20-26 JULHO, 2026
MWASO 133 Wayilenu Yehova ha Matangwa a Ukweze
Nyonga Kanawa Shimbu Kanda Uchiya ku Shikola Yinene
“Chikanyame kakutala kanawa ku kwenda chenyi.”—YISHI. 14:15.
YIZE MUTULILONGESA
Mutumona yikuma yilemu yize twatamba kuhengwola, shimbu kanda tuchikwata chiyulo cha kuya ku shikola yinene, ni chize shimbi ja mu Mbimbiliya mujitukwasa kukwata chiyulo chipema.
1-2. (a) Yiyulo yika akweze atamba kukwata? (b) Maliji “shikola yinene yika analumbunuka”? (Tala “Ulumbunwiso wa Amwe Maliji.”)
NYI uli mukweze, kota hanakuhula ha yisuho yinji ngwo: “Mulimo uka unazange kulinga muze mukola?” Kulingila Yehova mu mulimo wa shimbu lieswe, uli mulimo upema chinji uze muhasa kulinga ku mwono we. Alioze, watamba nawa kukalakala hanga upwe ni mbongo jize mulikwasa najo. (2 Tesa. 3:10) Kota hiunatese kulu mulimo uze unazange kulinga kulutwe.
2 Kanji-kanji, muze akweze akuhwisa shikola yikehe, yisemi jo kakuzanga aye ku shikola yinene hanga chikapwe chashi kuwana milimo. Kota wakunyonga nyi watamba kuya ku shikola yinene nyi ka.a Nyi chenacho, yika unazange kulilongesa ko? Ha mutwe uno, mutumona yikota ya shimbi ja Mbimbiliya yize muyihasa kukukwasa kunyonga kanawa hakutwala ku shikola yinene ni kukwata yiyulo ya mana. Chipwe ngwe mutwe uno unahanjikila hali akweze, alioze muuhasa kukwasa Akwa-Kristu eswe waze anazange kuya ku shikola yinene. Yiyulo mutushimutwina ha mutwe uno, muyikwasa yisemi amone chize makwasa ana jo akwate yiyulo yipema.
SHINA WATAMBA KUYA KU SHIKOLA YINENE?
3. Mumu liaka Akwa-Kristu amwe akusakula kuya ku shikola yinene?
3 Ku yihela yimwe, mutu mahasa kuwana mulimo upema, chipwe ngwe kalilongesele chinji. Alioze ku yihela yikwo, mutu katamba kuya ku shikola yinene mba awane mulimo uze mamufweta kanawa ni kupwa ni mashimbu a kulinga yuma yikwo. Chino muchihasa kukwasab Mukwa-Kristu kupwa ni katalilo wa kwambujola ha mashimbu anji, ni kulinga milimo yikwo nawa ya shimbu lieswe. Alioze, kuya ku shikola yinene chakumbata mashimbu, tachi ni mbongo jinji. Chikwo nawa, waze akuyako katamba kukwata yiyulo yilemu.
4. Iya watamba kusakula nyi Mukwa-Kristu maya ku shikola yinene nyi ka? (Tala nawa maliji mushi lia lifwo.)
4 Mbimbiliya yakwamba ngwo, “mutu ni mutu makambata chiteli chenyi mwene.” (Ngala. 6:5) Kashika, Mukwa-Kristu mweswe yoze hakola, katamba kusakula nyi maya ku shikola yinene,c nyi ka. Yisemi no kali ni ulite wa kusakula utotombo uze ana jo malilongesa muze achili twanuke. (Efwe. 6:1) Chikwo nawa, ayo mahasa kukwasa ana jo akwate yiyulo yipema, amone nyi maya ku shikola yinene nyi ka, muze makola.—Yishi. 22:6.
