Nakita Nako nga Dili Gyod Mubo ang Kamot ni Jehova

Katuigan sa ulahi, samtang didto si Papa sa balay sa among paryente, naa siyay naestorya nga Estudyante sa Bibliya, nga mao ang tawag sa mga Saksi ni Jehova kaniadto. Gideretso siyag pangutana ni Papa: “Puwede ba nimong i-explain ang Trinidad?” Ang Estudyante sa Bibliya miingon: “Dili ko ka-explain ana.” Mitubag si Papa: “Daan pa lagi ko nga lisod gyod ning i-explain.” Ang lalaki miingon: “Dili ko ka-explain sa Trinidad kay wala na sa Bibliya.” Tibuok gabii silang nag-estorya, ug pagkabuntag mideretso si Papa sa trabaho bisag walay tulog.

Human mabasa ni Papa ang mga libro nga gihatag sa Estudyante sa Bibliya, nakombinsir si Papa nga nakita na niya ang kamatuoran. Sa ulahi naminyo si Papa, ug sa ngadtongadto, siya ug ang akong mama nga si Kathryn nabawtismohan. Gitudloan ko nila nga higugmaon si Jehova, ug nabawtismohan ko niadtong 1945 sa hapit na kong mag-nuybe anyos.

Gipadapat Nako ang Tambag sa Akong Ginikanan

Kas-a, giingnan ko ni Papa: “Kon dunay ipahimo nga bag-o para nimo sa pag-alagad kang Jehova, ayaw gyod pag-ingon, ‘Dili ko kamao ana.’ Hinuon angay kang moingon, ‘Sige andam kong mokat-on ug himoon gyod nako ang akong maarangan.’ Tabangan ka ni Jehova ug dili gyod mubo ang iyang kamot.” (Numeros 11:23) Maayo gyong sulondan ang akong ginikanan kay giuna nila ang ministeryo diha sa ilang kinabuhi. Pananglitan, mibalhin sila sa Oklahoma diin nanginahanglan ug mga magmamantala. Ang ilang maayong ehemplo nagdasig nako nga mosulod pod sa bug-os panahong pag-alagad. Pagka-1956, nagsugod ko sa pag-alagad ingong payunir.

Gisunod pod nako ang tambag sa akong ginikanan bahin sa pagpili ug pangasaw-onon. Ila kong gidasig nga mas maayong pilion kadtong nag-alagad kang Jehova. Usa ka adlaw, giingnan ko sa akong papa: “Kon naa kay uyab, ipailaila siya sa imong mama. Kon ganahan siya sa imong uyab, dakog purohan nga magmalipayon mo. Pero kon dili gani, hunahuna ni pag-ayo.” Wala kaayo magustohi ni Mama ang una nakong gipailaila niya. Pero ganahan kaayo siya ni Arlene.

Si Arlene mibalhin ug puyo sa lugar nga duol sa Kingdom Hall. Siya nagtrabaho ingong tig-atiman sa mga tigulang. Dako tog tabang aron masuportahan ang iyang kaugalingon. Gigamit gyod niya ang iyang panahon ug kusog sa pag-alagad kang Jehova ug nahimo siyang dasig nga payunir. Pagka-1959, nagminyo mi ni Arlene. Suod kaayo sila ni Mama. Gani kon naa mi dili pagsinabtanay, mas dapigan pa ni Mama si Arlene!

Naapresyar kaayo nako si Arlene sa iyang pagkaandam mo-adjust sa pagsangyaw sa maayong balita. Pananglitan, dihay higayon nga giasayn mi ni Arlene sa dili kaayo masangyawan nga teritoryo sa Kansas. Naglisod mig pangitag kasak-an, maong nagtaod ra mig gamayng tent nga igo lang gyod namong duha. Nag-tent mi sa campsite pero kinahanglang dili mi molapas ug lima ka adlaw. Dihang giingnan namo ang manedyer sa campsite kon nganong naa mi sa Kansas ug unsay among ginahimo dinhi, siya miingon: “Walay problema, okey ra gyod kaayo nga magdugay mo diri.” Dili gyod to namo malimtan!

