Nunga ni Kukolesa Usepa We ni Yehova Chipwe Muze Uli ku Shikola Yinene

1-2. (a) Nyi wasakula kuya ku shikola yinene yika watamba kununga ni kulinga? (b) Maliji ‘kununga ni kwenda mu jila yacho,’ yika analumbunuka? (A-Fwilipu 3:16)

TUVUMBI a Yehova amwe, kakusakula kuya ku shikola yinene hanyima lia kuhwisa shikola yize nguvulu akwita. Ayo mahasa kunyonga ngwo, nyi maya ku shikola yinene, mawana mulimo uze muwakwasa muze analingila Yehova. Nyi wasakula kuya ku shikola yinene, kuchi muhasa kupwa ni shindakenyo ngwe, mununga ni kukundama kuli Yehova? (Tia. 4:8a) Kwamba pundu, muze te unachililongesa shikola yikehe, wapalikile mu yuma yize yesekele ufulielo we, chipwe chocho wayikumbile. Haliapwila, watamba kununga ni kwenda mu jila yacho, hanji ngwetu kununga ni kulingila Yehova ni ushishiko ngwe chize walingile kunyima.—Tanga A-Fwilipu 3:16.

² Mu limi lize asonekene Mbimbiliya, maliji analumbununa ngwo, ‘kununga ni kwenda mu jila yacho,’ kapwile ni kutwala atu hanga anyonge hali maswalale waze ananungu ni kwenda hamuwika chakuhona kumana, hanji kuhilukila kunyima. Ha mutwe uno, mutushimutwina yikota yiwana ya shimbi ja mu Mbimbiliya yize muyihasa kukukwasa. Yena unanyingika yikota yacho. wayikawile kunyima, kashika watamba kununga ni kuyikaula muze uli ku shikola yinene ni muze muhwisa kulilongesa.

NUNGA NI KULINGA YUMA YIZE MUYIKUKWASA KUKUNDAMA KULI YEHOVA

3. Muze unalilongesa shikola yinene, kapinda muka mahasa kusolokako?

³ Kapinda. Muze unalilongesa shikola yinene, mashimbu je makeha, mumu mukusoloka yuma yinji yize watamba kulinga hita tangwa. Amu unazange hanga yuma ku shikola yinene yende kanawa, muhasa kulihulikila chinji ha yuma ya ku shikola ni kuputuka kulengulula yuma ya ku ufulielo, ngwe kuya ku kukunguluka, kutanga Mbimbiliya, kulinga longeso lie lia wika, kulemba, ni kwambujola.—Uso. 2:4.

4. Yika muyikukwasa ‘kulihana chinji mu milimo ya Mwene’? (1 A-Korindu 15:58)

⁴ Tanga 1 A-Korindu 15:58. Kinga mba yinunge ni kwenda, watamba kununga ni kuyichofa. Chizechene nawa, mba usepa we ni Yehova ununge ni kukola, watamba kununga ni kulinga yuma ya ku ufulielo. Kashika Mbimbiliya yakutukolweza ‘tulihane chinji mu milimo ya Mwene.’ Mba uchilinge, kuwatambile kupalikisa wika amwe mashimbu ha kulinga yuma ya ku ufulielo. Alioze, watamba kusa yuma ya ku ufulielo ha chihela chitangu ku mwono we. Chitangu watamba kulimona ngwe uli kavumbi ka Yehova, mba mulimona ngwe uli longi wa ku shikola. (Mateu 22:37) Umwe ndumbu wa pwo avuluka ngwo Samantha, yamba ngwenyi: “Nalilakenyene ngwami, nyi shikola yami muyingupinjisa kuwayila Yehova, munguyecha.”

5. Yika muhasa kulinga hanga ununge ni kulingila Yehova?

⁵ Yize watamba kulinga shimbu kanda uchiya ku shikola yinene. Sako shindakenyo ngwe, mununga ni kusa Yehova ha chihela chitangu ku mwono we. Lihule ngwe: ‘Shina hinalulieka katalilo mupema yoze mangukwasa ngununge kuya ku kukunguluka, kulinga longeso lia wika ni kwambujola mashimbu eswe?’ (Yoshu. 1:8; Mateu 28:19, 20; Hepre. 10:25) Chikwo nawa, nyonga ha chino: Kuchi wapwile ni kusa yuma ya ku ufulielo ha chihela chitangu ku mwono we muze wapwile ku shikola yikehe? Nyi wamona ngwe kuli yuma yimwe yize kuwakapwile ni kulinga kanawa, yika muhasa kulinga hanga upwe ni shindakenyo ngwe muyilinga kanawa? Sako tachi hanga ununge ni kulingila Yehova, chipwe ngwe uli ku shikola yinene. Chili chilemu kusa tachi hanga ulilongese kanawa muze uli ku shikola. Alioze, kanda wecha hanga kulilongesa chikumbate mashimbu ni tachi ja kulingila Yehova.—Mateu 6:24.

