21-27 SETEMBRO, 2026
MWASO 12 Yehova Zambi wa Ndundo
Sako Tachi Hanga Unyingike Kanawa Yehova
“Nyingika Zambi ya tatenu ukamulingile ni mbunge yingunu.”—1 SANGO 28:9.
YIZE MUTULILONGESA
Mutumona yize kunyingika Yehova chinalumbunuka, mumu liaka twatamba kumunyingika kanawa, ni chize mutuhasa kuchilinga.
1. Kuchi twakwiva muze twakunyonga ha mana, yinyingi ni yuma yeswe yize Yehova hanalingi?
YEHOVA Zambi yetu kananyingika yuma yeswe. Iye kali ni mana kuhiana mutu mweswawo, chikwo nawa kakulinga yuma yinji yakukomwesa. Yetu twakukomoka chinji muze twakunyonga hali Sakatanga wetu. Kota ni yena muhasa kuliva ngwe chize postolo Paulu alivile muze asonekene ngwenyi: “Upite, mana ni yinyingi ya Zambi, kuyajotoka! Upatwilo ni majila jenyi, niumwe mahasa kuyinyingika yeswe kanawa wakuhi!”—Roma 11:33, 34.
2. Yika yakutwaha shindakenyo ngwo, mutuhasa kunyingika Yehova?
2 Kutuchi kuhasa kunyingika yuma yeswe hakutwala kuli Yehova. Chipwe chocho, mutuhasa kunyingika yuma yimwe hakutwala ku utu wenyi. Mwanangana Ndawichi kalwezele mwanenyi Solomone ngwenyi: “Nyingika Zambi ya tatenu ukamulingile ni mbunge yingunu . . . Nyi mumufupa mumuwana.” (1 Sango 28:9) Ngwe chizechene postolo Yoano ewulwile Akwa-Kristu ni akwo kunyima, ni yetu tuli ni “mana hanga tuhase kupwa ni chinyingi cha yoze wapwa wamwenemwene.” (1 Yoa. 5:20) Chikwo nawa, Yesu kambile ngwenyi, iye makwasa atu hanga ‘anyingike kanawa tato.’—Mateu 11:27.
3. Yika mutuhengwola ha mutwe uno?
3 Yetu eswe twakuwayila Yehova, hitwalilongesa yuma yinji hakutwala kuli iye. Chipwe chocho, kutuchi kecha kulilongesa hakutwala kuli iye. (Yoa. 17:3) Mashimbu eswe, mutuhasa kulilongesa chize mutuhasa kumuvisa kuwaha, ni chize mutuhasa kukolesa ujikijilo wetu muli iye. Haliapwila mututala yihula yino yitatu, yize yetu eswe twatamba kuhengwola, chipwe ngwe twakumuwayila ha miaka yeswayo: Kunyingika kanawa Yehova yika chinalumbunuka? Mumu liaka twatamba kusa tachi hanga tununge ni kumunyingika kanawa? Chikwo nawa, kuchi mutuhasa kumunyingika kanawa?
KUNYINGIKA KANAWA YEHOVA YIKA CHINALUMBUNUKA?
4. Kunyingika Yehova yika chinalumbunuka?
4 Twakulilongesa yize chinalumbunuka kunyingika kanawa Yehova, muze twakuhengwola hakutwala ku yize iye alwezele A-Yunda waze akatukile mu undungo mu Babilonia. Yehova kaalakenyene ngwenyi: ‘Mungunwaha mbunge ya kunyingika ngwo, yami Yehova.’ (Jere. 24:7) Kwamba umwenemwene, A-Yunda waze akatukile mu undungo mu Babilonia, te kananyingika yuma yinji hakutwala kuli Yehova. Alioze muze akatukile mu Babilonia, ayo te katamba kukundama chinji kuli Yehova. Umwe mukwa-kuhengwola Mbimbiliya kambile ngwenyi: “Kwatwama kalisa munene hakachi ka kunyingika yuma yimwe hakutwala kuli Zambi, ni kunyingika kanawa Zambi hanga tupwe masepa jenyi.” Mutuhasa kutesa chikuma chino, ni kalisa yoze watwama hakachi ka kutanga hakutwala ku zango, ni kuzanga umwe mutu. Kuli yuma yinji yize twatamba kunyingika kuchiza ko kunyingika wika ngwo, Yehova lie jina lienyi, chikwo nawa kali Zambi. Chili chilemu kunyingika yitanga yipema yize akwete.
