33 ZEOADA
I ti protez lerwa ki Zeova ti’n swazir
ZEOADA ti aze me i ti ankor for e annan bokou devouman pour Zeova. Zeoada ti servi konman granpret dan tanp Zerizalenm pandan en letan kot en kantite move keksoz ti pe arive e i ti ed pep Bondye pour ador Zeova dan sa bon fason.
En madanm ki apel Atalya ti responsab pour en kantite move keksoz ki ti pe arive dan sa pei. Atalya ti fiy Aab, lerwa Izrael ek Zezabel, son madanm. Zot ti telman move ki Zeova ti dir ki tou zot desandans ti pou ganny detrir. Menm si Atalya ti’n marye avek lerwa Zida, i ti ay vre ladorasyon. Ler son msye ti mor, son garson ti konmans dirize konman lerwa, me Zeova ti touy li. Apre sa, Atalya ti pran tronn pardfors menm si Zeova ti apwent zis bann zonm konman lerwa e zot ti bezwen bann desandans David. Pour fer sir ki i reste larenn, i ti deside pour touy tou bann ki ti’n kapab vin lerwa. Son bann pti zanfan ki ti devret vin lerwa, alor i ti donn lord ki zot tou zot ganny touye.
En granpret ek son madanm ti riske tou keksoz pour protez en zanfan ki ti san defans kont en larenn ki ti anvi touy li
Zeoada ti’n marye avek en zenn madanm brav ki ti apel Zeoseba oubyen Zeosabeat, en manm fanmir rwayal. Zeoseba ek son msye pa ti kapab les laliny desandans David ganny detrir. Zeova ti’n promet ki en desandans David ti pou dirize pour touzour! (2 Sam. 7:12, 13) Zeoseba ti deside pour protez enn sa zeritye, en pti baba ki pa ti ankor ganny enn an. I ti pran kouraz e i ti pran sa pti baba dan pale rwayal. Apre i ti anmenn sa pti garson ek sa madanm ki ti pe okip li, kot son msye ki ti granpret. Zeoada ti swazir en lasanm ki ti izole dan tanp kot zot ti pou kapab kasyet sa zanfan.
Pandan si-z-an sa zanfan, setadir Zeoas, ti grandi anba proteksyon Zeoada e i ti viv an kasyet dan lakaz Zeova. Sa letan ti bezwen vreman difisil akoz Atalya ti kapab fer nenport kwa pour protez son lotorite. Me finalman, sa letan ti arive pour Zeoada azir. I ti fer senk sef militer ki ti fidel vin kot li e i ti dir zot sa gran sekre: En vre zeritye David ti ankor vivan! I ti demann zot pour pozisyonn 500 solda dan bann landrwa enportan e o bor tanp. Bann solda ti debout toultour sa zenn garson avek bann boukliye ek zarm sorti dan tanp, anmezir ki Zeoada ti kouronn Zeoas. Vi ki bann dimoun ti pe bat lanmen e kriye, Atalya ti vin an tayan.
I ti antre dan lakour tanp e deswit i ti konpran sa ki ti pe arive. Alor i ti fer en dernyen lesey pour li reste o pouvwar. I ti kriye: “Konplo! Konplo!” Me an realite, li menm li ki ti’n fer konplo pour vin larenn. Si i ti krwar ki i ti pou ganny sipor lezot, son lespwar ti anven. Zeoada pa ti bes lebra. I ti donn lord bann sef tanp pour anmenn sa move larenn an deor tanp. Bann solda ti obeir e zot ti touy li laba menm. Zeova ti’n dir ki “fanmir Aab antye [ti] pou mor.” (2 Rwa. 9:8) Petet Atalya ti sa dernyen dimoun dan sa move fanmir pour ganny touye.
Me Zeoada pa ti aret la! I ti osi fer lepep ek sa zenn lerwa fer en lalyans pour reste fidel avek Bondye Zeova. Apre, i ti donn lord pour kas tanp Baal e touy son pret. Apre sa, Zeoada ti fer tou sa ki i ti kapab pour ed Zeoas pour grandi e vin en lerwa ki bon e fidel. Sa granpret ti annan en bon lenfliyans lo Zeoas ziska son lanmor. Zeoada ti mor a laz 130 an. I ti ganny en gran loner pour ganny antere parmi bann lerwa ki ti’n diriz Zerizalenm.
Malerezman, ler sa zonm fidel ti mor, Zeoas pa ti reste fidel avek Zeova. I ti swiv legzanp bann prens Zida e i ti konmans promot fo ladorasyon. I pa ti ekout bann profet ki ti konsey li. En dimoun ki ti konsey li ti Zekarya, garson Zeoada. I ti demann lepep: “Akoz zot pa obeir bann komannman Zeova?” Zeoas ti ankoler e i ti donn lord pour touy Zekarya! Me Zekarya ti demontre kouraz ziska son lanmor, zis parey son papa ti’n fer. Plizyer syek pli tar, Zezi Kri ti koz an byen lo Zekarya. Parey son Papa, Zezi pa zanmen oubliy kouraz bann zonm ek madanm fidel.
Lir sa resi dan Labib:
Pour diskit lo la:
Ki mannyer Zeoada ti demontre kouraz?
Al pli o profon
1. Ki serten spesyalis Labib in dir konsernan sa “gard personnel lerwa,” (gard Karyen) ki ti ed Zeoada touy Atalya? (2 Rwa. 11:4, 19; it-E “Carian Bodyguard”)
2. Petet ki sa “Temwannyaz” i refer avek e akoz Zeoada ti met li lo Zeoas? (2 Rwa. 11:12, not.; w91-E 1/2 31 ¶5-6) A
Portre A
3. Akoz Zeoas ti donn lord pour repar lakaz Zeova? (2 Kron. 24:4-7, 11-14; it-E “Jehoash” No. 1 ¶5)
4. Zekarya ti garson Zeoada. Alor, akoz Zezi ti apel li “garson Barakya”? (“son of Barachiah” not letid lo Mat. 23:35, nwtsty-E)
Reflesir lo sa bann leson
I posib ki ler Zeoada ti kasyet Zeoas, i ti annan plis ki 100 an. Ki mannyer son legzanp i kapab ankouraz bann serviter Zeova ki aze? (Ps. 92:12, 14) B
Portre B
Ler Zeoas ti ekout Zeoada, i ti reisi. Ki leson bann zenn i kapab aprann atraver son legzanp?
Ki lezot fason ou kapab imit kouraz Zeoada dan ou lavi?
Reflesir lo Zeova ek son plan
Ki sa resi i ansenny mwan lo Zeova?
Ki mannyer sa resi i relye avek plan Zeova?
Ki mon ti pou kontan demann Zeoada ler i resisite?
Aprann plis
Ki bann zanfan i kapab aprann avek Zeoas konsernan swazir byen zot zanmi?
“Jehoash Left Jehovah Because of Bad Association” (w09-E 1/4 24-25)
Gete ki mannyer Zeoada in kit en bon legzanp pour nou dan lafason ki i ti kontribye e servi sa kontribisyon pour promot vre ladorasyon.