Yesu “Yalilongesa Kwononoka”

Yesu mashimbu eswe kapwile ni kwononoka kuli Yehova. (Yoa. 8:29) Mba mumu liaka Mbimbiliya yakwamba ngwo: “Nihindu [iye] yalilongesa kwononoka ha lamba lize amwene.”?—Hepre. 5:8.

Muze apwile hano hashi, Yesu kapalikile mu yuma yize kuyatwamine mu malilu. Ngwe chilweza, yisemi jenyi waze amulelele te kakuzanga Yehova, alioze kapwile yihenge. (Luka 2:51) Iye kapwile ni kumumwesa lamba kuli mangana a yingeleja api ni kuli manguvulu. (Mateu 26:59; Marku 15:15) Chikwo nawa, iye ‘kalikehesele ni kwononoka ndo ku kufwa.’—Fwili. 2:8.

Kashika muze apwile hano hashi, Yesu kalilongesele kwononoka mu yimwe jila yaaha. Hachino, iye te mapwa Mwanangana ni Mwata wa asasendote mungunu yoze matuvwila keke. (Hepre. 4:15; 5:9) Hanyima lia kulilongesa kwononoka kupalikila mu lamba lize amwene, Yesu yapwa mutu mulemu chinji kuli Yehova. Nyi mutununga ni kwononoka mu yipikalo yeswayo mutupalika, ni yetu mutuhasa kupwa alemu chinji kuli Yehova, nawa iye matukalakalisa mu chiteli cheswacho matwaha.—Tia. 1:4.