Ki mannyer nou kapab ed nou fanmir ki pa Temwen Zeova?

1-2. Kwa ki’n kapab afekte ou relasyon avek ou fanmir ler ou ti fek aprann laverite?

ZEZI ti dir en zonm ki ti anvi vin son disip: “Al kot ou fanmir e rakont zot tou sa ki Zeova in fer pour ou.” (Mark 5:19) Zezi ti dir sa parski i ti konnen ki laplipar dimoun i kontan pour partaz bann bon nouvel avek bann dimoun ki zot kontan.

² Eski ou rapel ki mannyer ou ti santi ler ou ti fek aprann sa bon nouvel? I tre probab ki ou ti vreman eksite e ou pa ti kapab kit sa ki ou ti pe aprann pour ou menm. Me i kapab ki ou bann fanmir pa’n reazir byen. Oubyen i kapab ki lafason ki ou ti koz avek zot lo laverite ti fer zot ankoler. Si wi, ki mannyer ou kapab gard oubyen reganny en bon lantant avek ou bann fanmir san ki ou kas bann prensip Zeova?

3. Ki nou pou vwar dan sa lartik?

³ Dan sa lartik nou pou vwar: (1) Ki mannyer konpasyon i kapab motiv nou pour demontre lentere dan nou fanmir ki pa Temwen Zeova, menm si zot pa anvi aprann lo Zeova? (2) Ki nou kapab fer ler nou fanmir i dir oubyen fer bann keksoz ki bles nou santiman? (3) Ki mannyer ler nou annan pasyans e nou annan lespwar sa i kapab ed nou bann fanmir pour rekonnet laverite? e (4) Ki mannyer nou kapab montre zot ki nou kontan zot?

KONPASYON POU MOTIV OU POUR ED ZOT

4. Ki mannyer Zezi ti reazir anver bann ki pa ti enterese avek son mesaz?

⁴ Zezi pa ti aret esey ed bann dimoun ki pa ti enterese dan son mesaz. Zezi ti konpar son lekor avek en zardinyen ki ti travay dan en plantasyon rezen ki ti fer tou sa ki i kapab pour fer en pye fig ki pa ti pe raporte, raport fri. (Lik 13:6-9) Ler Zezi ti donn sa legzanp, i ti’n fer plis ki trwa-z-an depi ki i ti pe esey ed bann Zwif pour devlop lafwa dan li. Akoz i ti kontinyen esey ed zot? Zezi ti annan konpasyon e sa ti ed li pour demontre pasyans anver bann dimoun.

5. Kwa ki ti motiv Zezi pour demontre konpasyon anver bann Zwif?

⁵ Zezi ti annan konpasyon parski bann sef relizye pa ti’n ed bann Zwif pour devlop lafwa dan Bondye. Zezi ti vwar ki bann dimoun ti parey “bann mouton ki napa berze.” (Mark 6:34) Pa bokou letan avan Zezi ti mor, i ti menm plere pour Zerizalenm parski i ti konnen ki laplipar son zabitan ti pou mor akoz zot napa lafwa. (Lik 19:41-44) Ler nou devlop bann santiman koumsa pour nou fanmir, sa pou motiv nou pour ed zot.

6. Akoz nou devret demontre pasyans anver nou fanmir ki pa Temwen Zeova? (Galat 6:9)

⁶ Lir Galat 6:9. Menm si nou fanmir pa anvi aprann konsernan Zeova la konmela, nou devret demontre pasyans anver zot e pa aret “fer sa ki byen.” Nou konnen ki i pran letan pour en dimoun aret annan bann prezidis e pour demontre lafwa. Eski petet dan lepase ou ti parey bann ki ‘napa lespwar e ki pa ti konn Bondye’? (Efe. 2:12) Si wi, san dout en dimoun ti vin ed ou. Pa ou osi anvi ed ou fanmir satisfer zot bezwen spirityel si i posib?