5. Ha shimbu lika mutu atamba kunyonga nyi maya ku shikola yinene nyi ka? Mumu liaka? (Tala nawa chizulie ha chifukilo.)
5 Chili chipema kuli akweze, anyonge nyi maya ku shikola yinene nyi ka, shimbu kanda achihwisa shikola yikehe. Kwamba umwenemwene, akweze katamba kuhanjika ni yisemi jo hakutwala ku chikuma chino, shimbu kanda achikwata chiyulo. Chino muchakwasa kupwa ni mashimbu akuhengwola hamuwika ni yisemi jo ni kumona yize malilongesa ku shikola. Ayo hanji mamona ngwo, mahasa kulilongesa utotombo umwe uze muukakwasa kuwana mulimo, hanji muze makaya ku shikola yinene. Shina ayo katamba kukwata chiyulo shimbu mwano kanda achihwisa shikola yikehe? Muchihasa kupwa. (Yishi. 21:5) Akweze amwe hanahwisa shikola, kakukalakala, chikwo nawa hanaputuka mulimo wa upionelu. Chipwe chocho, machinyonga nyi maya ku shikola yinene nyi ka. Kashika, chipwe ngwe mukupalika mashimbu anji, nihindu mutu mahasa kunyonga cheka ha chiyulo chacho.
Yisemi Akwa-Kristu, kakukwasa ana jo hanga akwate yiyulo yipema hakutwala ku shikola yinene (Tala paragrafu 5)
6. Yika muyihasa kukwasa mutu kukwata chiyulo chipema hakutwala ku shikola yinene?
6 Yika muyikukwasa kukwata chiyulo cha mana hakutwala ku shikola yinene? Lemba kuli Yehova hanga akukwase kukwata chiyulo chipema. (Tia. 1:5) Chikwo nawa, nyonga ha yikuma yino yaali: Chitangu, lihule mumu liaka unazange kuya ku shikola yinene. (Samu 26:2) Chamuchaali, nyonga ha yuma yize muzuka ni kapinda yoze muhasa kupwa nenyi ku shikola yinene. (Yishi. 14:15) Haliapwila tuhanjikenu ha yikuma yino.
MUMU LIAKA UNAZANGE KUYA KU SHIKOLA YINENE?
7. Yika watamba kulihula nyi unazange kuya ku shikola yinene?
7 Nyi unazange kuya ku shikola yinene, lihule ngwe: ‘Mumu liaka ngunazange kulilongesa chinji?’ Atu anji kakulilongesa chinji hanga awane mulimo uze akuzanga hanji uze maafweta mbongo jinji. Shina manyonga wano kali api? Hi chocho ko. (1 Timo. 5:8) Alioze Mbimbiliya yakutulongesa ngwo, kutwatambile kunyonga ngwetu, mbongo che chuma chilemu chinji hanji ngwetu, mbongo wika mujitufunga. (Yishi. 23:4, 5; 1 Timo. 6:8-10; 1 Yoa. 2:17) Nyi unazange kulilongesa chinji upwe pichi, hanji ngwo akwenu akulemese, yena kuuchi kupwa ni uwahililo wamwenemwene. Chikwo nawa, mupihisa usepa we ni Yehova.
8-9. (a) Kuchi Akwa-Kristu atamba kumona shikola? (Mateu 6:33) (b) Yika twalilongesa ha chilweza cha Josefina, Morine ni Iris?
8 Kuchi twatamba kumona shikola? Nichimwe chuma kuchatambile kupwa chilemu chinji kuli yetu, kuhiana kuwayila Yehova. (Mateu 22:37, 38; Fwili. 3:8) Kashika, watamba kulilongesa ni nyonga lia kuwana yize mulikwasa nayo, muze unanungu ni kuwayila Yehova ni mbunge yeswe.—Tanga Mateu 6:33.