5. Kulita ni lusango wa Mwanangana Josia, yika chinalumbunuka kunyingika Yehova?
5 Twakunyingika nawa Yehova, muze twakulilongesa hakutwala ku yuma yize akuzanga ni yize keshi kuzanga. Mba tukwate kanawa chikuma chino, tutalenu chilweza cha Mwanangana Josia. Mbimbiliya yakwamba ngwo: “Ha mwaka wamuchinake wa kuyula chenyi shimbu uchili mukweze waputukile kufupa mwe Zambi ya kalamba kenyi Ndawichi. “ (2 Sango 34:3) Josia kakapwile wika ni kulilongesa Liji lia Zambi, alioze te kakusa mu yitanga yuma yize apwile ni kulilongesa. Kupalikila muli profeta Jeremia, Yehova yamba ngwenyi: “[Josia te] kakupatula ni kulita ni ululi.” Chikwo nawa, iye kapatwile kanawa chikuma cha chiswale ni cha mukwa kuhona. Yehova yamba nawa ngwenyi: ‘Chenacho chinalumbunuka kungunyingika.’—Jere. 22:15, 16.
6. Kulita ni Samu 9:10, yika muyihasa kulingiwa nyi twanyingika yuma yinji hakutwala kuli Yehova?
6 Tanga Samu 9:10. Muze twakunyingika yuma yinji hakutwala kuli Yehova, twakumujikijila chinji. Yino ye yalingiwile kuli postolo Paulu. Muze iye apwile mu zuwo lia ususu ni muze te hikwasala hakehe hanga afwe, iye kasonekene ngwenyi: “Chishi kwivwa sonyi. Mumu ngunanyingika kanawa Yoze nakufuliela.” (2 Timo. 1:12) Yize Paulu alilongesele ni yize apalikile ku mwono wenyi, yamukwashile kujikijila muli Zambi yenyi ni mbunge yeswe. Paulu kapwile ni shindakenyo ngwenyi: “Yehova kechi keza kavulama mulimo wenyi wa ushishiko, chikwo nawa makamuhindwisa.”
MUMU LIAKA TWATAMBA KUNYINGIKA KANAWA YEHOVA?
7. Mumu lia kuwayila Yehova ha miaka yinji, yika muyihasa kulingiwa?
7 Muze twaputukile kulilongesa hakutwala kuli Yehova, twalilongesele yuma yinji hali iye. Alioze hanyima lia kumuwayila ha miaka yinji, kota yituputuka kutepulula tachi jize twapwile ni kusa hanga tumunyingike kanawa. Mumu liaka chino chakulingiwa? Mumu muze tunatange Mbimbiliya ukawetu, hanji muze tuli ha kukunguluka, kota mutuhasa kulihulikila ha chize lusango wacho mahasa kutukwasa, hanji chize mutuhasa kukwasa akwetu ni lusango wacho. Mbimbiliya yakutukolweza hanga tuchilinge. (2 Timo. 3:16, 17) Alioze, kuli chimwe chikuma chilemu chize twatamba kunyonga. (Samu 25:8-10) Kutwatambile kulihulikila wika ha chize lusango wa mu Mbimbiliya mahasa kutuyukisa, hanji chize mutuhasa kukwasa akwetu ni lusango wacho. Alioze twatamba kulihula nawa ngwetu, ‘Yika lusango yono anangulongesa hali Yehova Zambi?’a
8. Muze mutunyingika kanawa Yehova, kuchi usepa wetu ni iye muupwa? (Samu 73:24-28)
8 Muze twakunyingika kanawa Yehova, usepa wetu ni iye wakukola. Ngwe chilweza, kuchi wakupwa usepa wetu ni Yehova, muze twakutanga Mbimbiliya tangwa ha tangwa, muze twakutala JW Broadcasting hita kakweji, ni muze kukunguluka cha mbonge hanji cha mambonge chakuhwa? Kanji-kanji, yetu twakukundama chinji kuli tata yetu wa mu malilu. Mumu liaka? Mumu twakulilongesa yuma yinji hakutwala kuli iye. Kashika twakuzanga kumuhalisa ni kumusakwilila. Yetu twakuliva ngwe chize alivile Asafwe, muze anyongene ha chize Yehova akumufunga. Iye kambile ngwenyi: “Zambi yami, kali liwe lia mbunge yami ni chihanda chami ku miaka yeswe.” (Tanga Samu 73:24-28.) Mashimbu eswe mutusa tachi hanga tunyingike kanawa Yehova, mutumusakwilila chinji ha kupwa sepa lietu mupema.
