Ki batenm i vedir e akoz i enportan pour batize?

1. Ki mannyer nou konnen ki batenm i en lansennyman dan Labib ki vreman enportan?

NOU vreman kontan ler bann nouvo i batize. Eski ou ti konnen ki bann Kretyen dan premye syek ti santi koumsa ler zot ti vwar en kantite dimoun batize Lapannkot lannen 33? Sa zour, i ti annan batenm ek en diskour ki ti ganny fer pour eksplike akoz i enportan pour batize. (Akt 2:38, 40, 41) Zapot Pol ti ekrir ki “bann lansennyman de baz konsernan Kris” i enkli “lansennyman lo batenm.” (Ebr. 6:1, 2) Menm si batenm i en lansennyman de baz, nou bezwen konpran sa lansennyman byen. Akoz?

2. Akoz nou bezwen konpran byen lansennyman lo batenm?

² Zis parey en fondasyon solid i kapab fer en lakaz stab e for, ler nou konpran byen lansennyman lo batenm, sa i kapab ed nou pour annan en lafwa for. Alor ki swa nou pe fer progre pour batize oubyen nou’n batize pour plizyer lannen, nou bezwen konpran sa lansennyman. Dan sa lartik, nou pou reponn sa bann kestyon: Kisisa batenm e akoz i enportan? Ki batenm i enplike? Akoz nou batiz o non Papa, o non Garson e o non lespri sen?

KISISA BATENM E AKOZ I ENPORTAN?

3. Ki batenm i montre lezot?

³ Ler ou batize, ou montre an piblik ki ou’n aksepte laverite konsernan Zeova ek Zezi Kri, ki ou’n repantir pour ou bann pese e ki ou’n fer bann sanzman pour ou kapab servi Zeova. Ou osi montre ki ou rekonnet ki i atraver Zezi ki Zeova i sov nou e ki ou’n promet Bondye dan lapriyer ki ou vreman anvi fer Son lavolonte e ki ou pou fer sa ansanm avek Son lorganizasyon. Ler ou fer sa promes oubyen sa dedikasyon e batize, ou konmans viv pour Zeova e sa i anmenn ver lavi eternel.

4. Ler ou ganny plonze anba delo, ki sa i montre? (Vwar portre.)

⁴ Ler ou batize, ou bezwen ganny plonze anba delo e apre ou sorti anba delo,a konmsi ou ti’n ganny antere e apre ou’n ganny resisite. (Konpar Kolosyen 2:12.) Batenm i montre ki ou’n fer bann gro sanzman dan ou lavi. Ki mannyer sa? Ler ou al anba delo, ou montre ki ou’n aret viv parey ou ti pe viv oparavan. Ler ou sorti anba delo, ou konmans en nouvo lavi e pour fer lavolonte Bondye i vin sa keksoz pli enportan dan ou lavi.

5. Ki mannyer sa travay ki ou fer pour kalifye pour batize i kapab ganny konpare avek sa travay ki Noe ti fer pour konstri lars? (1 Pyer 3:18-21)

⁵ Lir 1 Pyer 3:18-21. Nou kapab konpar sa travay ki nou fer pour kalifye pour batize avek sa travay ki Noe ti fer pour konstri lars. Si ou fek konmans aprann konn Zeova, petet ou santi ki i vreman difisil pour fer bann sanzman pour ou kalifye pour batize. I kapab paret difisil parey i ti ete pour Noe konstri sa lars. Eski i neseser pour nou fer tou sa zefor? Wi. Akoz nou dir sa? Annou reflesir konsernan Noe. Bondye ti dir Noe egzakteman ki mannyer pour konstri sa lars e Noe ti bezwen swiv sa bann lenstriksyon byen pour li kapab sov son lavi pandan Deliz. Vi ki Noe ti annan lafwa e i ti obei Zeova, Zeova ti ed li e i ti kapab konstri sa lars. Parey Noe, ou osi ou kapab fer ‘tou sa ki Bondye i demann ou pour fer.’—Zen. 6:22.

6. Ki mannyer batenm i kapab sov ou?

⁶ Dan 1 Pyer 3:21, zapot Pyer ti ekri ki batenm pe “sov zot.” Byensir, sa aksyon ganny plonze anba delo pa sov dimoun e i pa fer nou pese ganny pardonnen. Zis sakrifis Zezi ki fer li posib pour nou ganny pardonnen nou pese. (1 Zan 1:7) Me batenm i en laspe enportan bann lord ki Zeova in donnen e i sa fason ki ou “demann Bondye pour annan en konsyans kler.” Zeova pou kontan pour pardonn ou pese gras a sakrifis Zezi. Dan sa fason, batenm i “sov [nou]” setadir i fer li posib pour nou viv pour touzour.