PA KONSANTRE LO BANN MOVE KEKSOZ KI ZOT DIR E FER

7. Kwa ki’n kapab anpes bann demi frer Zezi annan lafwa dan li?

⁷ I tre probab ki bann demi frer Zezi ti’n tann konsernan bann mirak ki Zezi ti’n fer ler i ti Galile. (Lik 4:14, 22-24) Me o konmansman zot pa ti annan lafwa dan li. (Zan 7:5) Akoz? Labib pa dir nou me Labib i donn omwen de rezon akoz serten Zwif pa ti vin bann disip Zezi. Serten ti per ki zot ganny rezete par lezot Zwif. (Zan 9:18-22) Serten ki ti konn Zezi depi ler i ti ankor zenn pa ti kapab krwar ki i ti reprezantan Bondye. (Mark 6:1-4) I kapab ki bann demi frer Zezi ti mazin koumsa zot osi. Eski i posib ki ou fanmir osi i santi parey?

8. Kwa ki kapab fer nou fanmir ki pa Temwen Zeova dir oubyen fer bann keksoz ki bles nou santiman?

⁸ Esey konpran akoz zot dir oubyen fer serten keksoz. I kapab ki bann frer Zezi ti parmi bann manm fanmir ki ti’n dir ki Zezi in “perdi latet.” (Mark 3:21) Petet kwa ki ti fer zot dir sa? Konteks sa verse i montre ki sa letan, Zezi ti sitan bizi pe prese e geri dimoun ki i ti napa ni menm letan pour pran en repa. (Mark 3:20) Eski bann fanmir Zezi ti krwar ki i ti en fanatik? I posib. Nou bann fanmir i kapab krwar ki nou pran nou larelizyon tro o serye. I ti pou byen ki nou montre zot par sa ki nou dir e fer ki nou rezonnab.

9. Kwa ki kapab ed nou fanmir pour sanz lafason ki zot santi anver nou? (1 Pyer 3:1, 2) (Vwar portre.)

⁹ Annan en bon kondwit. Ler nou koz dan en bon fason e nou demontre labonte, sa i kapab motiv nou fanmir pour sanz lafason ki zot santi anver nou. (Lir 1 Pyer 3:1, 2.) En msye ki pa Temwen Zeova i kapab santi li tousel oubyen ankoler ler son madanm i al renyon oubyen predikasyon. Vi ki sa madanm pa anvi ki son msye i santi koumsa, petet i kapab sanz ler ki i fer son bann aktivite spirityel pour li kapab pas plis letan avek son msye. Par egzanp, i kapab al predikasyon ler son msye i bizi oubyen ler i pa kot lakour. Ler en madanm i rezonnab e i pare pour fer bann sanzman, sa i kapab ed son msye pour sanz son lopinyon lo Temwen Zeova.

10. Ki mannyer nou kapab swiv legzanp Zezi ler lezot i kritik nou?

¹⁰ Pa bezwen santi ki ou bezwen reponn sak fwa zot kritik ou. Ler en dimoun ti dir ki Zezi i manz e bwar tro bokou, i pa ti ankoler e esey defann son lekor. O kontrer i ti ankouraz zot pour obzerv li e deside pour zot menm si sa bann move keksoz ki zot ti’n tande ti vre oubyen non. (Mat. 11:19) Atraver son legzanp, i ti osi montre ki i rezonnab e zwaye. (Konpar Zan 2:2, 6-10.) Pareyman, pa bezwen santi ki ou bezwen reazir sak fwa ki ou ganny kritike. O kontrer par nou aksyon, montre nou fanmir ki nou rezonnab e nou zwaye. Zot pou kapab vwar sa pour zot menm e sa i kapab motiv zot pour rezet bann fo lenformasyon ki zot in tande lo nou.