9. Nyi ‘twatayiza’ Yehova, yika mutulinga? Hana chilweza.
9 Mbimbiliya yakwamba ngwo: “Ukamutayize [Yehova]” (Yishi. 3:5, 6) Chino chinalumbunuka kunyonga ha yuma yize hitwalilongesa hali iye, ni chize akwiva mumu lia yuma yize twakulinga hanji yize kutushi kulinga. Nyi twachilinga, mutukwata yiyulo yipema. Ngwe chilweza, mandumbu anji kakusa foto ya mutu yoze alimbata nenyi, ha chihela haze mahasa kuyimona mashimbu eswe. Chino chakwakwasa kunyonga mashimbu eswe hali mutu yoze alimbata nenyi, kukwata yiyulo yize muyimuvisa kuwaha ni kwehuka yuma yize muyihasa kumulemeka ku mbunge. Chizechene nawa, nyi mutunyonga mashimbu eswe hali Yehova, mutukwata yiyulo yize muyimuvisa kuwaha.—Samu 19:13, 14.
10. Nyi twanyingika yuma yinji hakutwala kuli Yehova, yika mutuhasa kulinga?
10 Twakwimbulula yitanga ya Yehova, mumu katutangile mu chifwa chenyi. (Uputu. 1:26) Nyi twanyingika yuma yinji hakutwala kuli iye, muchipwa chashi kumwimbulula. Yino ye alongeshi a shimbi ni A-Fwariseu kakalingile. Chipwe ngwe ayo kanyingikine kanawa Shimbi, nihindu kapwile ni ‘kulengulula yikuma yilemu ya Shimbi, che kwamba kupatwila ni ululi, keke ni ushishiko.’ (Mateu 23:23) Yetu kutwazangile kupwa ngwe ayo. Tunazange kunyonga ha yize shimbi ni yikota ya shimbi yakutulongesa hali Yehova. Kulinga chino, muchitukwasa kusolola yitanga yipema.—1 Yoa. 4:8, 11.
CHIZE MUHASA KUNYINGIKA KANAWA YEHOVA
11. Kuchi wanyingikine Yehova?
11 Iya wakulongesele umwenemwene hakutwala kuli Yehova? Hanji yisemi je e akulongeselewo. Kota ayo kakulongesele yitanga ya Yehova, yize atangile, ni chize yitangiwa yakusolola utu wenyi. Muchihasa kupwa nawa ngwe, watayijile longeso lia Mbimbiliya kuli umwe Chela cha Yehova. Kupalikila mu mukanda Wahilila ku Mwono ku Miaka Yeswe!, longeshi we wa Mbimbiliya kakukwashile kuhengwola Yisoneko ni kulilongesa yitanga ya Yehova ha kutala yitangiwa.b (Nehe. 8:8; Yili. 14:17) Tutalenu chize mutuhasa kununga ni kulilongesa hakutwala kuli Yehova.
12-13. Yika mutuhasa kulilongesa hakutwala kuli Yehova ha kutanga Mbimbiliya? Hana chilweza. (Jeremia 39:15-18) (Tala nawa chizulie ha chifukilo.)
