Yika Mutuhasa Kulinga Hanga Tununge ni Kushishika Kuli Yehova Muze Mutupalika mu Yipikalo?

1-2. Muze Yesu te analongesa ku Kafwanaume, yika yalingiwileko?

TANGWA limwe, Yesu te kanalongesa chimwe chizavu cha atu mu Kafwanaume. Iye yamba ngwenyi: “Nyi kunwalile musunya wa Mwana-mutu ni kunwa manyinga jenyi, kunuchi kupwa ni mwono.” Iye yamba nawa ngwenyi: “Yoze wakulia musunya wami ni kunwa manyinga jami, kali ni mwono wa mutolo, yami mungukamuhindwisa ha tangwa lia kasula.” (Yoa. 6:53, 54) Anji a kuli tumbaji a Yesu kakazangile yize iye ambile, ayo yamba ngwo: “Maliji wano kali akalu chinji, iya mahasa kwapanjika?”—Yoa. 6:60.

² Mumu lia chino, tumbaji anji yecha kukaula Yesu. Shina kachilingile mumu kakapwile ni kufuliela muli Yesu? Kwamba pundu, ku uputukilo amwe kapwile ni kukomoka yuma yize Yesu apwile ni kulinga. Chocho yamba ngwo: “Chochene, Profeta yoze ambile ngwo makeza hashi mwenau.” (Yoa. 6:14) Yino yinasolola ngwo, tumbaji jacho kapwile ni yimwe ndambu ya ufulielo muli Yesu. Alioze muze ufulielo wo awesekele, ayo kechele kushishika kuli Yesu.

3. Yika apostolo alingile, mumu liaka? (Tala nawa chizulie.)

³ Apostolo kanungine ni kushishika kuli Yesu. Muze Yesu aahulile nyi te no mamuhichika, Petulu yakumbulula ngwenyi: “Mwene, kuli iya mutuya? Yenu nuli ni maliji a mwono wa mutolo. Yetu hitunafuliela, tunanyingika ngwetu, yenu nuli Musandu wa Zambi.” (Yoa. 6:68, 69) Muze Petulu ambile maliji wano, kuchakalumbunukine ngwo iye ni apostolo akwo te kananyingika ulumbunwiso wa maliji waze Yesu ambile ngwenyi, katamba kulia mujimba wenyi ni kunwa manyinga jenyi. Chipwe ngwe kapwile ni ulumbunwiso weswawo, nihindu ayo yasakula kupwa sali lia Yesu. Mumu liaka? Mumu ayo kapwile ni shindakenyo ngwo, Yesu kali “Kristu wa Zambi.”—Luka 9:20, 35.

4. Yuma yika muyihasa kweseka ushishiko wetu kuli Yehova?

⁴ Kuli yuma yinji yize muyihasa kweseka ushishiko wetu kuli Yehova. Ngwe chilweza, yuma yimwe muyihasa kupwa muze ululikiso wetu wakwalumuna ulumbunwiso wa chimwe chisoneko, hanji muze akwalumuna mutapu wa chize twakwambujola sango jipema. Chuma chikwo muchihasa kupwa muze mutupalika mu umwe luyinda. Mumu lia chino, mutuhasa kulihula ngwetu, mumu liaka Yehova echa hanga tumone lamba? Ufulielo wetu muuhasa nawa kupwa mu cheseko, nyi ngwe sepa lietu yoze twazanga chinji matulemeka ku mbunge hanji ndumbu yoze twakulemesa chinji matulinga yuma yipi.

5. Mumu liaka twatamba kukolesa ufulielo wetu? Hana chilweza. (A-Kolosu 1:23)

⁵ Mba tunyingike ulemu wa kupwa ni ufulielo ukolo, tutalenu chilweza chino. Zuwo lize akutungila ku yihela kuze kwakulingiwa minyiko yinji, liatamba kupwa ni fundamentu yikolo mba lihone kupuzuka. Chizechene nawa, ni yetu twatamba kupwa ni ufulielo ukolo mba tununge ni kushishika kuli Yehova, chipwe ngwe mutupalika mu kapinda ngwe yoze twatongola helu. Kashika, twatamba kukolesa ufulielo wetu muli Yehova hanga tununge ni kumulingila, chipwe ngwe mutupalika mu kapinda mweswawo.—1 Kori. 15:58; tanga A-Kolosu 1:23.

