Livashanenu ni Kawashi

Tutalenu chilweza chino: Chifwaha chize chakatuka mu chihela, mahasa kuchifunyisa mu chihela chacho, nyi ngwe ndotolo masa tachi hanga achikoke muze kanda kuchipalika mashimbu anji. Alioze, yikola muyihasa kununga nyi ngwe kachifunyishine mu chihela chacho ni kawashi. Chikwo nawa, nyi ngwe mukupalika mashimbu anji, chifwaha chacho muchihasa kuhenga hanji kuwezela kapinda.

Muze mutu akuhikuka, kakulinga yimwe ni kawashi-washi hanga afunyise chifwaha mu chihela chacho. Chizechene nawa, nyi ngwe umwe ndumbu matulemeka ku mbunge, twatamba kulinga yimwe ni kawashi-washi hanga tufunyise usepa wetu. Mumu liaka? Mumu nyi twapalikisa mashimbu anji, mutununga ni kwiva yikola ha kutokesa usepa wetu. Chikwo nawa, nyi kutwasele tachi hanga tulivashane, mutulitulikila toto mashimbu eswe, mutulivila uli ni kushiha usepa wetu. Yesu kambile ngwenyi, pwenu ni ‘kulivwashana kawashi-washi.’ (Mateu 5:25) Kashika, hanjika ni sepa lie ni kumulweza yikola yize unevu ku mbunge. Kulivwashana ni akwetu hi chashi ko. Mumu liaka? Tutalenu yikuma yaali.

Chitangu, hanji muhasa kulengulula kapinda wacho, mumu kuushi kuzanga kuhanjeka chinji ha kapinda we.b Nyi chenacho, kuushi ukawe. Yino ye yalingiwile kuli mandumbu aali a mapwo, Evotia ni Sentiki waze apwile ni kulivila uli unji. Chakusoloka ngwe kapinda wo kambachile mashimbu anji, mumu chipwe ngwe Paulu kapwile kusuku, ku Roma, nihindu iye kanyingikine lusango wo. Iye kaalwezele hanga apwe ni sambukila umwe ni mukwo. (Fwili. 4:2) Ayo kahashile kufunyisa usepa wo mumu lia kulikehesa, kulihanjikisa kanawa, ni kulikonekena ni mbunge yeswe.

Chamuchaali, hanji muhasa kunyonga ngwe, mukwenu mwe wahengesa, chikwo nawa mwe watamba kulianga kwamba ngwenyi, kahengesa ni kukwita ukonekeno. Twiwulukenu ngwetu, ndotolo yoze unazange kufunyisa chifwaha mu chihela chalita, keshi kuhula-hula hanga anyingike yuma yeswe yize mutu alinganga mba ahikuke. Kashika, muze muhanjika ni sepa lie, kanda ulihulikila ha kusolola yoze wahengesa. Shimbu uchilinge, nyonga ha chize wakulemesa usepa wenu ni kulihulikila ha yize muhasa kulinga hanga nululieke usepa wacho.

Nyi ngwe uli ni kapinda ni umwe ndumbu, hanjika nenyi haliapwila hanga nufunyise usepa wenu. “Kanda nwivwa uli ndo ku kutoka cha tangwa.” (Efwe. 4:26) Nyi ngwe walinga chimwe chuma hanga nuhwise kapinda, yena mukwasa kufunga ‘sambukila ni kulinunga’ umwe ni mukwo.—Efwe. 4:1-3.