Kwasa Atu Anyingike Yehova

1. Kuchi wakwiva muze wakumona longi ye makola ku ufulielo?

KUCHI wakwiva muze wakumona longi ye maya ha kukunguluka ha chisuho chitangu, maputuka kukumbulula ha kukunguluka, maputuka kwambulwila atu ufulielo wenyi, chikwo nawa ha kupalika cha mashimbu, makwata chiyulo cha kulihana kuli Yehova hanga amupapachise? Kwamba umwenemwene, yena wakuwahilila. Alioze, Yehova mwe watela uchichimieko muze alongi jetu masenya kulutwe ku ufulielo. Twakuhalisa Yehova muze twakumona chize iye akukwasa umwe mutu kukola ku ufulielo.—1 Kori. 3:5-9; 3 Yoa. 3, 4.

2. Yika Yehova anazange hanga alongi a Mbimbiliya alinge? (1 Timoteu 2:3, 4)

² Yehova kanazange hanga “atu a mutapu weswe alilamwine, apwe ni chinyingi cha umwenemwene.” (Tanga 1 Timoteu 2:3, 4.) Iye kanazange nawa hanga atu amunyingike kanawa, ni kunyingika nawa yuma yipema yize iye hanalingi ni yize makalinga. (Jere. 9:24) Mba chino chilingiwe, mutu katamba kupwa ni chinyingi cha umwenemwene. Maliji “chinyingi cha umwenemwene,” kalumbunukine ngwo mutu katamba kunyingika wika sango jimwe hakutwala kuli Zambi. Umwe mukwa-kuhengwola Mbimbiliya kambile ngwenyi: “Maliji wano kanalumbunuka ngwo, mutu katamba kulilongesa yuma yize muyalumuna mwono wenyi ni kumukundamisa kuli Zambi.” Muze umwe longi akunyingika kanawa Yehova, iye kakuzanga kwalumuna chize akulinga yuma. Muze akuchilinga, kakupwa ni kutalatala cha “mwono wa mutolo.”—Yoa. 17:3.

3. Yika mutushimutwina ha mutwe uno?

³ Yehova katuhele chiwape cha kukwasa akwetu hanga amunyingike. Ha mutwe uno, mutukumbululaho yihula yino: Mumu liaka alongi a Mbimbiliya atamba kunyingika kanawa Yehova? Kuchi mutuhasa kwakwasa kunyingika chize Yehova apwa? Chikwo nawa, kuchi mutuhasa kwakwasa hanga anyingike chize mahasa kukaula yize ananyingika hakutwala kuli Yehova?

KWASA ALONGI A MBIMBILIYA HANGA ANYINGIKE KANAWA YEHOVA

4. Kulita ni Marku 12:30, nyonga lika lilemu twatamba kupwa nalio muze tunasongwela longeso lia Mbimbiliya?

⁴ Yesu kambile ngwenyi, shimbi yilemu chinji yili ‘kuzanga Yehova ni mbunge yetu yeswe, ni mwono wetu weswe, ni kunyonga chetu cheswe ni tachi jetu jeswe.’ (Tanga Marku 12:30.) Longi wa Mbimbiliya katamba kunyingika kanawa Yehova mba amuzange. Tunazange hanga longi yetu wa Mbimbiliya amupapachise mumu lia zango lienyi hali Yehova. Kutwazangile hanga amupapachise mumu ngwo kanazange kupwa sepa lietu, kupwa sepa lia amwe Yela ja Yehova, hanji mumu lia kuzanga amwe malongeso a Mbimbiliya. Kashika, muze tunasongwela longeso lia Mbimbiliya, nyonga lilemu lize twatamba kupwa nalio, lili lia kukwasa longi yetu kunyingika Yehova ni kumuzanga.