9 Yika yakwashile amwe akweze kupwa ni nyonga lia Yehova hakutwala ku shikola yinene? Josefina wa mu Chile, yamba ngwenyi: “Yami nayile ku shikola yinene, hanga ngupwe ni umwe mulimo uze muungukwasa kupwa ni mashimbu anji akulingila Yehova. Natesele ngwami, kulilongesa chinji kuchatambile kupwa chuma chilemu chinji ku mwono wami, kuhiana usepa wami ni Yehova.” Umwe ndumbu wa pwo avuluka ngwo Morine, kayile ku shikola hanga alilongese kuyinda kambu ha mwaka umuwika. Mumu liaka achilingile? Iye yamba ngwenyi: “Mumu natesele kuya ni kukwasa kuze anafupu ukwaso wa akwa-kwambujola. Kashika nalilongesele mulimo uze te muungukwasa kumanununa yize natesele. Hanyima lia kuhwisa shikola yacho, yinguputuka mulimo wa kuyinda kambu hanga ngukunge mbongo jize te mujingukwasa muze mungwalukila ku chihela kuze te anafupu ukwaso wa akwa-kwambujola. Utotombo uze nalilongesele, wangukwashile kuwana mulimo kuze nayile.” Ndumbu Iris, yoze walilongesele mulimo wa kutala ha chikuma cha mazo, yamba ngwenyi: “Kunyingika yuma yinji, muchihasa kupwa chipema. Alioze, chino kuchichi keza katunehena uwahililo wamwenemwene.” Mba tupwe ni uwahililo wamwenemwene, twatamba kwiwuluka ngwetu, nyi twasa Yehova ha chihela chitangu ku mwono wetu, iye matukwasa kupwa ni uwahililo wamwenemwene, chikwo nawa matwaha yeswe yize mutufupa. Pundu lume, nyi usepa wetu ni Yehova wapwa ha chihela chitangu ku mwono wetu, mutukwata yiyulo yize muyitunehena uwahililo ku miaka yeswe.
NYONGA HA YIZE WATAMBA KULINGA SHIMBU KANDA UCHIYA KU SHIKOLA YINENE
10. Kuchi mukanda wa Shimbi Yamuchiali 32:29, muutukwasa kunyingika nyi twatamba kuya ku shikola yinene, nyi ka?
10 Kota kuli umwe mulimo uze wakuzanga kulinga. Alioze, chili chipema kunyonga ha milimo yikwo yalifa hanji yalisa yize muhasa kulinga. (Tesa ni Yishima 18: 17.) Musono, kuli mutapu unji wa kulilongeselamo, uze kuwakapwileko ku mashimbu akunyima. Ngwe chilweza, muhasa kulilongesela ku zuwo kupalikila ha internet. Hengwola umone nyi muhasa kulifunga, chipwe ngwe kuwayile ku shikola yinene. Joanna wa ku Finlândia, kakalilongesele shikola yinene, iye yamba ngwenyi: “Muze nahwishile shikola yikehe, yinguputuka kukalakala ha mashimbu akehe ni kuputuka mulimo wa upionelu. Yami hingunakalakala mu milimo yeka ni yeka, chikwo nawa namona chize Yehova akumanununa chilakenyo chenyi cha kutwaha yize tunafupu mashimbu eswe.” Iwuluka ngwe, kuya ku shikola yinene, muchihasa kupwa chipema hanji ka. Kashika, lihule ngwe: ‘Shina kuli yuma yinji yipema kuhiana yipi?’ (Tanga Shimbi Yamuchiali 32:29; 1 Kori. 10:23) Tutalenu yikuma yimwe, yize muyitukwasa kukumbulula chihula chino.
11. Mumu liaka chili chilemu kunyonga ha unji wa mashimbu waze mupwa ku shikola hita poso? (Tala nawa yizulie.)
11 Unji wa Mashimbu waze mupwa ku shikola. Nyonga ha unji wa maola waze mupwa ku shikola hanga utambule fumbo, ni milimo ya kulingila ku zuwo yize makwaha hita poso. Shina mupwa nawa ni mashimbu akulinga yuma ya ku ufulielo ni yiteli ye ya mu usoko? (Fwili. 1:10) Shina shikola yacho, muyikuhongesa chinji ku manyonga ni kuhona tachi ja kululieka kukunguluka, kutanga Mbimbiliya ni kulinga longeso lie lia wika? Yino ye yalingiwile kuli Jeroz, wa ku India. Iye yamba ngwenyi: “Chapwile chikalu kuli yami kwambujola mashimbu eswe ni kukunguluka. Ha mashimbu amwe, te chishi kuya ha kukunguluka. Musono nakunyonga ngwami, kachi chakayile ku shikola yacho, mumu yangumbachile mashimbu anji ni tachi.” Kuli malongeso amwe waze keshi kumbata mashimbu anji. Akwo, keshi kuhana milimo yinji ya kulingila ku zuwo. Ngwe chilweza, Rabeca wa mu Moçambique, kanawahilila ni malongeso waze anakasakula. Iye yamba ngwenyi: “Malongeso jacho, te kakumbata wika maola aali ha hita tangwa. Yino yinakangukwasa kununga mu mulimo wa upionelu.”
