11-17 MAIO, 2026
MWASO 7 Yehova Iye Tachi Jetu
Fuliela Muli Yehova Chitunda wa mu Malilu ni Hashi
“Yena wika uli ni jina lia Yehova, uli mwe Chitunda helu lia hashi heswe.”—SAMU 83:18.
YIZE MUTULILONGESA
Mutumona chize mutuhasa kukolesa ujikijilo wetu ngwo, Yehova kali Chitunda wa mu malilu ni hashi, ni kupwa ni shindakenyo ngwetu, matukwasa kukumba yeseko yeswe yize mutupalika haliapwila ni kulutwe lia matangwa.
1. Yuma yika yipi apalikile Yombi?
YOMBI, umwe lunga washishika wa ku shakulu, katokesele yuma yeswe yize apwile nayo: Ana jenyi ni upite wenyi weswe. Kusulaho, iye yakwachika umwe musongo upi. Chikwo nawa, mumu lia yuma yipi yize yalingiwile kuli iye, atu waze apwile ni kumuvumbika, yecha kumuvumbika. Malunga atatu waze apwile ni kuliamba ngwo kali masepa jenyi, kayile ni kumumeneka, alioze kambile yuma yize yatwalile Yombi kulivwa chipi. Mukwo-pwo neye kapwile ni kwivwa chinyengo chinji, chocho yamulweza ngwenyi: “Tuka Zambi ufwe.” (Yombi 2:9; 15:4, 5; 19:1-3) Yuma yino yeswe, kachi yatwalile Yombi eche kujikijila Zambi wamwenemwene hanji kumutwala hanga ayambashane nyi chamwenemwene Yehova kakufunga tuvumbi twenyi waze akumuzanga ni kumuwayila nyi ka.
2-3. Nyi tunapalika mu lamba yika mutuhasa kunyonga, nawa yika mutulilongesa ha chilweza cha Yombi?
2 Ha mashimbu wano, tunapalika mu yipikalo yinji yize muyihasa kweseka ujikijilo wetu muli Yehova. Tuli ha “mashimbu akalu chinji.” (2 Timo. 3:1) Muze twakupalika mu yipikalo yeka ni yeka, mutuhasa kunenganyana ni kunyonga ngwetu, kutuchi kuhasa kunyongonona. Mumu lia yipikalo, amwe mahasa kunyonga ngwo Yehova keshi kwazanga hanji ngwo, kazangile kwakwasa.
3 Nyi ngwe ha mashimbu amwe che wakunyonga, kanda uhonga. Yombi kalilongesele ngwenyi, Yehova kakulamwina atu waze akushishika kuli iye. Ni yetu mutuhasa kujikijila muli Tata yetu wa mu malilu, ngwe chize Yombi alingile. Haliapwila tutalenu yikuma yaali: Chitangu, chize mukanda wa Yombi muutukwasa kujikijila muli Yehova, Chitunda wa mu malilu ni hashi. Chamuchiali, mutumona ngwetu, Yehova kali ni ndundo ja kumanununa yeswe yize akwamba. Chikwo nawa, iye kakutufunga ha kutwaha yeswe yize tunafupu hanga tununge ni kupwa ni usepa upema ni iye.
SATANA YEZA HAKACHI KO
4. Yika yalingiwileko, muze Yehova ni angelo mu malilu alikungulwile hamuwika?
4 Tangwa limwe, ana ja Zambi wamwenemwene, yalikungulula kumeso ja Yehova mu malilu. Mbimbiliya yakwamba ngwo: “Satana neye yeza hakachi ko.” (Yombi 1:6) Chino chili chisuho chitangu chize tunawane liji “Satana” mu Mbimbiliya. Mbimbiliya yakumuvuluka chocho, mumu iye kalimikine ni Yehova. Ha shimbu liacho, Satana te hecha kupwa mwana washishika wa Zambi. Iye te halipwisa mukwa-kole wa Yehova, ni wa yitangiwa yeswe ya mu malilu ni ya hano hashi. Yehova kasolwele ngwenyi, Satana kechele kulinga chihanda mu usoko wenyi wa mu malilu, muze ambile maliji waze tunawane ha mukanda wa Uputukilo 3:15. Kashika, Satana keshi kulinga nawa chihanda cha “pwo” yoze makasema “munyachi,” hanji ngwetu usoko wa Yehova wa yitangiwa ya mu malilu.
