34 EZEKYA
“I ti reste fidel avek Zeova”
EZEKYA ti enn parmi sa ptigin lerwa Zida ki ti vreman kontan Zeova me son papa ti vreman move. Son papa, Aaz, ti en move lerwa ki ti ankouraz lezot pour ador bann fo bondye. Aaz ti menm sakrifye omwen enn son garson avek sa bann fo bondye. (2 Rwa. 16:2-4; 2 Kron. 28:1, 3) Alor, i kapab ki Ezekya ti ganny en lanfans vreman difisil. An tou ka, ler i ti en adilt, i ti refize swiv move legzanp son papa. Ler Aaz ti mor, Ezekya ti annan apepre 25 an e ler sa zenn lerwa ti konmans dirize, i ti fer en kantite sanzman ki ti demann kouraz.
Ezekya ti reouver e repar tanp Zeova Zerizalenm e i ti tir tou bann zidol ki ti ladan e i ti ankouraz bann pret ek levit pour servi Zeova ankor. Apre, i ti anvoy bann mesaze pour envit tou bann Izraelit pour vin selebre Lapak Zerizalenm. I ti menm envit sa dis tribi dan nor ki ti’n aret servi Zeova. Serten ti monk sa bann mesaze me lezot ti vini. Dan tou le de rwayonm, legzanp Ezekya ti ankouraz bann dimoun pour detrir bann zidol ek bann landrwa ki dimoun ti pe servi pour ador bann fo bondye. Pep Bondye ti menm fer en zidol avek sa serpan an kwiv ki Zeova ti’n demann Moiz pour fer plizyer syek pase. Ezekya ti kraz sa serpan pour ki personn pa ador li ankor.
Pandan plizyer lannen, Ezekya ti kapab vwar ki i ti pou annan en move keksoz ki ti pou arive avek Izrael. Depi lontan Zeova ti’n averti rwayonm Izrael ki dan nor, ki zot ti pou ganny detrir. Zis detrwa lannen apre ki Ezekya ti’n konmans dirize, bann Asiriyen ti atak Izrael e zot ti anmenn laplipar dimoun an egzil. Eski Zida osi ti pou ganny atake? Zida parey Izrael ti osi enfidel e petet menm i ti pli pir ki Izrael. Zeova ti’n averti sa nasyon atraver son bann profet e sa ki i dir i toultan vin vre. Aprezan, anmezir ki Asiri ti pe anvair bann teritwar pre avek Zida, Ezekya ti annan rezon pour li trakase.
Pa bokou letan apre, sa larme Asiriyen ti vin atak Zida, i ti pe ganny dirize par Lerwa Senakerib, en lerwa agresiv. Sa bann lennmi pwisan ti konmans pran bann lavil dan rwayonm Ezekya enn par enn. I paret ki i ti pandan sa menm letan difisil ki Ezekya ti ganny en maladi vreman grav. I pa ti ankor ganny en garson, alor laliny desandans David ti riske disparet. Avek lafwa, i ti sipliy Zeova pour ed li. Zeova ti reponn son lapriyer. Avek lanmour, Zeova ti azout ankor 15 an lo son lavi! Me kantmenm sa, bann Asiriyen ti kontinyen vin pli pre.
Pour protez Zerizalenm, lavil sen Zeova, Ezekya ti anvoy en gro sonm larzan pour esey anpes Senakerib vin atak zot. Sa lerwa Asiriyen ti pran sa larzan me kantmenm sa i ti oule atak sa lavil. Pandan sa letan, Ezekya ti pe esey ranforsi Zerizalenm, i ti konstri en nouvo miray ek en gro rigol anba later ki ti pou anmenn delo dan lavil an ka lavil ti ganny antoure par lennmi. Ezekya ti osi ankouraz lepep e i ti reasir zot ki Zeova i bokou pli for ki okenn larme imen.
