Gitabangan Mi ni Jehova sa Paghimog Maalamong mga Desisyon

Natawo ko niadtong 1952 sa Karlovy Vary,a usa ka lungsod sa kasadpang bahin sa kanhing Czechoslovakia, nga duol sa border sa Germany. Ako ug ang akong magulang nga lalaki nga si Milan gidaogdaog sa eskuwelahan kay German mi. Tungod niini, ang among pamilya mibalhin sa Frankfurt, Germany niadtong 1966.

Mga Saksi ni Jehova ang akong mga ginikanan niadtong bata pa kaayo ko, pero gitangtang sila sa kongregasyon niadtong gamay pa ko. Tungod niini, nagdako ko nga walay espirituwal nga mga tumong.

Sa ngadtongadto, ang akong mga ginikanan mibalik sa pag-alagad kang Jehova. Dugang pa, malipayong gidawat ni Milan ang kamatuoran ug gibawtismohan siya sa usa ka kombensiyon sa Hannover. Niadtong panahona, 15 anyos ko ug nakadesisyon pod ko nga magpabawtismo niadtong adlawa! Pero wala madugay human sa akong bawtismo, gihangyo nako ang akong mga ginikanan nga mobalhin ko sa Berlin, diin mieskuwela kog art.

Samtang nag-eskuwela kog art, naay duha ka pangutana sa akong hunahuna nga gusto nakong matubag: Naa bay Maglalalang? ug Ang Bibliya pulong ba gyod sa Diyos? Sa among mga art class, nakita nako nga ang komplikadong mga detalye sa usa ka painting ug ang kanindot niini, wala ra gyod kon ikompara sa kanindot sa gikopyahan niini diha sa kinaiyahan. Busa nakaingon ko nga kon naay naghimo sa mga painting, naa poy naghimo sa kinaiyahan diin gikopya ang mga painting!

Ang akong ikaduhang pangutana natubag pinaagi sa pag-research kon sa unsang paagi gipamatud-an sa karaang kasaysayan nga natuman ang mga tagna sa Bibliya kaniadto. Anam-anam nakong napamatud-an nga ang Bibliya mao gyod ang Pulong sa Diyos.—1 Tesalonica 2:13.

Gawas pa sa pag-research, pirme kong makig-estorya sa usa ka ansiyano nga naningkamot sa pagtabang nako. Anam-anam nga milig-on ang akong pagtuo kang Jehova, ug nahimo na lang ikaduha sa akong kinabuhi ang art. Niadtong 1972, gihimo nako ang usa sa pinakamaayong mga desisyon sa akong kinabuhi dihang nagpayunir ko sa Berlin. Sa primero, nagplano ko nga tulo ka bulan ra kong magpayunir.

Pag-alagad Kang Jehova sa Ubang Lugar

Ang pagpayunir sa Berlin lisod kaayo. Ang maayong balita gisangyaw niining siyudara sa halos 100 na ka tuig, pero morag wala kaayoy interesado. Busa para nako milagro kaayo nga naa koy nasugdan ug pagtuon sa Bibliya! Tungod adto, mas kombinsido na ko nga makasangyaw ko bisag asa uban sa tabang ni Jehova, maong nagpadayon ko sa pagpayunir.

Paglabayg mga usa ka tuig, gipangutana ko sa sangang buhatan kon andam ba kong mokat-on sa pinulongan nga Serbo-Croatianb aron sangyawan ang mga taga-Yugoslavia nga nagtrabaho sa Germany. Malipayon nakong gidawat ang asaynment ug wala madugay giasayn ko sa Frankfurt. Nagkat-on ko didtog Serbo-Croatian kauban ni Hans ug Sonja Smode, nga bag-o lang mi-graduate sa Gilead School. Human mi mag-uban ug tulo ka bulan, giasayn ko ingong espesyal payunir sa Stuttgart. Sa misunod nga duha ka tuig, gikan sa 1973 hangtod 1975, kadaghan kong mibalhin ug lima ang nahimo nakong partner sa pag-espesyal payunir.

Sa ngadtongadto, naasayn ko sa Serbo-Croatian nga grupo sa Karlsruhe. Didto, nailaila nako ang akong makauban sa tibuok nakong kinabuhi—usa ka kugihan kaayong espesyal payunir nga si Lenka. Wala madugay, nahigugma na ko niya, ug nagminyo mi. Dayon pagka-1978, giasayn ko nga magdumala sa Yugoslavian nga sirkito.

