Pwako ni Nyonga Lialita Hakutwala ku Yipikalo

1-2. Yika twatamba kulinga mba tunyongonone muze mutupalika mu yipikalo? (Tala nawa chizulie.)

SHINA unapalika mu yuma yipi? Asoko je kanalimika ni yena? Nyi hanji kanakuhungumiona mumu lia ufulielo we? Shina unanyongonona mumu lia kuyiza hanji mumu lia ushinakaji? Nyi hanji unamono lamba mumu lia kutokesa atu waze yena wazanga? Ngwe chizechene chakulingiwa kuli tuvumbi anji a Yehova, kota mwono we unapu wa “kuhondangana ni chinyengo wika.”—Samu 90:10.

² Mba tukumbe yipikalo yetu, twatamba kuyimona ngwe chize Yehova akuyimona. Kuchi mutuhasa kuchilinga? Tutalenu chilweza chino: Yipikalo yize twakupalika mutuhasa kuyitesa ni ponde yize yakusoloka muze mutu anendesa mashinyi. Kulita ni ponde yacho, mutu mahasa kuteulukila ku sali lia utata hanji lia umama, kukokolola fuji ja mashinyi, hanji kumana ha mashimbu akehe. Alioze, mba akwate chiyulo chalita, katamba kumona kanawa ponde yacho. Iye kechi kuhasa kumona kanawa, nyi ngwe ha kapenda hali majilo hanji mbundu. Chizechene nawa, mba tukumbe kapinda wetu twatamba kumumona ngwe chize Yehova akumumona. Ha mutwe uno, (1) mutumona jila yalita yize mutuhasa kumwenamo yipikalo yetu, (2) chize kumwena yipikalo yetu mu jila yize kuyalitele muchihasa kwokesa kapinda, ni (3) mutumona majila waze matukwasa kupwa ni nyonga lialita muze mutupalika mu yipikalo.

JILA YALITA YA KUMWENAMO YIPIKALO YETU

3. Mumu liaka kutuchi kuhasa kuchina yipikalo haliapwila?

³ Kutuchi kuhasa kuchina yipikalo mu chifuchi chino cha Satana. Amu tuchili yihenge, chikwo nawa, twatwama mu chifuchi chize anayulu kuli Satana, yipikalo yakukwata ku mwono wa yetu eswe. Mutupalika mu yipikalo yinji, chipi-chipi ha matangwa wano a kusula. Yipikalo yimwe muyihasa kwiza mumu lia luyinda wa chisemewa, luyinda yoze akukoka kuli atu ni mumu lia lamba lize mahasa kutumwesa kuli atu api. (Mateu 24:8; 2 Timo. 3:13) Yehova makahwisa yipikalo yeswe kulutwe lia matangwa. Ha mashimbu wano, kechi kuhwisa yipikalo yacho, mumu nyi machilinga, muchisoloka ngwe kanakwasa kuyula cha Satana. Kashika, amu Satana machiyula hashi, yetu mutununga ni kumona lamba.—Chilu. 9:12.

4. Chikuma chikwo chika chakunehena lamba Akwa-Kristu?

⁴ Kapinda mukwo yoze Akwa-Kristu akupalika, kakwiza mumu lia kwononokena Yesu. Ha yisuho yinji, Yesu kapwile ni kulweza tumbaji twenyi ngwenyi te maahungumiona mumu lia ufulielo wo. (Mateu 24:9; Yoa. 16:2) Kashika kutushi kukomoka muze akutuhungumiona. (1 Tesa. 3:3, 4) Nyi mutunyongonona ha mashimbu akalu ku mwono wetu, mutuhasa kupwa ni shindakenyo ngwetu tunalingi yuma yalita. Chikwo nawa, Yehova ni Yesu makatuwahisa ni mwono wa mutolo. Muze twakuchilinga, twakusolola ngwetu Yehova kali mukwa-kuyula mupema, kashika twakusakula kumuwayila, ni kusolola ngwo Satana kali mukwa-mahuza. Amwe a ku mahuza a Satana, kali ngwo, atu keshi kuwayila Zambi mumu lia zango, alioze kakuchilinga mumu lia yuma yipema yize akwaha. Satana kakuzanga kusolola ngwo, yize ambile yili yamwenemwene, kashika akunehena atu ja Zambi kapinda mweka ni mweka hanga eche kushishika. (Yombi 1:9-11) Muze twakunyongonona mumu lia zango lietu hali Yehova, twakumuvisa kuwaha.—Yishi. 27:11.