6. Yika yakwashile apostolo kununga ni kushishika kuli Yesu?

⁶ Yika yakwashile apostolo kununga ni kushishika kuli Yesu, chipwe muze tumbaji anji amuhichikile? Apostolo kapwile ni shindakenyo ngwo, katamba kuwayila Yehova mumu iye mwe watangile yuma yeswe, Yesu kali Mwana wa Zambi, chikwo nawa ngwo, nyi te mononokena Yesu, mapwa ni “mwono wa mutolo.” Kanyingikine nawa ngwo, Yehova te kakuwahilila ni yeswe yize Yesu apwile ni kulinga. Haliapwila tutalenu umwenemwene utatu uze muutukwasa kushishika kuli Yehova mu majila eka ni eka. (1) Yehova kali Sakatanga wa yuma yeswe. (2) Yehova mwe watumine kusoneka Mbimbiliya. (3) Yehova kakukwasa ululikiso wenyi musono. Nyi twapwa ni shindakenyo ha umwenemwene uno utatu, mutununga ni kushishika kuli Yehova, chipwe ngwe mukusoloka yuma yize muyeseka ufulielo wetu.

YEHOVA KALI SAKATANGA

7. Yika mukanda wa Usolwelo 4:11 wakwamba hakutwala kuli Yehova, kuchi kunyingika chino muchitukwasa muze mutupalika mu yipikalo?

⁷ Tanga Usolwelo 4:11. Versu yino yakulumbununa ngwo, Yehova mwe watangile yuma yeswe. Yakutukwasa nawa kumona ulemu wa mumu liaka twatamba kuwayila Yehova. Muze twakupukuna ha ndundo jenyi, chino chakutukwasa kupwa ni shindakenyo ngwo, iye matukwasa mu kapinda mweswe mutupalika. Satana hanazalisa hashi ni mahuza hanga atu anyonge ngwo, Zambi katwamineko. Akwa-mana amwe kakwamba ngwo, kukwatwamine Sakatanga yoze watangile mwono. Kashika chili chilemu kupwa ni shindakenyo ngwetu, Yehova mwe Sakatanga chikwo nawa kakutuzanga. Nyi twachilinga, chipwe ngwe mutupalika mu yipikalo, mutupwa ni shindakenyo ngwetu iye kwatwama, chikwo nawa kanazange kutukwasa.—Hepre. 11:6.

8-9. Yika muhasa kulinga nyi muputuka kukakajana ngwo Yehova kali Sakatanga? (Tala nawa chizulie.)

⁸ Nyi ngwe unakakajana nyi Yehova kali lume Sakatanga nyi ka, linga chimwe ni kawashi-washi. Tanga ha mikanda yetu yikuma yinasolola ngwo, Yehova kali Sakatanga wa yuma yeswe. Yena muhasa kuwana sango jinji jize mujikolesa ufulielo we hakutwala ku chikuma chino, ha kamukanda A Vida—Teve um Criador? ni kamukanda A origem da vida—Cinco perguntas que merecem resposta. Sango jikwo jili ha yikuma, “Shina Umwe Wayitangile?” ha jw.org. Umwe ndumbu wa ku Estados Unidos avuluka ngwo Jessica, yamba ngwenyi: “Hanyima lia kutanga kamukanda Origem da vida, yingupwa ni shindakenyo ngwami, kwatwama Sakatanga. Yami te hingunanyingika kulu chikuma chino, alioze muze natangile cheka kamukanda kano, yingwecha kukakajana.” Atu anji kakuyuka muze akutanga mukanda Existe um Criador Que Se Importa com Você? Hanji hiunatange mukanda uno, shina muchilita kuutanga cheka?

⁹ Ngwe chilweza, muhasa kusa mashimbu hanga ulilongese chikuma cha mumu liaka watamba kutayiza ngwo, Zambi kwatwama. Sango jize muwana kujichi kukukwasa wika kukolesa ufulielo we ngwo Yehova kwatwama, alioze mujikukwasa nawa kumunyingika kanawa. (Roma 1:20) Chikwo nawa, yuma yize mulilongesa muyikukwasa hanga ukwase akwenu waze keshi kutayiza ngwo Zambi kwatwama. Chikuma chilemu chili ngwo, yuma yeswe yize Yehova atangile, yakusolola ngwo iye kwatwama.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