Nyi unanyongo kuya ku shikola yinene, sako shindakenyo ngwe mupwa ni mashimbu a kulinga yuma yahiana ulemu (Tala paragrafu 11)
12. Yihula yika muyikukwasa uhone kukisa mashimbu je? (Chilumbununyi 12:1)
12 Mashimbu waze mumbata mba uhwise kulilongesa. Chili chilemu kunyonga ha tukweji ni miaka yize mumbata mba uhwise kulilongesa. Shina kulilongesa chacho muchikukwasa uhone kukisa mashimbu je? (Efwe. 5:15-17) Nyi uli mukweze, shina kuya ku shikola muchikukwasa kulihana chinji hanga ulingile Yehova mu mulimo wa shimbu lieswe ha mashimbu a ukweze we? (Tanga Chilumbununyi 12:1.) Shina kuli malongeso amwe akulinga ha mashimbu akehe waze makukwasa kupwa ni utotombo hakutwala ku mulimo uze unazange? Ku mashikola amwe hanji yihela yimwe ya kukalakalila, yena muhasa kulilongesa utotombo ni kawashi chakuhona kufweta mbongo jinji. Mario, wa ku Chile, yamba ngwenyi: “Shimbu nguye ku shikola yinene, yingusakula kulilongesa umwe mulimo ha miaka yaali. Napwile ni kulilongesa matangwa awana wika ha poso. Chino changukwashile kununga mu mulimo wa upionelu muze te ngunalilongesa.”
13. Yika muyihasa kulingiwa nyi ngwe shikola yili kusuku ni kuze watwama?
13 Kuze mulilongesela. Yena muhasa kulilongesela hakamwihi ni kuze watwama. Mba yika mutwamba nyi ngwe shikola yili kusuku ni kuze watwama, hanji watamba kwalukila ku chihela kuze mulilongesela? Iwuluka ngwe, kutwama kusuku ni usoko we muchihasa kukunehena kapinda munji ku ufulielo, chipi-chipi nyi mutwama ni atu waze keshi kuwayila Yehova. (Yishi. 22:3; 1 Kori. 15:33) Matias, wa ku Moçambique, kalilongesele umwe mulimo ha mwaka umuwika uze kakafetele mbongo jinji. Chipwe chocho, iye kalisehele ha chiyulo chize akwachile. Mumu liaka? Mwene yamba ngwenyi: “Yami te natwama ku shikola mumu zuwo lietu liapwile kusuku. Tangwa ni tangwa, kapwile ni kungweseka hanga ngulinge yuma yize kuyalitele. Ngunanukolweza nuye ku shikola yize muyinukwasa kupwa ni utotombo, alioze shikola yacho kuyatambile kupwa yize muyinuhandununa ni usoko wenu.” Umwe ndumbu wa pwo mu Rússia, yamba ngwenyi: “Nahashile kwehuka kapinda ni yeseko, mumu te natwama ni yisemi jami, shimbu nguye ni kutwama ni alongi-ni-akwetu.” Muhasa nawa kulilongesa kupalikila ha internet.
