Ukwaso Kuli Tupuputa
Akwa mana kakutayiza ngwo hano hashi, unji wa atu tununu 43 a tununu, kali tupuputa, akwo tununu 295 a tununu keshi kumona kanawa.a chaluyinda, kuli atu amwe waze akulinga yuma yipi kuli tupuputa ni atu waze keshi kumona kanawa.
Kuchi Zambi akumona tupuputa ni atu waze keshi kumona kanawa? Yika Mbimbiliya yakwamba hali atu jacho? Kuchi Yela ja Yehova anakwasa atu jacho musono?
Kuchi Zambi akumona tupuputa ni atu waze keshi kumona kanawa?
Mbimbiliya yakusolola ngwo, Yehovab kakulihulumba chinji ni tupuputa. Yehova kanazange hanga aasolwele ululi ni kwaha fumbo lize iye akuhana. Chikwo nawa, kanahe kutalatala chipema cha kulutwe lia matangwa.
Chisoneko: “Mashingiwa mutu yoze matokesa kapuputa.”—Shimbi Yamuchiali 27:18.
Ulumbunwiso: Ku mashimbu a kunyima, shimbi ja Zambi japwile ni kufunga atu waze apwile tupuputa hanga ahone kwamwesa lamba.
Chisoneko: “Zambi keshi katonde.”—Yilinga 10:34.
Ulumbunwiso: Zambi kakulemesa tupuputa chizechene ngwe akulemesa atu waze akumona.
Chisoneko: Yesu “yalawisa nawa meso ja tupuputa anji.”—Luka 7:21.
Ulumbunwiso: Muze Yesu apwile hano hashi, kalawishile meso ja tupuputa. Yize iye alingile yasolwele yize Wanangana wa Zambi muukalinga kulutwe lia matangwa.
Chisoneko: “Henaho meso ja tupuputa malaula.”—Izaia 35:5.
Ulumbunwiso: Yehova kanalakenya ngwenyi, kwasala hakehe muze Wanangana wenyi muuputuka kuyula hano hashi, tupuputa makamona.
Chize Yela ja Yehova akukwasa
Hashi heswe yetu Yela ja Yehova twakwambujola sango ja kutalatala jize Zambi analakenya kuli tupuputa. Kuchi twakuchilinga?
Twakufambwisa Mbimbiliya ni mikanda mu braille, yimwe yili mu sona jinene-jinene, tuli nawa ni yinema ni maliji a kukopa yize yakutukwasa kulilongesa nayo Mbimbiliya ni tupuputa ni atu waze keshi kumona kanawa.
Poso jeswe, hamuwika ni tupuputa twakulikungulula hanga tuwayile Zambi.
Twakulihana hanga tulongese Mbimbiliya kuli atu waze akuzanga kulilongesa.c
Twakulongesa atu Mbimbiliya chawana. Mumu liaka? Mumu Yesu kambile ngwenyi: ‘Hananweheyo yawana, ni yenu yihanenu yawana.’—Mateu 10:8.
Pundu lume, Yela ja Yehova kakulihulumba chinji ni tupuputa. Waze anazange kuwayila Zambi hamwe ni yetu mawana masepa apema waze malihulumba no. Talenu sango ja Yela ja Yehova amwe waze ali tupuputa.
Talita Alnashi, wa ku Suécia, keshi kumona kanawa chize muze asemukine. Talenu chize yisemi jenyi amulongesele Mbimbiliya ni chize atambwile ukwaso ni zango lize aasolwelele kuli masepa jo.
James Ryan, wa ku Estados Unidos, kasemukine kajika matwi, ha kupalika cha mashimbu yapwa kapuputa. Tutalenu yize yakumukwasa kuwahilila.
Cynthia Pablo, wa ku Filipinas, iye keshi kwiva chipwe kumona. Kuchi masepa jenyi Akwa-Kristu amukwashile ha mashimbu a musongo wa COVID-19? Tutalenu chikuma chinambe ngwo, “Congregação ajuda irmã cega e surda durante a pandemia.”
Yikwata yika twakulongesa nayo Mbimbiliya?
Mikanda ya Braille. Twakufambwisa Mbimbiliya ya Braille mu malimi anji, yamuundu hanji chihanda. (Nyi unazange kuwana malimi jacho, tala mushete “Mbimbiliya ya Yisoneko ya Chifuchi Chaha mu Braille.”) Kafambwisa nawa mikanda yinji mu Braille. Kuli waze anazange kulilongesa Braille, twafambwisa umwe mukanda wa usongwelo uli ni mutwe ngwo, Lilongese Kutanga Braille. Mukanda uno, kaulumbununa hanga ukwase tupuputa alilongese kutanga Braille ni ukwaso wa mutu yoze wakumona.
