Konpran bann legzanp ki dan Labib

Dan Labib, i annan plizyer legzanp. Me en kantite dimoun ki lir Labib i vwar li difisil pour konpran sa bann legzanp. (Mat. 13:13) Ki ou kapab fer pour ou konpran sa bann legzanp pli byen? Esey fer sa bann keksoz swivan:

• Idantifye sa topik ki pe ganny koz lo la ek sa legzanp. Par egzanp, dan Revelasyon 3:3, Zezi i dir ki i pe vin konman en voler. Alor, sa nide prensipal i ki Zezi pe vini (sa topik) e i ganny konpare avek en voler (sa legzanp).

• Reflesir lo ki mannyer sa topik ek sa legzanp i parey. Esey mazin bann rezon akoz en topik pe ganny konpare avek en legzanp e konsernan bann keksoz ki zot annan an komen.

• Tir sa bon konklizyon. Parfwa en dimoun i kapab mal konpran en legzanp e sa i fer li tonm lo en move konklizyon. Dan sa legzanp ki’n ganny mansyonnen, Zezi pa pe vini pour li vol en keksoz. O kontrer, dapre sa konteks, Zezi pe vin parey en voler dan sans ki i pou vin dan en letan ki dimoun pa pe ekspekte e i pa pou fer konnen ki i pe vini.