Sako Tachi Hanga Ununge Kupwa Sepa Lia Mutu Yoze Walimbata Nenyi

1. Mumu liaka masepa amwenemwene kali chawana cha kuli Yehova?

MASEPA amwenemwene, kali chawana cha kuli Yehova. (Tia. 1:17) Ayo kakuzanga Zambi, nawa kakutuzanga. Muze twakuwahilila, no kakuwahilila, kakututakamisa muze twakunenganyana ni kutwaha yiyulo muze mutuyifupa. Ayo kashishika, mutuhasa kwajikijila. Pundu lume, masepa wano ‘kakuwahisa mbuge yetu.’—Yishi. 27:9.

2. Mumu liaka chili chilemu kuli waze alimbata kununga ni kukolesa usepa wo? (Mateu 19:6)

² Chili chilemu kuli lunga ni mukwo-pwo kupwa masepa apema. Ayo katamba kwiwuluka ngwo, chili chilemu kusa tachi hanga akolese usepa wo. Nyi ayo malengulula chiyulo chino, maliva ukawo, malivutula ni kawashi ni kuhona kuwahilila. Alioze, nyi manunga ni kusa tachi hanga apwe masepa apema, usepa wo muukola chinji. (Tanga Mateu 19:6.) Ha mutwe uno, mutumona chize waze alimbata mahasa kununga ni kukolesa usepa wo. Alioze, chitangu tutalenu chize Akwa-Kristu waze anazange kulimbata, mahasa kusakula kanawa mutu yoze malimbata nenyi, yoze mapwa sepa mupema ku mwono weswe.

CHIZE MUSAKULA MUTU YOZE MAPWA SEPA MUPEMA KU MWONO WESWE

3-4. Yika muyihasa kukwasa Mukwa-Kristu kuwana mutu mupema yoze malimbata nenyi? (Yishima 18:22)

³ Shimbu kanda tuchikwata chiyulo chilemu, twatamba kunyonga ha yuma yipema ni ha yuma yipi yize muyihasa kulingiwa nyi mutukwata chiyulo chacho. Yiyulo yize twakukwata muyihasa kwalumuna mwono wetu weswe hanga upwe upema hanji upi. Kashika, twatamba kunyonga kanawa shimbu kanda tuchikwata chiyulo chilemu.

⁴ Kusakula mutu yoze mutulimbata nenyi, chili chimwe chiyulo chilemu chinji, mumu mutusakula mutu yoze mapwa sepa lietu ku mwono wetu weswe. Amu Yehova mwe watangile ulo, chili chilemu kumupanjika ni kukaula usongwelo wenyi shimbu kanda tuchisakula mutu yoze mutulimbata nenyi. Yehova kanazange hanga lunga awane pwo mupema, ni pwo neye awane lunga mupema. Iye kananyingika yize yapwa yipema kuli yetu. (Tanga Yishima 18:22; Iza. 48:17, 18) Shimbi twakuwana mu Liji lia Zambi, mujihasa kukwasa Mukwa-Kristu kuwana mutu mupema yoze malimbata nenyi.

5. Mumu liaka chili chilemu kulimbata ni mutu yoze hanamupapachisa?

⁵ Kukatuka ha tangwa lize mutu akumupapachisa, iye kakupwa sepa lia Zambi. (Samu 25:14) Nyi unazange kumbata hanji kusomboka, watamba kusakula mutu yoze wapwa sepa lia Yehova. (1 Kori. 7:39) Nyi wachilinga, musolola usakwililo we ha shimbi ja Yehova, mumona nawa ngwe, mutu yoze mulimbata nenyi kali chiwape cha kuli Yehova. (Yishi. 19:14) Chikwo nawa, mwehuka kapinda wa kulimbata ni mutu yoze keshi ‘kukaula mwene.’ (2 Kori. 6:14) Chipwe ngwe kanda uchiwana Chela cha Yehova yoze muhasa kulimbata nenyi, nihindu kanda ulisa mu ponde ya kulimbata ni mutu yoze keshi kuzanga ni kuwayila Yehova. Chili uhepuke kunyonga ngwo, ‘munguhasa kulinga usendo ni mutu yoze keshi kuwayila Zambi,’ ni kushimbwila ngwo kulutwe iye makalumuka ni kupwa Chela cha Yehova.