5. Muze longi wa Mbimbiliya akuzanga Yehova, yika akulinga?

⁵ Muze longi wa Mbimbiliya akunyingika Yehova ni kumuzanga, chakupwa chashi kumwononokena. Yesu kasolwele ngwenyi, mutu yoze wakuzanga Zambi, kakumwononokena. Iye kambile ngwenyi: “Hanga akwa-hashi anyingike ngwo nakuzanga Tata, nakulinga ngwe chize Tata angulwezele.” (Yoa. 14:31) Chizechene ngwe Yesu, longi wa Mbimbiliya yoze wakuzanga Yehova, kakwononoka ni kushishika kuli iye.—1 Yoa. 5:3.

6. Kuchi kunyingika kanawa Yehova muchihasa kukwasa longi ye wa Mbimbiliya? Hana chilweza.

⁶ Alongi a Mbimbiliya waze akunyingika kanawa Yehova, e akukwata yiyulo ya mana. Mba tunyingike kanawa chikuma chino, tutalenu chimwe chilweza. Mutu yoze unalilongesa kwendesa kinga, kechi kuhasa kwendesa kanawa ha kutala wika atu waze anendesa hanji kutanga wika mukanda uze wakusolola usongwelo wa chize akwendesa kinga. Mba ahase kwendesa, iye katamba kuyinyina ni kuyichofwa ha yisuho yinji. Muze machilinga mejilila, chikwo nawa manyingika kwendesa kanawa. Chizechene nawa, longi wa Mbimbiliya keshi kunyingika Yehova ha kulilongesa wika Mbimbiliya. Alioze mahasa kuchilinga nawa, ha kumona chize mwono wenyi wakupema muze akukwata yiyulo kulita ni yikota ya shimbi ja mu Mbimbiliya. Muze akunyingika kanawa Yehova ni kumona chize akumukwasa, malilongesa kukwata yiyulo yipema ha yikuma yeswe ku mwono wenyi.

7. Kuchi kunyingika Yehova chakwashile Yosefwe?

⁷ Kunyingika kanawa Yehova, che chakwashile Yosefwe muze pwo lia Potifwa amwesekele hanga alinge nenyi utanji. Chize ku wanuke wenyi, Yosefwe kapwile ni kwiva sango hakutwala kuli Alama ni Eva ni Apalahama ni Sara. (Uputu. 2:24; 20:3, 6) Kupalikila mu sango jacho, Yosefwe kanyingikine nyonga lia Yehova hakutwala ku ulo. Chikwo nawa kanyingikine ngwenyi, kulimona cha pwo ni lunga, chili chawana chize Yehova ahanyine wika kuli atu waze alimbata kulita ni shimbi. Yosefwe kanyingikine kanawa Yehova, kashika ahashile kuchina miheto yize pwo lia Potifwa apwile ni kumutela. Iye kambile ngwenyi: “Kuchi te mungulinga shili yipwahaha ni kuvulumuna kuli Zambi?” (Uputu. 39:7-9) Yosefwe kakwachile chiyulo chalita mumu kanyingikine yuma yize Yehova akuzanga, yize keshi kuzanga ni yuma yize yakumuvisa kupihia. Nyi twakwasa alongi jetu a Mbimbiliya anyingike kanawa chize Yehova apwa, no makwata yiyulo yize muyimuvisa kuwaha.

MULONGESE CHIZE YEHOVA APWA

8. Muze nunalilongesa mukanda Wahilila ku Mwono ku Miaka Yeswe! kuchi muhasa kukwasa longi ye kunyingika kanawa Yehova?

⁸ Kuchi muhasa kukwasa longi ye wa Mbimbiliya hanga anyingike chize Yehova apwa? Yehova kakwashile Yombi ha kumuhula yihula yinji kuhiana 50. (Yombi 38:1–41:34) Ni yetu mutuhasa kuhula alongi jetu yihula yize yili mu mukanda Wahilila ku Mwono ku Miaka Yeswe!, mumu kayiluliekele hanga yikwase alongi a Mbimbiliya anyingike kanawa utu wa Yehova. (Tala mushete, “Yihula Yize Yakutukwasa Kulongesa Kanawa.”) Kashika, muze unalongesa longi ye, pwako ni kumuhulayo hanga umukwase kunyingika kanawa Yehova.

