Repar domaz deswit!

Annou vwar en legzanp ki pou ed nou konpran sa. Ler en lezo i kase, sa lezo i bezwen ganny tretman dokter pour li kapab fonksyonn byen san okenn douler. Si sa lezo pa ganny aranze deswit, sa douler pou kontinyen. Pli pir ankor, sa lezo i kapab reste koumsanmenm e pa fonksyonn byen.

Zis parey en lezo kase i bezwen ganny redrese deswit, pour ou kapab repar domaz ki’n arive dan ou lanmitye avek en lot Kretyen, ou bezwen azir deswit. Si ou pa fer sa, sa douler ki sa domaz in anmennen pou kontinyen. Ou kapab konmans gard rankin e petet menm perdi ou zanmi. Zezi ti dir: “Pa tarde pour rezourd problenm.” (Mat. 5:25) Alor, apros ou zanmi e avek labonte koz lo sa ki’n arive. Akoz sa i kapab difisil? Annou vwar de rezon.

Premyerman, ou kapab anvi inyor sa sityasyon parski ou pa konfortab pour koz lo sa problenm.b Mazin sa ki ti arive avek de ser ki ti apel Evodi ek Sentis ki aparaman pa ti kapab rezourd en problenm ki ti arive antre zot. I tre probab ki sa problenm ti dire pour en kantite letan parski menm zapot Pol ki ti pe reste Ronm, ti tann konsernan sa sityasyon. I ti ankouraz zot pour fer tou sa ki zot kapab pour fer lape avek kanmarad. (Fili. 4:2) Si zot ti demontre limilite, koz lo sa problenm e vreman pardonn kanmarad, zot ti kapab revin zanmi ankor.

Dezyenmman, petet ou kapab ekspekte ki sa lot dimoun i aksepte tor. Me ou anvi reganny ou zanmi, pa pour rode lekel ki annan rezon oubyen lekel ki annan tor. En dokter ki pe tret en lezo ki’n kase pou konsantre lo geri sa lezo e pa lo rod tou detay konsernan kwa ki’n fer sa lezo kase. Ler ou koz avek ou zanmi, pa konsantre lo lekel ki annan tor pour sa problenm. O kontrer, gard antet ki kantite ou apresye ou lanmitye e konsantre lo sa ki ou bezwen fer pour repar sa lanmitye.

Akoz ou pa koz avek sa frer oubyen sa ser ozordi menm e fer zefor pour repar zot lanmitye? “Pa reste ankoler ziska soley kouse.” (Efe. 4:26) Ler ou fer zefor pour repar sa lanmitye deswit, ou pou protez sa ‘lape ki ini nou tou ansanm.’—Efe. 4:1-3.