Usa ka Lisod nga Desisyon

Sulod sa mga 10 ka tuig, gibisita namo ang mga grupo ug ang tanang kongregasyon sa tibuok Europe. Nag-enjoy mi ani nga asaynment, pero kadugayan naapektohan mi pag-ayo niini. Dihang si Lenka nakaeksperyensiyag grabeng kakapoy, nagtuo siya nga tungod to kay kulang ang iyang pagtuo, maong gipugos niya ang iyang kaugalingon nga mohimo pag dugang. Dili to maalamon, pero wala pod mi mahibalo kon unsay angayng himoon. Busa kinasingkasing ming nag-ampo kang Jehova aron giyahan mi.

Gitubag ang among mga pag-ampo dihang mikonsulta mig doktor. Sa buotan nga paagi, iya ming gipasabot nga kinahanglan namong ilhon nga naa mi pisikal ug emosyonal nga mga limitasyon. (Miqueas 6:8) Naamgohan namo nga kinahanglan ming moundang sa sirkitong buluhaton, pero lisod kaayo tong dawaton. Nakig-estorya mi sa eksperyensiyadong mga overseer sa Bethel bahin sa among kahimtang. Wala gyod mi magdahom sa ilang sugyot nga magpadayon mi sa among bug-os panahong pag-alagad ingong mga translator sa Serbo-Croatian nga pinulongan didto sa sangang buhatan sa Austria. Kini nga kausaban nakatabang kang Lenka nga anam-anam nga maulian sa iyang kahimtang. Gitabangan mi ni Jehova pinaagi sa mga igsoon nga naghatag namog maalamong tambag, ug tungod niana nalikayan namo ang paghimog dili maalamong desisyon.—Proverbio 15:22.

Paghimog Lisod nga mga Desisyon Panahon sa Gubat

Human mi mag-alagad ni Lenka sa Vienna sulod sa duha ka tuig, gibalhin mi sa sangang buhatan sa Zagreb, Croatia, nga mao ang nagdumala sa buluhaton sa kanhing Yugoslavia. Bisag lainlaig kultura ug relihiyon ang kadaghanan sa mga taga-Yugoslavia, malinawon sila. Pero nausab ni dihang nagsugod ang gubat niadtong 1991. Pipila ka bulan una pa ang gubat, ang among Country Committee nangandam para sa internasyonal nga kombensiyon nga tambongan sa mga Saksi gikan sa tanang bahin sa Yugoslavia.

Dihang nagsugod ang gubat, ang mga brader sa Country Committee nag-ampo, naghisgot bahin sa kahimtang, ug nakadesisyon nga ipadayon ang pagpangandam para sa kombensiyon. Nakigtinabangay pod mi sa lokal nga mga awtoridad aron mapaneguro ang seguridad sa among mga bisita gikan sa laing nasod. Nalipay kaayo mi nga lima ka membro sa Nagamandong Lawas ang mitambong! Ang programa sa kombensiyon mao gyod ang gikinahanglan sa mga igsoon.

Mga usa ka tuig gikan sa pagsugod sa gubat, ang Country Committee nakadawat ug mga report nga ang mga igsoon sa Sarajevo ug ubang bahin sa Bosnia hapit nang mahutdan ug pagkaon, sugnod, ug tambal. Ang ilang mga lungsod giatake sa mga sundalo sa Serbia, ug walay makahatod nilag hinabang. Nag-ampo mi ug nangayog giya kang Jehova aron mahibalo mi kon unsay angay namong buhaton sa pagtabang sa mga igsoon.

Gitabangan mi sa sangang buhatan sa Austria aron maorganisar ang pagpanghatag ug hinabang bisag peligroso kaayo ning himoon. Niadtong Oktubre 26, 1993, ang mga trak gikan sa Vienna nagdalag 16 ka toneladang hinabang para sa mga igsoon sa Bosnia.c

Dihang miagi mi sa lugar diin nagakahitabo ang gubat, naeksperyensiyahan namo nga ang kamot ni Jehova “dili mubo” ug gitabangan gyod mi niya. (Isaias 59:1) Dili gyod namo malimtan ang among peligrosong biyahe gikan sa Zenica paingon sa Sarajevo. Pero dihang 40 kilometros (25 ka milya) na lang ang among gilay-on gikan sa Sarajevo, kinahanglan ming moagi sa lasang, nga tungod niana nadugangan ug 140 kilometros (90 ka milya) ang among biyahe.

Dihang duol na gyod mi sa Sarajevo, mihangyo ko nga makig-estorya sa komander, nga sa ulahi nahibaloan nako nga usa diay ka heneral. Ang komander naghunahuna nga imposibleng mahatod namo ngadto sa mga igsoon ang mga hinabang. Pero dihang nahibaloan niya nga mga Saksi ni Jehova mi, iya kong gipangutana kon nakaila ba ko kang Hajrudin. Ako siyang giingnan nga ang maong brader among higala. Ang komander miingon: “Higala pod nako siya. Parehas mig eskuwelahan sa una. Sukad nga nahimo siyang Saksi, mas nakadayeg ko niya.”

