Imbulula “Zambi ya Utakamiso”

1. Mumu liaka twatamba kutakamisa akwetu?

TULIESWE twakwiva chinyengo mumu lia kupalika mu “yeseko yeka ni yeka.” Kashika ha mashimbu amwe, twakufupa atukolweze ni kututakamisa. (1 Petu. 1:6) Twakusakwilila chinji muze akwetu akututakamisa. Kashika, ni yetu twatamba kutakamisa akwetu kawashi-washi muze anapalika mu yipikalo. (Mateu 7:12) Yehova “Zambi ya utakamiso,” kakutusolwela chize mutuhasa “kutakamisa akwetu mu lamba lieswalio.” Mutuhasa kwimbulula chilweza chenyi, ha “kulitakamisa umwe ni mukwo.” (2 Kori. 1:3, 4; 1 Tesa. 4:18) Yetu kutushi kulitakamisa wika mumu ngwo ye twatamba kulinga. Alioze, twakuchilinga mumu twakuzanga mandumbu jetu. Ha mutwe uno, (1) mutumona yize utakamiso unalumbunuka, (2) chize mutuhasa kutakamisa akwetu, ni (3) yize mutuhasa kulinga muze mutufupa utakamiso.

UTAKAMISO YIKA UNALUMBUNUKA?

2. Kulita ni Mbimbiliya, kutakamisa akwetu yika chinalumbunuka?

² Mu Mbimbiliya, liji lia Ngregu analumbununa ngwo “utakamiso,” mulihasa kulumbunuka yuma yinji. Ngwe chilweza, mulihasa kulumbunuka kwamba yuma yize muyihasa kujikijisa akwetu hanji kwakolweza hanga alinge chimwe chuma. (Roma 12:8; tala nota, “wakukolweza.”) Liji “utakamiso,” linalumbunuka nawa, kusanyika umwe mutu yoze mapwa ku sali lia mukwo ni kumukwasa. Kashika, mutuhasa kunyonga hali mutu yoze weza kawashi-washi hanga akwase sepa lienyi yoze unamono lamba. Mutu mahasa kutakamisa sepa lienyi mu majila eka ni eka. Alioze, kakusa shindakenyo mashimbu eswe ngwo, sepa lienyi maliva kanawa.

3. Yika twalilongesa ha chilweza cha Mbarnabe? (Tala nawa chizulie.)

³ Tutalenu chimwe chilweza cha mu Mbimbiliya. Umwe Mukwa-Kristu avuluka ngwo Yosefwe, kapwile ni utotombo wa kukolweza ni kutakamisa akwo. Kashika apostolo amulukile jina lia Mbarnabe hanji ngwetu, “mukwa kutakamisa akwo.” (Yili. 4:36) Jina lino linakamutela. Kashika Mbimbiliya kuyishi kumusanyika nawa ngwo Yosefwe, alioze yakumuvuluka ngwo, Mbarnabe. Ha yisuho yinji, yitanga ya Mbarnabe yalitele lume ni jina lienyi, mumu kapwile ni kukwasa mandumbu jenyi muze te anafupu ukwaso. Ngwe chilweza, ha shimbu likehe muze Saulu apwile Mukwa-Kristu, iye yaya mu Yerusaleme hanga alitakane ni Akwa-Kristu ni akwo. Alioze ayo kapwile ni kumuvila woma, mumu kunyima kapwile ni kuhungumiona Akwa-Kristu anji. Mbarnabe te keshi kwiva woma wa kusolola umbovu kuli Saulu. Chikwo nawa, kamukwashile kunyingika apostolo.—Yili. 9:26-28.

KUCHI MUTUHASA KUTAKAMISA AKWETU?

4. Kuchi mutuhasa kutakamisa akwetu? (A-Roma 1:11, 12)

⁴ Ameneke nyi muchilita. Yehova kakutuma tuvumbi twenyi hanga atakamise akwo. Ngwe chilweza, muze profeta Eliya apwile ni kusakalala, Yehova katumine mungelo hanga amutakamise. (1 Mia. 19:4-7) Postolo Paulu neye kanyingikine ngwenyi, kumeneka akwetu ni kwatakamisa, chili chilemu. (Tanga A-Roma 1:11, 12.) Muze mumeneka umwe mutu, twama nenyi amwe mashimbu hanga umutakamise. (1 Kori. 16:7) Alioze, nyi kuwahashile kumeneka umwe mutu ku zuwo lienyi, muhasa kumutakamisa ha kumusanyika ku telefone, kumusonekena umwe mukanda, hanji kumutumina yimwe mesaje. Yehova kanazange kutakamisa akwenu kupalikila muli yena. Shina muhasa kulihana hanga uchilinge?