YEHOVA MWE WATUMINE KUSONEKA MBIMBILIYA

10. Mumu liaka Mbimbiliya yili yilemu chinji kuli yetu? (2 Timoteu 3:16, 17)

¹⁰ Tanga 2 Timoteu 3:16, 17. Mu Mbimbiliya, muli sango ja Yehova jize ahanyine kuli atu eswe. Mbimbiliya yakukumbulula yihula yilemu ya ku mwono, yakutulweza upale wa Zambi ni yize Yehova akuzanga hanga tulinge. Yetu twakutayiza ngwetu, Yehova mwe mwenya Mbimbiliya. Yino yakupwisa Mbimbiliya mukanda walisa ni mikanda yikwo, chikwo nawa yili yilemu chinji ku mwono wetu. Kashika, tunazange kusa tachi hanga tunyingike ulumbunwiso wa yize mututanga ni kulinga yeswe yize mutuhasa hanga tukaule yize mutulilongesamo.

11. Mumu liaka tuli ni shindakenyo ngwetu, Zambi mwe watumine kusoneka Mbimbiliya?

¹¹ Mumu liaka tuli ni shindakenyo ngwetu, Yehova mwe watumine kusoneka Mbimbiliya? Mumu lia yikuma yinji. Ngwe chilweza, yize Mbimbiliya yakwamba hakutwala ku yuma yize yalingiwile kunyima, yili yamwenemwene. (Luka 3:1, 2) Chikwo nawa, yakusolola umwenemwene muze yakuhanjika hakutwala ku yitangiwa. (Yombi 26:7) Mbimbiliya yili nawa mukanda walipwila. Chipwe ngwe Satana kasele tachi jinji hanga ayinongese, nihindu kuli Mbimbiliya jinji mu malimi anji kuhiana mikanda yeswe ya atu. Mbimbiliya kayisonekene kuli malunga 40 alisa ha miaka 1,600, chipwe chocho, sango jamo jalita. Chipwe ngwe sango jacho kajisonekene ha mashimbu anji kunyima, nihindu yiyulo yamo yakukwasa atu anji musono. (Yishi. 13:20; 15:21; Mateu 7:12) Chikwo nawa, uprofeto unji wa mu Mbimbiliya hiunamanunuka. Chino chili chikuma chikwo cha mumu liaka twatamba kujikijila Mbimbiliya. (Yoshu. 23:14) Pundu lume, tuli ni shindakenyo ngwetu, Zambi mwe watumine kusoneka Mbimbiliya.

12. Yika mutuhasa kulinga nyi twaputuka kukakajana ngwo Mbimbiliya hi ya Zambi ko?

¹² Yika mutuhasa kulinga nyi ngwe mutuputuka kukakajana ngwetu Mbimbiliya hi ya Zambi ko? Nyi chenacho, twatamba kulemba kuli Yehova, kumulweza chize tunalivu ni kumwita ukwaso. Hanyima, twatamba kuhengwola hakutwala ku chikuma chacho. Jordan, yoze alelele kuli yisemi jenyi waze ali Yela ja Yehova, yamba ngwenyi: “Yami chishi kutayiza yeswe yize yisemi jami hanji atu akwo akungulweza. Nakufupa kupwa ni shindakenyo wa yize ayo akwamba. Ha mashimbu akwo, nakukakajana ha yize nakutanga hanji kwiva. Muze yino yakulingiwa, nakufupa makumbululo alita mu mikanda yetu.” Nyi twapwa ni shindakenyo ngwetu Yehova mwe watumine kusoneka Mbimbiliya, chino muchitukwasa kukolesa ufulielo wetu.—1 Kori. 3:12, 13.

YEHOVA KAKUKWASA ULULIKISO WENYI

13. Yika twatamba kulinga nyi twaputuka kukakajana hakutwala ku ululikiso uze Zambi akutayiza musono?

¹³ Nyi twaputuka kukakajana, nyi ngwe ululikiso wa Yela ja Yehova uli ni utayizo wa Zambi nyi ka, twatamba kulinga yimwe kawashi-washi. Ngwe chilweza, mutuhasa kunyonga ha yihula yino: ‘Aya akusa tachi ambate mwono wo kulita ni yize Mbimbiliya yakwamba? Ululikiso uka wakulongesa atu yize Mbimbiliya yakwamba? (2 Timo. 4:3, 4) Aya analingi upale wa Yehova musono?’—Mateu 7:20, 21.

