Yehova Katukwashile “Kusoka Miji Kweswako Kuze Atutumbile”

Mats ni Ann-Catrin kayile ku Shikola ya Ngiliate ha 1979. Ha kupalika cha miaka, ayo kaatumine hanga aye ni kukalakala ku Irã, Zaire, Tanzânia, ku tungo lia Ilhas Maurício ni ku Myanmar. Muze apwile ku Shikola ya Ngiliate, umwe longeshi avuluka ngwo Jack Redford, kaehele chimwe chiyulo chize chapwile ni kwakwasa ha yisuho yeswe yize apwile ni kwaha chiteli chaha. Twivwenu lusango wo.

Mats, tulweze kama, kuchi wanyingikine umwenemwene?

Mats: Te natwama mu chifuchi cha Polônia ni asoko jami, ha mashimbu a jita yamuchaali ya hashi heswe. Ha mashimbu jacho, te twakuya mu yingeleja ya Katolika. Muze tata amwene ngwenyi mu yingeleja yacho keshi kulongesamo umwenemwene, iye yamba ngwenyi, “Umwenemwene kuuli. Mutuhasa kuuwana.” Ha kupalika cha amwe mashimbu, yingumona ngwami, tata te kanahanjika umwenemwene. Te nakuzanga kutanga, kashika napwile ni kulanda mikanda yinji, chocho yingulanda mukanda uze avuluka ngwo, “Umwenemwene Uze Wakutwala ku Mwono wa Mutolo.” Mutwe wa mukanda uno, wangukwachile chinji ku mbunge. Kashika, yingutanga mukanda weswe tangwa lizeliene. Muze te hinahwisa kutanga mukanda wacho, yingupwa ni shindakenyo ngwami, nawana umwenemwene.

Ha Abril 1972, naputukile kutanga mikanda yinji ya Yela ja Yehova. Mikanda yino yangukwashile kuwana makumbululo a yihula yize napwile nayo hakutwala ku Mbimbiliya. Muze natangile mikanda yacho, yingunyonga ha chilweza cha Yesu cha mukwa-kulanjisa yoze ‘walanjishile’ yuma yeswe yize apwile nayo hanga alande “kakanga” yoze awanyine. Chilweza chino changukwachile chinji ku mbunge. Chocho yingulanda umwenemwene uze nawanyine ha kwecha kuya ku shikola yinene yize nazangile hanga ngupwe ndotolo. (Mateu 13:45, 46) Kashika, ha kupalika cha amwe mashimbu, yangupapachisa ha 10 Dezembro, 1972.

Ha mwaka uzewene, yisemi jami ni mwana-kwetu, no yatayiza umwenemwene ni kwapapachisa. Ha Julho 1973, yinguputuka upionelu wa shimbu lieswe. Mu chikungulwila chetu mwapwile umwe pionelu wa pwo avuluka ngwo, Ann-Catrin. Twalizangile chinji, chocho yitulimbata ha 1975. Yituputuka kukalakala hamuwika mu Strömsund, Suécia, mu yimwe mbonge yipema muze atu anji te akuzanga kulilongesa Mbimbiliya.

Ann-Catrin: Tata kalilongesele umwenemwene muze te hikwasala hakehe hanga ahwise shikola yinene mu Estocolmo. Ha mashimbu jacho, napwile wika ni tukweji atatu. Chipwe chocho, tata te kakungutwala ku kukunguluka ni mu mulimo wa kwambujola. Alioze mama te kakupihilila, kashika iye yasa tachi hanga atukwike kuwayila Yehova. Alioze kakahashile, ha kupalika cha amwe mashimbu, neye yaputuka kulilongesa Mbimbiliya chocho yamupapachisa. Muze napwile ni miaka 13, ni yami yangupapachisa, mba muze napwile ni miaka 16, yinguputuka upionelu wa shimbu lieswe. Hanyima lia kukalakala mu mbonge ya Umea, Suécia, kuze te kunafupiwa ukwaso wa akwa-kwambujola, yingupwa pionelu walipwila.

Hanyima lia kulimbata ni Mats, twakwashile atu anji kunyingika umwenemwene. Hakachi ka atu jacho, hapwile umwe mwana-pwo avuluka ngwo Maivor, yoze wechele mulimo wa kwasa konda hanga akalakale hamuwika ni mwana-kwetu mu mulimo wa upionelu. Ha 1984, yaasanyika ku shikola ya Ngiliate. Haliapwila, ayo kanakalakala ngwe mishionaliu mu Equador.