DEMONTRE PASYANS E ANNAN LESPWAR

11. Ki mannyer Zezi ti tret son bann frer?

¹¹ Bann Levanzil i montre ki Zezi ti toultan demontre pasyans anver son bann frer. Par egzanp, zot osi zot ti Kana ler Zezi ti fer son premye mirak. (Zan 2:11, 12) Parey nou’n vwar pli boner, bann frer Zezi pa ti annan lafwa dan li me Zezi pa ti aret pas letan avek zot. Labib i dir ki apepre trwa-z-an apre ki Zezi ti’n fer son premye mirak Kana, i ti koz byen avek son bann frer.—Zan 7:5-8.

12. Kwa ki kapab ed nou pour kontinyen annan lespwar ki nou fanmir i kapab servi Zeova en zour?

¹² Ler nou konpran ki kantite Zeova i pran pitye, sa i kapab ed nou pour kontinyen annan lespwar. Ler tou fo larelizyon i ganny detrir, i kapab ki nou fanmir i rapel ki nou ti’n deza dir zot ki sa pou arive.a (Rev. 17:16) Zot kapab menm vin servi Zeova ansanm avek nou apre ki gran ladetres i konmanse. Si nou fanmir pe pas dan problenm la konmela, nou pou fer tou sa ki nou kapab pour ed zot. Ler zot vwar ki nou lanmour ek labonte i senser, petet sa i kapab fer zot pli anvi aksepte bann laverite ki dan Labib.

MONTRE ZOT KI NOU KONTAN ZOT

13. Menm si nou bizi dan servis Zeova, ki nou devret fer atansyon?

¹³ Menm si nou bizi dan servis Zeova, nou pa anvi nou fanmir i krwar ki nou napa letan pour zot oubyen ki nou nepli kontan zot. (Mat. 7:12) Ki mannyer nou kapab montre ki nou kontan zot? Annou vwar detrwa fason.

14-15. Ki en fason ki nou montre ki nou kontan nou fanmir ki pa Temwen Zeova? Donn en legzanp.

¹⁴ Gard kontak avek zot e montre zot ki ou kontan zot. Nou montre ki nou kontan nou fanmir par les zot konnen ki mannyer nou ete tanzantan. Par egzanp, ou kapab anvoy zot en teks ek detrwa portre ki ou’n tire pandan vakans, en vwayaz oubyen pandan en moman avek bann zanmi. Ou kapab donn zot en pti kado oubyen en pti let. Petet i sanmenm tou ki ou bezwen fer pour amelyor ou relasyon avek ou fanmir. Ler nou pran linisyativ pour fer bann keksoz koumsa, nou montre zot ki nou kontan zot.

¹⁵ Annou vwar leksperyans en ser ki apel Anna, ki reste Larmeni. Son fanmir i kontan pas en kantite letan ansanm sirtou ler i annan en lanniverser nesans e pandan bann lafet. Ler Anna ti aksepte laverite, son fanmir ti konmans enkyet ki son nouvo larelizyon ti pou afekte zot relasyon. Zot ti osi enkyet konsernan ki mannyer son desizyon pour vin en Temwen Zeova ti pou afekte son lavenir. Ki Anna ti fer dan sa sityasyon? I dir: “Ler mon ti vizit mon fanmir, mon ti dir zot ki pe pase dan mon lavi e kwa ki ti pe fer mwan bizi. Mon ti osi envit zot kot mwan e entrodwir zot avek mon bann zanmi. Sa i fer ki laplipar mon fanmir i konn mon bann zanmi e zot santi zot konfortab avek zot.” Anna i osi dir: “En kantite mon bann fanmir in dir ki zot remarke ki mon zwaye e zot nepli enkyet pour mwan.”

16. Ki mannyer Zezi ti demontre lentere dan son demi frer Zak? (Vwar not.)

¹⁶ Montre zot ki ou enterese avek sa ki pe pase dan zot lavi. Apre ki Zezi ti’n resisite, i ti montre ki i ti enterese avek son frer Zak par aparet avek li. (1 Kor. 15:7) Eski ou kapab imazinen ki mannyer Zak ti santi ler i ti realize ki Zezi ti ankor enterese avek li? I tre probab ki i ti sa moman ki Zak ti konvenki ki Zezi ti Mesi. Apre ki Zezi ti’n vizit Zak, i kapab ki Zak ti ed lezot manm fanmir pour konpran ki Zezi ti Mesi.b—Akt 1:14.