6. Yika watamba kulihula hanga umone nyi unanungu ni kusa Yehova ha chihela chitangu ku mwono we? (Tala nawa chizulie.)

⁶ Muze uli ku shikola yinene, nunga ni kulihengwola. Nyi muchilita, kamuwika ha kakweji. Lihule ngwe: ‘Shina ngunanungu ni kusa yuma ya ku ufulielo ha chihela chitangu ku mwono wami? Shina hichapwa chako kuhona kupwa ha kukunguluka hanji kulaluka? Muze nguli ha kukunguluka, shina nakunyonga chinji ha malongeso jami a ku shikola? Shina hinapwa ni chako cha kukungulukila ha Videoconferência kuhiana kupwa mu Zuwo lia Wanangana?’ Muhasa kulihula nawa ngwe, ‘Shina nakulemba matangwa eswe ni kutanga Mbimbiliya ngwe chize napwile ni kulinga kunyima? Shina nakuya mu mulimo wa kwambujola mumu ngwo ndo nguchilinge, chikwo nawa nakuzanga kuuhwisa ni kawashi?’ Nyi wakumbulula ngwo ewa, ha yihula yimwe, sako tachi hanga walumune yimwe ku mwono we. Kanda wecha hanga shikola yikukwike kusa Yehova ha chihela chitangu ku mwono we.

KANDA WECHA AKWENU AKUTWALE KUKAKAJANA HA UMWENEMWENE WA MU MBIMBILIYA

7. Kuchi kulilongesa shikola yinene muchihasa kwalumuna mutapu wa kunyonga che?

⁷ Kapinda. Ku shikola mahasa kukulongesa yuma yize yakulimika ni Mbimbiliya, hanji ngwo “mana a hano hashi, ni kwonga chamokomoko.” Ngwe chilweza, mahasa kukulongesa ngwo Zambi katwamineko, atu kakaatangile. (Kolo. 2:8) Chikwo nawa, yuma yize mulilongesa ku shikola muyihasa kukutwala hanga ulijikijile yena mwene kuhiana kujikijila Yehova. Umwe ndumbu kanewuluka ngwenyi: “Yetu kakatulongesele wika yuma yaha. Alioze, katulongesele nawa umwe mutapu wa kunyonga, uze walisa ni chize Yehova akuzanga hanga tunyonge. Ngwe chilweza, katulongesele ngwo mba mutu awahilile ku mwono, katamba kujikijila ha utotombo wenyi. Chino changutwalile hanga ngunyonge ngwami, te kuchafupile ukwaso wa Yehova mba nguwahilile. Mumu lia chikuma chino, chapwile chikalu kuli yami kujikijila muli Yehova.”

8. Mumu liaka chili chilemu kufunga “maseliekela”? (Yishima 5:1, 2)

⁸ Tanga Yishima 5:1, 2. Mbimbiliya yakutukolweza hanga ‘tufunge maseliekela.’ Nyi twanyingika ngwetu chuma chimwe chili chilemu kuli yetu, twakuchifunga kanawa ahone kuchipihisa hanji kutwiyacho. Satana ni chifuchi chenyi, mashimbu eswe kakusa tachi hanga alumune manyonga jetu. (1 Petu. 5:8) Mumu lia yize atu akwamba ni kunyonga, yena muhasa kukakajana nyi Zambi katwama ko nyi ka, hanji kukakajana ha yize Yehova akutulongesa yinatale ha chipi ni chipema. Alongeshi je hanji atu amwe, mahasa kukutwala hanga unyonge ngwo, ayo kananyingika kanawa yikuma yino kuhiana atu akwo. Alioze, manyonga jacho kali a “uhepuke kuli Zambi.”—1 Kori. 3:18-20.