12 Mutuhasa kulilongesa yuma yinji hakutwala kuli Yehova ha kutanga ni kulilongesa Liji lienyi. Ha mashimbu amwe, Mbimbiliya yakutongola yitanga ya Zambi. (Kutuhu. 34:6, 7) Kanji-kanji, yakuhanjika hakutwala kuli atu, ni yiyulo yize ayo akwachile. Muze mutanga sango jacho, nyonga ha yize muhasa kulilongesa hakutwala kuli Yehova.
13 Tutalenu chimwe chilweza. Nyi watanga Jeremia 38:6-13, mulilongesa yuma yinji hakutwala kuli Ka-Etiopia Ebede-meleke, yoze walamwinyine profeta Jeremia. Kota muchihasa kupwa chashi kuli yena kumona chize muhasa kwimbulula Ebede-meleke yoze waolwele hamu ni zango ha kukwasa Jeremia, chipwe ngwe kuchakapwile chashi. Shina wamona yitanga yikwo ya Yehova yize anasolola ha lusango yono? (Tanga Jeremia 39:15-18.) Ngwe chilweza, versu yika yinasolola ngwo Yehova kali mukwa-kusakwilila, mukwa-ululi nawa keshi katonde? Yitanga yikwo yika ya Yehova yize wamona ha lusango yono? Mashimbu eswe mutanga Liji lia Zambi, fupa kunyingika yitanga ya Yehova. Chikwo nawa, musakwilile ni kumuhalisa ha yitanga yacho.
Ebede-meleke kanasolola hamu, ha kuchiza Jeremia mu shima (Tala paragrafu 12 ni 13)
14. Mumu liaka twatamba kupukuna ha yitangiwa?
14 Mutuhasa kulilongesa nawa yuma yinji hakutwala kuli Yehova, ha kupukuna yitangiwa. (Samu 145:9, 10) Kwamba pundu, chino kuchishi kulingiwa ha kutala wika yuma yize Yehova atangile. Ngwe chilweza, atu amwe kakupalikisa miaka yinji ku mwono wo ha kulilongesa hakutwala ku tushitu ni mitondo. Chipwe chocho, ayo keshi kunyingika ngwo kwatwama umwe Zambi yoze watangile yuma yacho, yoze ukwete yitanga yipema. Postolo Paulu kasonekene ngwenyi: “Yitanga yenyi yize kuyishi kumoneka, chipwe ndundo jenyi ja mutolo ni Uzambi wenyi, yakusoloka zwalala chize ku uputukilo wa yitangiwa mumu twakuyimona kupalikila mu yuma yize atangile.” (Roma 1:20) Mu Mbimbiliya yimwe, versu yino kayilumbunwine ngwo, “Mutu yoze wakupukuna kanawa, mahasa kumona yitanga ya Zambi.” Kashika, mba tunyingike yitanga ya Sakatanga wetu, twatamba kupukuna ha yize twakumona.
15. Yika Patrick alingile hanga anyingike kanawa Yehova? Kuchi yena muhasa kumwimbulula? (Tala nawa chizulie.)
15 Anji a kuli yetu, kota twatwama mu mambonge waze keshi ni mitondo yinji hanji tushitu anji. Chipwe ngwe watwama ku chihela ngwe chino, nihindu muhasa kulilongesa hakutwala kuli Yehova kupalikila mu yuma yize atangile. Tutalenu chilweza cha Patrick, yoze watwama mu Brazzaville, yimwe mbonge yinene ya mu República ya Congo. Iye yamba ngwenyi: “Tangwa ha tangwa, nakweseka kutala chimwe chuma chize Yehova atangile. Kanji-kanji nakumona tungenyengene, tujila ni tushitu akwo akehe-akehe waze anafupu kulia ni chihela cha kutwama. Tangwa limwe namwene chize te tujila anatungu chaswa cho. Ayo kapwile ni kufupa mu mbonge, yuma yize te muyakwasa kutunga chaswa chipema hanga ana tujila atwame kanawa.” Alioze Patrick kalingile yuma yikwo nawa. Iye yamba ngwenyi: “Nalilongesa ngwami, Yehova kakulihulumba ni yitangiwa yenyi, chipwe yize yakusoloka ngwe kuyishi ni ulemu. Chino chakungwaha shindakenyo ngwami, mashimbu eswe iye mangufunga ni kungwaha yize mungufupa.”
