Ki ou pou fer si ou rankontre problenm apre ou batenm?

1-2. Ki nou kapab fer pour prepar nou pour bann problenm ki nou kapab rankontre dan laverite? Donn en legzanp.

NOU tou nou ekspekte ki nou pou ganny problenm dan sa lemonn ki ganny dirize par Satan. I pour sa rezon ki Zezi ti dir son bann disip: “I pou toultan annan keksoz ki fer dimoun tonbe.” (Mat. 18:7) Avek sa antet, nou bezwen prepar nou pour fer fas avek problenm e sa i enkli bann problenm ki nou kapab gannyen avek bann frer ek ser dan kongregasyon.

² Annou vwar en legzanp. Pep Zeova i ganny ankouraze pour prepare pour bann dezas natirel. Ki mannyer nou fer sa? Premyerman, nou bezwen rode ki bann dezas ki kapab arive dan sa rezyon kot nou reste. I vreman enportan pour fer sa sirtou si nou fek vin reste dan sa landrwa. Apre ki nou’n konnen ki bann dezas ki kapab arive, nou bezwen plàn ki pour fer si sak sa bann dezas i arive. (Prov. 21:5) Dan menm fason, nou kapab reflesir lo ki kalite problenm nou kapab rankontre dan laverite e prepar nou depi la konmela pour nou kapab pare si sa bann keksoz i arive. Koumsa sa bann problenm pou annan mwens lefe lo nou e zot pa pou gat nou lanmitye avek Zeova. (Ps. 17:5) Aprezan, annou vwar trwa kalite problenm ki nou kapab gannyen e ki mannyer nou kapab prepar nou pour sak sa bann problenm.a

EN FRER OUBYEN EN SER I OFANS OU

3. Ki problenm nou kapab fer fas avek dan kongregasyon?

³ Eski ou rapel ki mannyer ou ti santi premye fwa ou ti asiste en renyon e santi sa lanmour ki i annan parmi pep Zeova? Eski ou ti konvenki ki ou’n trouv laverite? (Zan 13:35; Kol. 3:12) Koumsanmenm ki Blancab ti santi. Me apre ki i ti’n batize, i ti fer fas avek en keksoz ki i pa ti pe ekspekte. I dir: “En ser pa ti tret mwan byen. Mon ti osi remarke ki i ti koz an mal lo lezot. Mon pa ti pe ekspekte sa parski mon ti’n aprann ki bann Temwen Zeova i fer zefor pour viv anpe avek kanmarad e pour demontre lanmour.” Byensir, ou bann frer ek ser i fer bokou zefor pour demontre bann kalite Kretyen pli byen me zot pa parfe. (Efe. 4:23, 24; 1 Zan 1:8) Alor i kapab arive ki enn i dir oubyen fer en keksoz ki bles ou santiman. (Zak 3:8) Malerezman in arive kot bann problenm koumsa in fer serten aret servi Zeova.

4. Kwa ki kapab ed ou pour prepare an ka en frer oubyen en ser i ofans ou? (Efezyen 4:32)

⁴ Ki ou kapab fer pour prepare an ka en frer oubyen en ser i bles ou santiman oubyen ofans ou? Reflesir lo sa konsey ki dan Efezyen 4:32 (Lir.) e fer li en labitid pour demontre bann kalite ki ganny mansyonnen dan sa verse. Si ou fer ou mye pour demontre labonte ek konpasyon, sa pou ed ou pour evit en kantite problenm ki pa neseser. Depi la konmela, annan sa lobzektif pour pardonn lezot volonterman pour bann fot ki zot fer. Kwa ki kapab ed ou pour fer sa? Mazin sa kantite fwa ki ou demann Zeova pour pardonn ou pour bann fot ki ou fer e lafason ki i pardonn ou volonterman. (Mat. 6:12) Ler ou fer sa, ou pou apresye lafason ki Zeova in zenere anver ou e i pou pli fasil pour ou pardonn lezot.

5. Ki prensip Labib ki kapab ed nou ler en dimoun i ofans nou? (Proverb 19:11) (Vwar portre.)

⁵ Lir Proverb 19:11. Labib i dir ki ler nou annan bon zizman,c nou pa ankoler vitman ler lezot i ofans nou. Sa prensip ti ed en ser ki apel Rima, ki ti batize detrwa lannen pase. I dir: “Ler bann frer ek ser i dir oubyen fer bann keksoz ki dapre mwan i pa zantiy, sa premye keksoz ki mon mazinen i Proverb 19:11. Mon reflesir lo zot sirkonstans, sa ki’n ariv zot dan lepase e rezon petet akoz zot in azir dan sa fason. Mon osi esey travay avek zot dan predikasyon. Sa i fer mwan konn zot pli byen.” Sa i en bon konsey. Depi la konmela, ou kapab aprann konn ou bann frer ek ser. Pli ou konpran zot, pli ou pou vwar li fasil pour pardonn zot si zot fer en keksoz ki bles ou santiman.

