ڕاستی لەسەر باوکو ڕۆڵەو ڕۆحی پیرۆز
ئەو کەسانەی بڕوایان بە فێرکاری سێیەکانە هەیە دەڵێن کە خودا لەو سێ کەسانە پێکهاتووە کە بریتین لە باوکو ڕۆڵەو ڕۆحی پیرۆز. ئەوان دەڵێن ئەو سێ کەسە لەگەڵ یەکتری یەکسانن، واتە هەرەبەتواناترینن و سەرەتایان نییە. بەگوێرەی بیروباوەڕی سێیەکانە، باوک خودایە، ڕۆڵە خودایەو ڕۆحی پیرۆزیش خودایە، کەچی لەڕاستیدا خودا تاک و تەنهایە.
زۆربەی ئەوانەی کە بڕوایان بە سێیەکانە هەیە دانپیادەنێن کە ناتوانن ئەم فێرکارییەیان شیبکەنەوە. بەڵام سەڕەرای ئەمەش ئەوان پێیان وایە کە ئەم فێرکارییە لە پەرتووکی پیرۆزەوەیە. شایانی سەرنجە کە وشەی «سێیەکانە» هەرگیز لە پەرتووکی پیرۆزدا نەبینراوە. بەڵام ئایا بۆچوونی سێیەکانەی تێدایە؟ بۆ وەڵامی ئەم پرسیارە وەرن با بڕوانینە ئەم ئایەتانەی پەرتووکی پیرۆز کە لایەنگرانی بیروبۆچوونی سێیەکانە بۆ پشتگیری لە بۆچوونەکەیان ئاماژەیان پێدەکەن.
«وشەکە خودا بوو»
لە پەرتووکی یۆحەننادا نووسراوە: «لە سەرەتاوە وشەکە بوو، وشەکە لای خودا بوو، وشەکەش خۆی خودا بوو» (یۆحەننا ١:١). دواتر هەر لە هەمان بەشدا یۆحەننای نێرراو بە ئاشکرایی باسی دەکا کە «وشەکە» عیسایە (یۆحەننا ١:١٤). چونکە وشە بە خودا ناوی بردراوە هەر بۆیە هەندێ کەس وایلێکدەدەنەوە کە ڕۆڵە و خودا دەبێ هەریەکیان بەشێک لە خودا بن.
لەبیرت بێ کە ئەم بەشەی پەرتووکی پیرۆز لە سەرەتاوە بە زمانی یۆنانی نووسرابوو. دواتر وەرگێڕەکان لەسەر بنچینەی زمانی یۆنانییەوە وەریانگێڕایەوە سەر زمانەکانی دیکەوە. بەڵام زۆربەی وەرگێڕەکانی پەرتووکی پیرۆز دەستەواژەی «وشەکە خودا بوو»یان بەکار نەهێنا. بۆچی نا؟ بەهۆی ئەو شارەزاییەی کە لەسەر زمانی یۆنانی هەیانبوو بەو ئەنجامە گەییشتن کە دەستەواژەی «وشەکە خودا بوو» دەبێ بە شێوەیەکی جیاواز وەربگێڕدرێ. چۆن؟ لێرەدا چەند نموونە باس دەکەین: «لۆگۆس [وشە] یەزدان بوو» (وەرگێڕانێکی نوێی پەرتووکی پیرۆز [ئینگلیزی]). «وشەکە خودایەک بوو» (چاپی ڕاستکرنەوەی پەیمانی نوێ [ئینگلیزی]). «وشەکە لەگەڵ خودا بوو و ڕوانگەی وەک خودا بوو» (پەیمانی نوێ بۆ وەرگێڕەکان [ئینگلیزی]). بە گوێرەی ئەم وەرگێڕانانە، وشەکە هەمان خودا نییە.a چونکە وشەکە شوێنێکی تایبەتی لە نێوان ئافەریدەکانی یەهوەدا هەیە، بە «خودایەک» ناوی هێنراوە. لێرەدا دەستەواژەی «خودایەک» واتای تواناداری هەیە بەڵام هەرەبەتواناترین نییە.