5. Yika twalilongesa ha yize Satana ambile ni chize Yehova amukumbulwile?
5 Yehova kazangile hanga tunyingike yize yalingiwile ha kukunguluka chacho mu malilu. Kashika atumine hanga asoneke lusango wacho mu Mbimbiliya. Yize Satana ambile yinasolola ngwo, iye kali mupi, chikwo nawa kakuhanjika mahuza. (Yombi 1:9; tesa ni Usolwelo 12:10.) Kukunguluka chacho, chinatulongesa nawa ngwo, mashimbu eswe Yehova akukalakalisa ndundo jenyi jize kujishi musulo, iye kakulinga yuma yalita, chino chakututakamisa. Chikwo nawa, twalilongesa ngwetu, Mukwa-Ndundo-Jeswe, mwe uli ni ulite wa kutesa yize atu atamba kulinga ni yize katambile kulinga.
YEHOVA MWE ULI NI ULITE WA KUTESA YIZE TWATAMBA KULINGA NI YIZE KUTWATAMBILE KULINGA
6. Kuchi Yehova asolwele ndundo ha kukunguluka chize chapwile mu malilu? (Yombi 1:7, 8)
6 Tanga Yombi 1:7, 8. Yehova mwe wapwile ni kusongwela kukunguluka chacho. Iye kahulile Satana ngwenyi: “Hiwahengwola kavumbi kami Yombi?” Yehova kanyingikine ngwenyi, Satana te kanazange kumwesa lamba Yombi. Haliapwila, tutalenu chize Yehova akalakalishile ndundo jenyi hanga akwase Yombi.
7. Kulita ni mukanda wa Yombi 1:10, 11, yika Satana ambile hakutwala kuli atu waze akuwayila Yehova?
7 Tanga Yombi 1:10, 11. Yehova kali Mukwa-Ndundo-Jeswe wa mu malilu ni hashi, yoze wakukalakalisa ndundo jenyi mu jila yalita. (Jere. 32:17; Danie. 4:35) Chipwe chocho, Satana kalamikijine Yehova ngwo, iye kakukalakalisa ndundo jenyi mu jila yize kuyalitele. Satana kambile ngwenyi, Zambi kakuhana yuma yipema kuli atu hanga amuwayile ngwe chize alingile kuli Yombi. Satana kambile nawa ngwenyi, atu waze akuwayila Yehova, kakumuwayila wika mumu lia yuma yipema yize akutambula kuli iye. Yika Yehova alingile ha chikuma chacho?
8-9. Yika Yehova atayijile Satana kulinga, nawa yika kakamutayijile kulinga?
8 Tanga Yombi 1:12. Yehova katayijile hanga Satana eseke Yombi hanga amone, nyi chamwenemwene Yombi keshi kuzanga Yehova. Alioze, Yehova kakamutayijile kulinga yeswayo mazanga. Zambi kalwezele Satana ngwenyi: “Mwene kanda umusunga.” Angelo eswe apwile ha kukunguluka chacho, kevwile shimbi yize Yehova ahanyine kuli Satana. Satana te katamba kwononokena shimbi yize amuhele. Chikwo nawa, iye kakapwile ni ndundo ja kulinga yuma yinji hali Yombi, kuhiana yize Yehova amutayijile kulinga. Chipwe musono, Satana kakulinga wika yize Yehova akumutayiza kulinga. Kashika Yehova afungile Yombi ni kumukwasa hanga amone ngwo, iye kali mukwa-ululi nawa Zambi ya zango.
