“Zot pa ti pran kont nanryen”

INYOR lavertisman i kapab anmenn maler.

Lavil Darwin an Lostrali ti pe fer preparasyon pour en lafet an 1974 ler sinyal alarm ti ganny donnen konsernan en siklonn ki pe aprose. Me i ti fer apepre 30 an ki lavil Darwin pa ti’n ganny afekte par en siklonn. Alor akoz la aprezan? Laplipar rezidan pa ti pran sa danze vreman oserye ziska ki bann gro divan ti konmans retir bann twa e grenn miray bann lakaz kot dimoun ti’n rasanble. Son lannmen, sa lavil ti aplat ater.

An Kolonbi dan Novanm 1985, en volkan ti eklate. Lanez ek ays ti fonn e fer en lavalas labou ki ti anter plis ki 20,000 zabitan lavil Armero. Eski ti napa okenn lavertisman ki ti ganny donnen davans? Sa montanny ti pe sekwe pour plizyer mwan. Me vi ki zot ti’n abitye viv pros avek en volkan, laplipar dimoun Armero pa ti fatig zot. Bann zofisye ti ganny averti ki maler ti pou arive byento, me zot pa ti fer preski nanryen pour averti piblik. Bann lanons lo radyo ti ganny fer avek bi pour rasir sa popilasyon. Legliz sa vilaz ti ankouraz dimoun pour reste kalm. Pandan lannwit, ti annan de gro leksplozyon. Eski ou ti pou’n kit ou bann zafer deryer e sove? Zis detrwa dimoun ki ti fer zefor pour sove avan ki i ti tro tar.

Souvan bann dimoun ki etidye tranbleman-d-ter i kapab predir ase byen kote i pou arive. Me byen rar ki zot kapab predir egzakteman ki ler zot pou arive. An 1999, tranbleman-d-ter dan lemonn antye ti touy apepre 20,000 dimoun. Bokou sa bann dimoun ki ti mor ti krwar ki sa pa ti pou zanmen ariv zot.

Ki mannyer ou reazir anver Lavertisman ki sorti kot Bondye?

Labib i dekrir dan en fason byen kler e byen davans bann levennman ki pou mark bann dernyen zour. An rapor avek sa, Labib i ankouraz nou pour mazin “letan Noe.” “Dan bann zour avan deliz,” bann dimoun ti preokipe avek bann keksoz dan lavi toulezour, menm si zot ti enkyet sa nivo ki vyolans ti’n arive. Konsernan sa lavertisman ki Bondye ti donnen atraver son serviter Noe, “zot pa ti pran kont nanryen ziska deliz ti vini e balye zot tou.” (Matye 24:37-39) Si ou ti pe viv sa letan, eski ou ti pou’n ekout sa lavertisman? Eski ou pe fer li la dan nou letan?

Meton ou ti viv Sodonm, pre avek Lanmer Mor, dan letan Lot neve Abraam. Ki ou ti pou’n fer? Lakanpanny sa pei ti parey en paradi. Lavil ti prospere. Dimoun pa ti pe trakas zot avek nanryen. Dan letan Lot, “dimoun ti pe manze, bwar, aste, vann, plante, konstri.” Imoralite ti’n osi ariv lo en nivo enkrwayab dan sa sosyete ki zot ti pe viv ladan. Eski ou ti pou’n pran aker sa lavertisman ler Lot ti koz kont sa bann move konportman? Eski ou ti pou’n ekoute ler i dir ou ki Bondye ti’n determinen pour detrir lavil Sodonm? Oubyen eski ou ti pou’n pran li konman en fars, parey en fitir zann Lot ti fer? Eski kekfwa ou ti pou konmans sove me apre get deryer, parey madanm Lot ti fer? Menm si lezot pa ti pran oserye sa lavertisman, zour ki Lot ti sorti Sodonm, “dife ek souf ti sorti dan lesyel e tonm parey lapli e detri tou dimoun.”—Lik 17:28, 29.

Lamazorite dimoun ozordi pa pran kont lavertisman. Me sa bann legzanp in ganny prezerve dan Parol Bondye konman en lavertisman pour nou, pour ankouraz nou pour KONTINYEN VEYE!

[Bwat/Portre lo paz 22]

Eski vreman ti annan en Deliz lo Later?

I annan bokou kritik ki dir ki Deliz pa ti arive. Me Labib i dir ki i ti arive.

Zezi Kri li menm ti koz lo la, e i ti vivan ler Deliz ti arive. I ti dan lesyel e i ti vwar ler Deliz ti pe arive.

[Bwat/Portre lo paz 23]

Eski Sodonm ek Gomor ti vreman ganny detrir?

Bann resers dan sa landrwa i prouve ki sa levennman ti arive.

Listwar imen i mansyonn sa levennman.

Zezi Kri ti konfirm sa levennman, e 14 diferan liv dan Labib i refer lo sa ki ti arive.