9-10. (a) Yika muyikwasa alongi a Mbimbiliya kulilongesa yuma yinji hakutwala kuli Yehova muze anatange Mbimbiliya? (Tiangu 5:11) (b) Hana chilweza chinasolola chize umwe lusango wa mu Mbimbiliya mahasa kusolola yuma yize yakuvisa Yehova kuwaha ni yize yakumuvisa kupihia.

⁹ Muze twakuputuka kulilongesa Mbimbiliya ni umwe mutu, twakumukolweza hanga apwe ni kutangaa Mbimbiliya matangwa eswe. Kuchi mutuhasa kumukwasa kulilongesa yuma yinji hakutwala kuli Yehova muze matanga Mbimbiliya? Mutuhasa kumukolweza hanga apwe ni kulihula mumu liaka Yehova asele lusango wacho mu Liji lienyi, ni kufupa kunyingika yitanga ya Yehova yize anasolola ha lusango wacho, ha shimbu lieswalio matanga Mbimbiliya. Ngwe chilweza, tutalenu yize kambaji Tiangu alilongesele ha lusango wa Yombi. Tiangu kalilongesele ngwenyi, Yombi kapwile umwe lunga yoze wanyongonwene mu yipikalo. Kalilongesele nawa ngwenyi, Yehova kali Zambi ya umbovu ni keke.—Tanga Tiangu 5:11.

¹⁰ Tunazange hanga alongi jetu anyingike yuma yize Yehova akuzanga ni yize keshi kuzanga kupalikila mu lusango yoze matanga mu Mbimbiliya. Ngwe chilweza, longi ye wa Mbimbiliya mahasa kukaula katalilo uli ha chikuma, “Putuka Kutanga Mbimbiliya,” chili mu mukanda Wahilila ku Mwono ku Miaka Yeswe!. Nyi makulweza ngwenyi, kasakula kutanga lusango wa Daniele muze amusele mu wina wa ndumba, mukolweze alihule ngwenyi: ‘Mumu liaka Yehova alamwinyine Daniele? Yika nawana ha lusango yono yize yakuvisa Yehova kuwaha?’ (Danie. 6:10, 22) Mahasa kulihula nawa ngwenyi: ‘Yika yalingiwile kuli atu waze alamikijine Daniele? Yika nawana ha lusango yono yize yakuvisa Yehova kupihia?’ (Danie. 6:4, 5, 24) Kusulaho, iye mahasa kunyonga nawa ha yitanga yikwo ya Yehova yize akusolola ha lusango wacho.—Danie. 6:26, 27.

11. Kuchi mutuhasa kukwasa alongi jetu a Mbimbiliya hanga amone ngwo, longeso lia Mbimbiliya lili chawana cha kuli Yehova?

¹¹ Twakuwahilila chinji muze longi yetu wa Mbimbiliya akulemesa yuma yize akuyuka mumu lia kulilongesa Mbimbiliya. Alioze, twatamba kumukwasa hanga anyingike ngwenyi, yuma yize akuyuka yakukatuka kuli Yehova longeshi munene. (Iza. 30:20, 21) Longi yetu wa Mbimbiliya mahasa kutusakwilila mumu lia yuma yize alilongesa, hanji kutuchichimieka mumu lia chize twakulongesa. Chipwe ngwe yuma yino hi yipi ko, alioze twatamba kutalikisa usakwililo uno ni uchichimieko wacho kuli Yehova.

KWASA LONGI YE ASE MU YITANGA YUMA YIZE ANALILONGESA

12-13. Kuchi kunyingika Yehova muchihasa kukwasa umwe longi wa Mbimbiliya muze mawana lusango mukalu kuli iye? (Tala nawa chizulie.)