14. Kuchi Yela ja Yehova akumanununa maliji waze ali ha Mateu 24:14?

¹⁴ Zambi kanazange hanga atu eswe eve sango jipema, shimbu kanda achineha songo lia chifuchi chino chipi. Kashika mutuhasa kulihula ngwetu: Aya waze anambujola sango jipema hashi heswe musono? (Mateu 24:14) Kumbululo lili zwalala. Ululikiso wa Yela ja Yehova, we Zambi anasongwela hanga alinge mulimo uno. Yetu wika Yela ja Yehova e tunambujola sango ja Wanangana wa Zambi hashi heswe, mu yifuchi kuhiana 240. Chikwo nawa, yetu twakulinga mulimo uno ha miaka kuhiana 100. Ewa, kuli Yela ja Yehova mulimo wa kwambujola, uli mulimo ulemu chinji uze ayo akulinga hashi heswe.—Mateu 28:19, 20.

15. Kuchi Yela ja Yehova akufumanyisa jina lia Zambi musono? (Mateu 6:9; Izaia 43:10)

¹⁵ Tanga Mateu 6:9 ni Izaia 43:10. Yetu kanatunyingika ngwo, tuli Yela ja Yehova. Chili kuyuka chinene kutuvuluka ha jina lia Zambi. Atu anji musono, kanyingikine ngwo jina lia Zambi, Yehova. Alioze, yetu twakukalakala chinji hanga tufambwise Mbimbiliya yize yili ni jina lia Zambi, ngwe chize liapwile ni kusoloka ha yisoneko yitangu. Chikwo nawa, jina lia Zambi twakuliwana ha yisuho kuhiana 7,000 mu Mbimbiliya ya Yisoneko ya Chifuchi Chaha.

16. Mumu liaka mutuhasa kwamba ngwetu, Yela ja Yehova kakwononokena maliji ali ha Yoano 13:34, 35? (Tala nawa chizulie.)

¹⁶ Tanga Yoano 13:34, 35. Musono, atu anji keshi kulivashana ni akwo, chikwo nawa kakulivila kole. Alioze, yetu Yela ja Yehova twalisa no, twakulizanga umwe ni mukwo nawa twalinunga. Yela ja Yehova kali a ku yifuchi yalisa, nawa kakwete mwono walisa, chipwe chocho kakusa tachi hanga apwe ni sambukila mukachi ko ni kulisolweza zango. Hanji hiunameneka chikungulwila cha Yela ja Yehova ku chihela cheka. Nyi che walingile, kota wamwene chize mandumbu je a malunga ni a mapwo akulisolwela zango ni kulinunga. Yino yakusolola zwalala ngwo, Yehova kanasongwela Yela jenyi hanga amanunune upale wenyi musono. Kunyingika chino, muchitukwasa kununga ni kushishika kuli Yehova, chipwe ngwe mutupalika mu cheseko cheswacho ku ufulielo.

KANDA WIZA KECHA YEHOVA NILIMWE TANGWA

17-18. Yipikalo yika mutuhasa kupwa nayo ha matangwa wano akusula, alioze yika mutuhasa kwamba ni shindakenyo yeswe?

¹⁷ Twatwama ha matangwa akalu chinji. Ha kusula cha chifuchi chino, mutupalika mu yipikalo yinji. (2 Timo. 3:1, 13) Ha mashimbu amwe, mutuhasa kulitakana ni yipikalo yize kutuchi kumona chize mutuyihwisa. Ha mashimbu akwo, muchihasa kupwa chikalu kunyingika ulumbunwiso wa yuma yimwe yize yalumuka mu ululikiso, hanji nawa muchihasa kupwa chikalu kwononokena usongwelo waha. Ha yisuho yikwo, mandumbu jetu a mapwo ni a malunga mahasa kwamba yimwe yize muyitulemeka ku mbunge, mba mutuputuka kunyonga ngwetu, ayo keshi kulemesa manyonga jetu. Ha yikuma ngwe yino, hanji kutuchi kuhasa kuhwisa kapinda wetu, chipwe kunyingika mumu liaka yuma yimwe yinalingiwa.

¹⁸ Chipwe ngwe mutunenganyana hanji kusakalala mumu lia yuma yize muyilingiwa kuli yetu, nihindu twatamba kununga ni kushishika kuli Yehova mashimbu eswe. Mumu liaka? Mumu tunanyingika ngwetu Yehova kali Sakatanga, iye watumine kusoneka Mbimbiliya, chikwo nawa Yela ja Yehova kali ni utayizo wenyi. Ngwe chize Petulu alwezele Yesu, ni yetu mutuhasa kwamba ngwetu: “Mwene, kuli iya mutuya? Yenu nuli ni maliji a mwono wa mutolo.”