5. Mumu liaka ha mashimbu amwe muchihasa kupwa chikalu kutakamisa mandumbu jetu?

⁵ Mwono unayi ni kukala chinji ha matangwa wano a kusula. Kashika, muchihasa kupwa chikalu kuli yetu, kumeneka mandumbu jetu muze mafupa utakamiso. Ha mashimbu waze Paulu apwile mu zuwo lia ususu mu Roma, Oneseforu kasele mwono wenyi mu ponde ha kumufupa, chipwe ngwe kanyingikine ngwenyi, neye mahasa kumusa mu zuwo lia ususu hanji kumushiha. (2 Timo. 1:16-18) Chizechene ngwe Oneseforu, mandumbu jetu a malunga ni a mapwo mu Rússia kakulitakamisa umwe ni mukwo, muze anaahungumiona. Muze Yela ja Yehova akwasopesa, mandumbu jetu a malunga ni a mapwo, kakuya ku chota, chipwe ngwe kulinga chino muchihasa kusa mwono wo mu ponde. Kuchi muhasa kulilulieka hanga utakamise mandumbu je, ngwe chizechene akulinga mandumbu a mu Rússia? Muhasa kulilongesa yilweza ya tuvumbi twa Zambi a musono ni a ku mashimbu a kunyima, waze alitakamishine umwe ni mukwo ni kumona yize ayo apwile ni kulinga hanga anunge ni kuwahilila, chipwe ngwe kapwile ni kwahungumiona.

6. Kuchi mutuhasa kwimbulula Yehova muze tunatakamisa akwetu? (Tala nawa chizulie.)

⁶ Apanjike. Muze profeta Eliya amwene ngwenyi mwono wenyi uli mu ponde, iye yalemba ni mbunge yeswe kuli Yehova. Chipwe ngwe Zambi yetu wa zango, te kananyingika kulu yize yapwile ni kupinjisa profeta wenyi, nihindu yasakula kumupanjika kanawa muze te anasakalala. Yehova kapanjikile Eliya ni uhumikizo, chipwe muze apwile ni kufunyina yuma yoyene ha yoyene. (1 Mia. 19:9, 10, 14) Profeta Habakuke kalwezele Yehova chize alivile hakutwala ku lamba ni upi uze amwene. Yehova kamupanjikile ni uhumikizo, chikwo nawa, kakevile uli chipwe muze Habakuke ahanjikile mu jila yize yasolokele ngwe kanamuhono vumbi. (Haba. 1:2, 3) Ni musono nawa, Yehova kakupanjika kanawa yilemba yetu, chipwe ngwe kananyingika kulu yize tunafupu. Mutuhasa kwimbulula chilweza cha Yehova ha kupanjika kanawa, ni kusolola vumbi muze mandumbu jetu anahanjika. Chikwo nawa, kutwatambile kuholesa akwetu hanga yetu tuhanjike yize tunazange. Nyi ayo mahanjika yuma yize kuyalitele, kutwatambile kwiva uli. Chipwe muze ayo manunga ni kuhanjika yuma yoyene ha yoyene, twatamba kwapanjika.—Tia. 1:19; Chilu. 7:9.

7. Kuchi mutuhasa kunyingika yize sepa lietu anafupu?

⁷ Nyingika yize mutu anafupu. Yetu Kutushi kuhasa kumona yize yili mu mbunge ya mutu, alioze Yehova kakumona. Kashika, mba unyingike chize mutakamisa umwe mutu, watamba kumupanjika kanawa. Kanda unyonga ngwe unanyingika yize mutu anafupu mumu ngwo, ni yena wapalikile mu yuma yoyene. Yetu eswe twalisa, kashika sako mashimbu hanga umupanjike kanawa ni kumuhula ni mana. Nyi wachilinga, mukwasa mutu wacho ahanjike yize yili mu mbunge.—Yishi. 20:5.

8. Yika Yesu alingile hanga atakamise Marta ni Maria muze Lazaru afwile? (Tala nawa yizulie.)

⁸ Tutalenu chize Yesu atakamishine Marta ni Maria muze ndumbwo Lazaru afwile. Ayo eswe kapalikile mu lamba limuwika. Alioze, Yesu kaatakamishine mu majila alisa. Muze Yesu apwile hamwe ni Marta, iye kahanjikile hakutwala ku uhindukilo ni kumukwasa kukolesa ufulielo wenyi ha chawana chino. Alioze, Mbimbiliya kuyishi kwamba ngwo, Yesu kahanjikile hakutwala ku uhindukilo muze Maria te analila. Shimbu achilinge, iye yalila hamwe ni Maria ni kumuhula kuze Lazaru amusele. (Yoa. 11:20-35) Yika mutuhasa kulilongesa? Muze mututakamisa waze anamono lamba, twatamba kweseka kunyingika yize ayo anafupu, shimbu tweseke kwatakamisa eswe mu jila yimuwika.