14. Nyi unazange kuya ku shikola yinene, kuchi chiyulo chili ha Luka 14:28 muchihasa kukukwasa?
14 Mbongo jize mufeta. Malongeso amwe keshi kufika mbongo jinji. Akwo, nguvulu mwe wakwafetela. Kashika, muhasa kulilongesa hanga upwe ni umwe utotombo uze muukukwasa kuwana mulimo chakuhona kufeta mbongo jinji. Kanji-kanji, muze mutu akuya ku shikola yinene, kakufeta mbongo jinji. Kuli yuma yikwo yize muhasa kufetela mbongo. Ngwe chilweza, muhasa kufeta kuli umwe longeshi apwe ni kukulongesa hanga ujame mba akutayize ku yimwe shikola. Curso jimwe, jakunjisa alongi mu mikuli yinji yize muyihasa kumbata miaka mba ahwise kuyifeta. Adilson, wa ku Moçambique, yaliseha mumu lia chiyulo chize akwachile hakutwala ku shikola. Iye yamba ngwenyi: “Akaka waze angulelele, kakapwile ni mbongo ja kulanda kulia chimwe, ni yuma yikehe-yikehe yize te akufupa, mumu lia kufeta shikola yami ha miaka yiwana.” Muze munyonga ha curso yize unazange kulinga, lihule ngwe: ‘Mbongo jingahi mungufeta? Shina yami ni asoko jami mutuhasa kujifeta? Shina kuli curso yikwo yize munguhasa kufeta mbonge jikehe?’ (Tanga Luka 14:28.) ‘Nyi nalinjisa mu mikuli, mashimbu angahi mungumbata mba nguyifete? Shina mulimo uze mungukapwa nawo, makangufeta mbongo jakumbana hanga ngulande yuma yakulikwasa nayo ni kufeta mikuli yeswe?’—Yishi. 22:7.
15. Mumu liaka chili chilemu kunyonga nyi muchipwa chashi kuwana mulimo shimbu kanda uchitesa yize mulilongesa?
15 Shina muchikapwa chashi kuwana mulimo? Nyonga ha milimo yize yakusoloka chinji kuze watwama hanji kuze mwalukila. Shina shikola yacho muyikukwasa kuwana mulimo? Curso jimwe, kujichi kukukwasa kulilongesa milimo ya moko, mumu jakulihulikila wika ha kulongesa yinyingi shimbu jilongese atu utotombo uze muukakwasa kuwana milimo. (Kolo. 2:8) Umwe ndumbu wa pwo mu Índia, yamba ngwenyi: “Curso yami, kuyakangukwashile kupwa ni utotombo uze akwa-kuhana milimo akufupa. Kashika, yami chakawanyine milimo kulita ni yize nalilongesele ku shikola.” Kuli curso jimwe muhasa kukaula, alioze muchipwa chikalu kuwana milimo. Ngwe chilweza, Sublime, wa mu República Centro-Africana, kahwishile curso ya kululieka ar-condicionado. Alioze yamba ngwenyi: “Kuze natwama atu kakululieka yuma yo ene, kashika chili chikalu kuwana milimo.”
16. Mumu liaka chili chilemu kunyonga ha mulimo uze mukalinga muze mukahwisa kulilongesa?
16 Nyonga nawa ha mulimo uze mukalinga muze mukahwisa kulilongesa. Shina mukawahilila ha kulinga mulimo wacho? (Chilu. 3:12, 13) Chihela chika mukakalakalila, chikwo nawa atu a mutapu uka mukakalakala no? Shina mulimo uze unazange uli wa ponde? Shina atu waze mukakalakala no kakuzanga kupwa wika ha chihela chitangu? Nyi wakalakala ni atu a mutapu au, shina makushinjila wimbulule yitanga yo? Shina ku mulimo wacho makufeta mbongo jakumbana jize mulikwasa najo? Shina mununga ni kulilongesa hanga uhone kutokesa mulimo wacho? Chahiana ulemu, shina mulimo wacho muukukwasa kusa Wanangana wa Zambi ha chihela chitangu ku mwono we? (Chilu. 12:13) Kwamba umwenemwene, nyi kuze twatwama chili chikalu kuwana mulimo, kuchichi kupwa chashi kuwana mulimo uze twakuzanga. Kashika, watamba kukwata chiyulo chipema hakutwala ku malongeso waze unazange hanga chikapwe chashi kuwana mulimo kulutwe. Tabitha, wa ku Índia, kasakwile curso ya kutonga mazalo, yize alingile ha tukweji asambano. Iye yamba ngwenyi: “Nasakwile mulimo uno, mumu nanyongene ngwami, muungukwasa mu mulimo wa upionelu. Akwa-kutonga mazalo kakwafupa mashimbu eswe, chikwo nawa yami mwene mungusakula ha mashimbu waze mungukalakala. Chakafupile mbongo jinji mba nguputuke mulimo wacho.” Mulimo wacho wamukwashile hanga anunge mu mulimo wa upionelu.