Lerwa Ezekya ti fer fas avek en gran lennmi ki ti fer pep Zerizalenm per akoz i ti menas e boufonn zot
Senakerib ti vin pli agresiv. I ti anvoy Zerizalenm en o zofisye, Rabsake, pour li provok e dekouraz lepep. Sa zonm ti mank respe e i ti monk zot lerwa ek zot Bondye, Zeova. Me Ezekya ti kontinyen annan lafwa dan Zeova e i ti ankouraz son pep. Apre sa, Senakerib ti anvoy bann let pour menas e dekouraz Ezekya. Ezekya ti anmenn sa bann let kot tanp Zeova e i ti ouver zot konmsi i ti pe montre sa Bondye tou pwisan sa problenm ki i ti pe fer fas avek. Zeova ti reponn par anvoy en mesaz avek profet Izai pour reasir Ezekya. Dan son mesaz Bondye ti dir li: Senakerib pa pou zanmen antre Zerizalenm. Son bann zonm pa pou zanmen tir ni menm en fles laba.
Sa menm zour swar, Zeova ti anvoy en lanz dan kan bann Asiriyen. Dan en pti moman, zis en lanz ti touy 185,000 solda Senakerib. Zis mazin Senakerib pe leve granmaten e i vwar tou sa bann lekor mor. I ti sove e retourn kot li dan laont. En pti pe pli tar, ler i ti dan tanp son bondye Nisrok, son bann garson ti touy li.
Ezekya ti ganny en gran laviktwar! Sa bann solda Asiriyen ti’n ganny detrir e i ti’n reganny son lasante, alor i ti ganny en garson. Malerezman i ti annan en letan kot Ezekya ti vin orgeye. Me Zeova ti disiplin li e avek limilite i ti aksepte sa disiplin. Ezekya ti vreman enn parmi bann pli bon lerwa ki ti diriz Zida. I ti demontre en kantite kouraz dan en letan vreman difisil e i ti reste fidel avek Zeova ziska son lanmor.
Lir sa resi dan Labib:
Pour diskit lo la:
Ki mannyer Ezekya ti demontre kouraz?
Al pli o profon
1. Ki bann arkeolog in dekouver ki siport sa ki Labib i dir lo Ezekya? (w11-E 1/5 15 ¶1-3) A
Zev Radovan/Alamy Stock Photo
Portre A: En sele an larzil date wityenm syek avan Kris avek sa lenskripsyon: “I apartenir Ezekya [garson] Aaz, Lerwa Zida”
2. Ki mannyer Ezekya ti akonpli sa profesi Izai konsernan “en serpan dife ki anvole”? (Iza. 14:28, 29; ip-1-E 190-191 ¶4-6)
3. Kwa ki remarkab konsernan sa ki Senakerib ti dir e sa ki i pa ti dir dan sa resi ki bann arkeolog ti dekouver Niniv? (g-E 12/10 27 ¶3-5) B
© The Trustees of the British Museum. Licensed under CC BY-NC-SA 4.0. Source
Portre B: En dokiman ki apel Taylor Prism. Bann laviktwar Senakerib in ganny ekrir lo la
4. An 2003, en group syantis ti rode si vreman rigol Ezekya ti ganny konstrir ler Ezekya ti pe dirize. Ki konklizyon zot ti tonm lo la? (w09-E 1/5 27 ¶3-5)
Reflesir lo sa bann leson
Ki mannyer legzanp Ezekya i ankouraz en Kretyen ki son papa oubyen manman pa pe ador Zeova? C
Portre C
Ler Zerizalenm ti pe al ganny atake, kwa ki ti pli enportan pour Ezekya? (2 Rwa. 19:15-19) Ki mannyer nou kapab imit son legzanp ozordi?
Ki lezot fason ou kapab imit kouraz Ezekya dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Ezekya ler i resisite?
Aprann plis
Get sa pti video eksitan ki montre bann diferan keksoz ki ti arive dan 2 Lerwa 19:14-36.
Ki mannyer sa profesi ki dan Mika 5:5 ti ganny akonplir dan letan Ezekya e ki mannyer i pe ganny akonplir ozordi?
“Ki sa set berze ek wit prens i reprezante pour nou ozordi?” (w13 15/11 18-20 ¶9-18)