9 Muze Satana esekele Yombi, yuma kuyakendele ngwe chize iye azangile. Yombi kanungine ni kushishika kuli Tato wa mu malilu. (Yombi 1:22) Chipwe chocho, Satana te kanazange kununga ni kweseka Yombi hanga eche kuwayila Yehova.
Muze Satana ambile mahuza hakutwala kuli Yehova ni atu, angelo no kapwileho (Tala paragrafu 8-9)
10. Mumu liaka Yehova atayijile hanga Satana eseke cheka Yombi? (Yombi 2:2-6)
10 Tanga Yombi 2:2-6. Ha chisuho chino, Satana yawezela yeseko yenyi, hanga Yombi eche kuwayila Yehova. Satana kazangile kweseka Yombi, mumu kanyongene ngwenyi, nyi Yombi mamona ngwenyi kanambe kufwa, mavwila kole Yehova ni kwecha kumuwayila. Mba Yehova asolole ngwo Satana kali mukwa mahuza, yamutayiza hanga eseke Yombi ni umwe musongo upi. Cheka nawa, Yehova yamusela shimbi ha kwamba ngwenyi: “Alioze kanda uchiza mwono wenyi.” Satana kakapwile ni ndundo ja kushiha Yombi, mumu Yehova kakamutayijile kuchilinga. Cheka nawa, twahasa kumona ngwo, Yehova kali Mukwa-Ndundo-Jeswe, mumu Satana kakahashile kulinga yuma kuli Yombi kuhiana yize Yehova amutayijile.
YEHOVA YAHWISA LAMBA LIA YOMBI
11. Kulita ni Yombi 42:10-13, kuchi Yehova awahishile Yombi hanyima lia kuhwisa lamba lienyi?
11 Tanga Yombi 42:10-13. Mu yeseko yeswe yize Yombi apalikile, iye kanungine ni kushishika kuli Yehova. Kashika Yehova akanjishile Satana kweseka cheka Yombi. Chocho, Yehova yahwisa lamba lia Yombi. Cheka nawa, Satana kakapwile ni ndundo ja kukinda Yehova kufunga ni kuwahisa Yombi.
12. Hana chilweza chinasolola chize Yehova akwashile tuvumbi twenyi waze anakajikijila muli iye?
12 Ha matangwa wano akusula, atu anji kakumona chize Yehova akukalakalisa ndundo jenyi hanga aakwase. Ngwe chilweza, ha 1945, maswalale a Nazista kashinjilile mandumbu jetu 230, hanga ende hashi mu umwe wenyi usuku chinji, kukatuka ku zuwo lia ususu ndo ku kalunga-lwiji ni nyonga lia kwashiha. Alioze, eswe kanakalilamwina. Hanyima lia kupalika mu yuma yino yeswe yikalu, ayo yasoneka maliji wano: “Hanyima lia kupalika mu yeseko yino yikalu chinji, waze asalile ni mwono, kapwile ngwe kaachiza mu lutengo wa kahia, keshi chipwe ni vumba lia mwishi. Chikwo nawa, kali ni tachi ni ndundo ja kuli Yehova.” Yamba nawa ngwo: “Hanyima lia kutuhuka mu wina wa ndumba, tunazange chuma chimuwika wika, atutayize kuwayile Yehova ku miaka ya mutolo. Chino, che kwononona chetu.”—Tesa ni Daniele 3:27; 6:22.
13. Shindakenyo yika twatamba kupwa nayo muze tunapalika mu yipikalo? (Tala nawa yizulie.)
13 Ni yetu mutuhasa kupalika mu yuma yikalu, ni kulivwa ngwe tuli mu wina wa ndumba. (1 Petu. 5:8-10) Ha mashimbu amwe, twakuhonga chinji ni kunyonga ngwo, yipikalo yetu kuyichi keza kahwa nilimwe tangwa. Ha mashimbu jacho, kwiwuluka yize yalingiwile kuli Yombi, muchihasa kutukwasa. Mutuhasa kujikijila ha ndundo ja Yehova ngwo iye mahasa kuhwisa lamba lietu, chipwe ngwe machilinga ha mashimbu wano, hanji mu chifuchi chaha. Iye makanongesa chifuchi chino chipi, ha shimbu lize atesele.