Mu mulimo wa mishionaliu yika yanukwashile kukaula chiyulo cha “kusoka miji kweswako kuze anutumbile”?

Mats: Kapwile ni kwalumuna chinji yiteli yetu ni kututuma ku yihela yeka ni yeka. Chipwe chocho, twapwile ni kusa tachi hanga twimbulule chilweza cha Yesu, chipi-chipi ha kulikehesa. (Kolo. 2:6, 7) Ngwe chilweza, shimbu tushimbwile mandumbu ejilile ni mianda yetu, twapwile ni kusa tachi hanga tulilongese chize ayo akulinga yuma ni mumu liaka akuyilinga. Twafupile kunyingika mianda yo ni chize ayo akunyonga. Ha kwimbulula chilweza cha Yesu, twalivwile ngwe katutumba “ku tupila twa meya” hanga tuwahilile ku chihela cheswacho apwile ni kututuma.—Samu 1:2, 3.

Ann-Catrin: Mba mutondo ukole muze mautumbulula, wakufupa chivukuminya cha mwalwa. Mu mulimo wetu weswe, Yehova kapwile ngwe ‘mwalwa’ kuli yetu. (Samu 84:11) Iye katuhele mandumbu a ku ufulielo waze apwile ni kutusolwela zango. Ngwe chilweza, mu chikungulwila chetu chikehe cha ku Teerã, Irã, mandumbu jetu katusolwelele zango linji. Chino chatwiulwile zango lize Akwa-Kristu a ku sekulu yitangu apwile ni kusolwela akwo. Twazangile chinji kutwama mu Irã. Alioze ha Julho, 1980, Yela ja Yehova yaakanjisa kulinga mulimo wo wa kwambujola. Kashika, yatulweza tukatuke mu chifuchi chacho ha matangwa aali, ni kututuma mu África, mu chifuchi cha Zaire chize musono akuvuluka ngwo, República Democrática do Congo.

Muze nanyingikine ngwami matutuma mu África, nalilile chiji, mumu nevwile ngwo, mu África mwatwama tupela anji ni misongo yinji. Alioze, lunga ni pwo waze apwile masepa jetu, waze akalakalile mu África ha miaka yinji yatulweza ngwo: “Kanda nwivwa woma. Yenu kanda nuchiya mu África. Tuli ni shindakenyo ngwetu nyi nwaya mu África, munukazangamo chinji.” Muze twayileko, yitumona ngwetu, ayo kahanjikile umwenemwene. Mandumbu mu chifuchi chacho kapwile ni kutuzanga chinji. Kwamba pundu, muze atulwezele ngwo twatamba kuhichika Zaire mumu lia ukanjiso, hanyima lia kutwamamo miaka yisambano, yami nalembele kuli Yehova, ni kwamba ngwami: “Lisesa Yehova, tweche kama tutwame mu África.”

Yiwape yika nwazuka mu mulimo wa Yehova?

Mats: Twakuyuka chinji ha kupwa ni usepa upema ni mishionaliu ni akwetu a ku yihela yalisa. Chikwo nawa, ku yihela yimwe kuze apwile ni kututuma, twapwile ni kusongwela malongeso anji a Mbimbiliya. Ngwe chilweza, twapwile ni kusongwela malongeso 20 ha mutu. Chishi kuvulama nawa zango lize mandumbu a mu África te akutusolwela muze te twakumeneka yikungulwila ya mu Tanzânia. Chipwe ngwe ayo kali yiswale, nihindu kapwile ni kusa shindakenyo ngwo kutwahonene chuma nichimwe. (2 Kori. 8:3) Mashimbu apema waze napwile ni kuzanga chinji, kali muze napwile ni kutwama ni mukwetu-pwo Ann-Catrin ha kuhwa cha tangwa hanga tuhanjike hakutwala ku yize yalingiwa ha tangwa ni kusakwilila Yehova ha ukwaso wenyi.

Ann-Catrin: Yami nakuwahilila chinji ha kunyingika mandumbu a mu yifuchi yinji. Twalilongesa malimi aha, ngwe, Persa, Francês, Luganda ni Suaíli, ni kunyingika yako ya ku minyachi yikwo. Twakwashile tumbaji aha kukola ku ufulielo, nawa twapwile ni masepa apema waze te twakukalakala no mu mulimo wa Yehova.—Zefa. 3:9.