6. Kwa ki kapab ed nou pour annan bann bon lanmitye avek bann frer ek ser dan kongregasyon?

⁶ Ki ou kapab fer pour annan bann bon lanmitye avek lezot dan kongregasyon? Anmezir ki ou aprann konn ou bann frer ek ser, fer sir ou konsantre lo zot bann bon kalite. (Konpar Proverb 10:12; Rom. 12:10; Fili. 2:2, 3) En frer ki apel Mark ti fer sa. Annou vwar ki mannyer sa ti ed li. Anmezir i ti pas plis letan avek bann frer ek ser dan son kongregasyon, i ti remark zot bann defo. Kwa ki ti ed Mark pour li pa les defo lezot fer li aret servi Zeova? I dir: “Mon ti realize ki mon ti pe konsantre lo bann pti defo e sa ti ptipti konpare avek bann move keksoz ki en kantite dimoun ti pe fer dan sa lemonn. Mon ti konpran ki mon pa devret konsantre lo defo mon bann frer ek ser. Alor, mon ti konmans konsantre lo zot bann bon kalite.” Si ou fer parey, ou pou annan bann bon lanmitye avek bann frer ek ser dan kongregasyon.

OU KONMANS MANK BANN KEKSOZ KI OU’N KIT DERYER

7. Kwa ki kapab fer nou konmans mank bann keksoz ki nou’n kit deryer?

⁷ Ler ou ti fek aprann laverite, san dout ou ti kontan pour kit sa move lemonn Satan deryer. Petet ou kapab mazinen, ‘Ki mannyer en dimoun i kapab mank sa bann keksoz ki i’n kit deryer?’ Me i kapab ki ler ou pas dan problenm, ou konmans mazin e menm anvi serten keksoz ki ou’n kit deryer ler ou ti konmans servi Zeova. (Konpar Nonm 11:4-6.) Par egzanp, i kapab ki serten frer ek ser ti deside pour kit en karyer ki ti fer zot renonmen me ki ti pran tro bokou zot letan. I kapab ki lezot ti annan bann zanmi pros ki ti aret frekant zot ler zot ti konmans etidye Labib. I annan lezot ankor ki’n sirmont en adiksyon ki zot ti kontan me ki pa ti fer Zeova plezir. I ti pou vreman malere si en Kretyen ti les okenn keksoz ki i ti fer dan lepase fer li elwannyen avek Zeova. Ki ou kapab fer la konmela pour ki nenport kwa ki arive, ou pa zanmen fer sa bann keksoz ki ou ti fer dan lepase?

8. Ki nou aprann avek legzanp Abraam ek Sara?

⁸ Dan Labib, i annan legzanp bann serviter fidel Zeova ki ti’n kapab konmans mank bann keksoz ki zot ti’n kit deryer. Par egzanp, Abraam ek Sara ti obei Zeova e zot ti kit lavil Our, en lavil ki ti ganny proteze avek bann gro miray, pour al reste dan bann latant. (Ebr. 11:8, 9) I kapab ki parfwa zot ti mazin sa lavi konfortab ki zot ti annan dan lavil Our. Me “si zot ti’n kontinyen mazin” oubyen anvi bann keksoz lepase, petet zot ti pou’n kapab ganny tante pour retourn dan lavil Our. Me olye fer sa, zot ti konsantre lo lavenir.—Ebr. 11:15, 16.