¹² Longi wa Mbimbiliya katamba kwalumuna mwono wenyi ni kukaula yuma yize analilongesa hakutwala kuli Yehova. Kuchi muhasa kukwasa longi ye akaule yuma yize analilongesa? Chitangu, mulongese mu jila yize muyimukwasa kwiwuluka yuma yize analilongesa hakutwala kuli Yehova, muze matanga mu Mbimbiliya umwe lusango yoze muchipwa chikalu kumulumbunuka. Ngwe chilweza, nyi ngwe matanga hakutwala ku upatwilo wa Yehova, iye mahasa kulihula mumu liaka Yehova ashihile atu amwe, alioze yalamwina atu akwo. Kuchi muhasa kukwasa longi ye kupukuna ha chikuma chino?

¹³ Kolweza longi ye wa Mbimbiliya apwe ni kunyonga ha yuma yize akulilongesa hakutwala kuli Yehova. Ngwe chilweza, muhasa kumukolweza hanga alihule ngwenyi: ‘Yuma yika Yehova anazange kulingila atu?’ (2 Petu. 3:9) Chuma chika chilemu chinji chize iye alingile hanga atulamwine, chipwe ngwe tuli yihenge? (Efwe. 2:4, 5) Shina Yehova kakumwesa atu lamba chakuhona chitela? Shina iye kakwecha kumwesa lamba atu waze atamba kumona lamba? (Kutuhu. 34:6, 7) Ha mashimbu amwe, lusango wa mu Mbimbiliya keshi kutukwasa kunyingika mumu liaka Yehova alinga chimwe chuma. Alioze, kutwafupile kunyingika yuma yeswe. Yetu tunanyingika Zambi yetu, chikwo nawa tuli ni shindakenyo ngwetu, mashimbu eswe malinga yuma yalita.

14. Kuchi muhasa kukwasa longi ye nyi ngwe kali ni kapinda ni umwe ndumbu?

¹⁴ Nyonga ha jila yamuchaali yize muhasa kukwashilamo longi ye wa Mbimbiliya, kusa mu yitanga yize alilongesa hali Yehova. Achinyonga ngwe longi ye kali ha kukunguluka, alioze kali ni kapinda ni umwe ndumbu. Hanji ndumbu wacho kamulingile chuma chize chamulemekene ku mbunge. Nyi chenacho, kolweza longi ye anyonge ha chize Yehova akumona mandumbu jetu. Mukwase hanga anyonge ha yikuma yino: ‘Yuma yika Yehova alingile hanga asolole ngwo kakwazanga? (Yoa. 3:16) Shina kuli Yehova kulinunga chize chatwama hakachi ka tuvumbi twenyi chili chilemu? (Samu 133:1) Kuchi iye akwiva muze akutumona tunase tachi hanga tufunge kulinunga chacho?’ (2 Kori. 13:11) Kwasa longi ye hanga amone chize Yehova mawahilila nyi mutusa tachi hanga tulihulikile ha yitanga yipema ya akwetu, shimbu tulihulikile ha tupalia two.

15-16. (a) Nyi ngwe longi wa Mbimbiliya kanazange kukwata chiyulo chilemu, kuchi mahasa kwimbulula Yesu? (Yoano 8:29) (b) Kuchi ndumbu Marianne akwashile longi yenyi kukwata chiyulo chipema? (Tala nawa chizulie.)

¹⁵ Kusulaho, muhasa kukwasa longi ye wa Mbimbiliya hanga akwate yiyulo yipema kulita ni yize alilongesa hakutwala kuli Yehova. Muhasa kumusolwela longeso 35 lia mukanda Wahilila ku Mwono ku Miaka Yeswe! ha chikuma chinambe ngwo, “Chize Mutuhasa Kukwata Yiyulo Yipema.” Yika muhasa kulinga, nyi ngwe longi ye hahengwola mu mikanda yetu ni kulemba hakutwala ku chikuma chino, chipwe chocho chinamukalila kukwata yiyulo yipema? Mukolweze hanga anyonge ha chilweza cha Yesu. Yika yakwashile Yesu kukwata yiyulo yipema? Iye kambile ngwenyi: ‘Mashimbu eswe nakulingila Tata yuma yize yakumupemena.’ (Tanga Yoano 8:29.) Kolweza longi ye hanga alihule yihula yino: Kulita ni yize nahengwola mu mikanda yetu ni yize ngunanyingika hakutwala kuli Yehova, chiyulo chika muchimuvisa kuwaha? Cheswacho chiyulo muchivisa Yehova kuwaha, che chiyulo chipema chenacho.