KI BATENM I ENPLIKE?

7. Ki mannyer en batenm i devret ganny fer?

⁷ Labib pa donn bokou detay konsernan lafason ki batenm i devret ganny fer me i dir ki ler en dimoun i batize, i bezwen ganny plonze anba delo. Me Labib i ed nou konnen kwa ki apropriye pandan en batenm. Par egzanp, bann prensip dan Labib i ed bann kandida batenm pour konnen ki mannyer pour sanze ler zot pe al batize e i osi ed bann ki pe obzerv sa batenm pour konnen ki mannyer pour konport zot pandan sa levennman. (1 Kor. 14:40; 1 Tim. 2:9) Dan nou letan, i normalman en ansyen ki batiz dimoun e nou evite donn sa ansyen okenn latansyon spesyal. (1 Kor. 1:14, 15) Osi i pa enportan ki kantite dimoun ki obzerv en batenm, ki swa en ptigin dimoun oubyen en kantite dimoun.—Akt 8:36.

8. Ki bann kestyon ki bann kandida batenm i ganny demande e akoz? (Akt 2:38-42) (Vwar portre.)

⁸ Labib i dir ki nou devret “anons sa parol an piblik pour [nou] ganny sove” setadir nou bezwen eksprim nou lafwa. (Rom. 10:9, 10; vwar not letid “publicly declare” dan nwtsty-E.) Nou fer sa zour nou batenm. I pour sa rezon ki bann kandida batenm i ganny demande de kestyon. Premye kestyon i, “Eski ou’n repantir ou bann pese, dedye ou lavi avek Zeova e aksepte son laranzman pour ganny sove atraver Zezi Kri?” Sa kestyon i konsantre lo bann keksoz ki sa dimoun in fer pour li kalifye pour batize e i en pe parey sa ki Pyer ti dir bann dimoun zour Lapannkot. Sa dezyenm kestyon i, “Eski ou konpran ki ou batenm i idantifye ou konman en Temwen Zeova e ki ou form par lorganizasyon Zeova?” Sa kestyon i fer nou rapel ki nou bezwen viv dapre nou dediksyon. Nou fer sa par obei bann lenstriksyon ki nou gannyen atraver lorganizasyon Zeova e nou servi Bondye ansanm avek nou bann frer ek ser, zis parey bann disip dan premye syek ti fer. (Lir Akt 2:38-42.) Bann ki dir wi pour sa de kestyon avek tou zot leker, i kalifye pour batize.

9. Ki tou dimoun i bezwen fer pour ganny laprouvasyon Bondye?

⁹ I kapab ki avan ou ti aprann laverite, ou ti viv dan en bon fason e ou pa ti fer okenn pese grav. Oubyen i kapab ki ou’n grandi dan laverite e ou paran in ed ou pour kontan Zeova. Eski malgre sa ou ankor bezwen repantir e batize pour ganny laprouvasyon Bondye? Wi. Nenport ki fason ki nou’n grandi, nou tou nou bezwen rekonnet ki nou’n erit pese e sa in fer nou elwannyen avek Bondye. (Ps. 51:5) Me anmezir ki nou aprann konn Bondye, nou swazir pour met son lavolonte avan sa ki pour nou. Ler nou fer sa, nou kapab repantir pour bann move keksoz ki nou’n fer dan lepase e konmans viv nou lavi dan en fason ki fer plezir nou Papa ki dan lesyel. Apre sa, nou kapab batize.—Akt 3:19.

10. Ki ou devret fer si ou’n deza batize dan en lot larelizyon?

¹⁰ Si oparavan ou ti’n batize dan en lot larelizyon, ou ankor bezwen batize konman en Temwen Zeova. Akoz sa? Parski sa letan ou pa ti konpran byen laverite konsernan Zeova ek Zezi. Menm si ou ti dedye ou lavi avek Bondye dan lapriyer, ou promes pa ti baze lo en bon konprenezon konsernan son lavolonte. Ler zapot Pol ti dan lavil Efez, i ti zwenn bann zonm ki ti’n batize me zot pa ti’n byen konpran laverite konsernan Zezi. Alor i ti fer zot batiz ankor.b (Akt 19:1-5) Ozordi osi, pour en dimoun kalifye pour batize i bezwen konpran byen lavolonte Bondye.