9. Kuchi muhasa kutakamisa akwenu ni Liji lia Zambi? (A-Roma 15:4, 5)

⁹ Atangile Mbimbiliya. Nyi mulianyina ‘Yisoneko yize yakutakamisa’ ni umwe mutu, mumukwasa kupwa ni kutalatala. (Tanga A-Roma 15:4, 5.) Nyi mapwa ni kutalatala chikolo, matakama chinji ni kumona ngwo Yehova kakumuzanga ni kumufunga. (Izaia 40:31) Kuchi muhasa kuwana yisoneko yize mutakamisa nayo umwe mutu mu Mbimbiliya? Mandumbu amwe, kakusoneka versu jize mahasa kutakamisa najo akwo. Yena muhasa kuwana versu jacho ja mu Mbimbiliya, ha mukanda Yisoneko Yize Yakusongwela Mwono wa Akwa-Kristu, ha chikuma “Utakamiso.” Eta kuli Yehova hanga akukwase kutakamisa akwenu ni Liji lienyi, muze muchilita. Spiritu yenyi muyihasa kukukwasa kuwana Yisoneko ya utakamiso, muze muyifupa.—Yoa. 14:26.

10. Mumu liaka twatamba kuhanjika ni umbovu muze tunazange kutakamisa umwe mutu?

¹⁰ Hanjika ni umbovu. Mashimbu amwe mutufupa kutakamisa masepa jetu, ha kwakwasa hanga alumune nyonga lio hakutwala ku yipikalo. Nyonga kanawa ha yize muhanjika. Kwamba umwenemwene, tunazange mutu alive kanawa, shimbu anenganyane hanji kwiva uli mumu lia yize mutuhanjika. (Yishi. 12:18) Mutuhasa kwimbulula chize Yehova akwashile Eliya. Eliya kanyongene ngwenyi, hakachi ka aprofeta eswe a Yehova iye wika mwe wasalile ni mwono. Kanyongene nawa ngwenyi, kakahashile kulinga mulimo wenyi ngwe profeta wa Zambi. Yehova kakwashile Eliya kwalumuna manyonga jenyi chakuhona kumulweza ngwo, manyonga jenyi kalitele. (1 Mia. 19:15-18) Ni yetu mutuhasa kukwasa mandumbu jetu ni umbovu, nyi twanyonga kanawa ha yize mutwamba. Muze unazange kutakamisa mandumbu kupalikila mu pande hanji ha kuhana kumbululo ha kukunguluka, chitangu pwako ni shindakenyo ngwe, yize mwamba muyihanjika ni umbovu, chikwo nawa, muyatakamisa.

11. Muze masepa jetu anamono lamba, yika ayo akufupa? (1 Yoano 3:18)

¹¹ Hana kuli akwenu yize anafupu. Muze masepa jetu anamono lamba, twatamba kulinga yimwe hanga twakwase, hi kwalweza wika ko maliji a utakamiso. (Tanga 1 Yoano 3:18.) Mbarnabe katuhichikilile chilweza chipema muze alanjishile chihanda cha munda wenyi ni kuhana mbongo jacho kuli apostolo hanga akwase mandumbu jenyi waze apwile yiswale. (Yili. 4:36, 37) Mandumbu anji a malunga ni a mapwo, no kakusolola zango ha kuhana kuli mandumbu jo yuma yize anafupu. Umwe ndumbu avuluka ngwo Gabriela, wa ku Polonia, kakamwene yize te malinga muze zuwo lio liazalile ni meya. Iye yamba ngwenyi: “Yami ni yisemi jami twevile woma unji ni kusakalala. Chocho, yinguputuka kulihula ngwami, kuchi mutululieka yuma? Mandumbu a ku yikungulwila yikwo kejile ni kukalakala ni yetu ni kutukwasa kululieka yuma yeswe ha tangwa limuwika. Chino changukwashile kukolesa ufulielo wami ngwo, Yehova mwe unasongwela atu jenyi ni kutakamisa waze anamono lamba.”

