Kestyon lekter

Kan ki bann nasyon pou dir “lape ek sekirite”?

Parey nou ti vwar dan “Kestyon lekter” ki ti ganny pibliye dan en Latour Veyera resaman, byento Zeova pou met dan leker “sa dis korn” (tou bann gouvernman) “son nide,” setadir ki zot donn zot pouvwar ek lotorite avek sa “bebet sovaz rouz” ki reprezant Nasyon-z-ini. Sa bebet i osi ganny apele “stati sa bebet sovaz.” (Rev. 13:14, 15; 17:3, 16, 17) Apre “sa dis korn” ek sa bebet sovaz ki fek ganny pouvwar pou detrir tou fo larelizyon lo later. Eski bann nasyon pou dir “lape ek sekirite”b avan oubyen apre ki tou fo larelizyon in ganny detrir?—1 Tesa. 5:3.

Nou pa konnen kan egzakteman bann nasyon pou dir “lape ek sekirite.” Si nou ti konn tou bann detay, nou pa ti pou bezwen reste alert e eveye. Zezi ti dir son bann disip plizyer fwa ki zot bezwen “kontinyen veye.” (Mat. 24:42; 25:13; 26:41) Aprezan annou vwar sa profesi ki Zeova ti enspir zapot Pol pour koz lo la dan sa let ki i ti ekri pour bann Kretyen Tesalonik.

Pol ti dir: “Ler zot pou dir, ‘Lape ek sekirite!’ en destriksyon pou vin lo zot en sel kou.” (1 Tesa. 5:2, 3) Souvandfwa nou bann piblikasyon i dir sa konsernan sa ki Pol ti dir: Sa proklanmasyon “lape ek sekirite” pou ganny fer zis avan gran ladetres i konmanse, ki pou konmans avek destriksyon Gran Babilonn ki reprezant tou fo larelizyon. Nou’n osi dir ki sa proklanmasyon “lape ek sekirite” pou fer nou konnen ki gran ladetres pe al konmanse.

Me apre letid o profon, nou’n konpran ki i posib ki i annan en lot leksplikasyon. I kapab ki sa proklanmasyon “lape ek sekirite” pou ganny fer apre ki tou fo larelizyon in ganny detrir. Akoz nou dir sa? Annou vwar larepons sa bann kestyon swivan.

Ki lenfliyans bann fo larelizyon in annan dan bann lager ki’n arive lo later? Labib i dir: “Disan . . . tou bann ki’n ganny touye lo later in ganny trouve dan sa lavil [“sa gran prostitye” setadir Gran Babilonn].” (Rev. 17:1, 5; 18:24) Tou dilon listwar, sa gran prostitye in siport bann lager e souvandfwa zot in responsab pour bann latak terorizm. Alor sa gran prostitye in lakoz bann lager ek vyolans dan lemonn olye lape ek sekirite. Sa i fer nou demande: Eski bann nasyon pou dir “lape ek sekirite” selman apre ki zot in detrir Gran Babilonn? Sa i posib me nou pa asire.

Ki pou arive apre ki bann nasyon in dir “lape ek sekirite”? Pol ti dir: “En destriksyon pou vin lo zot en sel kou.” (1 Tesa. 5:3) Not letid pour sa verse i dir: “Dan sa verse, Pol pe montre ki i kapab ki destriksyon bann ki pe dir ‘lape ek sekirite’ i ariv deswit apre ki zot in fer sa proklanmasyon. Me i osi kapab ki en pe letan i pase avan ki zot ganny detrir. Me zot destriksyon pou en sel kou e zot pa pou kapab sape.” Alor si bann gouvernman i dir “lape ek sekirite” apre ki bann fo larelizyon in ganny detrir, sa i vedir ki apre sa, bann nasyon pou ganny detrir vitman e en sel kou.

Ki mannyer pep Zeova pou reazir ler sa bann keksoz i arive? Pol i dir: “Mon bann frer, zot pa dan fernwanr, pour ki sa zour i sirprann zot parey lizour i sirprann en voler.” (1 Tesa. 5:4) Reflesir lo sa: Si sa proklanmasyon “lape ek sekirite” i ganny fer apre destriksyon fo larelizyon, pep Bondye pou konnen ki destriksyon bann nasyon pe al arive tre byento. Me pour bann nasyon, zot destriksyon pou vin parey en voler, en sel kou san ki zot ekspekte.

Alor, ki nou kapab ekspekte? Byento, “sa dis korn” ek sa bebet sovaz ki fek ganny pouvwar pou detrir fo larelizyon. Sa pou konmans sa gran ladetres. Nou osi konnen ki a en serten moman bann nasyon pou fer sa proklanmasyon “lape ek sekirite.” Kan ki sa pou arive? Nou’n vwar de posibilite. Premyerman: I posib ki sa proklanmasyon pou ganny fer avan ki tou fo larelizyon in ganny detrir. Dezyenmman: I posib ki sa proklanmasyon pou ganny fer apre ki bann gouvernman pou’n detrir tou fo larelizyon. Nou pou bezwen espere e vwar ki pou arive. Souvandfwa nou konpran bann profesi Labib anmezir ki zot pe ganny akonplir oubyen apre ki zot in ganny akonplir.—Konpar Zan 12:16.

Antretan, sa ki pli enportan, i pa kan sa proklanmasyon “lape ek sekirite” pou ganny fer me i ki nou reste fidel avek Bondye. Nou bezwen “reste eveye e kontinyen rezonn byen” pour ki nou pare pour sa ki pe al arive, dan nenport ki lord zot arive.—1 Tesa. 5:6.