6-7. Yika muhasa kulihula hakutwala kuli mutu yoze unazange kulimbata nenyi?

⁶ Chipwe ngwe mutu hanamupapachisa, chino kuchalumbunukine ngwo, kali mutu mupema yoze mulimbata nenyi. Nyi kuli umwe mutu yoze yena unazange,a muhasa kulihula ngwe: ‘Shina kakuzanga usoko wenyi? Shina kakwete vumbi, nawa kakulihulumba ni akwo? Masepa jenyi aya? Yika akulinga muze akwo akupwa ni manyonga alisa ni a iye? Shina kakushimbwila hanga yuma yeswe yende kulita ni chize akuzanga, nyi hanji kakupanjika manyonga ja akwo, nyi ngwe yize ayo anambe kuyalimikine ni Mbimbiliya? Kuchi akumona mbongo?’

⁷ Muhasa kulihula nawa ngwe: ‘Shina mutu yoze ngunazange kulimbata nenyi kakuzanga Yehova ni mbunge yeswe? Shina kanase tachi hanga azale “utu waha”? Shina mangukwasa ngununge ni kuwayila Yehova? Shina yuma yize hanatese kulinga kulutwe mu mulimo wa Yehova, yinalite ni yize yami hingunatese? Shina mutuhasa kupwa wika masepa apema, nyi masepa amwenemwene?’ (Kolo. 3:9, 10) Nyi uli ndumbu wa pwo, lihule ngwe: ‘Shina mutu yoze ngunazange kulimbata nenyi mahasa kupwa sepa hanji mwata mupema wa mu usoko?’ (1 Kori. 11:3) Nyi uli ndumbu wa lunga, lihule ngwe: ‘Ndumbu yoze ngunazange kulinga nenyi usendo, shina makangukwasa ni kuvumbika yiyulo yize mungukwata ngwe mwata wa mu usoko, chipwe ngwe ngulinga amwe tupalia?’ Kwakupalika mashimbu mba mutu awane makumbululo a yihula yino. Kashika, ha mashimbu a usendo sako tachi hanga unyingike kanawa mutu yoze unazange kulimbata nenyi.

8-9. Yika muyihasa kukwasa waze anazange kulimbata kukwata yiyulo ya mana? (Tala nawa chizulie.)

⁸ Ha mashimbu a usendo, muhasa kukwata chiyulo cha mana, nyi wasa tachi hanga unyingike kanawa chize apwa mutu yoze unazange kulimbata nenyi. Hula kuli mandumbu hanga akulweze chize ayo akumumona. Muhasa kuhula hakutwala ku yitanga ni lufuma wenyi. Ngwe chilweza, shina ndumbu wacho kanamunyingika ngwo kali mukwa-kulikehesa, chimbovu nawa mutu mwashi? Sarah, wa ku Guiana Francesa, yoze walimbachile ni ndumbu Daniel, yamba ngwenyi: “Nayile ni kuhula sango ja Daniel, kuli ndumbu te atwama nenyi yoze wapwile pionelu, kuli umwe mukulwana wa mu chikungulwila chenyi, kuli masepa jenyi ni kuli mandumbu a mapwo a mu chikungulwila chenyi.” Muhasa kuhula ni vumbi kuli mutu yoze unazange kulimbata nenyi, ha chimwe chikuma cha ku mwono wenyi wa kunyima, chipwe yuma yimwe yize akulinga, yize muyihasa kupinjisa ulo wenu kulutwe lia matangwa.

⁹ Yuma yeswe makulweza kuli masepa ajama a mutu yoze unazange kulimbata nenyi, kanda uyilengulula. Nyi wachilinga, mukwata chiyulo chipema ha kutesa nyi mununga ni usendo nyi ka.b Haliapwila, mutuhanjika ha chize waze hanalimbata mahasa kukolesa usepa wo.

