I ti pran byen swen avek son fanmir

I DEMANN kouraz pour vin en bon papa. Me Zozef, en sarpantye Nazaret, ti bezwen kouraz menm avan i ti vin en papa. I ti tande ki Mari, sa fiy ki i ti pe al marye avek, ti ansent. Me sa zanfan pa ti pour li. Mari ti rakont li tou sa ki ti’n ariv li pour li tonm ansent. Me sa ti en keksoz vreman difisil pour Zozef konpran e aksepte. Alor, ki i ti pou fer?

Labib i dir ki “Zozef ti fer sa ki byen.” I ti en dimoun zis, onnet e i ti obeir bann lalwa Zeova. I ti osi bon e annan konpasyon. I ti “reflesir lo tou sa bann keksoz.” Alor, pour protez Mari e pa imilye li, Zozef ti pe mazin divors li an sekre. (Sa letan, en fiyansay ti ganny konsidere parey en maryaz.) Me Zeova ti entervenir. I ti anvoy en lanz ki ti koz avek Zozef dan en rev. Sa lanz ti dir Zozef: “Pa bezwen per pour anmenn ou madanm Mari kot ou.” Sa lanz ti reasir Zozef ki Mari ti pe dir li laverite. Vreman sa zanfan ti pour Bondye e i ti pou vin Mesi!

Zozef “ti fer sa ki lanz Zeova ti’n demann li pour fer.” Avek kouraz, i ti pare pour pran responsabilite ki Zeova ti’n donn li: I ti pou bezwen pran swen avek son madanm ek Garson Bondye ki ti pe al ne. Zozef ti pou vreman bezwen en kantite kouraz.

Pa lontan apre sa, Sezar Ogis ti donn lord pour ki en resansman i ganny fer. Alor, Zozef ti pou bezwen al Betleenm pour anrezistre. Eski dapre lalwa, Mari osi ti obliz ale? An tou leka, i bezwen ki Zozef ti santi ki i ti pou pli byen kapab protez li si zot reste ansanm. Alor, zot ti fer sa gran vwayaz ansanm, menm si Mari “ti pros pour ganny pti baba.” Laba Betleenm, Mari ti konmans ganny douler e i ti ganny Zezi dan en park bef.

Zozef ti travay dir pour pran swen avek son fanmir, me i pa ti ris. Ler Zozef ek Mari ti anmenn zot zanfan kot tanp Zerizalenm, zot ti ofer en sakrifis ki bann pov ti annan drwa ofer. Pli tar, serten astrolog ki petet ti sorti Babilonn ti vwar en “zetwal” drol e zot ti swiv sa zetwal ziska lakaz kot Zozef ti pe reste Betleenm. Zot ti donn sa fanmir bann kado ki ti annan valer. Pa lontan apre sa, en lanz ti averti Zozef ki move Lerwa Erod ti anvi touy Zezi. Sa lanz ti demann Zozef pour sove avek son fanmir e al Lezip.

Avek kouraz, Zozef ti demann son madanm pour depese ansanm avek sa pti garson e kit Betleenm dan milye lannwit pour al dan en pei etranze. Me ki mannyer i ti pou pran swen avek zot laba Lezip? Sirman, i ti rekonesan pour sa bann kado ki sa bann dimoun ki ti sorti byen lwen ti’n donn zot. Pli tar, Zeova ti demann Zozef pour retourn avek son fanmir dan zot pei. Me Betleenm ti pe ganny dirize par en dimoun danzere, alor Zozef ti ekout konsey Bondye e i ti anmenn son fanmir Nazaret.

Laba, Zozef ti travay dir konman en sarpantye pour pran swen avek Mari, Zezi ek omwen sis lezot zanfan ki zot ti’n gannyen. Me pli enportan ankor, i ti pran swen avek son fanmir spirityelman. Zot ti fer li en labitid pour al sinagog regilyerman pour aprann lo Zeova e zot ti osi al bann lafet enportan Zerizalenm. Dernyen fwa ki Labib i koz lo Zozef i ler i ti per ki i ti’n perdi Zezi, ki ti annan 12 an sa letan, kot enn sa bann lafet. Zozef ki ti en bon papa ti vreman trakase sa zour! Me Zezi ti sen e sof e i ti “kontinyen soumet” avek son paran.

Labib pa dir kan Zozef ti mor, me i bezwen ki avan i ti mor i ti donn Zezi plis formasyon. Dimoun ti konn Zezi pa zis konman “garson sa sarpantye” me osi konman “sa sarpantye.” Sa i montre ki son papa ti’n montre li son metye. Zozef in kit en bon legzanp ki montre sa ki Zeova i anvi tou papa i fer. I anvi ki zot protez e pran swen avek zot fanmir fidelman, zot vin bann bon ansenyan ki fidelman desarz bann responsabilite ki Zeova i donn zot.

Lir sa resi dan Labib:

• Matye 1:18-25; 2:1-23; 13:55

• Mark 6:3

• Lik 2:1-7, 22-24, 41-51

Pour diskit lo la:

Ki mannyer Zozef ti demontre kouraz?

Al pli o profon

1. 1. Vi ki Mari ti fiy Eli, akoz Lik 3:23 i dir ki Zozef ti “garson Eli”? (w17.08 32 ¶4)

   Ou larepons

2. 2. Petet akoz Zozef pa ti annan okenn relasyon seksyel avek Mari avan Zezi ti ne? (w03-E 15/12 5 ¶5)

   Ou larepons

3. 3. Kwa ki montre ki Zozef ti travay dir? (ia 166-167 ¶15-18) A

   Ou larepons

   

4. 4. Akoz nou kapab dir ki Zozef ti mor petet ler Zezi ti ankor ase zenn? (w17.07 11 ¶8, not)

   Ou larepons

Reflesir lo sa bann leson

• Ki bann sef fanmir i kapab aprann avek Zozef lo lenportans pour obeir konsey Zeova, menm si zot bezwen fer serten sakrifis? (Mat. 1:20, 24; 2:13-15, 19-21)

  Ou larepons

• Ki Zozef i ansenny nou konsernan met Zeova premye dan nou lavi fanmir? (Lik 2:41) B

  Ou larepons

  

• Dan ki lezot fason ki ou kapab imit kouraz Zozef?

  Ou larepons

Reflesir lo Zeova ek son plan

• Ki sa resi i ansenny mwan lo Zeova?

  Ou larepons

• Ki mannyer sa resi i relye avek plan Zeova?

  Ou larepons

• Ler Zozef i resisite, ki mon ti pou kontan demann li?

  Ou larepons

Aprann plis

Dan sa video, gete ki mannyer Zozef ti pare pour obeir e fer lavolonte Zeova.

“I ti fer sa ki lanz Zeova ti’n demann li pour fer” (4:39)

Ki mannyer nou kapab imit legzanp Zozef ek Mari ler gouvernman i donn en lalwa ki kapab en lenkonvenyans oubyen enzis?

“Eski ou ‘pare pour obei’?” (w23.10 8-10 ¶9-14)