“Zambi ya Umwenemwene” Mashimbu Eswe Kakumanununa Yilakenyo Yenyi

1. Kulita ni Samu 31:2-5, mumu liaka twatamba kujikijila muli Yehova?

TWATWAMA mu chifuchi chize anayulu kuli Satana. Mumu lia chino, atu anji kakulionga. Kashika chakupwa chikalu kumona yoze mutujikijila. Akwa-mingoso keshi kuhanjika umwenemwene ha yize akulinga. Kalimba-limba kanoko chinji kuli akwa-mingoso mumu ayo kanazange wika hanga atu alande yize ayo analanjisa. Mashimbu amwe, chipwe masepa jetu lume keshi kumanununa yize akutulakenya. Alioze, chili kuyuka chinene kunyingika ngwetu, mashimbu eswe mutuhasa kujikijila Yehova. Mumu liaka? Mumu iye kali “Zambi ya umwenemwene.” (Tanga Samu 31:2-5.) Umwenemwene uli chihanda cha utu wenyi. Yehova keshi kulionga, mashimbu eswe kakuhanjika umwenemwene. Pundu lume, yuma yeswe yize Yehova akulakenya, kakuyimanununa.

2. Yika mutumona ha mutwe uno?

² Ha mutwe uno, chitangu mutumona yimwe yikuma ya mumu liaka twatamba kujikijila muli Yehova ni mbunge yetu yeswe. Kulutwe mutumona chize Yehova makanongesa Satana ni chifuchi chino chipi ni yize analingi haliapwila hanga amanunune yilakenyo yenyi yinatale hali atu ni hano hashi. Kunyingika chino, muchitukwasa kwokesa zango lia kulweza akwetu umwenemwene hakutwala kuli Yehova.

MUTUHASA KUJIKIJILA MULI ZAMBI YA UMWENEMWENE

3. Mumu liaka mutuhasa kujikijila muli Yehova ni mbunge yeswe?

³ Mutuhasa kujikijila muli Yehova mumu iye kali Sakatanga. Iye mwe watangile malilu ni hashi ni akwa-mwono eswe. (Uputu. 1:1; Samu 36:9; Uso. 4:11) Iye mwe walingile yuma yeswe hano hashi yize twakufupa mba tununge ni mwono, ngwe mwiku uze twakuhwima ni meya waze twakunwa. Iye kali ni ndundo ja kufunga yuma yeswe. Amu Yehova mwe watutangile, kananyingika yuma yeswe, chikwo nawa, kali ni ndundo jize kujishi musulo. Kashika, mutuhasa kumujikijila hanga asongwele mwono wetu ni kufuliela ngwetu, makatwaha mwono upema kulutwe lia matangwa.

4. Kuchi tunanyingika ngwetu Yehova kakutuzanga?

⁴ Mutuhasa kujikijila muli Yehova mumu iye kakutuzanga. Yehova katangile atu hanga atwame ni mwono ni kuwahilila ngwe chize iye akuwahilila. Yehova kasolwele upale wenyi muze ambile ngwenyi: “Tutangenu mutu mu chifwa chetu, alifwe ni yetu.” (Uputu. 1:26) Katutangile ku upale wenyi, katuhele zuwo lipema, hano hashi. (Samu 115:16) Iye kawahishile yisemi jetu atangu ni kwaha chimwe chiteli chipema chinji, cha kupwisa hashi paraisu. (Uputu. 1:28; 2:15) Iye kaahele kulia chinji chipema, milali yeka ni yeka ya yitemo, mitondo, mihuko, tushitu ni yuma yikwo nawa. Iye kachilingile hanga ayo awahilile ni kulivisa kuwaha. Pundu lume, yuma yino yeswe yakusolola ngwo, “utu wa zango lia Yehova wapwa wa ku miaka ya mutolo ndo ku miaka ya mutolo.”—Samu 103:17.