9. Yika muhasa kulinga hanga ufunge maseliekela?

⁹ Yize watamba kulinga shimbu kanda uchiya ku shikola yinene. Shimbu kanda uchiya ku shikola yinene, sako shindakenyo ngwe, yize Mbimbiliya yakulongesa yili yamwenemwene. Lihule ngwe: ‘Yika yakungwaha shindakenyo ngwo Zambi katwamako? Yika yakungwaha shindakenyo ngwo Mbimbiliya yili Liji lienyi? Yika yakungwaha shindakenyo ngwo kutwama kulita ni yize Mbimbiliya yakwamba ngwo yalita, chili chipema kuhiana kukaula yize atu akwamba? Chikwo nawa, nyonga ha yize yalingiwile kunyima. Kwamba umwenemwene, muze wapwile ku shikola yikehe yena wanyingikine chize akwa-hashi akunyonga. Shina ufulielo we watepulukile muze wanyingikine ngwo, atu akwo kakutayiza ngwo yuma yalitangile yene? Shina chapwile chikalu kuli yena kulituna yuma yipi yize alongi ni akwenu te akulinga? Nyi wakumbulula ngwe ewa, ha chihula chimuwika hanji yaali, yika muhasa kulinga haliapwila hanga upwe ni shindakenyo ngwo, yize Mbimbiliya yakulongesa yili yamwenemwene, chikwo nawa muyikuyukisa mashimbu eswe? Muze uli ku shikola yinene, kanda wecha hanga akwenu akutwale kukakajana ha yuma yize wakufuliela ngwo yili yamwenemwene.—2 Timo. 2:16-18.a

10. Kuchi muhasa kununga ni kufunga maseliekela?

¹⁰ Muze unalilongesa shikola yinene, nunga ni kulihengwola. Lihule ngwe: ‘Shina ngunaputuka kunyonga ngwami, yuma yize Yehova akwamba ngwo kuyalitele, yize akwetu akulinga hi yipi ko chinji? Shina ngunanyingika ngwami, yuma yize anangulongesa yili wika manyonga ja atu? Shina nguli ni shindakenyo ngwami, Wanangana wa Zambi we wika muukahwisa upi weswe hano hashi?’ Mba ufunge maseliekela, watamba kununga ni kupwa longi mupema wa Liji lia Zambi. Kutanga Mbimbiliya ni kuyipukuna, muchikukwasa kupwa ni shindakenyo ngwe, yize unalilongesa yili yamwenemwene.—1 Timo. 4:15.

KANDA UKISA MASHIMBU JE

11. Shimbu uchili ku shikola yinene, kapinda muka mahasa kusolokako?

¹¹ Kapinda. Kuya ku shikola yinene muchihasa kumbata mashimbu anji. Mupwa ni yuma yinji ya kulinga, chipi-chipi muze muheta ha mashimbu a yeseko ku shikola ni muze unase tachi hanga uhwise umwe mulimo. Nyi wakanyamine, muhasa kusakalala chinji ni kuhonga mashimbu eswe. Kashika, chili chilemu chinji kulifunga ku mujimba ni ku manyonga.

12. Yika watamba kulinga hanga uhone kukisa mashimbu je ni yuma yamokomoko? (A-Efwesu 5:15, 16)

¹² Tanga A-Efwesu 5:15, 16. Muchihasa kupwa chikalu kuhona ‘kukisa mashimbu ni yuma yamokomoko.’ Mumu liaka? Mumu tuli ni yuma yinji ya kulinga. Ngwe chilweza, chipwe ngwe watamba kupwa hamwe ni alongi-ni-akwenu hanga nulilongese, nihindu chili chilemu kusa mashimbu hanga upwe hamwe ni asoko ni mandumbu je a mu chikungulwila. (Samu 133:1; Yishi. 18:1) Chipwe ngwe mulinga yuma yeswayo, nihindu yuma ya ku ufulielo, yatamba kupwa ha chihela chitangu ku mwono we. (Mateu 6:33) Muchihasa kupwa ngwe watamba kulinga yimwe hanga ufunge asoko je, hanji ukwete umwe mulimo. Chikwo nawa, watamba kunana-nana mujimba we ni kuufunga kanawa ha kupwa ni mashimbu a kuhwima. (Chilu. 4:6; 1 Timo. 4:8) Yuma yeswe mba tuyilinge, twatamba kupwa ni mana hanga tumone yize mutulinga ni mashimbu jetu.