12. Kuchi kunyongonona mu yipikalo muchihasa kukwasa mandumbu je?

¹² Nyongonona mu yipikalo. Paulu kanakawahilila chinji ni kutakama, muze anyingikine ngwo A-Tesalonika kananungu ni kushishika chipwe ngwe kanapalika mu yihungumiona. Iye kanyingikine ngwenyi, mulimo uze alingile hakachi ko, kuwakapwile wamokomoko. (1 Tesa. 3:5-8) Paulu kanyingikine nawa ngwenyi, nyi te manunga ni kushishika kuli Yehova muze anapalika mu yipikalo, chino te muchitakamisa mandumbu jenyi hanga anunge ni kushishika kuli Yehova. (Kolo. 2:1, 2) Chizechene nawa, muze mandumbu jetu akumona ngwo tunashishika kuli Yehova muze tunapalika mu yipikalo, chino chakwatakamisa chinji. Chakwakwasa nawa kupwa ni shindakenyo ngwo, Yehova maakwasa hanga no anyongonone ngwe chize atukwasa yetu.

13. Yika twatamba kulinga nawa nyi tunazange kutakamisa akwetu?

¹³ Lihumikize. Ndumbu yoze unanenganyana, hanji kechi kuliva kanawa ha shimbu lizeliene mutumutakamisa. Alioze, yisoneko yakutukolweza hanga tununge ni “kulitakamisa umwe ni mukwo.” (1 Tesa. 5:11) Nunga ni kulihumikiza muze unalembejeka ni kutakamisa waze anafupu ukwaso we. (1 Tesa. 5:14) Kwamba umwenemwene, ha mashimbu amwe ni yetu twakufupa hanga akwetu atutakamise. Yika mutuhasa kulinga nyi tunafupu utakamiso?

MUZE MUFUPA UTAKAMISO

14-15. Yika mutuhasa kulinga nyi ngwe tunasakalala hanji tunalipikala chinji?

¹⁴ Lemba kuli Yehova. Eta kuli Yehova hanga akutakamise ha mashimbu waze musakalala hanji mulipikala. (Samu 94:19) Lweza Yehova chize unevu. (Samu 62:8) Kwamba umwenemwene, Yehova kananyingika chize unalivu shimbu kanda uchilemba. Alioze, nyi wamulweza chize unalivu, musolola ngwe wakufuliela muli iye ni kusolola nawa ngwe, kakukuzanga ni kupanjika yilemba ye. Chikwo nawa, mashimbu eswe Yehova kakukwasa atu waze akumufuliela ni kulemba kuli iye chipwe ngwe, ukwaso uze maaha hi uze ko te anashimbwila. (Marku 11:24) Mukanda wa A-Fwilipu 4:6, 7 unambe ngwo: “Nyingikisenu kwita chenu kuli Zambi . . . mba sambukila ya Zambi yize yahiana kunyonga cheswe, muyikafunga mbunge jenu ni kunyonga chenu.”

¹⁵ Eta ukwaso kuli akwenu. Hanjika ni umwe sepa, hanji umwe mukulwana wa mu chikungulwila yoze wakujikijila, ni kumulweza chize unalivu. Mandumbu je mahasa kupwa chishina cha utakamiso. Alioze, ayo hanji kechi kunyingika chize unalivu ni yize unafupu, nyi ngwe kuwalwezeleyo. (Yishi. 14:10) Yena muhasa kwita hanga akupanjike kanawa, alise mu chihela che, akutangile chimwe chisoneko, hanji chimwe chikuma ha mikanda yetu chize ayo mamona ngwo chili cha utakamiso.

16. Yika muyihasa kulingiwa muze anakutakamisa, alioze yika watamba kwiwuluka?

¹⁶ Lihumikize ni kupwa mukwa-kukonekena. Mandumbu je hanji malinga amwe tupalia muze anakutakamisa. Ngwe chilweza, ayo hanji mahanjika ni kulinga yuma yize muyikuvisa chinyengo shimbu yikutakamise. Nyi chino muchilingiwa, hwima mbunge. (1 Kori. 13:4, 7) Iwuluka maliji ali ha Tiangu 3:2, anambe ngwo: “Nyi mutu keshi kulinga tupalia ha kuhanjika, kali mungunu.” Kashika, mandumbu je kanazange wika kukukwasa. Iwuluka nawa ngwe, “spiritu yinazange, alioze mujimba ulelu.”—Mateu 26:41.

17. Yika yetu eswe tunazange kununga ni kulinga?

¹⁷ Yetu eswe tunafupu utakamiso mumu tuli ha matangwa a kusula. Tunanyingika ngwetu, mutupalika mu kapinda munji mumu akwa-kole ja Zambi kanatuvila uli unji. Kashika, wano e mashimbu mutufupa chinji utakamiso. Tulingenu yeswe mutuhasa hanga tulitakamise umwe ni mukwo.