv ere pour touzour!
Lir sa resi dan Labib:
Pour diskit lo la:
Ki mannyer Zakob ti demontre kouraz?
Al pli o profon
1. Akoz Zeova ti fer sir ki Zakob ki ti ganny drwa premye ne olye Ezai? (w03-E 15/10 29 ¶2)
2. Ki Zeova ti fer Zakob reve e ki mannyer sa ti rasir li? (w03-E 15/10 28 ¶3–29 ¶1) A
Portre A
3. Akoz Zakob ti asire ki i ti pou ganny en benediksyon avek sa lanz? (w03-E 15/10 31 ¶1) B
Portre B
4. Ki Zakob ti fer pour protez son fanmir kont lenfliyans bann Kananeen? (w95-E 15/9 21 ¶4, not)
Reflesir lo sa bann leson
Zakob ti santi li responsab pour sak mouton Labann. (Zen. 31:38-40) Ki mannyer bann berze, setadir bann ansyen ozordi i kapab demontre plis lentere pour bann mouton Zeova, setadir zot frer ek ser? C
Portre C
Ler Zakob ti per i ti priy Zeova. (Zen. 32:6-12) Ki nou aprann avek Zakob lo konman pour priye?
Ki mannyer ou kapab imit kouraz Zakob dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Zakob ler i resisite?
Aprann plis
Ki mannyer nou kapab swiv legzanp Zakob ler nou realize ki nou’n ofans enn nou frer oubyen ser?
Servi sa resi dan illustrated Bible story pour ansenny ou fanmir lo Zakob.