LINGILENU HAMUWIKA YUMA YIZE MUYINUKWASA KUPWA MASEPA APEMA

10. Mumu liaka chili chipema kuli lunga ni pwo kutwama mashimbu anji hamuwika ni kulihulikila hali umwe ni mukwo?

¹⁰ Lunga ni pwo mahasa kukolesa usepa hanji ulo wo, ha kutwama mashimbu anji hamuwika, chipwe ngwe kali ni yuma yinji ya kulinga. Chino chakwaha uhashi wa kuhanjika ha yuma yize yakulingiwa tangwa ha tangwa, kulilweza yize ananyongo, chize analivu, kulisolwela zango, ni kupwa nawa ni mashimbu a kuheha.

11. Yika muyihasa kuneha ponde mu ulo?

¹¹ Lunga ni pwo waze apwa masepa apema, kakuzanga kutwama hamuwika. Kwamba umwenemwene, hi mashimbu eswe ko ayo akupwa hamuwika. Alioze, kuhona kupwa mashimbu anji hamuwika, yili ponde yinene. Ngwe chilweza, amwe kakutwama kusuku ni asoko jo ha mashimbu anji mumu lia kuya ni kukalakalila mu chifuchi cheka. Chipwe ngwe kupwa ni mbongo muchihasa kwakwasa, alioze kutwama kusuku umwe ni mukwo ha mashimbu anji, yili ponde yinene.

12-13. (a) Yika akulinga Akwa-Kristu amwe waze alimbata hanga apwe mashimbu anji hamuwika? (Tala nawa chizulie.) (b) Kuchi watamba kupwa usepa we ni mutu yoze walimbata nenyi? (Tala mushete “Kuchi Natamba Kumona Mutu Yoze Nalimbata Nenyi?”)

¹² Tutalenu yuma yimwe yize akulinga waze alimbata hanga apwe mashimbu anji hamuwika. Leah, wa mu Guam, yamba ngwenyi: “Yami ni lunga liami, twakuwahilila ha kulinga yuma yeka ni yeka hamuwika. Muze twakuya ni kwendangana, hanji kumwe kuze atusanyika, kutushi kulihichika.” Roxanne, wa ku Estados Unidos, yamba ngwenyi: “Amu tuli ni yuma yinji ya kulinga, twakulianga kutesa mashimbu waze mutukapwa hamuwika, ngwe chizechene twakulinga ni yikuma yikwo yilemu.” (Tesa ni Amose 3:3.) Damien, watwama mu França, yamba ngwenyi: “Twalilongesa kuzanga yize mutu mukwo akuzanga.” (Mateu 7:12) Katie, wa ku Estados Unidos, neye yamba ngwenyi: “Mashimbu amwe twakusa telefone hasuku yihone kutupiangula.”

¹³ Chuma chilemu kuli waze alimbata, chili kulingila Yehova hamuwika. Myriam, wa mu França yamba ngwenyi: “Yetu twakuputuka tangwa lietu ha kutanga Mbimbiliya hamuwika, ni kulianyina yize mutu ni mutu azanga, ni yize tunazange kukaula ku mwono wetu. Yami nakuzanga chinji mashimbu jacho.” Iye yamba nawa ngwenyi: “Yami nakuwahilila chinji muze twakulemba hamuwika ni kwiva chize mukwetu-lunga akuzanga Yehova.” Katie, yoze hitwatongola kulu, yamba ngwenyi: “Mashimbu waze nakuzanga chinji, kali waze nakupwa ni mukwetu-lunga mu mulimo wa kwambujola. Usepa wetu wakukola muze twakwiva umwe ni umwe mahanjika hakutwala kuli Yehova.”—Yishi. 27:17.

NUNGENU HAMUWIKA MUZE MUKUSOLOKA YIPIKALO

14-15. Mumu liaka waze alimbata atamba kusa tachi hanga akumbe kapinda yoze mahasa kusoloka mu ulo wo? Hana chilweza.