13. Yika muhasa kulinga hanga uhone kukisa mashimbu je?

¹³ Yize watamba kulinga shimbu kanda uchiya ku shikola yinene. Mbimbiliya yakwamba ngwo, yuma yeswe muyenda kanawa nyi twanyingika shimbu lize twatamba kulinga yize tunazange. (Yishi. 21:5) Hachino, linga katalilo mupema shimbu kanda uchiya ku shikola yinene. Mba uhase kuchilinga, nyonga ha yize yalingiwile kunyima. Muhasa kunyonga ha mashimbu waze wapwile ku shikola yikehe ni kulihula ngwe: Shina napwile ni mashimbu a kulinga yuma yeswe yilemu? Nyi mumona ngwe kuwakalingile kanawa yuma yimwe kunyima, yika muhasa kululieka haliapwila? Sako tachi hanga upwe ni katalilo mupema hanga uhone kusakalala mashimbu eswe.

14. Yihula yika muyikukwasa kulihengwola?

¹⁴ Matangwa eswe, lihengwole utale yize unalingi ni mashimbu je. Lihule ngwe: ‘Shina yuma yize nakulinga yakungwaha mashimbu a kuhwima ni kunana-nana mujimba? Shina nakuhasa kupwa hamwe ni mandumbu jami a mu chikungulwila? Shina nakuhasa kulinga milimo yami hanji yiteli yikwo ha shimbu lialita? Nyi kuushi kuhasa kulinga yuma yize twatongola hano, shina chakulingiwa mumu wakweseka kulinga yuma yeswe ha shimbu limuwika nyi wakushimbwila kuyilinga ha minutu ya kasula? Shina asoko jami ni masepa jami kanamono ngwo kuli yimwe yize natamba kwalumuna?’ Nyi mumona ngwe, watamba kwalumuna yimwe ha katalilo we hanji kumupemesa, sako tachi hanga uchilinge kawashi-washi. Chikwo nawa, muhasa kuhanjika ni atu waze akuhasa kulinga kanawa yuma chakuhona kukisa mashimbu.—Yishi. 11:14.

LIKATE NI MASEPA WAZE AKUZANGA YEHOVA

15. Muze unalilongesa shikola yinene mu cheseko chika muhasa kupalika?

¹⁵ Kapinda. Muze unalilongesa shikola yinene, alongi-ni-akwenu mazanga hanga ulichinge no. Muhasa kupwa mu cheseko cha kulichinga no, mumu hanji nuli ni miaka yimuwika, nwakuzanga yuma yimuwika, hanji nawa mumu lia kutwama mashimbu anji chimuwika. Chikwo nawa, yena muhasa kumona ngwe ayo kali ni yuma yinji yinalifu ni ya yena kuhiana mandumbu je a mu chikungulwila. Alioze watamba kukanyama. Mumu liaka? Mumu chipwe ngwe nuli ni yimwe yalifa, yenu nwalisa chinji. Ayo keshi kuwayila Yehova, yena wakumuwayila. Muze muputuka kupalikisa no mashimbu anji, ni yena muputuka kunyonga ngwe ayo. (1 Kori. 15:33) Yino ye yalingiwile kuli ndumbu Michael, ha miaka yiwana muze te analilongesa milimo ya kahia ka zembwe. Iye yamba ngwenyi: “Muze napwile ni kupalikisa mashimbu anji ni alongi-ni-akwetu, ayo kapwile ni kuhanjika ni kwiva miaso ya sonyi, te keshi kuvumbika mapwo, chocho ni yami yinguputuka kunyonga ngwami yuma analingi hi yipi ko chinji.”

16. ‘Kwenda ni akwa-mana’ yika chinalumbunuka? (Yishima 13:20)

¹⁶ Tanga Yishima 13:20. Mbimbiliya yakututoweza ngwo, kulikata ni atu waze keshi kuwayila Yehova muchitukokela lamba. Chekwamba, ‘nyi wenda ni akwa-mana ni yena mupwa ni mana.’ Yika twalilongesa? Twalilongesa ngwetu, mutuhasa kulilongesa yuma yipema hanji yuma yipi kuli atu waze twakupalikisa no mashimbu. Kashika, sakula masepa waze akuzanga Yehova ngwe yena, waze anazange hanga yena upwe ni uwahililo wamwenemwene.—Samu 101:6, 7; 119:63.