Nyi unazange kutambula umwe mukanda wa Braille ha mafwo, hanjika ni umwe Chela cha Yehova hanji kwita hanga akumeneke.
Ha jw.org chiza mikanda yize muyiza ni chihela haze muhasa kusonekena.d
Mikanda ya sona jinene-jinene yili ha mafwo ni mu site. Tuli ni mikanda yinji ya sona jinene-jinene yize muyihasa kukwasa atu waze keshi kumona kanawa. Site jw.org kayitungile hanga mutu ahase kutohwesa sona. Aplicativo JW Library neyo yakukwasa hanga mutu atohwese sona ha umwe mukanda.
Nyi unazange kutambula umwe mukanda ha mafwo wa sona jinene-jinene, hanjika ni umwe Chela cha Yehova hanji kwita hanga akumeneke.
Ha jw.org chiza mikanda yize muyiza ni chihela ngwe chize chakusoloka ha mikanda ya ha mafwo.
Mikanda mu maliji a kukopa. Twafambwisa Mbimbiliya ya Yisoneko ya Chifuchi Chaha mu maliji a kukopa, mu malimi kuhiana 200. Chikwo nawa, mikanda yetu yinji yize yakukatuka mu Mbimbiliya twayifambwisa mu maliji a kukopa. Mikanda yacho, yakulumbununa nawa yizulie yize yakusolokaho.
Tala hanji chiza mikanda mu maliji a kukopa ha jw.org hanji ha aplicativo JW Library.
Ha jw.org chiza mikanda ha PDF, EPUB, JWPUB, Leitor de leta (RTF), Linha braille (BRL), ni DAISY.e
Yinema ni ulumbunwiso wa yinema yacho.f Yela ja Yehova kakufambwisa yinema ya sango ja mu Mbimbiliya ni ulumbunwiso wa yinema yacho mu malimi kuhiana 100. Yinema yacho yakukwasa atu anyingike ulumbunwiso wayo ni kukaula yiyulo ya Mbimbiliya.
Tala yinema yize yili ni ulumbunwiso wa maliji mu malimi amwe:
Kukunguluka ni yiwanyino. Tuli ni yikungulwila yinji hashi heswe, yize twakulikungulwila hita poso hanga tulilongese ni kuwayila Zambi. Chikwo nawa, twakulinga yiwanyino yinene-yinene hanga tutambule fumbo lia Mbimbiliya hita mwaka. Ha yiwanyino yacho kakusololaho yinema, chikwo nawa twakusa tachi hanga tulumbunune yinema yacho mu maliji. Twakusa tachi hanga tulumbunwine nawa tupuputa ni waze afa matwi ha yiwanyino yacho. Twakutambula atu eswe kutushi kusolola katonde.
Nyingika kukunguluka chetu cha mambonge chize twakulinga ha mwaka.
Yako ha Chiwanyino cha Kwiwuluka Kufwa cha Yesu. Chiwanyino chacho, chili chilemu chinji ha mwaka.
José Luis Ayala, yoze watwama ku México, kasemukine kafa matwi, alioze muze apwile ni miaka 29 yapwa kapuputa. Iye kanyingikine ulemu uze yiwanyino yetu yikwete ku mwono wenyi ni chize yamukwashile kupwa longeshi mupema wa Mbimbiliya.
a Hano liji “keshi kumona kanawa” linatale ha ulema uze keshi kuhasa kuuka uze wakupinjisa mutu ahone kumona kanawa tangwa ha tangwa. Ha mutwe uno liji “kapuputa,” linachingi kupapata, kufa meso hanji kumona chikehe.
b Yehova lili jina lia Zambi (Samu 83:18) Tala chikuma, “Yehova Iya?”
c Yena muhasa kwita hanga akulongese Mbimbiliya chawana.
d Notegraber yili yikwata ya ha site ni linha braille, yakululieka kanawa ni maliji waze akuhanjika ku computador hanji telefone. Monitore jaha jize anafambwisa, mutu mahasa kujikandwisa hanji kujipalumwisa hanga asoneke yimwe mu Braille. Nyi mutu kali ni Notegraber kafupile kupwa ni macopia anji a mikanda ya Braille.
e Leitor de leta (RTF), yakukwasa mutu eve maliji mwilu waze akuhanjika mu yimwe computador hanji maliji a kukopa. Tecnologia yino yakukwasa mutu kuhengwola chipwe lume yikuma yilemu ya umwe mukanda.
f Ulumbunwiso wa maliji, kali maliji waze akuhanjika muze anembisa chimwe chinema hanga alumbunune yize yinalingiwa ha chinema chacho.