Nag-Gilead ug Giasayn sa Brazil

Usa ka adlaw, nakadawat mi ug application para sa Gilead School. Natingala mi kay wala man mi mangayo ug application. Aw, mora na man pod mig mga misyonaryo kay nagpuyo mi sa tent. Busa nakahunahuna mi nga pil-apan ang application para sa Gilead ug mahimong tinuod nga mga misyonaryo. Wala madugay, nakadawat mig imbitasyon nga moeskuwela sa ika-38 nga klase sa Gilead. Mi-graduate mi niadtong Nobyembre 1963, ug giasayn mi sa Brazil.

Pag-abot namo sa Brazil niadtong 1964, puno na ang mga missionary home. Busa gihangyo mi nga didto lang usa mi sa sangang buhatan sa Rio de Janeiro ug mag-alagad ingong mga misyonaryo sa mga teritoryo nga duol sa sangang buhatan. Pero lisod kaayo para namo ang pagtuon sa ilang pinulongan. Sa unang bulan namo sa Brazil, halos kada adlaw ming magtuon ug Portuguese sulod sa 11 ka oras. Pero pagkasunod bulan, tunga sa adlaw na lang ming magtuon ug Portuguese aron naa pa mi panahon sa pagsangyaw. Dihang gisulayan nakog gamit ang maong pinulongan, dihay mga panahon nga nahilaw kaayo ko. Pananglitan, dihang nagsangyaw mi, giingnan mi sa tagbalay nga bag-o lang siya namatyag bana. Pero dili kaayo mi segurado sa iyang giingon. Busa, miingon na lang pod kog, “Maayo kay mao nay imong gibati!” Maayo na lang gani kay masinabtanon kaayo siya ug nakahibalo siya nga mga langyaw mi nga nagtuon ug Portuguese.

Nag-enjoy sa Pag-alagad sa Bethel

Human sa pipila ka bulan ingong mga misyonaryo, gihangyo ko nga motrabahog usa ka adlaw kada semana sa Bethel Printery. Human sa usa ka tuig sukad nga miabot mi sa Brazil, nakadawat mig bag-ong asaynment ug giasayn mi sa Bethel. Nagtrabaho ko sa maintenance shop ug sa housekeeping pod si Arlene. Sa tinuod lang, dili kaayo ko eksayted nga giasayn mi sa Bethel. Ganahan kaayo mi sa field ug nagdahom mi nga makaalagad sa sirkitong buluhaton. Bisan pa ana, gidawat namo ang maong asaynment ug sa ngadtongadto na-enjoy ra namo ang among pag-alagad sa Bethel. Human sa pipila ka tuig, gibalhin ang sangang buhatan sa São Paulo.

Sulod sa daghang tuig, nakita gyod nako kon giunsa pagpanalangin ni Jehova ang among paningkamot nga makaimprenta ug daghang literatura nga gikinahanglan sa Brazil. Pananglitan, dihay higayon nga gihangyo ko nga mangitag dugang nga printing press. Nakakita kog segunda mano ug barato nga printing press, ug ako ning gitan-aw kon mogana pa ba ni. Gipangutana nako ang tag-iya kon nganong gibaligya ni nila. Miingon siya nga guba na ang printing press ug naay problema inig-print. Gipalit gihapon namo ang printing press kay nakita namo nga kondisyon pa kaayo ni. Sa dihang naa na sa Printery ang printing press, akong gibungkag ang dagkong mga piyesa ug gisusi kon unsa gyoy problema ani. Dayon akong nakita nga usa ra man diay ka hose ang hinungdan kon nganong dili ni mogana! Busa among giilisan ang guba nga hose, migana ang printing press, ug nagamit namo ni sulod sa daghang tuig.

Dako Kaayog Tabang ang Pag-ampo

Sa ngadtongadto, nanginahanglan mig dugang nga pasilidad para sa Printery kay paspas miuswag ang buluhatong pagsangyaw sa Brazil. Tapad sa usa sa mga bilding sa Printery, naa mi nakita nga bakanteng lote. Pero naabtan na lang mig usa ka tuig, wala gyod namo makontak ang tag-iya. Wala mi kahibalo nga layo diay kaayo ang iyang gipuy-an, halos 1,000 kilometros (621 milya) ang gilay-on gikan sa siyudad, ug wala pa gyoy signal didto.