5. Yika twalilongesa ha mukanda wa Chilumbununyi 7:13, 14? (Tala nawa yizulie.)

⁵ Yehova kakutayiza hanga tupalike mu yipikalo. Yehova kechi kapwa mupi nilimwe tangwa, hanji kutweseka ni yuma yipi. (Tia. 1:13) Mumu liaka Mwanangana Solomone asonekene ngwenyi, ‘tangwa lia luyinda’ lili milimo ya Zambi? (Tanga Chilumbununyi 7:13, 14.) Iye kakazangile kwamba ngwenyi, Yehova mwe wakuneha yuma yipi. Alioze, kazangile kwamba ngwenyi, Yehova kakutayiza hanga yuma yipi yilingiwe. Solomone kahanyine chiyulo chipema chize muchitukwasa kupwa ni nyonga lialita muze mutupalika mu yipikalo. Chitangu, amu tuchili yihenge, chikwo nawa, twatwama mu chifuchi cha Satana, matangwa amwe mahasa kupwa apema akwo api. Muze mutupwa ha ‘matangwa apema,’ twatamba kusakwilila kuli Zambi ni kumona matangwa jacho, ngwe chawana chize chakatuka kuli iye. Chamuchaali, Solomone kanatwiwulula ngwenyi, yetu ‘kutushi ni uhashi wa kunyingika yize muyilingiwa hamene.’ Kashika, kutushi kuhasa kunyingika tangwa lize yipikalo muyituwana. Kwamba pundu, yipikalo yakwiza hali akwa-ululi ni hali yihenge.

6. Mumu liaka Yehova akutayiza hanga tupalike mu yipikalo? (A-Hepreu 12:7, 11)

⁶ Nyi twamwena yipikalo yetu mu jila yalita, mutumona ngwetu, Yehova kakutulongesa hanga tujikijile hali iye hi hali yetu ene ko. Yehova kakulihulumba ni yetu, kakunenganyana muze twakumona lamba ni kutukwasa mashimbu eswe. Chipwe ngwe iye kakutayiza hanga tupalike mu “chikulo cha chizulie cha kufwa,” nihindu iye kakutusongwela ni kutwaha shindakenyo ngwo kakutuzanga. Kakutwaha nawa tachi jize tunafupu hanga tunyongonone mu yipikalo. (Samu 23:4) Muze twakupalika ha mashimbu akalu, twakunyingika kanawa chize twapwa ni kumona chize mutuhasa kululieka yitanga yetu. (Tanga A-Hepreu 12:7, 11.) Ngwe chilweza, Yombi katambile kusa tachi hanga apwe mukwa-kulikehesa. Lamba lize Yombi amwene hi Yehova ko unakamukokelalio. Alioze, Yehova katayijile Yombi apalike mu lamba hanga amulongese yimwe yikuma yilemu. (Yombi 42:1-6) Chipwe ngwe mutupalika mu yipikalo, nihindu tupwenu ni shindakenyo ngwetu, Yehova kechi kutayiza hanga tupalike mu yipikalo yacho ku miaka yeswe. Chikwo nawa, muze twakunyongonona ni ushishiko, yetu ‘twakukumba kuhiana.’—Roma 8:35-39.

7. Mumu liaka muhasa kuwahilila chipwe ngwe unapalika mu yihungumiona mumu lia ufulielo we?

⁷ Mutuhasa kuwahilila muze tunapalika mu yihungumiona. Nyi unapalika mu yipikalo, kanda unyonga ngwe Yehova keshi kukuzanga, hanji ngwo kechi kukukwasa nawa. Shimbu unyonge chocho, iwuluka ngwe, nyi unapalika mu yipikalo mumu lia kwononokena Yehova, wakumuvwisa kuwaha. Chikwo nawa, iye makuwahisa. (Mateu 5:10-12) Nyi wamwena yihungumiona mu jila yino, muhasa kuwahilila ngwe chizechene apostolo apwile ni kuwahilila. (Yili. 5:40-42) Chikwo nawa, nyi twanunga ni kushishika muze mutupalika mu yihungumiona, mutuhasa kukwasa akwetu anyingike umwenemwene hakutwala kuli Yehova ni kumuhalisa. (1 Petu. 2:12) Tunyongenu ha chilweza cha Yosefwe. Yehova kamukwashile ni kumuwahisa, hi wika ko muze amutuswile, alioze chipwe muze apwile mu zuwo lia ususu. Chipwe yetu, mahasa kutuwahisa muze mutupalika mu yipikalo.—Uputu. 39:3, 23.