17. Yika muhasa kulinga hanga uchine kulikata ni masepa api?

¹⁷ Yize watamba kulinga shimbu kanda uchiya ku shikola yinene. Lianga kutesa mashimbu waze mupwa ni kutwama ni alongi-ni-akwenu, ni usepa uze munupwa nawo. Umwe Chela cha Yehova avuluka ngwo Trenton, yamba ngwenyi: “Nakuhanjika kanawa ni alongi-ni-akwetu, alioze chishi kupalikisa no mashimbu anji. Nakwamona ngwe alongi-ni-akwetu, chishi kwamona ngwe masepa jami.” Kuchi muhasa kupwa ni shindakenyo ngwe kuuso kupalikisa no mashimbu anji hanji kwakundama chinji? Mba ukumbulule chihula chino lihule ngwe: Yika yangukwashile muze napwile ku shikola yikehe? Nyi mumona ngwe kuwakalingile kanawa yuma yimwe kunyima, yika muhasa kululieka haliapwila? Nunga ni ‘kwenda ni akwa-mana,’ ni kwehuka kulikata ni atu waze keshi kuzanga Yehova.b

18. Yika muhasa kulihula ha kupalika cha amwe mashimbu? (Tala nawa chizulie.)

¹⁸ Ha kupalika cha amwe mashimbu, lihengwole nawa. Lihule ngwe: ‘Shina ngunalikate chinji ni alongi-ni-akwetu? Shina yitanga yo, yize akuhanjika ni chize akulinga yuma, yinakwate ha manyonga jami? Kuchi Yehova akunyonga ha usepa wami ni alongi-ni-akwetu?’ (Samu 1:1) Nyi wamona ngwe watamba kwalumuna yimwe, yilinge ni kawashi. Sako shindakenyo ngwe masepa je kakuzanga Yehova, chizechene ngwe yena. Chikwo nawa, kanda wecha kuhanjika ni alongi-ni-akwenu hakutwala ku yize Mbimbiliya yakulongesa. Yena uli ni uhashi unji wa kwakwasa hanga alilongese hakutwala kuli Yehova

LILULIEKE

19. Kuchi muhasa kununga ni kulinga yuma ya ku ufulielo muze unalilongesa shikola yinene? Hana chilweza.

¹⁹ Atu waze akuzanga kuzomboka kakulilulieka shimbu kanda achiputuka kuzomboka. Ayo katamba kupwa ni shindakenyo ngwo, kali ni tachi hanga ahete ndo ku songo, kali ni yuma yeswe yize muyafunga ha mashimbu a chishika ni a chivukuminya, chikwo nawa kananyingika kuze anayi. Chipwe ngwe ayo kanyingikine yuma yeswe yize muyilingiwa mu jila, nihindu kulilulieka kanawa hanji kupwa ni yuma yeswe muchakwasa kuheta kuze anayi. Yino mutuhasa kuyitesa ni yuma yize muyikukwasa muze mwoya ku shikola yinene. Nunga ni kukolesa usepa we ni Yehova. ‘Zala mazalo eswe a utale.’ Chikwo nawa, iwuluka mumu liaka unazange kulilongesa shikola yinene. Yena kuuchi kulilongesa shikola yinene mumu ngwo unazange kupwa ni mbongo jinji hanji lufuma mu chifuchi chino. Alioze, chuma unazange chili kuvisa Yehova kuwaha mu yuma yeswe.—Efwe. 6:11-13; 1 Kori. 9:26, 27; 10:31.

20. Kuchi mutuhasa kununga ‘ni kulihengwola yetwene hanga tumone nyi tuli mu ufulielo’?

²⁰ Mbimbiliya yakutukolweza ‘tununge ni kulihengwola yetwene hanga tumone nyi tuli mu ufulielo; mba tununge ni kusolola chize twapwa.’ (2 Kori. 13:5) Yena muhasa kuchilinga muze unanungu ni kulilongesa. Yika muyihasa kukukwasa? Pukuna ha yihula yino: ‘Shina unanungu ni kusa tachi hanga ulinge yuma ya ku ufulielo? Shina unafungu mbunge ye ku manyonga a hano hashi? Shina unase tachi hanga uhone kukisa mashimbu je? Shina unakundama kuli masepa je a mu chikungulwila muze unehuka waze keshi kuwayila Yehova? Kwamba umwenemwene, yihula yino ye Yela ja Yehova atamba kulihula, muze ali ku shikola, ku milimo hanji ku chihela cheswacho. Sako tachi ukolese ufulielo we chipwe ngwe mulitakana ni yuma yeswayo. Yehova makuwahisa nyi wasa tachi hanga ulinge yuma yalita ni kununga kukundama kuli iye.—Yishi. 3:5, 6.