Bann diferan lasenn pwason ki i ti annan dan letan Labib

Serten parmi bann disip Zezi ti bann peser. (Mark 1:16-20) Zot ti servi lasenn ler zot ti lapes dan Lanmer Galile.

Pour fer en lasenn pwason, en dimoun ti servi bann lakord ki ti normalman ganny fer avek len e i ti anmar sa bann lakord ansanm. I ti anmar zot dan en fason ki sa bann lakord ti vin parey en lakaz bib avek en kantite trou. Si en peser ti anvi atrap bann pti pwason, i ti pou servi en lasenn avek bann pti trou. Si i ti anvi atrap bann gro pwason, i ti pou servi en lasenn avek bann gro trou. Souvandfwa, bann pti lasenn ti ron e i ti annan bann diplon oubyen bann ros avek e sa ti fer sa lasenn koule e atrap bann pwason. Tandis ki bann gran lasenn ti ganny trennen dan lanmer pour atrap pwason. Avek sa bann lasenn, i ti annan diplon anba ek bann flot anler.

Lasenn pwason ti ser. I ti kapab ganny andomaze avek ros dan fon lanmer oubyen ganny desire ler i ti annan tro bokou pwason dan lasenn. (Lik 5:6) Labib i mansyonn en moman kot Zak ek Zan ti “pe repar zot lasenn.” I tre probab ki zot ti servi en zegwir ek en difil linenn. (Mat. 4:21) I kapab ki bann peser ti fer sa sak fwa ki zot ti fini lapes. Lik ti osi dir ki bann peser ti “lav zot lasenn” pour tir labou avek. (Lik 5:2) Apre, bann peser ti met zot lasenn sek. I tre probab ki zot ti fer sa pour anpes zot lasenn pouri.—Ezek. 47:10.

Zezi ti envit bann zonm ki ti konnen ki mannyer pour servi lasenn pour “lapes dimoun.”