8. Yuma yikwo yika muyitukwasa kununga ni kushishika muze mutupalika mu yipikalo?

⁸ Yipikalo yetu muyikahwa. Chilweza cha Yombi, chakutwiwulula ngwo, yipikalo yetu muyikahwa. Mbimbiliya yakwamba ngwo: “Yehova yawahisa matangwa a Yombi a kusula kuhiana a uputukilo.” (Yombi 42:12) Chizechene nawa, ni yetu Yehova makatuwahisa mu chifuchi chaha mu yimwe jila yalipwila. Yipikalo tunamono haliapwila, yili ya mashimbu akehe wika. Nyi tunazange kumona chize Yehova makamanununa yilakenyo yenyi mu chifuchi chaha, tunungenu kumuwayila ni ushishiko.—Mateu 24:13.

KUHONA KUPWA NI NYONGA LIALITA CHAKWOKESA LAMBA

9. Kuchi kupwa ni manyonga waze kalitele muchihasa kwokesa lamba lietu?

⁹ Yipikalo yetu muyihasa kwoka chinji nyi twaputuka kutayiza yuma yize hi yamwenemwene ko. Ngwe chilweza, mutuhasa kukakajana lume ni kunyonga ngwetu, Yehova mwe unatukokela lamba liacho. Ha mashimbu amwe, Yombi kanyongene ngwe Yehova mwe te unamumwesa lamba. Manyonga jacho kamutwalile ‘kulisambisa mwene kuhiana kusambisa Zambi.’ (Yombi 32:2) Noemi neye kanyongene ngwo Zambi mwe wamukokelele lamba. (Rute 1:13, 20, 21) Nyi Yombi ni Noemi kanungine ni kulikwachilila ha manyonga jo, ayo kachi kapihishile usepa wo ni Yehova. (Yishi. 19:3) Alioze, Yehova kaakwashile apwe ni manyonga alita hakutwala ku yipikalo yo, ni kwawahisa mumu lia ushishiko wo.

10. Muze tunapalika mu yipikalo yika mutuhasa kunyonga?

¹⁰ Chipwe ngwe tuli ni shindakenyo ngwetu, Yehova keshi kutukokela lamba, nihindu mutuhasa kuliva ngwe, kutushi ni ulemu kuli iye, hanji kunyonga ngwetu, iye keshi kulihulumba ni yetu. Manyonga wano mahasa kutuhongesa ni kupwisa chikalu kununga ni kulingila Yehova. (Yishi. 24:10) Mwanangana Ndawichi ni profeta Habakuke, no kapalikile mu yipikalo yize yaatwalile kuyambashana, nyi chamwenemwene Yehova kakupanjika yilemba yo nyi ka. (Samu 10:1; Haba. 1:2) Chipwe chocho, ayo kakalitwaminyine kulemba. Yehova kakumbulwile yilemba yo ni kununga ni kwakwasa. Kashika, mutuhasa kupwa ni shindakenyo ngwetu, ni yetu matukwasa.—Samu 10:17.