5. (a) Yika Yehova alingile muze Alama ni Eva avulumwine? (b) Yilakenyo yimwe yika yize Yehova hanamanununa? (Tala mushete “Zambi Kakuhanjika Umwenemwene Mashimbu Eswe.”)

⁵ Mutuhasa kujikijila muli Yehova mumu kakuhanjika umwenemwene mashimbu eswe. Yehova kakatangile hashi ‘hanga hapwe hahululu, alioze katangileho hanga atu atwameho.’ (Iza. 45:18, 19) Muze Alama ni Eva ahonene kwononokena Yehova, ayo yafwa. Chasolokele ngwe Ndiapu kakwikile Yehova kumanununa upale wenyi unatale hali atu ni hano hashi. Alioze, kukushi chuma nichimwe chize muchihasa kukinda Yehova. Mashimbu eswe, iye kakumanununa yize akutesa kulinga. (Iza. 46:10, 11) Upale wenyi wa atu kutwama hano hashi ku miaka yeswe, kuwalumukine. Kashika atayijile Alama ni Eva kupwa ni ana, ni kutuma Mwanenyi wa wika eze ni kutufwila, mba chipwe chashi kuli yetu kupwa ni kutalatala cha mwono wa mutolo.—Yoa. 3:16.

ZAMBI YA UMWENEMWENE KAKUMANUNUNA YILAKENYO YENYI

6. Yika Yehova ambile muze Alama ni Eva ahonene kwononoka?

⁶ “Kapela wa shakulu, avuluka ngwo Ndiapu kanda Satana,”a mwe watwalile Alama ni Eva kulimika ni Zambi. (Uso. 12:9; Uputu. 3:4, 5; Yoa. 8:44) Mumu lia yize Satana alingile, Yehova kambile ngwenyi makamunongesa kulutwe lia matangwa. (Uputu. 3:15) Shimbu kanda achimunongesa, atu anji kali ku sali lienyi, ayo kakwimbulula yuma yipi yize iye akulinga. Alioze, kuli atu akwo anji waze ananungu ni kushishika kuli Yehova.

7. Aya akukaula chilweza chipi cha Satana, yika muyikalingiwa kuli ayo?

⁷ Waze akwimbulula chilweza chipi cha Satana, kali angelo waze akulimika ni Zambi ni atu waze keshi kuzanga kwononokena Zambi. Mumu lia kuhona kwononokena Yehova, atu anji kali ku sali lia Satana. Alioze, Yehova hanatese shimbu lize makanongesa Satana ni waze ali ku sali lienyi.—Danie. 2:44; Roma 16:20.

8. Yika Yesu alingile ha 1914? (Tala nawa yizulie.)

⁸ Mumu liaka mutuhasa kupwa ni shindakenyo ngwetu, chilakenyo cha Yehova cha kunongesa Satana ni eswe waze ali ku sali lienyi muchikamanunuka? Ha 1914, Yesu kashile jita ni Satana Ndiapu ni andemoniu jenyi ni kwanyasa hano hashi. (Uso. 12:7-9) Chipwe ngwe jita yacho kayashile mu malilu, nihindu yize yalingiwileko yakwachile ku mwono wa atu hano hashi. Kashika Mbimbiliya yakwamba ngwo: “Lamba kuli akwa-hashi ni kalunga-lwiji, mumu Ndiapu hanahulumuka kuli yenu, kali ni ufwatulo unji mumu kananyingika ngwenyi, mashimbu akehe asala no.” (Uso. 12:12) Chize ha 1914, Satana kakulihulikila wika hano hashi, kashika twakumona yuma yinanungu ni kupihia wika. Cheka nawa, “lamba kuli akwa hashi.” Kwasala hakehe, Yesu matambula chiyulo chize Satana alinacho hano hashi ni kunongesa eswe waze ali ku sali lia Satana. (Uso. 6:2) Yesu makanangamisa jina lia Yehova, kamuwika kunahu. (Samu 45:4-6) Muze yino muyikalingiwa, yetweswe mutukanyingika ngwetu Yehova kali Zambi ya umwenemwene.—Eze. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