Uwahililo ukwo twapwile nawo, wapwile kumona yitangiwa yinji ya Yehova. Mashimbu eswe te akutwaha chiteli chaha, chapwile ngwe twaputuka wenyi waha, uze Yehova te akusongwela. Mu mulimo wa Yehova, yetu twamona yuma yinji yipema yize ukawetu te kutushi kuhasa kuyimona.

Yipikalo yika nwamwene, nawa kuchi nwahashile kuyikumba?

Mats: Ha kupalika cha miaka, yituputuka kukwachika misongo yinji, kuchingako kachiki. Yisuho yimwe Ann-Catrin katambile kumupasula ni kawashi. Twapwile nawa ni kulipikala hali yisemi jetu waze te anayi ni kushinakajiwa. Kashika twakusakwilila chinji mandumbu jetu a ku musunya ha kutukwasa kufunga yisemi. Ayo kapwile ni kuchilinga ni zango, uhumikizo ni uwahililo. (1 Timo. 5:4) Twalingile yeswe yize mutuhasa hanga tukwase yisemi jetu chipwe ngwe te tuli kusuku. Chipwe chocho, ha yisuho yimwe twapwile ni kunenganyana, mumu te kutushi kukwasa yisemi jetu ngwe chize te twakuzanga.

Ann-Catrin: Ha mwaka 1983, muze te tuchili mu Zaire, yingukwachika musongo wa cólera, nayijile chinji. Chocho ndotolo yalweza Mats ngwenyi: “Nwatamba kukatuka mu chifuchi kawashi-washi.” Mukwachako, yituya ku Suécia mu yimwe ndeke yize te yakumbata yikwata, mumu ye wika yapwileko.

Mats: Twanyongene ngwetu, mulimo wetu wa mishionaliu muuhwa, chocho yitulila chinji. Alioze, yize ndotolo anyongene kuyakalingiwile, mumu Ann-Catrin yahinduka. Ha kupalika cha mwaka umuwika, yitufuna nawa mu Zaire. Alioze ha chisuho chino, yituya ni kukalakala ku Lumbumbashi mu chimwe chikungulwila chikehe cha limi lia Suaíli.

Ann-Catrin: Muze twapwile ku Lumbumbashi, yingupwa kafumba, alioze mwana yapalika. Chipwe ngwe kutwakanyongene kupwa ni mwana, nihindu yitunenganyana chinji ha yize yalingiwile. Alioze ha mashimbu jacho akalu, Yehova yatwaha chawana chize kutwakapwile nikushimbwila. Twapwile ni alongi anji a Mbimbiliya. Ha mwaka uzewene, unji wa akwa-kwambujola yiuliwezela chinji. Twapwile 35, alioze yitupwa 70, nawa unji wa waze apwile ni kwiza ku kukunguluka yiuliweza, kukatuka ha 40, ni kupwa 220. Twalihanyine chinji mu mulimo wa kwambujola, chocho yingutakama chinji ha chiwape chino cha Yehova. Ndo haliapwila, twakunyonga hali mwanetu ni kuhanjika hali iye. Tunashimbwila tangwa lize Yehova makauka yikola yino mu mbunge yetu.

Mats: Ha kupalika cha shimbu, Ann-Catrin yaputuka kuzeya chinji ku mujimba. Ni yami yanguwana ni musongo wa câncer ya colon, kashika natambile kupalika ku poko. Haliapwila nguli kanawa, Ann-Catrin neye kanalingi yize akuhasa mu mulimo wa Yehova.

Tunanyingika ngwetu, hi yetu wika ko tunapalika mu yipikalo. Ha 1994, muze atu alishihile chinji mu Ruanda, twayile ni kumeneka mandumbu mu yilombo ya uchinyino. Yetu twamwene ufulielo ni kunyongonona cho, ni chize apwile ni kuzumbula ngeji chipwe ngwe kapwile ha mashimbu jacho akalu. Chino chatulongesele ngwetu, Yehova kali ni tachi ja kukwasa tuvumbi twenyi, chipwe ngwe mapalika mu yipikalo yeswayo.—Samu 55:22.