9. Ki mannyer zapot Pol ti konsider sa bann keksoz ki i ti’n kit deryer? (Filipyen 3:7, 8, 13)

⁹ Zapot Pol ti fer bann sanzman pour li kapab servi Zeova. Avan ki i ti vin en Kretyen, i ti ganny ansennyen Lalwa Zwif par Gamalyel, ki ti en ansenyan ki bokou Zwif ti respekte. (Akt 22:3) Si i ti’n kontinyen etidye, i ti pou’n kapab ganny en pozisyon enportan dan larelizyon Zwif. (Gal. 1:13, 14) Me ler i ti aksepte sa bon nouvel, i ti kit tousala deryer. Eski son lavi ti toultan fasil apre ki i ti’n vin en Kretyen? Non. I ti ganny bate, ganny met dan prizon e bann Zwif ti ay li. (2 Kor. 11:23-26) Si i ti’n konsantre zis lo sa bann problenm e i ti konpar son lavi konman en Kretyen avek parey i ti ete avan, i ti’n kapab krwar ki son lavi ti pou pli meyer si i pa ti’n vin en Kretyen. O kontrer, i ti konsantre lo sa gran privilez ki i ti annan pour servi Zezi Kri e lo sa lavenir merveye ki i annan. Pol ti asire ki sa bann benediksyon ti annan bokou plis valer ki bann sakrifis ki i ti’n fer.—Lir Filipyen 3:7, 8, 13.

10. Ki nou devret reflesir lo la regilyerman? (Mark 10:29, 30) (Vwar portre.)

¹⁰ Ki nou kapab aprann? Si ou konmans mazin bann keksoz ki ou’n kit deryer pour ou kapab vin en Kretyen, fer sir ki ou osi mazinen akoz ou’n kit zot deryer. (Ekle. 7:10) Konpar sa bann keksoz ki ou’n kit deryer avek bann benediksyon ki ou’n gannyen ler ou’n vin dan laverite. Ou annan en lanmitye pros avek Souvren liniver. (Prov. 3:32) Ou annan en fanmir spirityel ki kontan ou. (Lir Mark 10:29, 30.) Ou osi annan en lavenir merveye. (Iza. 65:21-23) Si ou regilyerman reflesir lo bann benediksyon ki ou’n gannyen akoz ou servi Zeova, i tre probab ki ou pa pou mank bann keksoz ki ou’n kit deryer.

11. Ki ou aprann avek leksperyans Rosemary?

¹¹ En ser ki apel Rosemary ti batize ler i ti dan son bann 50 an. Remarke ki i ti fer pour ed li pa mank bann keksoz ki i’n kit deryer. I dir: “O konmansman mon ti sagren ki mon pa ti selebre Nwel parski sa ti toultan en moman zwaye ki nou ti pase an fanmir. Mon ti kontan donn kado bann dimoun ki mon kontan. Mon ti kontan vwar bann zanfan otour larb de Nwel e pour vwar sa lazwa lo zot figir ler zot ti ouver zot bann kado.” Kwa ki’n ed Rosemary? I dir: “Mon’n vwar en fason pour ranplas Nwel. Tou le lannen, mon swazir en diferan zour e mon rasanble mon fanmir. Mon donn zot kado e eksplik zot akoz mon apresye zot.” Rosemary ti fer fas avek en lot problenm. I dir: “Ler mon ti aprann laverite, mon bann zanmi ti aret frekant mwan. Parfwa mon mank zot e mon santi mwan tousel.”d Kwa ki’n ed li? I ti konmans fer plan pour al predikasyon avek diferan ser. I dir: “Ler mon’n fer sa, mon’n fer bann nouvo zanmi ki mon kontan e apresye.” Ki ou kapab aprann avek son legzanp? Petet ou mank en keksoz ki ti fer ou zwaye avan ou ti aprann laverite. Me ou kapab ranplas li avek lezot keksoz ki pli meyer e ki fer Zeova plezir. (Fili. 4:8, 9) Osi gard antet ki Zeova i toultan donn ou plis ki sa ki ou’n kit deryer.

LER LEZOT I ARET SERVI ZEOVA

12. Ki i kapab arive dan kongregasyon ki kapab fer li difisil pour andire?

¹² Ler ou ti vin en Temwen Zeova, i tre probab ki ou ti kontan pour nepli form parti sa move lemonn e ki aprezan ou form parti sa sel group dimoun ki ansenny laverite e ki esey fer sa ki byen. (Iza. 65:14) Me i kapab arive ki ou tande ki en dimoun dan kongregasyon in fer en pese grav. I kapab osi arive ki en dimoun i ganny tire dan kongregasyon. (1 Kor. 5:13) Remarke ki mannyer en sityasyon en pe parey ti fer en ser ki apel Samar santi. I dir: “Pa bokou letan apre ki mon ti’n batize, en ansyen ti fer en pese grav e i ti ganny tire dan kongregasyon. Mon ti pros pour mwan aret servi Zeova parski mon pa ti krwar ki i posib pour en ansyen fer pese kont Zeova e bles bann frer ek ser dan kongregasyon.” Byensir, nou devret toultan annan konfyans ki nou bann frer ek ser i kontan Zeova e ki zot anvi reste fidel avek li. (1 Kor. 13:4, 7) Me malerezman, tou le lannen, serten i ganny tire dan kongregasyon. I kapab difisil sirtou si en dimoun ki nou pros avek oubyen en dimoun ki nou annan respe pour li i swazir pour kit Zeova.