17. (a) Kulihi Mukwa-Kristu mawana sango jize mujimukwasa hanga akwate chiyulo chipema chinatale ha shikola yinene? (b) Yikota yika ya shimbi yize muyikukwasa kukwata chiyulo chipema? (Tala mushete “Yikota ya Shimbi ja mu Mbimbiliya yize Watamba Kuhengwola.”)
17 Ha mutwe uno, twalilongesa yikuma yinji yilemu yize twatamba kuhengwola hakutwala ku shikola yinene. Kulihi muwana sango jize unafupu hanga ukwate chiyulo chipema? Muhasa kuwana sango jinji hakutwala ku curso yize unazange, ha kuya ni kuhula ku shikola yacho hanji kujifupila ha internet. Hengwola hanga unyingike akwa-kukalakala angahi anafupu ku mulimo wacho. Muhasa kuhula nawa atu waze ahwishile curso yacho hanji waze akukalakala ku mulimo wacho. (Yishi. 13:10) Ahule ngwe: “Yika munguhasa kuyuka ku mulimo wacho? Kapinda muka mahasa kusolokako?” Chikwo nawa, hanjika ni atu waze analingila Yehova ni uwahililo. (Yishi. 15:22) Ayo makukwasa kumona shikola ni mulimo upema uze muhasa kusakula. Hanji makulweza umwe mulimo uze kanda uchinyonga kama.
18. Yika twatamba kwiwuluka?
18 Ngwe chize hitwamona kulu, kuya ku shikola yinene muchihasa kutuyukisa hanji kutunehena kapinda. Kashika, lemba ni kunyonga ha curso yize muhasa kulilongesa. Iwuluka ngwe, kuya ku shikola yinene muchihasa kukukwasa kuwana mulimo uze makufweta mbongo jize mulikwasa najo. Alioze, mba upwe ni uwahililo wamwenemwene, watamba kupwa ni usepa ukolo ni Yehova. (Samu 16:9, 11) Yehova kakufunga tuvumbi twenyi mashimbu eswe, chipwe ngwe maya ku shikola yinene hanji ka. (Hepre. 13:5) Mba yika mutwamba nyi ngwe wasakula kuya ku shikola yinene? Yika muyikukwasa kununga ni kukundama kuli Yehova muze uli ku shikola yinene? Yino ye mutukalilongesa ha mutwe uze muuhataho.
MWASO 45 Kupukuna cha Mbunge Yami
a ULUMBUNWISO WA AMWE MALIJI: Ha mutwe uno ni uze muuhataho, maliji “shikola yinene,” kanatale ha shikola hanji ha fumbo lize akuhana hanyima lia kuhwisa shikola yize nguvulu akwita. Yinachingi nawa, curso jize akulinga ha mashimbu anji hanji ha mashimbu akehe, jize akulongesa ku mashikola anene-anene, hanji ku mashikola akehe-akehe, chipwe lume ku yihela ya kukalakalila kuze mutu mahasa kulilongesela milimo ya moko ni umwe utotombo.
b Sango jino, jinatale nawa hali mandumbu jetu a mapwo.
c Ku mashimbu a kunyima, mikanda yetu yapwile ni kusolola ngwo, hi chipema ko Mukwa-Kristu kuya ku shikola yinene. Ngwe chilweza, Kaposhi wa Kutalila 1 Outubro, 2005 ha chikuma chinambe ngwo, “Pais, que futuro desejam para seus filhos?” kasolwele ponde ya kuya ku shikola yinene. Chipwe ngwe mukuhasa kusoloka ponde, nihindu mutu mwene mwe watamba kusakula nyi maya ku shikola yinene nyi ka. Mukwa-Kristu mweswe katamba kulikwachila chiyulo mwene. Alioze hakutwala kuli twanuke, yisemi jo mahasa kwakwachila chiyulo. Chipwe chocho, eswe katamba kulianga kuhengwola shimbi ja mu Mbimbiliya shimbu kanda achikwata chiyulo. Niumwe Mukwa-Kristu hanji mukulwana wa mu chikungulwila, katambile kusopesa ndumbu niumwe ha chiyulo chize makwata chinatale ha shikola yinene.—Tia. 4:12.