Shina Yino ye te Zambi Anazange Hali Yetu?

NYI watanga papilo lia sango, watala yizulie ha televizau, hanji wapanjika chisaji, muwivwa sango jinji hakutwala ku utoji, jita nyi upupilo! Nawa achinyonga ha yipikalo ye. Yikola hanji kufwa cha yoze wazanga chakuneha yinyengo yinji. Ena hanji muhasa kwivwa ngwe chize evwile Yombi, lunga wa ululi, yoze wambile ngwenyi, “nakuzala nyi sonyi ha kutala luyinda wami.”—Yombi 10:15.

Muhasa kulihula ngwe:

• Shina yino ye te Zambi anazange hali yami nyi atu akwo?

• Kulihi munguhasa kuwana ukwaso hanga ngukumbe yipikalo yami?

• Hashi muheza kapwa sambukila limwe tangwa, nyi?

Mbimbiliya yakukumbulula kanawa yihula yino.

MBIMBILIYA YAKULONGESA NGWO ZAMBI MAKAHWISA LAMBA LIESWE HANO HASHI.

“Iye makakusumuna masoji eswe ku meso jo. Kufwa kuchichi kapwa ko nawa; kukuchi kapwa nawa kunenganyana, chipwe miteto, chipwe yikola, ka; mumu yuma yitangu hiyinahu.”—Usolwelo 21:4

“Chilema masamba ngwe kapaji.” —Izaia 35:6

“Meso ja tupuputa malaula.” —Izaia 35:5

“Waze eswe ali mu mafuka . . . makatuhuka.”—Yoano 5:28, 29

“Nyiumwe watungako mamba ngwenyi: ‘Ngunayiji.’”—Izaia 33:24

“Kumukukapwa kulumbama cha mbuto mu mavu.”—Masamu 72:16

YUKA HA YIZE MBIMBILIYA YAKULONGESA

Kanda ulengulula yilakenyo yize twamona ha mafwo waze twahichika ngwe yili yangwanza. Zambi hanalakenya kulinga yuma yacho, nawa Mbimbiliya yinalumbununa chize iye makayilinga.

Mbimbiliya yakulongesa nawa yuma yikwo. Yakulumbununa chize mutuhasa kupwa nyi uwahililo haliapwila. Achinyonga ha yipikalo ye nyi lamba lie. Yipikalo yacho muyihasa kupwa, kuhona cha mbongo, yipikalo mu usoko, yikola hanji kufwa cha yoze wazanga. Mbimbiliya muyihasa kukukwasa kukumba yipikalo ye, nyi kuhuzulula mbunge ye ha kukumbulula yihula ai:

• Mumu liaka twakumona lamba?

• Kuchi mutuhasa kukumba yipikalo yetu?

• Kuchi mutuhasa kupwa nyi uwahililo mu usoko?

• Nyi mutu hafwa shina kakuya kumwe kuma?

• Shina mutukamona nawa masepa nyi asoko jetu waze hanafu?

• Kuchi mutuhasa kupwa nyi ushindakenyo ngwo Zambi makamanuna yilakenyo yenyi?

Kutanga mukanda uno chinalumbunuka ngwo unazange kunyingika yize Mbimbiliya yakulongesa. Mukanda uno muukukwasa. Mushi lia mafwo eswe muli yihula yize yinalita nyi malongeso waze ali mu maparagrafu jacho. Atu anji waze akulilongesa Mbimbiliya nyi Yela ja Yehova kakuzanga chinji mutapu wa longeso lia yihula nyi kumbululo. Tunafuliela ngwetu nyi yena muuzanga. Muhasa nawa kupwa nyi yiwape ya Zambi nyi kwivwa chiseke ha kunyingika yize chamwenemwene Mbimbiliya yakulongesa!