YIHULA YA WAZE AKUTANGA MIKANDA YETU

Usendo uka waali Paulu apwile ni kuhanjika ha A-Ngalashia 4:24?

Hanyima lia kuhanjika ha usendo uze Apalahama, apwile nawo ni Sara ni Hekare, postolo Paulu yamba ngwenyi: “Yuma yino yili ni ulumbunwiso ukwo; mumu mapwo wano kanalumbunuka usendo waali.” (Ngala. 4:22-24) Ku mashimbu a kunyima, twapwile ni kwamba ngwetu, usendo uno waali umwe wapwile usendo waha, ukwo usendo wa Shimbi. Alioze, hanyima lia kuhengwola kanawa twamona ngwetu, versu yino yili ni ulumbunwiso weka. Chinasoloka ngwe Paulu te kaso kuhanjika ha usendo waha, alioze te kanahanjika ha usendo wa Apalahama. Tutalenu mumu liaka tunambe chocho.a

Paulu katesele Hekare, yoze wapwile ngamba, ni Mulundu wa Sinai. (Ngala. 4:25) Hekare kanalumbunuka usendo wa Shimbi uze ahanyine ha Mulundu wa Sinai ha 1513 K.M.J. (Kutuhu. 19:5, 6) Te kukushi niumwe mutu chihenge yoze mahasa kwononokena shimbi yino ni ungunu weswe. Chino te chakwiwulula A-Yunda ngwo ayo kali ndungo ja shili. Usendo wacho nawa te muukwasa vungu lia A-Izalele kunyingika Mesaya muze te meza, mumu iye wika mwe te mahasa kumanununa Shimbi ni ungunu weswe. Muze Mesaya ahanyine mwono wenyi ungunu ngwe chitapo, iye yapwisa chashi hanga atu yihenge aakuule ku shili ni kufwa (Ngala. 3:19, 24, 25) Amu Mesaya amanunwine upale wa Zambi, Shimbi yiyecha kupwa ni ulemu.—Roma 10:4.

Paulu kambile nawa ngwenyi, kulisa ni Hekare Sara kapwile “pwo yoze te hi ndungo ko,” yoze ‘wasemene kupalikila mu chimwe chilakenyo.’ (Ngala. 4:23) Chilakenyo chacho, usendo wa Apalahama. (Ngala. 3:29; 4:28, 30) Usendo wacho uli ha Uputukilo 22:18 unambe ngwo: “Kupalikila muli munyachi we, [Apalahama] mavungu eswe a hashi kumakaawahisa, mumu hiwononokena liji liami.”

Ha usendo uno, hihalichinga nawa chilakenyo chize Yehova alingile mu munda wa Endene. (Uputu. 3:15) Zambi yasolola ngwenyi, “munyachi” anatongola hano te mapwa wa ku munyachi wa Apalahama. Hanyima Paulu yalumbununa ngwenyi, “munyachi” chitangu kanalumbunuka Yesu Kristu. Mba yamba nawa ngwenyi, waze ali hamwe ni Kristu, e 144,000 swana waze makayula ni Yesu mu Wanagana wenyi, newo kali muchima lia munyachi uno. (Ngala. 3:16, 29; Uso. 14:1-3) Umanunuko wa chilakenyo chize Zambi alingile kuli Apalahama, muukaneha yiwape yinji kuli eswe waze matayiza Yesu ni kumwononokena.

Yika Paulu azangile kulongesa muze ahanjikile “chijimbikilo” chino? Iye kambile ngwenyi, nyi te A-Yunda malikwachilila ha kukaula usendo wa Shimbi, chizechene ngwe Hekare, ayo te manunga mu undungo. Alioze nyi te matayiza “munyachi” wa Apalahama, Yesu Kristu, ayo te matusuka chizechene ngwe Sara. Chikwo nawa, ayo te mapwa ni utuswilo wamwenemwene hakutwala ku shili ni kufwa. (Yoa. 8:32-34) Alioze nyi te malituna Yesu, ayo te matokesa upale wa usendo wa Shimbi uze te muwatwala kuli Kristu.

A-Ngalashia anji waze Paulu apwile ni kusonekena te hi A-Yunda ko. Chikwo nawa, te katwamine mwishi lia Shimbi. A-Yunda amwe mu yikungulwila kapwile ni kushinjila mandumbu akwo waze te hi A-Yunda ko hanga ononokene Shimbi ni kwapwisa ngalami. Chocho Paulu yalumbununa ngwenyi, te muchipwa uhepuke ayo kununga mu “undungo” wa Shimbi mumu ayo te hanatambula kulu “utuswilo” kukatuka kuli Kristu.—Ngala. 5:1, 10-14.