¹⁶ Tutalenu chilweza cha umwe longi wa Mbimbiliya watwama mu Chile, yoze watambile kukwata chimwe chiyulo chilemu. Asoko jenyi kazangile hanga iye atayize umwe mulimo uze mamufeta mbongo jinji. Alioze, nyi te matayiza mulimo wacho, ha mashimbu amwe te kechi kuhasa kukunguluka. Longeshi yenyi wa Mbimbiliya avuluka ngwo Marianne, yamba ngwenyi: “Yami namukolwezele hanga anyonge ha chize Yehova meva mumu lia chiyulo chize makwata. Shina iye te mawahilila nyi mapihilila? Chikwo nawa, namulwezele alembe kuli Yehova hanga amulweze kapinda yoze te anapalika, ni kushimbwila kumbululo lienyi. Iye kakatayijile mulimo wacho. Hakupalika cha shimbu likehe, yawana umwe mulimo uze te kuushi kumukwika kukunguluka.” Marianne kakalwezele longi yenyi chiyulo chize te atamba kukwata. Alioze, kamukolwezele hanga anyonge ha yuma yize alilongesa hakutwala kuli Yehova. Mumu lia chino, longi yenyi kakolesele usepa wenyi ni Marianne, chahiana ulemu ni Yehova. Hakutwala kuli longi yenyi, Marianne yamba ngwenyi: “Iye kalilongesele ngwenyi, Yehova kakulihulumba chinji ni yetu, muze twakusa uwayilo wenyi ha chihela chitangu ku mwono wetu.”

YEHOVA MAKUWAHISA MUZE MUMUNYINGIKA KANAWA

17. Yuma yika yilemu alongi a Mbimbiliya atamba kulilongesa?

¹⁷ Alongi jetu kakunyingika yuma yinji muze akulilongesa Mbimbiliya. Ngwe chilweza, ayo kakulilongesa umwenemwene uno: Yika yakulingiwa kuli mutu nyi hafwa? Mumu liaka Yesu afwile? Yika Wanangana wa Zambi muukalinga? Chikwo nawa, ayo kakulilongesa chize ululikiso wa Yela ja Yehova wapwa, yize yakulingiwa ha kukunguluka, mulimo uze makulwana a mu chikungulwila akulinga ni mandumbu a mu Chizavu cha Tusongo. Alioze, ngwe chize hitwashimutwina kulu, kutwazangile wika hanga alongi jetu anyingike yuma yino. Tunazange hanga ayo anyingike kanawa Yehova.

18. Yiwape yika akutambula atu waze akunyingika Yehova?

¹⁸ Tuli ni chiwape chinene cha kukwasa akwetu hanga anyingike Yehova. Chipwe haliapwila, waze akunyingika Yehova ni kumuwayila, kakwawahisa ni mwono upema. (Samu 25:12-15) Kulutwe lia matangwa, waze eswe makapwa ni “chinyingi cha yoze wapwa wamwenemwene,” makapwa ni mwono wa mutolo. (1 Yoa. 5:20) Alioze, kuli yuma yikwo yipema nawa. Mbimbiliya yakutulweza ngwo, waze akusa tachi hanga anyingike ni kuzanga Yehova Zambi, ‘no kakwanyingika.’ (1 Kori. 8:3) Kwamba umwenemwene, muze Zambi Mukwa-Ndundo-Jeswe akutala kuli yetu, iye kakutumona ngwe masepa jenyi. Chino chili chiwape chinene chize twakupwa nacho, mumu lia kunyingika Zambi umuwika wamwenemwene.