¹⁴ Mumu lia kupwa yihenge, waze alimbata mahasa kupwa ni umwe kapinda. Mbimbiliya yakwamba ngwo, waze alimbata “kumakapwa ni yipikalo ku mwono wo.” (1 Kori. 7:28) Maliji wano, kanatale ha yipikalo yize mahasa kupwa nayo eswe waze alimbata. Muze mukusoloka yipikalo, mu waali wo katamba kusa tachi hanga akumbe yipikalo yacho ni kununga kupwa masepa apema.

¹⁵ Tutalenu chilweza chino. Nyi limwe zuwo lia lufuma mulipwa ni miaji, hanji chuma chimwe cha kulinga ni ulangaji muchipihia, enyayo kota malinga yeswe yize mahasa hanga ayilulieke. Chino muchihasa kumbata mbongo jinji ni mashimbu anji. Chipwe chocho, ayo kechi kuhonga. Mumu liaka? Mumu ayo kananyingika ngwo, yuma yacho yili yilemu chinji kuli ayo. Chizechene nawa, malo eswe kali alemu. Chipwe atu alimbata waze akwete usepa ukolo, ha mashimbu amwe mahasa kupwa ni umwe kapinda hanji kuhona kulivwashana ha yimwe yikuma. Ngwe chize akululieka zuwo lize lili ni miaji hanji chuma chimwe cha kulinga ni ulangaji, ni waze alimbata no mahasa kufunyisa usepa uze apwile nawo ku uputukilo. Kulinga chino, muchihasa kumbata mashimbu ni tachi. Alioze, Yehova kakuwahilila muze akumona waze alimbata kanase tachi hanga awahilile cheka. (Mala. 2:16) Chikwo nawa, muze akuchilinga, ayo keshi kusolola zango ni vumbi kuli ayo ene wika, alioze ni kuli Yehova yoze watangile ulo.

16. Kulita ni 1 A-Korindu 13:4-8a, yika muyihasa kukwasa lunga ni pwo waze anapalika mu umwe kapinda munene? (Tala nawa chizulie ni mushete “Yize Muyinukwasa Kukolesa Usepa mu Ulo Wenu.”)

¹⁶ Muze mukusoloka kapinda mu ulo, kanda ulipupula kulihandununa. (1 Kori. 7:10, 11) Shimbu uchilinge, lihule ngwe: ‘Shina kuli yimwe natamba kulinga hanga tukolese usepa wetu?’ Lilongese yize Mbimbiliya yakwamba ha chikuma cha kusolola zango, ni kunyonga ha chize musolola zango, kulita ni majila anatongola ha 1 A-Korindu 13:4-8a. (Tanga.) Shimbu unyonge kulihandununa ni mutu yoze walimbata nenyi, fupa jila yize muyikukwasa kukundama cheka kuli iye. Kanda unyonga ha yize mukwenu atamba kwalumuna, alioze nyonga ha yize yena watamba kulinga. Lemba kuli Yehova hanga akusongwele. Fupa ukwaso mu mikanda yetu, mu yinema, kuli makulwana a mu chikungulwila ni mandumbu jetu akwo waze ajama. Mbimbiliya yakwamba ngwo, ulo wapwa ngwe “Muhipu wa mbanda mutatu.” Yehova kali muya ulemu wa mu ulo wenu. Kashika, nyi nwalinga yuma kulita ni chize iye akuzanga, ulo wenu muupema chinji.—Chilu. 4:12.

17. Yika muyikwasa waze anazange kulimbata ni waze hanalimbata kulu hanga awahilile?

¹⁷ Yehova kanazange hanga tuvumbi twenyi eswe awahilile, kuchinga ko waze anazange kulimbata ni waze hanalimbata kulu. Kashika, nyi uchili twamishi, mba unazange kumbata hanji kuya ulo, sakula kanawa sepa yoze mutwama nenyi ku miaka yeswe. Alioze, nyi hiunambata, nunga ni kukolesa usepa we ni mutu yoze walimbata nenyi. Sako tachi hanga nukumbe kapinda yoze munupwa nenyi, ni kujikijila ha ukwaso wa Yehova. Nyi wachilinga, ‘muwahilila’ ni mutu yoze walimbata nenyi.—Chilu. 9:9.