‘Napa personn ki pli gran’

POUR plizyer syek, Zeova pa ti anvoy okenn profet pour konsey son pep. Me apre, i ti anvoy en zonm ki ti apel Zan pour anons son mesaz. Zan ti reste li tousel dan dezer Zide, en landrwa sek avek en kantite ros, kot bann serpan, skorpyon, bann gro zannimo ek bandi ti reste. Zan pa ti zis annan kouraz pour reste laba, me i ti osi anons en mesaz avek lardyes.

I bezwen ki son paran, Zekarya ek Elizabet, ti’n dir li sa ki lanz Bondye ti’n dir lo li. Alor, sirman Zan ti konpran ki i ti pou bezwen vin en profet devoue parey Eliya, en Nazireen parey profet Samyel e sa enn ki pou prepar semen pour en dimoun ki bokou pli enportan ki li. A laz 30 an, Zan ti’n kapab vin en pret parey son papa. Olye fer sa, i ti demann lepep pour zot repantir. I ti vin “sa dimoun ki pe kriye dan dezer,” ki ti’n ganny predir depi lontan. I ti telman koz avek konviksyon lo “Rwayonm lesyel” ki en kantite dimoun ti sorti dan bann lavil ek vilaz pour ekout li. I ti batiz bann dimoun ki ti repantir dan delo, parey Bondye ti’n demann li. Avek lardyes, i ti osi dir bann sef relizye pwisan, setadir bann Sadiseen ek Farizyen, ki zot ti ipokrit e move.

Zan pa ti les sa travay ki i ti pe fer, fer li vin orgeye. I ti plito dir ki i ti pe prepar semen pour sa enn ki ti pli enportan ki li. Zan ti dir ki i menm pa diny pour delarg soulye sa enn. Ler Zan ti batiz Zezi, i ti tann lavwa Zeova dir: “Sa i mon Garson ki mon kontan ki mon’n aprouve.” En pti pe pli tar, apre ki Satan ti’n tant Zezi, Zan ti dir byen for: “Gete! La Pti Mouton Bondye ki tir pese lemonn!”

Avek limilite, Zan ti ankouraz son bann disip pour swiv Zezi. En kantite disip Zan enkli Andre, frer Pyer e tre probab Zan garson Zebede, ti swiv Zezi. Pli tar, tou le de ti vin bann zapot Kris. Pour en serten letan, tou le de Zezi ek Zan ti ankouraz dimoun pour batize pour montre ki zot ti’n repantir. Ler dimoun ti dir Zan ki bann disip Zezi ti pe batiz plis dimoun ki li, i pa ti ankoler. Me avek limilite i ti dir: “Sa enn i devret kontinyen ogmante me mwan mon pou kontinyen diminyen.”

Avek lardyes, Zan ti reprimann bann dimoun enportan avek son mesaz onnet. Erod Antipas, en dirizan ki ti’n konverti dan larelizyon Zwif e ki dapre li i ti fidel, ti’n kas lalwa e marye avek Erodyad, madanm son demi frer. Avek kouraz, Zan ti dir li ki sa ti imoral. Erod ti met Zan dan prizon me sa pa ti ase pour Erodyad. I ti anvi ki Zan i ganny touye.

Ler Zan ti dan prizon, i ti rod lankourazman avek Zezi. I ti anvoy de son disip pour demann Zezi: “Eski ou sa Enn ki nou pe espere oubyen nou bezwen esper en lot?” Zezi ti demann zot pour dir Zan sa bon nouvel: “Bann aveg pe vwar aprezan, . . . bann sourd pe tande, bann mor pe ganny resisite.” Menm si Zan ti en profet parey Eliya, i pa ti zanmen ganny pouvwar pour fer mirak. Sirman, i ti rekonfortan pour Zan ki ti dan en kaso byen fernwanr, pour konnen ki i ti’n ede pour prepar semen pour Zezi, sa enn ki aprezan ti pe fer sa bann mirak.

Me pa lontan apre sa, Erodyad ti pran son revanz. Son fiy ti danse pour Erod e i ti ofer pour donn li nenport keksoz ki i ti anvi. Erodyad ti persyad son fiy pour demann Erod pour donn li latet Zan ki batize. Menm si sa kapon ti tris, i ti donn lord pour touy Zan. Zan ti kontinyen demontre kouraz ziska son lanmor.

Zezi ti dir sa lo Zan: “Mon dir zot, napa personn ki’n ne lo later ki pli gran ki Zan.” Napa okenn imen enparfe, pa ni menm bann profet parey Moiz oubyen Eliya, ki ti ganny sa privilez pour vin “sa dimoun . . . dan dezer” ki ti’n ganny predir pour prepar semen pour Mesi. Son kouraz in enspir bann Kretyen ziska ozordi.

Lir sa resi dan Labib:

• Matye 3:1-17

• Mark 6:14-29

• Lik 7:18-28

• Zan 1:6-8, 15, 19-37; 3:25-30

Pour diskit lo la:

Ki mannyer Zan ki batize ti demontre kouraz?

Al pli o profon

1. 1. Ki mannyer Zan ki batize ek Zezi ti fanmir? (w10-E 1/9 15 ¶4-6)

   Ou larepons

2. 2. Ki sa istoryen premye syek Flavius Josephus ti ekrir lo legzistans Zan ki batize? (mrt-E lartik 14) A

   Ou larepons

   

3. 3. Dan ki fason ki Zan ti annan “menm devouman ek lafors ki Eliya ti annan”? (Lik 1:17; it-E “Spirit” ¶60) B

   Ou larepons

   

4. 4. Kwa ki montre ki Zan pa’n resisite pour al dan lesyel? (Mat. 11:11; ijwbq-E lartik 178 ¶4)

   Ou larepons

Reflesir lo sa bann leson

• Menm si Zan ti akonplir bann profesi Labib e prepar semen pour Mesi, i pa ti vin orgeye. (Zan 1:26, 27) Ki nou kapab aprann atraver li?

  Ou larepons

• Zan ti viv en lavi senp, i ti fer tou pour akonplir lavolonte Bondye. (Mat. 3:4) Kwa ki kapab ed nou pour viv en lavi senp ozordi? C

  Ou larepons

  

• Ki mannyer ou kapab imit kouraz Zan ki batize?

  Ou larepons

Reflesir lo Zeova ek son plan

• Ki sa resi i ansenny mwan lo Zeova?

  Ou larepons

• Ki mannyer sa resi i relye avek plan Zeova?

  Ou larepons

• Ki mon ti pou kontan demann Zan ki batize ler i resisite?

  Ou larepons

Aprann plis

Gete kwa ki ti ed Zan pour andire avek lazwa ek pasyans.

“Zan ki batize—I ed nou aprann ki mannyer pour gard nou lazwa” (w19.08 29-31)

Ki mannyer legzanp Zan i kapab ed nou pour andir persekisyon, problenm ekonomik ek dezapwentman ki nou gannyen?

Aprann avek zot—Zan ki Batize (6:58)