Yehova makawahisa tuvumbi twenyi ashishika ngwe chizechene alingile kuli Yombi (Tala paragrafu 13)
YEHOVA KAKUZANGA TUVUMBI TWENYI ASHISHIKA
14-15. Yika Yehova anazange kulingila tuvumbi twenyi ashishika, nawa mumu liaka? (Yombi 14:15) (Tala nawa chizulie ha chifukilo.)
14 Tanga Yombi 14:15. Tata yetu wa mu malilu, kakushishika kuli waze akushishika kuli iye. Iye kakwazanga chinji. Muze ayo akufwa, iye kakwavwila usona. Kashika anazange kwahindwisa. Muze makahindwisa tuvumbi twenyi ashishika mu chifuchi chaha, yetu eswe mutukawahilila.—Iza. 65:17.
15 Chipwe muze lamba lia Yombi liahwile, nihindu iye kanungine ni kutwama mu chifuchi chino cha Satana. Alioze, Mbimbiliya yakutulweza ngwo, Yehova kawahishile Yombi mu yimwe jila yalipwila. Iye kawahishile Yombi, ha kumwaha yuma yinji yipema kuhiana yize apwile nayo. Alioze mu chifuchi chaha, Yehova makalingila Yombi yuma yinji. Kwamba pundu, Yehova kanazange hanga tuvumbi twenyi eswe ashishika, awahilile ni kupwa ni mwono upema. Iye makawahisa tuvumbi twenyi eswe ni mwono wa mutolo mu paraisu hano hashi. (Uso. 21:3, 4) Amu Yehova ali Chitunda wa mu malilu ni hashi, kukushi niumwe yoze mahasa kumukinda kulinga yize anazange hali tuvumbi twenyi. Kunyonga ha chize Yehova makatuwahisa, chakututakamisa chinji, chipi-chipi muze tunapalika mu umwe kapinda.
Hanyima lia kupalika mu yipikalo yeka ni yeka, Yombi ni mukwo-pwo, kawahililile ni yiwape yize Yehova aahele (Tala paragrafu 14-15)
16. Mumu liaka twatamba kujikijila nawa muli Yehova ngwe Chitunda wa mu malilu ni hashi?
16 Hanyima lia kutwama miaka yinji, Yombi yafwa. Alioze, Yehova kali ni ndundo ja kumuhindwisa, mumu iye kali Mukwa-Ndundo-Jeswe nawa Chitunda wa mu malilu ni hashi. (Shimbi 32:39) Yehova hanasakula shimbu lize makahindwisa atu waze azanga. Kukushi mutu niumwe yoze mahasa kumukinda kuchilinga.—Roma 8:38, 39.
JIKIJILA MULI YEHOVA NI MBUNGE YESWE
17. Kuchi tunanyingika ngwetu, Satana keshi kuhasa kunongesa atu ja Yehova?
17 Mu mukanda wa Yombi, twakulilongesamo yikuma yinji yize yakutukwasa kujikijila muli Yehova ni mbunge yeswe. Twakusakwilila chinji Yehova, ha kuhona kutayiza Satana kunongesa atu ja Zambi. Kumona unji wa atu tununu livwa a tununu waze akuwayila Yehova ni ushishiko musono, chakutwaha shindakenyo ngwetu, Yehova kali Chitunda wa mu malilu ni hashi. Manguvulu akwa-ndundo, ni mangana a mayingeleja, ha yisuho yinji kakweseka kukinda atu ja Yehova kumuwayila ni kwambujola sango jipema. Alioze, ayo keshi kuhasa kuchilinga, mumu Yehova kakutukwasa. (Iza. 54:17) Chikwo nawa, ayo keshi kuhasa kutukwika kulweza akwetu ngwo, Yehova kali Zambi yamwenemwene nawa ngwo Satana kali mukwa mahuza. Chipwe lume kufwa kuchichi kuhasa kutukumba, mumu Yehova makahindwisa waze eswe akufwa ni kushishika kuli iye.—Hoze. 13:14.
