Manda Waze Atu Apwile ni Kuta no Yishi ku Sekulu Yitangu

Amwe a kuli tumbaji twa Yesu, kapwile ni kulinga mungoso wa kuta yishi. (Marku 1:16-20) Kapwile kuta yishi mu Kalunga-Lwiji wa Ngalileya ni manda jo.

Wanda wa kuta nawo yishi, kapwile ni kuulinga ni miya yikolo kanji-kanji ya linyu. Te kakuyikasakasa muyipwa ni yimwe yituwa ngwe chize wapwa wanda wa chandawili. Yituwa ya wanda te kakuyilinga kulita ni mutapu wa yishi anazange kukwata. Manda akehe-akehe, kanji-kanji kapwile ajinguluka. Chikwo nawa, te kakushimbama hanga yishi afwilemo. Manda anene-anene, te kakwakoka hanga akwate nawo yishi. Chihanda chimwe te chakushimbama, alioze chikwo te chakututuka helu.

Manda a kuta no yishi kapwile ni ndando yinji. Chipwe chocho, te mahasa kupihia mumu lia kusakaminya ku mawe, hanji mumu lia kuzala ni yishi. (Luka 5:6) Mbimbiliya yakuhanjika ha limwe shimbu muze Tiangu ni Yoano te ‘analulieka manda jo.’ Kota kaaluliekele ni ndongo ni wanda wa linyu. (Mateu 4:21) Akwa-kuta yishi, kota te kakululieka manda jo muze te akuhwisa kuta. Luka neye kasonekene umwe lusango haze atongwele akwa-kuta yishi waze te ‘anakoso manda jo’ hanga achizeko malowa ni yiswaswa. (Luka 5:2) Hanyima, ayo kapwile ni kwanyika manda jo hanga achine kupola.—Eze. 47:10.

Yesu kasanyikine akwa-kuta yishi, yaalweza eche mungoso wo hanga apwe ‘akwa-kuta atu.’