Ang komander daghag pangutana bahin sa among tinuohan. Human niana, iya ming gitugotan nga gamiton ang secret tunnel aron mahatod ang mga hinabang ngadto sa mga igsoon sa Sarajevo. Iya pa ganing gipahunong ang paghatod ug mga suplay para sa mga sundalo sulod sa duha ka gabii aron ang mga sundalo makatabang sa pagdala sa among mga hinabang agi sa tunnel. Gipas-an sa mga sundalo ang mga package nga ang kada usa mga 27 ka kilo ang gibug-aton. Dili namo ni mahimo kon wala mi nila tabangi!

Sa pikas nga tumoy sa tunnel, gitabangan sa mga sundalo ang mga brader sa pagdala sa maong mga package ngadto sa luwas nga lugar ug sa pag-apod-apod sa pagkaon ngadto sa mga igsoon ug sa ilang mga silingan. Natandog pag-ayo ang mga dili Saksi nga nakadawat ug hinabang ug tungod niana miluhod sila uban sa mga igsoon ug nagpasalamat kang Jehova diha sa pag-ampo.—2 Corinto 9:13.

Daghang higayon nga ang among neyutralidad nakapanalipod namo dihang miagi mi sa mga checkpoint sa sundalo. Kinahanglan ming magsul-ob ug lapel card aron ipaila nga mga Saksi ni Jehova mi. Pero ang pagkahimong neyutral mas labaw pa kay sa pagsul-ob lang ug lapel card. Kinahanglan ming magpabiling neyutral diha sa among hunahuna ug pagbati. Maong nakadesisyon mi nga menosan ang pagpaminaw sa mga balita, kay ang makahahadlok nga mga report sa nagkontrahay nga partido makaapektar namo ug posibleng magpihigpihig mi ug dumtan o dapigan ang usa ka partido.

Sukad sa katuigan sa 1990, nag-alagad ko ingong membro sa Komite sa Sangang Buhatan sa Croatia ug dayon sa sangang buhatan sa Czech-Slovak. Naa koy mga nakat-onan bahin sa paghimog desisyon diha sa akong lainlaing asaynment. Puwedeng gamiton ni Jehova si bisan kinsa—bisan ang komander sa mga sundalo—aron tabangan ta sa atong mga problema! Nakat-onan pod nako nga dili ko angayng mosalig sa akong kaugalingong eksperyensiya, pero kinahanglang mosalig ko sa giya ni Jehova pinaagi sa iyang organisasyon.

Pag-atubang ug Wala Damhang Sakit

Dihang nagpa-checkup ko niadtong 2023, nadayagnos ko ug grabeng klase sa kanser. Wala ko sukad makasulay ug grabeng sakit, maong nahadlok ug nabalaka mi pag-ayo. Balikbalik ming nangayog tabang kang Jehova aron makahimog maalamong mga desisyon, ug milihok mi ni Lenka uyon sa among pag-ampo. Nag-research mi ug mikonsultag mga doktor. Dihang nakadesisyon na mi kon unsang klase sa pagtambal ang akong dawaton, mas mibati mig kalinaw.

Naningkamot pod mi nga dili ra kaayo mabalaka kon unsay mahitabo sa sunod adlaw. (Mateo 6:34) Daghan kaayo mig rason nga magpabiling positibo! Pananglitan, dihang miadto mi sa Germany aron magpatambal, nagpadala mig sulat bahin sa among bag-ong kahimtang ngadto sa pamilyang Bethel sa Bratislava, Slovakia. Nakadawat mig daghang mensahe gikan sa among minahal nga mga higala, nga nag-ampo para namo ug nagpasalig namo nga ila ming gimahal. Si Jehova magpalig-on nato pinaagi sa atong mga igsoon ug iya tang hatagan sa kalinaw “nga labaw sa tanang pagsabot.”—Filipos 4:7.

Ang tinuod, wala ta mahibalo kon kanus-a ta makaatubang ug makamatayng sakit o bisan gani kamatayon. (Ecclesiastes 9:11; Santiago 4:14) Maong mapasalamaton ko kang Jehova nga iya kong gitabangan niadtong bata pa kaayo ko sa paghimog maalamong desisyon nga alagaron siya ug ihatag ang akong pinakamaayo. Kini ang nakahatag nakog makahuloganon kaayo nga kinabuhi.d