11. Yika muyihasa kulingiwa nyi mutuhona kupwa ni manyonga alita hakutwala ku yipikalo?

¹¹ Nyi twecha kumona yipikalo yetu ngwe chize Yehova akuyimona, mutuhasa kuputuka kunyonga ngwe Yehova te katambile kwecha hanga yipikalo yacho yilingiwe kuli yetu. Chikwo nawa, mutuhasa kukomoka nyi chuma chipi muchilingiwa kuli yetu. (1 Petu. 4:12) Mutuhasa kulilongesa yimwe ha chilweza cha tumbaji twa Yesu. Muze Yesu aalwezele ngwo mamuhungumiona ni kumushiha, o kakatayijile. (Luka 18:33, 34) Ngwe chilweza, Petulu kanyongene ngwenyi, Zambi kechi kutayiza hanga mwanenyi amone lamba liacho, chipwe ngwe Yesu te hanaalweze kulu ngwo mamumwesa lamba. Yesu kanyingikine ngwenyi, kufwa chenyi ni lamba lize te mamona muyimanununa upale wa Yehova. Chikwo nawa, iye kazangile kumwononokena. Alioze, kachi chapwile chikalu kuli Yesu kumanununa upale wa Zambi, nyi te maputuka kunyonga ngwe chize Petulu anyongene. Kashika Yesu alitunyine manyonga ja Petulu. (Marku 8:31-33) Chikwo nawa, chipwe muze Yesu amushihile, kwapalikile mashimbu mba tumbaji jenyi anyingike mumu liaka iye amushihile. Alioze mumu lia zango, Yesu yanunga ni kwakwasa. Muze amuhindwishile, Yesu yaakwasa apwe ni manyonga alita hakutwala ku lamba ni “kwalumbunwina Yisoneko yize yahanjikile hakutwala kuli iye.” (Luka 24:25-27, 32, 44-48) Kupukuna ha yize Yesu aalongesele, te muchakwasa kulilulieka ha yipikalo yize te mapalika kulutwe. Ni yetu nawa, mutuhasa kunyonga ha yize Mbimbiliya yakwamba hakutwala ku yihungumiona hanga tulilulieke shimbu kanda yichisoloka.

12. Yika mutuhasa kunyonga nyi ngwe mutuhona kupwa ni nyonga lialita hakutwala ku yipikalo?

¹² Nyi twecha kunyonga ngwe chize Yehova anazange hanga tunyonge hakutwala ku yipikalo yetu, muchipwa chikalu kuyikumba. Yesu kasolwele chize yino muyihasa kulingiwa, ha chishima chize atele cha akwa-kukalakala mu munda wa uva. Amwe yaputuka kupihilila mumu ngwo, mwata wo kakaafwetele kulita ni chize ayo azangile. Alioze, mwata wo yaalweza ngwo: “Mukwetu, chakulingile upi niumwe.” (Mateu 20:10-13) Akwa-milimo kanyongene ngwo, mwata wo kakafwetele ni ululi. Alioze iye kakalingile chuma chipi. Ayo kanakapihilila mumu te kanashimbwila mbongo jinji. Musono, mandumbu jetu a malunga ni a mapwo no mahasa kupwa ni manyonga jacho. Chino muchihasa kulingiwa mumu lia kuhona kupwa ni chiteli chize ayo akuzanga mu ululikiso wa Yehova. Yika mutuhasa kulinga hanga tupwe ni manyonga alita muze mutupalika mu yipikalo?

YIZE MUTUHASA KULINGA MUZE MUKUSOLOKA KAPINDA

13. Yika muyihasa kulingiwa muze mukusoloka umwe kapinda?

¹³ Tuvumbi twa Yehova kananyingika yize Mbimbiliya yakwamba hakutwala ku lamba. Chikwo nawa, twakutangila akwetu yisoneko ya Mbimbiliya hanga twatakamise muze anapalika mu yipikalo. Alioze, muchihasa kupwa chikalu kupwa ni nyonga lialita, nyi ngwe yetu e tunapalika mu yipikalo. Ngwe chilweza, mutuhasa kunyonga ngwetu, Yehova kanatumwesa lamba mumu lia yimwe yuma twalingile kunyima, hanji kunyonga nawa ngwo kaso kwiva yilemba yetu. Yika muhasa kulinga hanga ununge kupwa ni nyonga lialita?

14. Yika muhasa kwita mu yilemba muze unapalika mu kapinda mweswawo? (A-Fwilipu 4:13)

¹⁴ Eta ukwaso wa Yehova. Lweza Yehova kapinda yoze unapalika ni chize unalivu. Chikwo nawa, muze mulemba, eta kuli Yehova hanga akwehe ukwaso uze unafupu. Muhasa kumwita spiritu yisandu hanga yikwehe mana ni tachi hanga uhase kunyongonona. Iwuluka ngwe, Yehova mahasa kukumbulula yilemba ye mu jila yize kuushi kushimbwila. (Efwe. 3:20) Yehova mahasa kutuma angelo, ni mandumbu jetu a malunga ni a mapwo hanga akukwase. (Samu 34:7) Kashika, tayiza ukwaso wenyi mu jila yeswayo makuhelawo. Muhasa kupwa ni shindakenyo ngwe, Yehova kanazange kukwaha spiritu yisandu hanga yikukwase kupalika mu kapinda mweswawo.—Tanga A-Fwilipu 4:13.

