“Munukevwa Zungo lia Jita”

“Chize muze naputukile mulimo wa jornalista, ha miaka 60 kunyima, hinasolwela atu sango ja jita kuhiana 40 hashi heswe. Yami napwile ni kumona chize akwa Estados Unidos ni akwa União Soviética apwile ni kulitachika, ni chize kulitachika chacho chahwile susumuku. Alioze, kanda nguchimona kama umwe mwaka ukalu chinji ngwe mwaka 2025. Mumu liaka? Chitangu, mumu kwalingiwa jita jinji jize jatuvisa woma unji. Chikwo nawa, jita jimwe, jakwata ha mwono wa atu anji hashi heswe.”—John Simpson, editor wa sango ja hashi heswe ku BBC.

Atu anji kanalihulumba chinji ni jita jize jinalingiwa hashi heswe. Ayo kakulihula ngwo, ‘shina yuma muyiza kapema kama?’ Yika Yesu alongesele?

Yika Yesu alongesele?

Yesu kaprofetezele yuma yize tunamono musono. Iye katowezele tumbaji twenyi ngwenyi: “Munukevwa zungo lia jita ni sango ja jita.”—Mateu 24:6.

Chipwe ngwe, jita ni mbwanja yize yinalingiwa yakutusakalalisa, nihindu mutuhasa kushimbwila ngwetu, yuma muyikapema kulutwe. Mumu liaka? Mumu Yesu kambile ngwenyi, jita, yitanga ya atu ni yuma yikwo yize yinalingiwa, ‘yili yilayi’ yize muyisolola ngwo, tuli ha matangwa akusula. (Mateu 24:3; Luka 21:7) Chino chinalumbunuka ngwo, Yesu makahwisa jita kulutwe lia matangwa. Kuchi makachilinga?

Yika Yesu makalinga?

Kwasala hakehe, ngwe Mwanangana wa mu Wanangana wa Zambi, Yesu ‘mamanununa jita ndo ku songo lia hashi.’—Samu 46:9.

Mba ulilongese yuma yinji hakutwala ku sambukila yize mutukapwa nayo hano hashi ni chize mwono muukapwa kulutwe lia matangwa, tanga chikuma “Chize Jita ni Mbwanja Muyiza Kahwa.”