Loloji ya Juízo Final Yinakundama ha Muchima Ufuku

Ha 27 Janeiro, 2026, Akwa-Ciencia Kasenyesa Ndambu Loloji ya Juízo Finala hanga yihete ha muchima ufuku. Ola yacho yinasolola luyinda wa hashi heswe yoze akukoka kuli atu.

• “Kulita ni Boletim ya Yiyulo ya Akwa-Ciencia ni Ufunge wo ha yuma ya Átomo, yize akuhengwola musono, Loloji ya Juízo Final, hiyaheta ha 85 segundu ya muchima ufuku. Chino chinalumbunuka ngwo, hitwakundama chinji ku luyinda kuhiana ku mashimbu a kunyima.”—Boletim ya yuma ya Átomo ya Akwa-Ciencia.

• “Tunatayiza ngwetu, lusango wa Loloji ya Juízo Final kali wamwenemwene. Mumu tunamono kwoka cha luyinda wa chisemewa, kulivashana kuli atu hichapwa chikalu, chikwo nawa mashimbu kanapalika ni kawashi. Twatamba kwalumuna yitanga yetu, mutuhasa kuchilinga. Alioze, atu eswe katamba kwita kuli manguvulu hanga chino chilingiwe ni kawashi.”—Alexandra Bell, kasongo wa, Boletim ya yuma ya Átomo ya Akwa-Ciencia.

Shina songo lia atu ni lia hano hashi hiliakundama? Shina twatamba kwiva woma mumu lia yuma yize tunashimbwila kulutwe? Yika Mbimbiliya yakulongesa?

Yize tunashimbwila kulutwe

Kulita ni Mbimbiliya, ‘hashi muhanunga ku miaka yeswe.’ Chikwo nawa, atu ‘Makatwamaho ku miaka yeswe.’ (Chilumbununyi 1:4; Samu 37:29) Kashika, atu kechi kuhasa kwonwona hashi hanji kuhichikaho ha hululu chakuhona akwa-mwono.

Alioze, Mbimbiliya yakuhanjika ha limwe songo. Ngwe chilweza, yakwamba ngwo, “hashi hanapalika.”—1 Yoano 2:17.

• Mba unyingike yize Mbimbiliya yakwamba ha lusango yono, tanga chikuma, “Será que o fim do mundo está chegando? O que é o Apocalipse?”

• Mba unyingike yize Mbimbiliya yakwamba ha yize muyikalingiwa kulutwe lia matangwa, tanga chikuma, “Quando vai ser o fim do mundo?”

Yize muyitukwasa kupwa ni nyonga lialita

Chipwe ngwe tunapinji ni milonga yinji ha mashimbu wano, nihindu Mbimbiliya muyihasa kutukwasa kupwa ni nyonga lialita. Mu mutapu uka?

• Mbimbiliya yakutwaha yiyulo ya mana. (2 Timoteu 3:16, 17) Ngwe chilweza, tanga chikuma, “Como controlar as preocupações” mba umone chize Mbimbiliya muyihasa kukukwsa kupwa ni nyonga lialita, chipwe ngwe unapalika mu yipikalo yinji.

• Mbimbiliya yakutwaha kutalatala chingunu cha kulutwe lia matangwa. (A-Roma 15:4) Yakulumbununa yuma yize mutuhasa kushimbwila haliapwila ni kulutwe lia matangwa. Kutalatala chino, chakutukwasa kumana nguu muze tunakumbu yipikalo ya chifuchi chino.

Mba uyuke ha yize mutanga mu Mbimbiliya, tunakwichi hanga ulilongese Mbimbiliya chawana ni umwe Chela cha Yehova.