15. Yika muyikukwasa kunyongonona mu yipikalo? (Tala nawa chizulie.)

¹⁵ Nunga ni kulinga yuma ya ku ufulielo. Nyi ngwe unapalika ha mashimbu akalu, muchihasa kupwa chikalu kuli yena kulinga yuma ya ku ufulielo. Alioze, ha mashimbu jacho, he watamba kulinga chinji yuma ya ku ufulielo ni kunyonga ngwe chize Yehova akunyonga. Tanga Mbimbiliya ni kupanjika yuma yize muyikukwasa kunyonga hali Yehova ni yize iye akwamba. (Samu 119:143) Nunga ni kutanga Mbimbiliya mashimbu eswe, kulilongesayo ni kuyipukuna. Chikwo nawa, ambujola sango jipema kulita ni uhashi we, ni kuya ha kukunguluka ni kuhana makumbululo muze uli ha kukunguluka. Chuma chikwo chize muhasa kulinga, chili kupwa hamwe ni mandumbu je a ku ufulielo. Kanda utwama mashimbu anji ukawe, chipwe muliva ngwe watamba kuchilinga.—Yishi. 18:1.

16. Muze unapalika mu yipikalo yika muhasa kunyonga, mba yika watamba kulinga? (2 A-Korindu 10:4, 5)

¹⁶ Kumba kukakajana che. Muze mupalika mu yipikalo, muhasa kuputuka kutayiza yuma yize hi yamwenemwene ko hakutwala kuli yena, hanji kuli Yehova. Ha chikuma chino, yika muyikukwasa kwalumuna manyonga je hakutwala kuli yena mwene ni Yehova? (Tanga 2 A-Korindu 10:4, 5.) Muhasa kukumba kukakajana chacho ha kupwa ni “chinyingi cha Zambi,” chize twakuwana mu Mbimbiliya ni mu mikanda ya mu ululikiso wetu. Ngwe chilweza, shina wakukakajana nyi uli ni utayizo wa Yehova? Nyi chenacho, kulilongesa chilweza cha postolo Paulu muchikukwasa. Mu mulimo wenyi wa kwambujola, iye kapalikile mu kapinda mweka ni mweka. Kupalika mu yipikalo yino, chamuhele shindakenyo ngwo Yehova ni Yesu, kakuwahilila ni iye. (2 Kori. 11:23-27) Shina wakuyambashana nyi Yehova hanakukonekena ha shili yize walingile kunyima? Nyi chenacho, soneka yisoneko ya mu Mbimbiliya yize yakusolola ngwo Yehova kakutukonekena. (Iza. 43:25) Tanga versu jacho ni kujipukuna. (Samu 119:97) Muchihasa kupwa ngwe, hanji kwalingiwile yimwe yuma yipi kuli yena hanji kuli mutu yoze wazanga, mba yiuputuka kunyonga ngwe Zambi keshi kufunga tuvumbi twenyi. Hengwola mu mikanda yetu yikuma yize yakusolola mumu liaka Zambi akwecha lamba, hanga upwe ni shindakenyo ngwe, Zambi kakutukwasa chipwe muze twakupalika mu kapinda mweswawo. (Samu 91:9-12) Tanga sango ja mandumbu jetu a malunga ni a mapwo waze apalikile mu yipikalo, ni yize alingile hanga anunge ni kuwayila Yehova ni chiseke.a

17. Yika twatamba kulinga muze mutupalika mu yimwe yipikalo?

¹⁷ Muchihasa kupwa ngwe, ha mashimbu wano kuuso kupalika mu umwe kapinda mukalu chinji. Nyi chenacho, sakwilila Yehova ni kumuhalisa ha yuma yipema yize akukwaha. (Chilu. 7:14) Alioze, muze mupalika mu yipikalo, nunga ni kupwa ni nyonga lialita ni kukolesa ujikijilo we muli Yehova. Nyi wachilinga, Yehova ‘makulweza jila ya kutuhukilamo hanga uhase kunyongonona.’ (1 Kori. 10:13) Mba yika mutwamba hali mandumbu jetu a malunga ni a mapwo? Kuchi mutuhasa kwakwasa nyi kanapalika mu kapinda? Mutukakumbulula chihula chino ha mutwe uze muuhataho.