Yihula ya Waze Akutanga Mikanda Yetu

Mukwa-kusoneka mukanda wa Yishima 30:18, 19 kambile ngwenyi “jila ya lunga ni mwana-pwo,” ‘chikalu kuyinyingika.’ Yika maliji wano analumbunuka?

Atu anji, chipwe lume waze ananyingika kanawa Mbimbiliya, kakulihula yize maliji wano analumbunuka. Mu Mbimbiliya ya Yisoneko ya Chifuchi Chaha mu putu, maliji eswe a versu jacho kali ngwo: ‘Kuli yuma yitatu yize kuchanyingikine, ewa yiwana kuyangulumbunukine, jila ya pupa mu tetela, jila ya kapela ha liwe, jila ya wato hakachi ka kalunga-lwiji ni jila ya lunga ni mwana-pwo.’—Yishi. 30:18, 19.

Kunyima, maliji wano “jila ya lunga ni mwana-pwo,” twapwile ni kwanyongena mu jila yipi. Mumu liaka? Mumu contexto yakusolola yuma yipi yize kuyishi kwamba ngwo, “kwahwa!” (Yishi. 30:15, 16) Mba versu 20, yinahanjikila hali “chikoi” yoze wakwamba ngwenyi, kuchalingile nichimwe chuma chipi. Kashika twapwile ni kunyonga ngwetu, chizechene ngwe pupa akuhumuka mwilu, chize kapela akulisweka ha mawe, hanji chize wato wakwenda kusuku mu kalunga-lwiji, lunga mahasa kulinga yimwe chakuhona mutu niumwe kunyingika yize alinga. Kashika kulita ni manyonga wano, twapwile ni kwamba ngwetu, maliji “jila ya lunga ni mwana-pwo” kanatale ha yuma yipi, hali umwe mukweze yoze wakwonga umwe mwana-pwo ni kulinga nenyi upangala.

Alioze, kuli yimwe yize yatutwala kunyonga ha versu jino mu jila yipema. Mukwa-kusoneka versu jino, te kanawahilila ni kukomoka wika ha yuma yacho.

Yisoneko yitangu mu Hepreu, yakusolola ngwo versu jino jinatale ha yuma yipema. Kulita ni Léxico Teológico ya Antigo Testamento, mu Hepreu maliji waze analumbununa ngwo, “yanguhiana kuyinyingika,” ali ha Yishima 30:18, “kanasolola chuma chize chapwa chipema hanji chikalu kusoloka.”

Longeshi avuluka ngwo, Crawford H. Toy, yoze wakulongesa yikuma ya Harvard ku shikola yinene mu Estados Unidos, neye yamba ngwenyi: “Versu jino ja mu Mbimbiliya kujishi kuhanjikila ha yuma yipi. Mukwa-kusoneka versu jacho, te kanazange wika kusolola chize yuma yacho yapwa yipema.”

Kashika muchilita kwamba ngwetu, maliji ali ha Yishima 30: 18, 19, kanasolola yuma yipema yakukomwesa yize kutuchi kuhasa kuyinyingika. Chizechene ngwe mukwa-kusoneka Mbimbiliya akomokene, ni yetu twakukomoka ha chize pupa akuhumuka, chize kapela akusenunuka ha liwe, chize wato ulemu wakupalika mu kalunga-lwiji ni chize mukweze wa lunga ni mwana-pwo akulizanga ni kutwama hamuwika