KESTYON LEKTER

Ki sa de lalyans ki zapot Pol ti koz lo la dan Galat 4:24?

Apre ki zapot Pol ti’n koz lo sa relasyon ki Abraam ti annan avek Sara e avek Agar, i ti dir: “Sa bann keksoz i annan en sinifikasyon senbolik, parski sa de madanm i reprezant de lalyans.” (Gal. 4:22-24) Dan lepase, nou ti krwar ki sa de lalyans ti pe refer avek lalyans Lalwa ek sa nouvo lalyans. Me apre ki nou’n etidye sa bann verse plis, nou krwar ki nou bezwen fer en azisteman dan nou konprenezon. I paret ki Pol pa ti pe refer avek sa nouvo lalyans me avek sa lalyans ki ti ganny fer avek Abraam. Annou vwar serten detay.a

Pol ti dir ki sa lalyans Lalwa ki ti ganny fer lo Montanny Sinai an 1513 avan Kris, ti parey Agar. (Egz. 19:5, 6; Gal. 4:25) I napa okenn imen enparfe ki ti pou kapab obei sa Lalwa parfetman alor i ti fer bann Zwif rapel ki zot ti bann lesklav pese. Sa lalyans ti pou kapab ed nasyon Izrael idantifye Mesi parski i ti pou sa sel imen ki ti pou kapab obei Lalwa parfetman. Ler Mesi ti sakrifye son lavi ki ti parfe, i ti fer li posib pour bann imen enparfe ganny libere dan pese ek lanmor. (Gal. 3:19, 24, 25) Apre ki Zezi ti’n akonpli lavolonte Bondye, i ti nepli neseser pour annan Lalwa.—Rom. 10:4.

Pol ti montre ki i ti annan en diferans ant Agar ek Sara. Sara ti en “madanm lib” ki ti donn nesans “akoz en promes.” (Gal. 4:23) Sa promes ti sa lalyans ki Bondye ti’n fer avek Abraam. (Gal. 3:29; 4: 28, 30) Dan Zenez 22:18, Zeova ti dekri sa lalyans e dir: “Atraver ou desandans [setadir desandans Abraam], tou nasyon lo later pou ganny beni parski ou’n ekout mwan.”

Sa lalyans ki ti ganny fer avek Abraam, i donn plis lenformasyon konsernan sa promes ki Zeova ti fer dan zarden Edenn. (Zen. 3:15) I ti montre ki sa “desandans” ki ti’n ganny promet ti pou en desandans Abraam. Pol ti eksplike ki sa “desandans” pe premyerman refer avek Zezi Kri. Me i pe osi refer avek bann ki “pour Kris,” setadir sa 144,000 Kretyen swazir ki pou dirize ansanm avek Zezi dan Rwayonm. (Gal. 3:16, 29; Rev. 14:1-3) Ler sa promes ki Bondye ti fer avek Abraam i ganny akonplir, tou bann ki aksepte e obeir Zezi pou ganny en kantite benediksyon.

Me ki Pol ti pe esey ansennyen ler i ti refer avek sa legzanp “senbolik”? I ti montre ki si bann Zwif dan son letan ti kontinyen ensiste pour swiv Lalwa, parey Agar, zot ti pou reste dan lesklavaz. Me si zot ti aksepte “desandans” Abraam, setadir Zezi Kri, parey Sara, zot ti pou lib. Zot ti pou ganny libere dan pese ek lanmor. (Zan 8:32-34) Si zot pa ti aksepte Zezi, sa ti vedir ki zot pa ti’n konpran lobzektif Lalwa, setadir ki i ti pou ed zot idantifye Kris.

Pol ti ekri sa let pour bann Kretyen dan lavil Galat e en kantite parmi zot pa ti bann Zwif e zot pa ti’n zanmen anba Lalwa. Serten ti pe ensiste ki bann Kretyen ki pa ti Zwif ti obei Lalwa, enkli sa lalwa konsernan sirkonsizyon. Pol ti eksplike i ti pou bet pour fer sa. I ti napa okenn rezon pour zot vin “lesklav” Lalwa vi ki zot ti deza “lib” parski zot ti’n aksepte Kris.—Gal. 5:1, 10-14.