18. Mumu liaka kutwatambile kwivwa woma wa yuma yize muyikalingiwa kulutwe?
18 Muze twakupukuna ha mukanda wa Yombi, twakukolesa ufulielo wetu muli Yehova ngwo, iye mapwa ku sali lietu mashimbu eswe. Kashika, chipwe mukulingiwa yeswayo kutwatambile kwivwa woma. Ha mashimbu a luyinda munene, Satana ni atu waze akumukwasa makanyonga ngwo, chili chashi kukumba atu ja Yehova. Chocho, makaalukukila. Alioze, Yehova makakalakalisa ndundo jenyi ngwe chize alingile kuli Yombi. Iye kechi katayiza Satana kunongesa atu jenyi. Mashimbu waze Yehova makahwisa lamba lieswe lize Satana akuneha kuli atu, kanakundama. Satana ni Andemoniu jenyi, makaakasa ni kwasa mu jondo ha miaka 1,000. (Luka 8:31; Uso. 20:1-3) Kusulaho, Satana ni atu eswe waze ali ku sali lienyi makaanongesa liakulu, ngwe chizechene Yehova alakenyene. (Uputu. 20:10) Hanji ngwetu, kechi kapwa ko nawa.—Uputu. 3:15; Roma 16:20.
19. Yiwape yika anashimbwila waze akujikijila muli Yehova ni mbunge yeswe? (Tala nawa chizulie.)
19 Tunashimbwila chifuchi chaha. Mu chifuchi chaha, mutukapwa ni mwono ungunu ni uwahililo wamwenemwene. Mwono mukapwa upema chinji kuhiana chize twakunyonga. Yehova kanalakenya ngwenyi: “Tala ngunalingi yuma yeswe yaha.” (Uso. 21:5) Maliji wano yika analumbunuka? Kanalumbunuka ngwo, Satana ni andemoniu jenyi, kechi kapwako nawa hanga amwese atu lamba ni kwatwala kulinga yuma yipi. Pundu lume, muze yino muyikalingiwa, mutukapwa ni sambukila ku miaka yeswe. Kukushi kapwa nawa nilimwe tangwa lize mutukahona kuya tulo mumu lia kusakalala ni yuma yipi ya mu chifuchi chino. Waze makalilamwina ha Armagedone, makamona yikomokeso yinji. Waze apwile ni kuyiza, makawuka misongo yo. Atu twazanga waze hanafu, makaahindwisa. Yetu mutukapwa ni mwono wa uwahililo, uze Tata yetu wa mu malilu azangile hanga tupwe nawo chize ku uputukilo.
Yehova makawahisa tuvumbi twenyi ashishika eswe a ku mashimbu akunyima waze anyongonwene mu yipikalo (Tala paragrafu 19)
20. Yika tunazange kulinga?
20 Ha matangwa wano akusula, mutupalika mu yipikalo yinji. Alioze twatamba kupwa ni hamu, mba tununge kushishika kuli Yehova. Kashika, tunungenu ni kujikijila muli Yehova ni mbunge yeswe ni kwononokena Wanangana wenyi. Tunazange kununga ni kusolola ngwetu, twakuzanga Tata yetu wa mu malilu Yehova, ni kusolola nawa ngwo, yize Satana ambile hali Yehova ni tuvumbi twenyi, yili ya mahuza. Mutuhasa kupwa ni shindakenyo ngwetu, nyi twanunga ni kushishika kuli Yehova, Chitunda wa mu malilu ni hashi, mutukapwa ni mwono upema kulutwe lia matangwa, mumu Yehova kanazange kuwahisa tuvumbi twenyi ashishika, nawa kali ni ndundo ja kuchilinga.
MWASO 153 Ngwehe Hamu