Ann-Catrin: Kapinda mukwo yoze twapwile nenyi, kalingiwile muze twayile ni kukunjika mutango wa Unganda kuli Yehova ha 2007. Muze kukunguluka te hichahwa, mishionaliu 25 hamwe ni Mbelita, yitulinga ungeji wa kuya ku Nairóbi, Quênia. Muze te kanda tuchiheta ku fronteira ya Quênia, umwe kalela mukehe yapupa ku mashinyi jetu. Hazehene, mukwa-kwendesa hamwe ni mandumbu akwo atano yafwa. Ndumbu mukwo wa pwo, yafwa muze ahetele ku shipitali. Tunashimbwila shimbu lize mutukaliwana cheka ni masepa jetu.— Yombi 14:13-15.

Ha kupalika cha mashimbu, yingulivwa kanawa. Alioze, yami ni Mats hamwe ni mandumbu akwo, twapwile ni kutungumioka mumu lia yize yalingiwile. Yami kanji-kanji te nakutungumioka chinji ufuku, te nakulivwa ngwe nakwachika musongo wa ku mbunge, napwile ni kwivwa woma unji. Alioze kulemba, kutanga ni kupukuna ha yisoneko yize te nakuzanga chinji, changukwashile chinji. Yetu twatambwile nawa ukwaso wa mandotolo, haliapwila kutushi kusakalala nawa chinji. Twakulemba kuli Yehova hanga atakamise eswe waze anapalika mu kapinda ngwe yono.

Muze te nunahanjika ha chize nwakumbile yipikalo, nwambanga ngwenu Yehova kanumbachile ngwe chize atu akumbata monda. Yika chino chinalumbunuka?

Mats: Twambanga chino mumu lia chimwe chishima chize akuta mu Suaíli, chakwamba ngwo, “Tumebebwa kama mayai mabichi.” Chinalumbunuka ngwo, “katumbachile ngwe chize atu akumbata monda awisu hanga ahone kufwa.” Yehova neye che akutukwasa ni zango lieswe mu yiteli yize akutwaha. Twapwile ni yuma yeswe yize te twakufupa. Kwamba pundu, twapwile ni yuma kuhiana yize te twakufupa. Jila yimwe yize twakumwenamo zango ni ukwaso wa Yehova, yili mutapu uze Chizavu cha Tusongo akulihulumba ni yetu.

Ann-Catrin: Ngunazange kunulumbunwina chisuho chimwe chize twamwene zango lino. Tangwa limwe, tata yangusanyika ku telefone ni kungulweza ngwenyi, kali ku Suécia, alioze kali mu UTI. Mats te machiputuka kulivwa kanawa ku musongo uze apwile nawo wa malária, kashika te kutushi ni uhashi wa kulanda bilhete ya ndeke hanga tuye ku Suécia. Chocho, yitutesa kulanjisa mashinyi. Alioze, lunga ni pwo waze anyingikine kapinda yoze te tunapalika, yatusanyika ni kutulweza ngwo matufwetela bilhete ya ndeke. Umwe ndumbu wa pwo kashinakaji, neye yatusanyika ni kutwaha kamwe kamushete ka mbongo haze asonekene maliji wano, “Ukwaso kuli yoze maufupa.” Ha minutu yiheke wika, Yehova yatwaha ukwaso weswe uze te tunafupu.—Hepre. 13:6.

Yika nwalilongesa ha miaka 50 yize nwalinga mu mulimo wa shimbu lieswe?

Ann-Catrin: Nalilongesa ngwami, ‘tachi jetu jakwiza ku uhumikizo ni ufulielo.’ Muze twakufuliela muli Yehova, iye kakupwisa yipikalo yetu ngwe niyenyi. (Iza. 30:15; 2 Sango 20:15, 17) Mumu lia kulihana chinji mu mulimo wa Yehova, iye katwaha yuma yinji yize te kutuchi kuhasa kupwa nayo nyi te kutwakanjilile mu mulimo wa shimbu lieswe.

Mats: Chuma chilemu chize yami nalilongesa chili ngwo, mu yuma yeswe natamba kujikijila muli Yehova ni kumona chize iye akungukwasa. (Samu 37:5) Yehova mashimbu eswe kangukwasa ngwe chize alakenyene. Ndo haliapwila, mutuchinunga ni kumona ukwaso wa Yehova mu chiteli chetu chaha ku Mbetele ya Myanmar.

Tunazange hanga akweze waze anazange kulihana alingile Yehova mu mulimo wa shimbu lieswe, no amone utu wa zango uze Yehova akwete hali yetu. Tuli ni shindakenyo ngwetu, akweze jacho mamona zango liacho nyi mecha hanga Yehova aakwase kusoka miji kweswako maatumba.