Obadia—Te Kakuvwila Zambi Woma

Obadia kapwile ni kukalakala ngwe kaselo ku zuwo lia Mwanangana mupi Ahabe, yoze wechele hanga uwayilo wa mahuza wa Mbale ulitande mu Izalele. Ewa, Obadia kapwile ni kuvwila Yehova woma ‘chize ku wanuke wenyi.’ (1 Mia. 18:1-13) Kashika, muze Obadia anyingikine ngwenyi mwazovu Jezebele katumine kushiha aprofeta eswe ja Yehova, Obadia kawashi-washi yahamuka, yalinga yimwe hanga aakwase. Kusweka chipwe lume profeta umuwika, chapwile ponde yinene. Alioze Obadia kahashile kusweka aprofeta 100 ni kwaha kulia ha mashimbu jacho a zala yinji. Tuchinyongenu ha chize chapwile chikalu kulinga mulimo uno, chakuhona kumumona kuli tununu twa aprofeta a mahuza waze apwile ni kukalakalila mwanangana ni mwazovu.—1 Mia. 18:19.

Yika mutuhasa kulilongesa kuli lunga yono wapwile ni kuvwila Zambi woma? Kwamba umwenemwene, Obadia te kakuvwila woma Ahabe, alioze woma uze te akuvwila Zambi wapwile unji chinji. Kashika, woma wacho wamukwashile kulamwina mandumbu jenyi chipwe ngwe mwono wenyi wapwile mu ponde. Nyi uwayilo wetu uli wakukanjisa kuze twatwama, ni yetu tunafupu kuvwila woma Zambi ngwe chize alingile Obadia. Mumu woma wacho muutwaha tachi hanga tukwase mandumbu jetu a mapwo ni a malunga waze mapwa mu ponde.