YEHOVA KANAKUNGU ESWE AKUZANGA UMWENEMWENE

9. Aya Yehova anakungu musono?

⁹ Ha mashimbu wano, Yehova kanakungu “yuma yeswe mwilu ni yuma yeswe hashi, yikapwe mushi lia Kristu.” (Efwe. 1:10) “Yuma yeswe mwilu,” yinatale hali akwa-kristu akuwayisa, waze Yehova hanasakula hanga akayule ni Yesu mu malilu. “Yuma yeswe hashi,” yinatale hali waze makatwama mu paraisu hano hashi ku miaka yeswe. Tuvumbi wano a Yehova, kakukalakala hamuwika hanga akwase atu a mbunge yipema kunyingika Yehova ni kusolola ngwo, Satana kali mukwa-mahuza.

10. Kuchi Yehova akukwasa atu kunyingika umwenemwene? (Usolwelo 14:6, 7)

¹⁰ Mba awane atu waze anazange kunyingika umwenemwene hakutwala kuli iye, Yehova kakutuma atu hanga ambujole umwenemwene hashi heswe. Au uli umwe mulimo uze kanda achiulinga kama ngwe chize anaulingi musono. (Tanga Usolwelo 14:6, 7.) Chipwe ngwe Yehova kahanyine mulimo wa kwambujola sango jipema kuli atu, nihindu angelo no kakukwasa mu mulimo wa kuwana atu a mbunge yipema hanga eze mu chikungulwila cha Akwa-Kristu. Mulimo wa kwambujola wakusolola hatoma mahuza a Babilonia Yinene, hanji ngwetu, uwayilo weswe wa mahuza uze Ndiapu akusongwela hanga ahanjike mahuza hakutwala kuli Yehova. (Uso. 18:2, 4) Kwasala hakehe, uwayilo weswe wa mahuza maunongesa. Chikwo nawa, eswe waze akuzanga Zambi ya umwenemwene makamuhalisa ngwe chize atela.—Uso. 17:16.

11. Kuchi mutuhasa kunyingika tuvumbi amwenemwene a Yehova?

¹¹ Atu waze akuzanga umwenemwene kali a ku yihela yalisa, amwe kakwete mbongo akwo ka, yako yo yalisa, kaalelele mu mutapu walisa, kali nawa a ku mavungu alisa. (Uso. 7:9, 10) Muze evwile “sango jipema,” yanyingika ngwo uno uli umwenemwene, yalichinga ni atu ja Zambi. (Marku 13:10) Musono, waze akuwayila Yehova mu jila yalita kakusoloka zwalala. Profeta Malakia kambile ngwenyi: “Munukamona kulipalikila hakachi ka akwa ululi ni yingulungulu; hakachi ka mukwa kulingila Zambi ni yoze kamulingilile.” (Mala. 3:18) Kupalikila mu yitanga yo ni mu mulimo wa kwambujola, atu ja Yehova kakusolola ngwo, kakuwayila Zambi ya umwenemwene.

12. Kuchi mulimo wa kwambujola wakutukwasa kumanununa upale wa Yehova?

¹² Muze twakwambujola “sango jipema ja Wanangana,” yetu twakwononokena Yesu ni kumanununa uprofeto. (Mateu 24:14; 28:18-20) Mumu lia mulimo uno, atu anji a hashi heswe kanatayiza kupwa tumbaji twa Yesu. Chikwo nawa, kanashimbwila mashimbu waze makawayila Yehova ku miaka ya mutolo. Chili kuyuka chinene, kupwa ni chiteli cha kumanununa upale wa Yehova.