13. Ki nou kapab fer depi la konmela ki pou ed nou reste fidel avek Zeova si en dimoun ki nou pros avek i kit Zeova?

¹³ Ki ou kapab fer depi la konmela ki pou ed ou reste fidel avek Zeova si en dimoun ki ou pros avek i kit Zeova? Kontinyen fer zefor pour vin pli pros avek Zeova. (Zak 4:8) Ou lanmitye avek Zeova pa depan lo sa ki lezot i fer. Par egzanp, menm si souvandfwa, nou ador Zeova ansanm avek nou fanmir e avek nou bann frer ek ser dan kongregasyon, nou osi bezwen annan nou prop routin spirityel setadir nou fer lapriyer e lir Labib toulezour.—Ps. 1:2; 62:8.

14. Ki nou aprann avek legzanp zapot Pyer? (Zan 6:66-68)

¹⁴ Nou kapab aprann avek lafason ki zapot Pyer ti reazir ler en kantite disip ti aret swiv Zezi. I kapab ki sa letan, Pyer osi ti en pti pe konfize. Me remark sa ki i ti dir ki ganny rikorde dan Zan 6:66-68. (Lir.) Olye konsantre lo sa ki lezot ti pe fer, Pyer ti konsantre lo sa laverite ki Zezi ti’n ansenny li. Sa ti fer ki Pyer pa ti aret swiv Zezi. I menm parey dan nou letan. Menm si lezot i aret servi Zeova, sa pa sanz sa laverite ki nou’n aprann avek led lorganizasyon Zeova. Reste atase avek sa laverite. Samar, ki’n ganny mansyonnen pli boner, i dir: “Mon toultan esey gard antet ki zis akoz en dimoun i fer en keksoz mal, sa pa vedir ki tou dimoun dan kongregasyon i fer bann move keksoz oubyen ki sa ki lorganizasyon i ansennyen i mal. Nenport ki fason ki imen i azir, Zeova i toultan en Bondye merveye.”

15. Ki ou aprann avek leksperyans Emily?

¹⁵ Annou vwar legzanp Emily. En semenn apre ki Emily ti batize, son manman ti abandonn son fanmir e i ti ganny tire dan kongregasyon. Emily i dir: “Mon pa ti zanmen mazinen ki mon manman ti pou fer en keksoz koumsa. Sa i sa keksoz pli difisil ki’n arive avek mwan e mon mank mon manman en kantite.” Kwa ki’n ed Emily? I dir: “Mon pa tousel. Mon annan sipor mon papa e osi lezot dan kongregasyon ki’n vin parey en fanmir pour mwan. Tou dimoun i annan problenm. I pour sa rezon ki i enportan ki nou reste pros avek kanmarad e ankouraz kanmarad.” (1 Pyer 5:9) Ou pa bezwen espere ziska ki i annan en problenm pour ou vin pli pros avek ou bann frer ek ser. Kontinyen fer zefor depi la konmela. Dan sa fason, nenport kwa ki arive, ou pa pou santi ou tousel.

16. Ki ou devret rapel? (Vwar portre.)

¹⁶ Rapel ki Zeova i disiplin bann ki i kontan. (Ebr. 12:6) I anvi ki tou bann ki ganny tire dan kongregasyon i retournen. (2 Pyer 3:9) Alor si en dimoun ki ou pros avek i ganny tire dan kongregasyon, ou kapab asire ki bann ansyen pou fer tou sa ki zot kapab pour ed li retourn kot Zeova.—2 Tim. 2:24, 25.

17. Ki nou kapab asire?

¹⁷ Dan sa lartik, nou’n vwar zis detrwa problenm ki ou kapab fer fas avek apre ki ou’n batize. I vre serten sa bann problenm i kapab difisil pour fer fas avek. Me ou napa okenn rezon pour per. I annan en kantite keksoz ki ou kapab fer pour prepar ou. Osi pa zanmen oubliye ki Zeova i sa pli bon led. I’n deza ed ou e i anvi ed ou pour touzour. (1 Pyer 5:10) I pou toultan donn ou sa lafors ek sa landirans ki ou bezwen pour fer fas avek okenn problenm. Si ou kontinyen aksepte led Zeova, i pou napa okenn problenm ki pou kapab elwanny ou avek li.—Ps. 119:165; Rom. 8:38, 39.