زانیاری زۆرتر بەدەست بهێنە
ئێستا زۆربەی خەڵکی ئەو شێوە زمانی یۆنانییە نازانن کە لە سەردەمی نووسرانی پەرتووکی پیرۆزدا باو بوو. کەوابو چۆن دەزانین کە یۆحەننای نێرراو بەڕاستی مەبەستی چییە؟ بیر لەم نموونەیە بکەوە: مامۆستای خوێندنگا بابەتێک بۆ خوێندکارەکانی شیدەکاتەوە. دواتر لەسەر تێگەییشتن لە مەبەستی مامۆستاکە لە نێوان خوێندکارەکاندا بۆچوونی جیاواز سەرهەڵدەدا. خوێندکارەکان چۆن دەتوانن ئەم کێشەیە چارەسەر بکەن؟ ئەوان دەتوانن بچن بۆ لای مامۆستاکەو داوای لێبکەن دەربارەی ئەوەی وتویەتی باشتر بۆیان ڕوون بکاتەوە. بێگومان ڕوونکردنەوەی زیاتر لەسەر بابەتەکە یارمەتیان دەدا تا باشتر لە شتەکە تێبگەن. بەهەمان شێوە بۆئەوەی باشتر لە واتای یۆحەننا ١:١ تێبگەین، دەتوانین بڕوانینە درێژەی باسەکە لە زمانی یۆحەننای نێرراوەوە تا زانیاری زۆرتر لەسەر پلەی عیسا بەدەست بهێنین. زانیاری زۆرتر لەسەر ئەم بابەتە یارمەتیمان دەدا تا بە ئەنجامێکی باشتر بگەین.
بۆ نموونە، سەرنج بدە بەشی ١ ئایەتی ١٨ و بڕوانە یۆحەننا چی نووسیوە: «هەرگیز کەس خودای [هەرەبەتواناترینی] نەبینیوە». بەڵام خەڵك عیسایان بینیوە کە ڕۆڵەیە، چونکە یۆحەننا دەڵێ: «ئینجا وشەکە [عیسا] بوو بە لەشو لە ناوماندا نیشتەجێبوو، ئێمە شکۆی ئەوەمان بینی» (یۆحەننا ١:١٤). ئەدی باشە چۆن شتیوا دەبێ کە ڕۆڵەکە بەشێک لە خودای هەرەبەتواناترین بێ؟ یۆحەننا هەروەها نووسیویەتی کە وشەکە «لای خودا» بوو. ئایا هیچکات شتیوا دەبێ کەسێک لەلای کەسێکی دیکە بێ و لەهەمان کاتیشدا هەر ئەو کەسە بێ کە چۆتە لای. لەمەش زیاتر هەروەک لە یۆحەننای ١٧:٣دا تۆمارکراوە، عیسا ڕوونی دەکاتەوە کە خۆی لەگەڵ باوکی ئاسمانی دوو کەسی لەیەک جیاوازن. عیسا، باوکی وەک «تەنها خودای ڕاستەقینە» ناو دەبا. یۆحەننای نێرراو لە کۆتایی نووسینەکەی لە ئینجیلدا شتەکان لەیەک گرێ دەدا کاتێ دەنووسێ: «بەڵام ئەم نیشانانە نووسراون تا باوەڕبکەن کە عیسا مەسیحە، ڕۆڵەی خودایە، هەتا ئێوە بەهۆی باوەڕهێنانەوە ژیان بەدەستبهێنن بەناوی ئەوەوە» (یۆحەننا ٢٠:٣١). سەرنج بدە کە بە عیسا ناڵێت خودا، بەڵکو ڕۆڵەی خودا. ئەم زانیاریانە لە ئینجیل بەدەستی یۆحەننا خراونەتە ڕوو، دەریدەخەن کە چۆن لە یۆحەننای ١:١ دەبێ تێبگەین. عیسا وشەکەیە و بە هۆی ئەوەی کە پلەیەکی بەرزی هەیە وەک «خودایەک» ناوی بردراوە، بەڵام پلەی ئەو وەک خودای هەرەبەتواناترین نییە.