TUPWENU NI SHINDAKENYO NGWETU YEHOVA MAMANUNUNA UPALE WENYI

13. Ni aya Satana akulimika chinji, mumu liaka?

¹³ Satana Ndiapu, kali ni ufwatulo unji mumu kananyingika ngwenyi, “mashimbu akehe asala no,” shimbu chifuchi chino kanda achichinongesa. (Uso. 12:12, 13) Iye kakulimika chipi-chipi ni akwa-kumanyinako Wanangana wa Zambi, hanji ngwetu, “waze akwononokena shimbi ja Zambi. Waze ali nawa ni mulimo wa kuhana uchela hakutwala kuli Yesu.” (Uso. 12:17; 14:12) Satana kakulimika nawa ni waze akukwasa Akwa-Kristu akuwayisa.

14. Yika muyikalingiwa muze Satana makalukukila atu ja Zambi? (Tala nawa chizulie ha chifukilo.)

¹⁴ Hanyima lia kunongesa Babilonia Yinene, Satana ni waze akumukwasa makeseka kunongesa atu ja Yehova eswe. Chino che muchikakoka jita ya Armagedone. (Uso. 16:13, 14, 16) Yesu ni maswalale jenyi, makeza hanga akalamwine atu ja Yehova ni kunongesa liakulu yuma yeswe ya mu chifuchi chino cha Satana. (Uso. 19:19-21) Muze yino muyikalingiwa, kukuchi kapwa nawa atu api hanji akwa-mahuza. (Uso. 21:8) Hanyima lia yino yeswe, atu eswe makanyingika ngwo, Yehova kakuhanjika umwenemwene ni kulinga yuma yalita mashimbu eswe.

15. Mumu liaka mutuhasa kupwa ni shindakenyo ngwetu yize Yehova analakenya muyikamanunuka? (Izaia 65:16, 17) (Tala nawa chizulie.)

¹⁵ Musono, atu anji kakulipinjesa ni kulionga umwe ni mukwo. Alioze, ni ukwaso wa Yehova, tuvumbi twenyi kali atu alinunga. Yehova kanakoko eswe akuzanga umwenemwene eze mu ululikiso wenyi. Kukushi chuma nichimwe chize muchihasa kukinda Yehova kuwahisa atu jenyi ha mulimo uze akulinga. (Tanga Izaia 65:16, 17.) Mutuhasa kupwa ni shindakenyo ngwetu, yuma yeswe yize Yehova hanalakenya muyikamanunuka. Postolo Paulu katuhele shindakenyo yacho ha maliji ali ha A-Roma 8:38, 39, anambe ngwo: “Chipwe kufwa, chipwe mwono, chipwe angelo, chipwe manguvulu, chipwe yuma ya haliapwila, chipwe yuma yize muyizaho, chipwe ndundo, chipwe usuku kwilu, chipwe usuku kwishi, chipwe chitangiwa chikwo cheswacho, chichi kuhasa kutuhandununa ku zango lia Zambi lize lili muli Kristu Yesu Mwene wetu.”

16. Mumu liaka wakujikijila muli Yehova ni mbunge yeswe?

¹⁶ Tuli ni yuma yinji yize yakutukwasa kujikijila muli Yehova, Zambi ya umwenemwene. Iye kali Sakatanga wetu, kakutuzanga chinji. Chikwo nawa, iye kananungu ni kukoka atu anji hashi heswe hanga amuwayile mu jila yalita. (Iza. 60:22; Zeka. 8:23) Tunanyingika nawa ngwetu, iye kakumanununa upale wenyi mashimbu eswe. Chikwo nawa, kwasala hakehe anongese chifuchi chino cha Satana ni mahuza jenyi. Twakulemba ngwe chize Ndawichi alembele, muze ambile ngwenyi: “Yehova Zambi akawahe; ukawenyi kakulinga yikomokeso. Jina lienyi lilemu likafumane ku miaka ya mutolo. Hashi heswe hakazale too ni ulemu wenyi.”—Samu 72:18, 19.