“O NON PAPA, O NON GARSON E O NON LESPRI SEN”

11. Ki i vedir batiz “o non Papa, o non Garson e o non lespri sen”? (Matye 28:18-20)

¹¹ Zezi ti donn lord pour ki bann nouvo disip i ganny batize “o non Papa, o non Garson e o non lespri sen.” (Lir Matye 28:18-20.) Ki Zezi ti pe esey dir? Dan Labib, sa mo “non” i souvandfwa refer avek repitasyon en dimoun. I osi kapab refer avek pozisyon ek lotorite ki en dimoun i annan. Alor ler nou fer en keksoz “o non” en dimoun oubyen en keksoz, nou rekonnet lotorite ki sa dimoun oubyen sa keksoz i annan. (Konpar Matye 10:41; vwar not letid “because he is a prophet” dan nwtsty-E.) Annou vwar ki mannyer ou kapab rekonnet pozisyon ek lotorite ki Papa ek Garson i annan e osi rol ki lespri sen i annan.

12. Ki mannyer nou batiz o non Papa? (Revelasyon 4:11) (Vwar portre.)

¹² O non Papa. Nou rekonnet ki Zeova i nou Papa ki dan lesyel oubyen sa Enn ki donn nou lavi. I Bondye tou pwisan e Kreater tou keksoz. (Lir Revelasyon 4:11.) Nou rekonnet ki Zeova i sa Enn ki ekout lapriyer e avek respe nou servi son non ler nou priye e koz avek lezot konsernan li. (Ps. 65:2) Me i annan en lot keksoz ki nou bezwen asire ler nou batiz o non Papa. Bann dimoun ki ti pe ekout Pyer zour Lapannkot ti deza konn Zeova me aprezan zot ti pou bezwen konpran ki Zeova i sa enn ki fer li posib pour zot viv pour touzour atraver Zezi Kri.—Rom. 5:8.

13. Ki mannyer nou batiz o non Garson? (Vwar portre.)

¹³ O non Garson. Nou rekonnet ki Zezi i sel Garson Bondye. Zezi i sa “semen” setadir i atraver li ki nou kapab annan en bon lanmitye avek Zeova. (Zan 14:6) Zezi i osi nou Sover setadir sa enn ki’n mor pour nou kapab ganny lavi. Ler nou konn sa, sa i motiv nou pour swiv son legzanp toulezour, pa zis ler nou batize. (1 Zan 2:6) Alor parey Zezi, nou anons sa bon nouvel avek devouman e nou pa les nanryen anpes nou fer sa. (Lik 4:43) Nou menm pare pour ganny persekite akoz nou servi Bondye. (2 Tim. 3:12) Vi ki nou annan respe pour Zezi konman “sef kongregasyon,” nou obei bann ki i’n swazir pour dirize e pour pran swen avek son bann disip.—Efe. 4:8, 11, 12; 5:23.

14. (a) Ki mannyer nou batiz o non lespri sen? (Vwar portre.) (b) Ki lezot batenm bann Kretyen swazir i gannyen? (Vwar bwat “Lezot batenm ki bann Kretyen swazir i gannyen.”)

¹⁴ O non lespri sen. Nou aksepte laverite konsernan lespri sen. Lespri sen pa en dimoun e i pa form parti en Trinite me i lafors aktif Bondye. Nou rekonnet ki lespri sen ti gid bann profet ek bann ekriven Labib alor nou lir Labib regilyerman e nou aplik son bann lansennyman. (2 Pyer 1:20, 21) Osi, nou evite fer bann pese grav parski sa i kapab anpes nou e menm kongregasyon ganny lespri sen Bondye.—Efe. 4:30.

15. Ki nou devret determinen pour fer?

¹⁵ Si ou’n fini batize e ou en Temwen Zeova, kontinyen fer zefor pour konpran byen sa “lansennyman lo batenm”c e gard sa promes ki ou ti fer avek Zeova ler ou ti dedye ou lavi avek li e batize. Me ki ou pou fer si ou pa ankor batize? Eski i annan en keksoz ki pe anpes ou batize? Dan sa lartik ki swiv, nou pou vwar ki mannyer ou kapab kontinyen fer progre pour ou kapab batize.