Gitubag ang among padayong pag-ampo dihang may lalaki nga mibisita sa Bethel, ug miingon siya nga ang manedyer sa tindahan duol sa Bethel nakaila sa tag-iya sa lote. Amo dayong giestorya ang manedyer, ug miingon siya: “Kita ka anang lalaki nga nag-inom ug beer atubangan sa baligyaanan ug ilimnon? Mao na ang tag-iya sa lote.” Tayming gyod kaayo kay sa daghang tuig, mao ra pod tong adlawa nga naa siya sa lungsod! Human namo mapalit ang lote, gisugdan dayon namo ug tukod ang pasilidad.

Sa ulahi, nakadawat mig sulat gikan sa world headquarters nga padad-an mi nilag duha ka bag-ong printing press. Pero naglisod mi kay huot na ang pasilidad ug dili na masigo ang idugang nga printing press. Busa giampo na pod namo ni kang Jehova. Pagkasunod adlaw, nakita namo ang usa ka lalaki nga nagpagawas sa iyang mga printing press kay mobalhin diay siyag puwesto. Gusto niya nga ibaligya ang iyang bilding nga naa tapad sa pasilidad. Ang gidak-on sa bilding mao gyod ang among gikinahanglan aron masigo ang bag-ong mga printing press.

Pagka-1970, nagkinahanglan mi ug dakong sangang buhatan sa São Paulo. Niadtong higayona, ang Nagamandong Lawas naghatag ug instruksiyon sa Komite sa Sangang Buhatan nga mangita ug lote sa gawas sa siyudad, diin posible ming makatukod ug dugang pa nga mga bilding sa umaabot. Nakadesisyon mi nga paliton ang lote duol sa Cesário Lange nga mga 150 kilometros (90 milya) ang gilay-on gikan sa São Paulo. Gipadala namo sa Nagamandong Lawas ang mga plano sa bag-ong Printery nga among tukoron. Pero giingnan mi nila: “Gamay ra kaayo na. Kinahanglang doble ana ang gidak-on sa inyong tukoron.” Gipadalhan pod mi nila ug mga drowing sa mas dako nga Printery nga maoy among gisundog.

Nakakat-on Ko nga Magmapainubsanon

Ingong membro sa Komite sa Sangang Buhatan sa Brazil, usahay maghunahuna ko nga ang akong opinyon ang pinakamaayo. Pero dihang maghisgot mi sa uban pang membro sa komite, maamgohan nako nga naa pa diay mas maayong ideya kay sa akoa. Nakita nako nga maayo ang solusyon kon “daghan ang magtatambag.”—Proverbio 15:22.

Pananglitan, dihay higayon nga ang brader nga tighatod ug literatura giakusahan nga sakit manulti sa uban. Pagkahibalo nako sa maong hitabo, mirekomendar ko nga papaulion ang brader. Sa ulahi, nasayran nako nga wala diay ko mahibalo sa tanang detalye. Bisag lisod, gidawat nako nga nasayop ko. Gipabalik ang brader sa Bethel, diin malipayon siyang nag-alagad sa daghang tuig. Nakakat-on gyod ko ug leksiyon adto! Tinuod gyod ang giingon sa Proverbio 18:13: “Kon ang usa motubag dayon nga dili una maminaw, kabuangan kana ug makauulaw.”

Pag-abot namo ni Arlene sa Brazil niadtong 1964, mga 28,000 pa lang ang magmamantala. Pero karon, kapin na silag 926,000! Makapalipay kaayong makita nga gipapaspas ni Jehova ang buluhaton. (Isaias 60:22) Karon nga kapig 80 anyos na mi, mapasalamaton kaayo mi nga batan-on ming nagsugod sa bug-os panahong pag-alagad ug hangtod karon padayon namong gihimo ang among maarangan. Tungod ana, nakita namo nga dili gyod mubo ang kamot ni Jehova.