Upale Wa Zambi Uka Hali Yetu?

NYI watanga papilo lia sango, watala yizulie ha televizau, hanji wapanjika chisaji, muwivwa sango jinji hakutwala ku utoji, jita ni upupilo. Kota chipwe yena mwene unamono lamba linji ku mwono we ha mukunda wa yikola hanji kufwa cha mutu yoze te wazanga chinji.

Achilihule ngwe:

• Shina yino ye te Zambi anazange hali yami ni asoko jami?

• Kulihi munguhasa kuwana ukwaso hanga ngukumbe yipikalo yami?

• Shina hashi muheza kapwa kama sambukila?

Mbimbiliya yakukumbulula kanawa yihula yino.

MBIMBILIYA YAKULONGESA NGWO ZAMBI MAKALINGA YUMA YIPEMA CHINJI HANO HASHI.

• Atu kechi kevwa yikola, kushinakajiwa hanji kufwa.—Usolwelo 21:4

• “Chilema masamba ngwe kapaji.”—Izaia 35:6

• “Meso ja tupuputa malaula.”—Izaia 35:5

• Afu kumakahindwisa.—Yoano 5:28, 29

• Niumwe makayiza wakuhi.—Izaia 33:24

• Atu eswe waze makatwama hano hashi makapwa ni kulia chinji.—Samu 72:16

  

YUKA HA YIZE MBIMBILIYA YAKULONGESA

Kanda umona ngwe yuma yize watanga ha mafwo atangu a mukanda uno yili wika yilota. Mumu Zambi hanalakenya ngwo kwasala hakehe hanga alinge yuma yacho hano hashi, nawa Mbimbiliya yinalumbununa chize iye makayilinga.

Mbimbiliya yakulongesa nawa yuma yikwo. Yakutulweza yuma yize twatamba kunyingika hanga tupwe ni chiseke chamwenemwene ni kuwahilila ku mwono haliapwila. Achinyonga ha yuma yize yakukupikalisa. Yipikalo yacho muyihasa kupwa, kuhona cha mbongo, yipikalo mu usoko, yikola hanji kufwa cha yoze wazanga. Mbimbiliya muyihasa kukukwasa kukumba yipikalo yino, ni kukutamisa ha kukumbulula yihula ngwe ai:

• Mumu liaka twakumona lamba?

• Kuchi mutuhasa kukumba yipikalo yetu?

• Shina usoko wetu muuhasa kupwa ni uwahililo?

• Yika yakulingiwa kuli mutu nyi hafwa?

• Shina mutukamona nawa masepa ni asoko jetu waze hanafu?

• Kuchi mutuhasa kupwa ni ushindakenyo ngwetu Zambi makamanununa yuma yeswe yize iye hanalakenya?

Kutanga mukanda uno chinalumbunuka ngwo unazange kunyingika yize Mbimbiliya yakulongesa. Mukanda uno muukukwasa chinji. Paragrafu jeswe jili ni yihula yize muyikukwasa kunyingika kanawa Mbimbiliya. Atu anji kakuwahilila chinji kulilongesa Mbimbiliya ni Yela ja Yehova. Tunafuliela ngwetu ni yena muzanga kulilongesa no. Zambi mahasa kukuwahisa hanga unyingike yize Mbimbiliya muyihasa kukulongesa!