Obeir Lavertisman ti sov zot Lavi

ZEZI KRI ti averti davans konsernan lafen sistenm Zwif ek son tanp an Zerizalenm. I pa ti donn en dat kan sa ti pou arive. Me i ti dekrir bann levennman ki ti pou arive zis avan sa destriksyon. I ti ankouraz son bann disip pour kontinyen veye e pour elwanny zot avek danze.

Zezi ti predir: “Kan zot a war Zerizalenm antoure par bann larme, zot a konnen ki son destriksyon i pros.” I ti osi dir: “Kan zot a war sa ki apel dezolasyon abominab . . . debout dan landrwa Sen, . . . alor fodre bann ki dan Zide, sov dan montanny.” Zezi ti ankouraz son bann disip pour pa retournen pour sov zot bann keksoz materyel. Si zot ti anvi sov zot lavi, zot ti pou bezwen sove san tarde.—Lik 21:20, 21; Matye 24:15, 16.

Sestis Galis ti diriz en group larme Romen kont Zerizalenm an 66 nou lepok, pour met en lafen avek en rebelyon ki ti pe persiste. I ti menm antre dan lavil e barikad tanp. Lavil antye ti dan boulvers. Bann ki ti pe veye ti kapab vwar ki maler ti pe al arive. Me ki mannyer zot ti pou kapab sove? San ekspekte, Sestis Galis ti retir son larme. Bann Zwif rebel ti tay deryer zot. Sa ti lemoman pour sorti Zerizalenm ek lezot landrwa dan Zide!

Son lannen answit, larme Romen anba konmann Vespazyen ek son garson Titis ti retournen. Pei an antye ti an-ger. Boner dan lannen 70 N.L., bann Romen ti barikad Zerizalenm antye. I ti nepli posib pour sove. (Lik 19:43, 44) Bann diferan group dan lavil ti touy kanmarad. Larestan dimoun ti swa ganny touye par bann Romen oubyen ganny anprizonnen. Lavil ek son tanp ti konpletman ganny detrir. Dapre Zozef, en istoryen Zwif ki ti viv dan premye syek, plis ki en milyon Zwif ti soufer e mor. Sa tanp pa’n zanmen ganny rekonstri ankor.

Si an 70 N.L. bann Kretyen ti ankor dan Zerizalenm, zot ti pou’n ganny touye oubyen anprizonnen ansanm avek tou lezot dimoun. Me bann istoryen dan letan ansyen i dir ki bann Kretyen ti obeir lavertisman Bondye e kit Zerizalenm ek Zide pour al dan montanny, les avek Larivyer Zourden. Serten ti etablir zot an Pela, dan provens Pere. Zot ti abandonn Zide e zot pa ti retournen. Obeir lavertisman Zezi ti sov zot lavi.

Eski ou pran oserye Lavertisman sorti kot en bon Sours?

Apre ki zot in antann plizyer lavertisman lo bann levennman ki pa’n zanmen vin vre, bokou dimoun i pran tou lavertisman alalezer. Me ekout lavertisman i kapab sov ou lavi.

Lasin an 1975, lavertisman ti ganny donnen ki en tranbleman-d-ter ti pou al arive. Bann zofisye ti pran aksyon neseser. Bann dimoun ti reazir. Plizyer milye lavi ti ganny sove.

Filipin an Avril 1991, bann dimoun dan bann vilaz obor montanny Pinatoubo ti raporte ki lavaper ek lasann ti pe sorti dan sa montanny. Apre ki Lenstiti Volkan ek Tranbleman-d-ter ti analiz sa sitiasyon pour de mwan, zot ti averti ki sa bann dimoun ti an danze. San tarde, plizyer dizyenm milye dimoun ti ganny evakye dan sa landrwa. Boner le 15 Zen, avek en leksplozyon pwisan, plis ki 8 kilomet kib debri ti anvole dan ler e apre kouver lakanpanny. Ekout lavertisman ti sov lavi plizyer milye dimoun.

Labib i averti nou konsernan lafen sa sistenm ki nou pe viv ladan. Ozordi nou pe viv dan bann dernyen zour. Anmezir ki lafen i aprose, eski ou pe kontinyen veye? Eski ou pe pran aksyon pour ou elwanny ou avek danze? Eski ou pe averti lezot pour fer parey, vi ki lafen i pros?

[Portre lo paz 20]

Obeir lavertisman ti sov lavi bokou dimoun ler montanny Pinatoubo ti larg lasann volkan

[Portre lo paz 21]

Bann Kretyen ki ti obeir lavertisman Zezi ti sov zot lavi ler Zerizalenm ti ganny detrir an 70 N.L.