لە ڕاستبوونی زانیارییەکان وردبەوە
جارێکی دیکە بیر لە نموونەی مامۆستا و خوێندکارەکان بکەوە. وێنای بکە کە سەرەڕای ڕوونکردنەوەکەی مامۆستا، هەندێ لە خوێندکاران هێشتاش لە گومان و دوودڵیدا ماونەتەوە. ئەوان چی بکەن باشە؟ ئەوان دەتوانن بچنە لای مامۆستایەکی دیکە تا لەسەر هەمان بابەت زانیاری لێوەربگرن. گەر بێتوو مامۆستای دووهەم پشتیوانی لە ڕاستبوونی زانیاری مامۆستای یەکەم کرد، ئەوە ئیتر خوێندکاران دەبێ گومانیان نەمێنێ. هەر بەهەمان شێوە گەر تۆ دڵنیا نی لە ڕاستبوونی ئەوەی یۆحەننا سەبارەت بە پەیوەندییەکەی نێوان عیسا و خودای هەرەبەتواناترین نووسیویەتی، بۆ وەرگرتنی زانیاری زۆرتر دەتوانی بڕوانییە بەشێکیتری پەرتووکی پیرۆز کە نووسەرێکی دیکە نووسیبێتی. سەرنج بدە کە نووسەرێکیتر بە ناوی مەتتا چی نووسیوە. بۆ نموونە کاتێ باس لە کۆتایی ئەم زەمانە دەکا، مەتتا لە زمانی عیساوە دەگێڕێتەوە: «ئەو ڕۆژو ئەو کاتە، کەس نایزانێ، نە فریشتەکانی ئاسمان، نە ڕۆڵە تەنها باوک نەبێ» (مەتتا ٢٤:٣٦). ئەم وشانە چۆن دەریدەخەن کە عیسا خودای هەرەبەتواناترین نییە؟
عیسا دەفەرمووێ کە باوک لە ڕۆڵە زۆرتر دەزانێ. ئەگەر عیسا بەشێک لە خودای هەرەبەتواناترینە، ئەوا دەبوایە هەموو ئەو شتانەی باوک دەیانزانێ ئەویش بیانزانێ. کەوابوو ڕۆڵەکە لەگەڵ باوک یەکسان نییە. ئێستا لەوانەیە کەسێک بڵێ کە: ‹عیسا دوو ڕواڵەتی هەبوو. ئەوەی عیسا لێرەدا وتویەتی کاتێک بووە کە لەسەر زەوی وەک مرۆڤ دەژیا›. بەڵام وایدابنێن کە وابێ، ئەدی باشە ڕۆحی پیرۆز چییە؟ ئەگەر ئەویش بەشێک لە خودایەتی باوکی بێ، باشە بۆچی عیسا ناڵێت کە ڕۆحی پیرۆز ئەو شتانە دەزانێ کە باوک دەیانزانێ؟
هەروا کە درێژە بە خوێندن پەرتووکی پیرۆز دەدەی، زۆر ئایەت فێردەبی کە پەیوەندیان بەم بابەتەوە هەیە. ئەو ئایەتانە پشتگیری لە ڕاستی دەربارەی باوکو ڕۆڵەو ڕۆحی پیرۆزەوە دەکەن—زەبوورەکان ٩٠:٢؛ کرداری نێرراوان ٧:٥٥؛ کۆلۆسی ١:١٥.
[ژێرنووس]
a بۆ لێدوانی زیاتر لەسەر یۆحەننای ١:١، بڕوانە تاوەری چاودێری ١ی، نۆڤەمبەری (خەزەڵوەر) ٢٠٠٨، لاپەڕەکانی ٢٤-٢٥، بڵاوکراوەی شاهیدانی یەهوە.