Nyingika kanawa Yehova, ha kupukuna ha yuma yize iye atangile (Tala paragrafu 15)
16. Yika yakwashile Maria naye ya Yesu kunyingika kanawa Yehova, chikwo nawa kuchi mutuhasa kumwimbulula? (Tala nawa chizulie.)
16 Jila yikwo yize muyitukwasa kunyingika kanawa Yehova, yili kupukuna ha yize twapalikile ku mwono wetu. Yino ye Maria, naye ya Yesu alingile. Iye kanyingikine kanawa Yehova, chikwo nawa ‘kapwile ni utayizo wenyi.’ (Luka 1:30) Alioze katambwile chiteli chilemu chinji, cha kupwa naye ya Mwana wa Zambi. Yehova yatakamisa Maria ni kumukwasa kulihumikiza kupalikila muli usoko wenyi Izabele ni mungelo Gabriele. Kulutwe, Maria yapukuna ha yuma yize apalikile ku mwono wenyi yize yasolwele ngwo Yehova kali mukwa-ndundo, mukwa-keke, keshi katonde, chikwo nawa kakulemesa atu waze akulelesa chinji kuli akwo. (Luka 1:46-55) Chizechene ngwe Maria apwile ni kusakwilila ukwaso wa Zambi, ni yetu twakusakwilila muze Yehova akutukwasa “ha shimbu lialita.” (Hepre. 4:16) Muze mutambula umwe ukwaso, lihule ngwe: Yika nalilongesa hali Yehova? Yitanga yika Yehova angusolwela?
Nyingika kanawa Yehova, ha kupukuna ha yuma yize akulingila (Tala paragrafu 16)c
MUTUNUNGA NI KULILONGESA
17-18. Mumu liaka mutuhasa kwamba ngwetu, kutuchi keza kecha kulilongesa hakutwala kuli Yehova?
17 Nyonga ha yuma yinji yize mutukalilongesa hali Yehova mu chifuchi chaha. Mutukatambula yivungo yize muyikasolola yuma yize Yehova makashimbwila hali yetu. (Uso. 20:12) Mutukalilongesa yuma yinji hakutwala kuli iye muze mutukalivisa kuwaha ni yuma yeswe yize atangile. (Iza. 11:6-9) Chikwo nawa, mutukanyingika kanawa Yehova mu majila aha muze mutukamona masepa ni mandumbu jetu maahindwisa ni muze mutukamona chize makatukwasa kupwa atu angunu.
18 Kutuchi keza kecha kulilongesa hakutwala kuli Yehova. Iye katwamako chize ku miaka ya mutolo ndo ku miaka ya mutolo. Kashika, “chili chikalu kunyingika mana jenyi.” (Samu 90:2; 147:5) Yetu kutuchi kuhasa “kusa chinyingi milimo yize Zambi hanalingi chize ku uputukilo ndo ku songo.” (Chilu. 3:11) Kashika, chipwe ngwe twakulingila Yehova ha miaka yinji, nihindu tulieswe tunazange kulilongesa hakutwala kuli Tata yetu wa zango.
MWASO 28 Kupwa Sepa lia Yehova
a Tala chikuma chakusoloka ku uputukilo wa Mbimbiliya ya Yisoneko ya Chifuchi Chaha, chili ni mutwe unambe ngwo, “Nyingika Kanawa Liji lia Zambi,” chihula 20.
b Tala longeso 7 ni chikuma 5-7, mu mukanda Wahilila ku Mwono ku Miaka Yeswe!
c ULUMBUNWISO WA YIZULIE: : Umwe ndumbu yoze wakusakalala chinji, kanapukuna ha chize Yehova amukwasa kumanununa chihanda chenyi ha kukunguluka cha mukachi ka poso.