17. Ki mannyer nou kapab aplik sa prensip ki dan Romen 12:15? (Vwar portre.)

¹⁷ Lir Romen 12:15. Si nou demontre lentere dan bann dimoun ki nou kontan dan bann moman kot zot vreman bezwen, ki swa dan bann bon moman oubyen dan bann move moman, sa i kapab ed zot pour sanz zot latitid anver nou.c Par egzanp, ler enn ou fanmir i ganny en pti baba, ou kapab rezouir avek zot e donn zot en pti kado pour montre zot ki ou kontan pour zot. Ler en dimoun ki zot kontan i mor, ou kapab konsol zot, ofer pour ed zot oubyen anvoy zot en kart. Byensir ou kapab pran kontak avek zot regilyerman sirtou ler zot pe pas dan bann moman difisil.

18. Ki mannyer nou kapab swiv legzanp disip Andre?

¹⁸ Entrodwir zot avek bann frer ek ser dan kongregasyon. Ler disip Andre ti konpran ki Zezi ti sa Mesi, deswit i ti entrodwir Zezi avek son frer Pyer. (Zan 1:40-42) Eski nou kapab fer en keksoz en pe parey? Par egzanp, eski tanzantan ou kapab envit en manm ou fanmir pour en renyon oubyen pour en repa ansanm avek ou bann zanmi? Ler nou entrodwir li avek bann frer ek ser dan kongregasyon, i pou vwar ki bann Temwen Zeova i bann dimoun normal, ki zantiy.

19. Menm si nou fanmir pa vreman konpran serten nou bann krwayans, ki mannyer nou devret tret zot? (1 Pyer 3:15)

¹⁹ Lir 1 Pyer 3:15. I kapab ki nou fanmir pa vreman konpran akoz nou refize fer serten keksoz me zot pou toultan rapel ki nou ti tret zot avek labonte ek respe. Menm si nou pa pou selebre serten lafet oubyen partisip dan serten koutim ansanm avek zot, i kapab ki zot pou kontan ler nou fer zefor pour pas letan avek zot dan lezot moman. Par egzanp, nou kapab vizit zot, pran en repa avek zot e donn zot bann pti kado dan lezot moman.

KONTINYEN ANNAN LESPWAR KI EN ZOUR OU FANMIR POU SERVI ZEOVA

20. Akoz legzanp Zak i kapab ankouraz nou?

²⁰ Zak ti mank sa loportinite pour vin en disip Zezi ler Zezi ti ankor lo later me pli tar i ti vin en disip. (Gal. 1:18, 19; 2:9) Menm si i ti pran letan pour vin en disip, i kler ki i ti pran aker bann lansennyman Zezi. Par egzanp, i ti ganny enspire pour ekri en let e dan sa let, i ti mansyonn bann keksoz ki Zezi ti ansennyen dan Serman lo Montanny.d

21. Akoz nou devret kontinyen annan lespwar ki nou fanmir pou deside servi Zeova en zour?

²¹ Menm si nou fer bokou zefor, i kapab ki nou fanmir pa aksepte laverite oubyen zot pa reazir byen ler nou demontre lentere dan zot. Akoz nou devret kontinyen demontre labonte anver zot? Parski sak fwa nou demontre labonte anver zot, nou pe swiv legzanp nou Bondye ki pran pitye ek son Garson Zezi. (Lik 6:33, 36) Si nou kontinyen demontre lanmour anver nou fanmir, avek letan sa i kapab motiv zot pour sanz lafason ki zot santi anver nou. Zot menm kapab rapel bann keksoz ki nou’n dir zot dan lepase konsernan Zeova ek son bann promes. Si nou kontinyen esey ed nou fanmir e demontre labonte anver zot, i kapab ki zot deside pour servi Zeova e sa pou fer nou vreman zwaye.